QADRIGA YETINGQadriga yeting boʻlsa akangiz,
Qoʻlidan yetaklang, boʻlsa ukangiz.
Kun kelib, mabodo kuchdan qolsangiz,
Begonalar sari chopa olmaysiz,
Ulardan boshqani topa olmaysiz.
Boshga koʻtaring, boʻlsa singlingiz,
Shu qizcha koʻtarar bir kun koʻnglingiz,
Mudom intizordir, poylab yoʻlingiz.
Kosada luqma-oshni yuta olmaysiz,
Ulardan boshqani topa olmaysiz.
Agar yoningizda, boʻlsa opangiz,
Emaklab boring-da, poyin oʻpingiz.
Yakkayu-yagona duoguyingiz,
Bozordan boshqa bir opa olmaysiz,
Ulardan boshqani topa olmaysiz.
Yaxshi kunda qadrin biling yoringiz,
Oʻshadir nomus, oʻsha oringiz,
Tarqalib ketganda yoʻgʻu boringiz.
Koʻz yoshni oʻzgaga sepa olmaysiz,
Undan boshqasini topa olmaysiz.
Bugun shoʻx yugurgan jajji bolangiz,
Artadi kun kelib, koʻzda jolangiz,
Suykalib kelsa gar boshin silangiz.
Oʻzganing bolasin oʻpa olmaysiz.
Ulardan boshqasin topa olmaysiz.
Oh, qadriga yeting boʻlsa onangiz.
Duosini oling boʻlsa otangiz
Tuzating shu bugun boʻlsa xatongiz.
Attang eshigini yopa olmaysiz,
Ulardan boshqasin topa olmaysiz.
💌 Yaqinlarga ham ulashing
🌍 Bolalar Dunyosi