O'zingizning va yaqinlaringizning o'qishiga, bilim olishiga pulni ayamang. Uni xarajat emas, sarmoya deb biling. Sarmoyani qaysi manbaga kiritayotganingizga ham jiddiy qarang: o'qish haqida turli tomondan fikrlar oling, borib ko'ring, test darslarda qatnashing. Videokurs bo'lsa, demo qismini ko'rib, keyin xulosa qiling. Vaqt o'tishi bilan ular o'z mevasini bera boshlaydi. O'zimning misolim haqida pastda.
Ota-onam mening o'qishim uchun beminnat ko'p pul tikishgan.
- pullik bog'cha va maktab
- Toshkentdagi Vestminster universitetidagi o'qish kontrakti ($5220 * 4.5)
- turli videokurslar, o'quv kurslar uchun to'lovlar.
Bular o'z vaqtida juda katta xarajatdek tuyulgan va shunday bo'lgan ham. Lekin ularning hammasining hozirgi holatimga kela olishimga o'ziga yarasha hissasi bor. Masalan, ustozlik mahorati bo'yicha kurs (5 million so'm), HTMLAcademyda malaka oshirish uchun kursga to'lov (11 million so'mdan ko'proq), jami sotib olgan videokurslarim (kamida $500-600 atrofida).
Shu kurslar va universitetda o'qib chiqqanligim sababidan sifatli kontentni farqlay olaman, o'zim o'tadigan darslarga yuqoriroq talab qo'ya olaman. Har doim ham mo'ljal qilgan narsalarimga yetisha olmayman: vaqt, kuch, ishtiyoq, xohish yetmay qoladi. Lekin baribir ichimda "men shu narsani yanada yaxshilashim, tartiblashim mumkin", "o'quvchilarimga falon narsalarni o'rgatishga ulgurdim, lekin yana qo'shishim mumkin bo'lgan mavzular ham bor" degan narsa bo'ladi. Bardavom bo'lish nasib qilsin.
Biron narsani o'rganmoqchi bo'lsangiz, qo'lingizda pul bo'lmasa, qarz olib bo'lsa ham shu ishning ustasi bo'lishga harakatni boshlashingiz mumkin. Ba'zi holatlarda o'zining beminnat yordamini beradigan yaxshilar ham bo'ladi. O'zimda bo'lgan holat - oldingi yil kurslarimning to'lovi uchun $900 qarz so'ragandim bir yaxshi odamdan. Javoblari biroz kechikkandek tuyulib, "yana kimdan so'rab ko'rsam bo'lar ekan" deb o'ylab qoldim. Bir kuni ko'rishishga chaqirdilar. "$900 ni bir yilga qarzga olsam, o'zimning kundalik xarajatlaridan orttirib to'play ola olsam kerak. Hatto juda bir yilga bormay ham qaytara olarman. Sug'urta sifatida bir yil so'rayman" deb borgan edim. U aka $1000 ni shundayicha berib yubordilar 🤯 Mendan xursand odam yo'q. Miyamdagi holatim ham g'alati bo'lib qolgan. Na tayinli rahmat ayta olgandim, na qandaydir xursandligimni ko'rsata olgandim.
Bu postni o'sha yaxshi aka ham o'qiydilar katta ehtimol bilan. Ishonchingiz uchun sizga katta rahmat. Alloh rozi bo'lsin. Imonda bardavom qilsin.
Xullas, o'zingizga pul tiking. Vaqt o'tishi bilan postga qo'yilgan rasmdagi kabi o'sishni ko'rasiz o'zingizda, Alloh nasib qilsa.
P.S. Rasm manbasi - Andrei Terbea YouTube kanali
https://www.youtube.com/watch?v=mlAyvhc6m9o&ab_channel=AndreiTerbea ©️Muhammadjavohir Sur'atov
