***

Hozircha ko'ngildan qolganimiz yo‘q,
Hozircha ko‘ngilga joylashmadik ham...
Bitta osmon osti, bitta yer usti,
Ayni havolarni ko‘ryapmiz baham.

Keyin-chi, bilmadim...
Keyinlarimiz
kutmoqning kuyiga sozlangan tormi?
Hozircha muhabbat manzillarining
Qaysi tomonida ikkimiz bormiz?

Ayni qo‘shiqqa jo‘r, o‘sha tundan mast
Shu yulduzga boqding men ham qaradim.
Bulutga aylangan yoshlarim haqqi,
Kechib ket... ko‘zlarim osmon bo‘lsa ham.

Qancha daqiqalar dorga tikildi ,
Va qancha kunlarni sovurdik ko‘kka.
Bilmaysan... to‘lishar soniya sayin,
Mayning havosini simirgan o‘pkam.

Nurtalash ufqqa termulaman jim,
Va taskin shivirlar sukut cho‘mgan dam:
"Hozircha tuyg‘ular o‘lganicha yo‘q,
Hozircha muhabbat tug‘ilmadi ham"

Keyin-chi, bilmadim...

✍️ Aziza Shokirova