Zangiota АКМ

1966 yil 7 fevralda Turkmaniston Respublikasi Toshhovuz viloyati Toza-yormish qishlog‘ida tug‘ilgan.

1983 yili Toza-yormish qishlog‘idagi 30-o‘rta maktabni bitirdi.

1984–1986 yillarda Primorye o‘lkasida harbiy xizmatda bo‘ldi.

1986 yilda ToshDU (hozirgi O‘zMU) o‘zbek filologiyasi fakultetiga o‘qishga qabul qilindi va uni 1991 yili imtiyozli diplom bilan bitirdi. Bu dargohda O. Sharafiddinov, U. Normatov, B. Qosimov, N. Xudoyberganov, L. Qayumov, I. Qo‘chqortoyev, Sh. Rahmatullayev, M. Mirtojiyev, Yo. Tojiyev, T. Solihov, M. Jo‘raboyeva kabi ulkan olimlardan tahsil oldi. Talabalik yillarida “Yoshlik”, “Sharq yulduzi” jurnallarida, “Ma’rifat”, “O‘zbekiston adabiyoti va san’ati” gazetalarida dastlabki adabiy-tanqidiy maqolalari nashr qilindi.

1991–1994 yillarda shu universitet aspiranti, 1996–1999 yillarda shu universitet doktoranti bo‘lgan.

1994–1996 yillarda o‘zbek filologiyasi fakulteti “Hozirgi o‘zbek adabiyoti” kafedrasida XX asr o‘zbek adabiyoti tarixi, o‘zbek adabiyotshunosligi va tanqidchiligi tarixi fanlari bo‘yicha ma’ruzalar o‘qigan; shuningdek, dekanning ilmiy ishlar bo‘yicha muovini, so‘ngra o‘quv ishlari bo‘yicha dekan muovini vazifalarida ishladi.

1995 yil 7 iyunda O‘zFA Alisher Navoiy nomidagi Til va adabiyot instituti qoshidagi Ixtisoslashgan kengashda “Vadud Mahmudning 20-yillar adabiy tanqidchiligidagi o‘rni” mavzusida nomzodlik (ilmiy rahbari – akademik Baxtiyor Nazarov) dissertasiyasini himoya qildi. Munaqqid Vadud Mahmudning adabiy-ilmiy faoliyatini batafsil yoritdi. Shu ilmiy tadqiqotning amaliy tatbiqi o‘laroq ushbu munaqqid faoliyatini o‘rganish oliy o‘quv yurtlari o‘quv dasturlaridan o‘rin oldi.

2002 yil 26 iyunda “XX asr o‘zbek adabiyotshunosligida talqin muammosi” (qodiriyshunoslik misolida) mavzusida doktorlik (ilmiy maslahatchi – professor Umarali Normatov) dissertasiyasini himoya qildi. Dissertasiyada tushunish, tushuntirish, talqin, tahlil, tanqid masalalari qodiriyshunoslik misolida tekshirildi. B. Karimov tadqiqotida jahon adabiyotshunosligidagi ilg‘or tadqiqot metodlaridan, jumladan, germenevtika – talqin nazariyasidan unumli foydalandi. Tadqiqot ilmiy jamoatchilikda o‘ziga xos yangicha yo‘nalishi bilan juda yaxshi taassurot qoldirdi.

2003 yil yanvaridan 2006 yil yanvariga qadar Mirzo Ulug‘bek nomidagi O‘zbekiston Milliy universiteti o‘zbek filologiyasi fakulteti dekani vazifasida ishladi. 1999 yil noyabridan 2016 yil avgustigacha shu universitetning “O‘zbek adabiyotshunosligi va adabiy aloqalar” kafedrasi mudiri lavozimida ishladi.

Hozir B. Karimov Alisher Navoiy nomidagi Toshkent davlat o‘zbek tili va adabiyoti universiteti “Adabiyot nazariyasi va zamonaviy adabiy jarayon” kafedrasi mudiri.

B. Karimov 2003–2006 yillarda O‘zMU qoshidagi filologiya fanlari doktori ilmiy darajasini olish uchun disssertasiyalar himoyasi bo‘yicha Ixtisoslashgan Kengash raisi sifatida faoliyat ko‘rsatdi.

2005 yilda akademik M. Qo‘shjonov, professor U. Normatov hamda yozuvchi Rahimjon Otayevlarning tavsiyalari bilan O‘zbekiston Yozuvchilar uyushmasi a’zoligiga qabul qilindi.

2001–2008 yillarda O‘zMU qoshida Yozuvchilar uyushmasi tashabbusi bilan tashkil etilgan Oliy adabiyot kursining o‘quv jarayonini boshqardi. Respublika markaziy-ilmiy nashrlarida chop etilgan 200 ga yaqin maqolalari, ulardagi yangicha talqinlar B. Karimovning ilmiy salohiyatini, ma’naviyat va ma’rifatga munosabatini ko‘rsatadi. Shuningdek, Turkiya, Germaniya, AQSH, Turkmaniston, Ozarbayjon, Ukrainada ham maqolalari bosilgan.

Bahodir Karimov “Jadid munaqqidi Vadud Mahmud” (1999), “Qodiriy qadri” (2003), “Yangilanish sog‘inchi” (2004), “Cho‘lpon va tanqid” (2004. matnlar), “Abdulla Qodiriy: tanqid, tahlil va talqin” (2006), “Adabiyotshunoslik metodologiyasi” (2012), “Abdulla Qodiriy va germenevtik tafakkur” (2014), “Qodiriy nasri – nafosat qasri” (2014 “O‘zbekiston”), “Ruhiyat alifbosi” (2016. Gʻafur Gʻulom nashriyoti) kabi ilmiy kitoblar muallifi.