Buxoro tumani hokimligi

Afg‘on urushi faxriylari uchun bayram tadbiri tashkil etildi

15-fevral – Sovet qo‘shinlari Afg‘onistondan olib chiqilganiga 36 yil to‘ldi. Ushbu sana munosabati bilan tuman hokimligi tashabbusi bilan urush faxriylari uchun “Oqshom” to‘yxonasida bayram tadbiri tashkil etildi.

Bayram tadbirda so’z olgan tuman hokimi Anvarjon Ochilov Afg‘onistonda chorak asrcha davom etgan o‘zaro urushlarga barham berish uchun sobiq ittifoq armiyasi safida safarbar qilingan, murakkab sharoitlarda jang-u jadallarda qatnashib, omon qaytgan faxriylar uchun 15 fevral – sobiq ittifoq qo‘shinlari olib chiqib ketilgan sana chinakkam bayram ekanligini ta’kidladi hamda ularni bayram bilan tabrikladi. Sana munosabati bilan har yili mamlakatimizda turli tadbirlar o‘tkazilib, sobiq afg‘onchilarga alohida hurmat-e’tibor ko‘rsatilayotganini qayd etib o‘tildi.

Turli jabhalarda ish olib borayotgan bu faxriylar tuman hokimligi tomonidan tashkil etilgan uchrashuvdan behad minnatdor bo‘lishdi. Ular bir tumanda istiqomat qilishayotgan bo‘lishsa-da, anchadan buyon bir-birlari bilan uchrasha olmagan edilar. Bugun ular diydorlashishdi. Birga Afg‘oniston Respublikasi hududida xizmat qilgan chog‘larini eslashdi. Janglarda o‘z xizmat vazifalarini mardlarcha ado etishgan, marhum quroldosh do‘stlarini xotirlashdi.

Qo‘shni Afg‘oniston hududida tinchlikni ta’minlash maqsadida bundan 46 yil avval, 1979-yil 25-dekabrda boshlangan harbiy harakat, 1989-yil 15-fevral kuni Hayraton ko‘prigi orqali qo‘shinlarimizning olib chiqib ketilishi bilan yakun topgandi. Yaqin o‘n yil davom etgan harbiy harakatlar chog‘ida bizning respublikamizdan Afg‘onistonga 65 ming nafarga yaqin kishi chaqirilgan, jangchilarning 1520 nafari halok bo‘lgan, 2,5 mingga yaqini og‘ir tan jarohatlarini olganlar.