Zafarbek Solijonov

“MO’JIZA HONEYMOON” МЧЖ раҳбари реклама қонунларини такроран бузгани учун маъмурий жавобгарликка тортилди

Январ ойининг охирида Рақобат қўмитаси Фарғона вилояти ҳудудий бошқармаси “MO’JIZA HONEYMOON” МЧЖ ўз маҳсулотининг рекламаларида гўёки беморлар шифо топаётган ҳолатларни кўрсатиб, даволаш хоссаларига эга деган таассурот уйғотишга ҳаракат қилгани учун жаримага тортилганди.

Чунки унинг маҳсулоти дори воситаси ҳисобланмайди ва уни қўллаш натижасида одамлар тузалаётганини кўрсатиш реклама қонунчилигига зид ҳисобланади.

Бундан ташқари, тадбиркор пиар учун доимий равишда турли хил домлалар, муллалардан фойдаланиб келган. Бу эса оддий инсонларни илмий текширилган дори воситалари ўрнига аслида даволаш хусусияти бўлмаган нарсаларга пул сарфлаши, замонавий тиббиётдан воз кечишига олиб келади.

Шундан кейин, МЧЖ раҳбарига ҳолатни бартараф этиш ва келгусида йўл қўймаслик юзасидан кўрсатма берилган, лекин рекламалар яна аввалги кўринишида чиқарилиши давом этган.

Бошқарма махсус комиссияси “MO’JIZA HONEYMOON” МЧЖ раҳбарига нисбатан маъмурий чора қўллашни сўраб, судга мурожаат қилган. Суднинг ҳал қилув қарори билан маъмурий жавобгарлик тайинланган.

Агарда МЧЖ раҳбари шундан кейин ҳам ўз ҳаракатларини давом эттириб, рекламада одамларни алдайдиган бўлса, у жиноий жавобгарликка тортилади.

👉 @Zafarbek_Solijonov

Коррупцияга қарши курашиш тизими халқаро стандартлар асосида такомиллаштирилади
 
Давлат раҳбарининг ташаббуси билан эндиликда йирик инвестиция лойиҳалари юқори даражадаги халқаро коррупцияга қарши курашиш стандартлари асосида баҳолаб борилади.

Бунинг учун:
- йирик инвестиция лойиҳаларини амалга оширишда халқаро коррупцияга қарши курашиш стандартлари жорий қилинади;

- коррупцион хатарларни олдини олиш мақсадида, йирик инвестиция лойиҳалари аукциони шартлари рақобатбардошлик экспертизасидан ўтказиш асосида йўлга қўйилади;  

- “Шаффоф қурилиш” платформасининг қамрови оширилиб, халқаро ташкилотлар лойиҳаларига ҳам босқичма-босқич жорий қилиш амалиёти амалга оширилади.
 
Юқоридагиларнинг барчаси, мамлакат коррупцияга қарши курашиш тизимининг яхшиланишига ёрдам беради.

Бундан ташқари, буни ортидан "Transparency International” халқаро ташкилоти томонидан эълон қилинадиган Коррупцияни қабул қилиш индексида Ўзбекистон ўрни кўтарилиши мумкин.

Албатта бу яширин иқтисодиётга барҳам берилишига ҳам яҳши таъсир қилади.
 
 👉 @Zafarbek_Solijonov

8 мартда янги фирибгарлик

Россияда фирибгарликнинг янги тури тарқаяпти. Бизгаям етиб келса керак. Ёки Рамазон ойидаям шу ном билан алдашга уринишлари мумкин.

"8 март байрами билан сизга бепул совғамиз ёки гул бор, сизга етказишимиз керак. Рақамингизга код боради, шуни айта оласизми, тасдиқлаш учун" деб алдайди. Рақамни айтсангиз тамом, пулингизни ечиб олади. Код берманг. Огоҳлантиришимизни яқинларга юбориб қўйинг.

👉 @Zafarbek_Solijonov

Бир нарса эшитиб қолдим. Ёлғонми ростми аниқ айтолмайман. Лекин жуда қизиқ.

Бир инсон бир ташкилотга ишга кирмоқчи бўлган. Ўша ташкилотдаги бир бўлим бошлиғи чиқиб, ундан ишга жойлашишга пора сўраган. Ишга жойлашмоқчи бўлган шахс органга мурожаат қилган. Тадбир бўлган. Ҳалиги пул сўраган инсон қамалган, ишдан кетган. Жойи бўшаган. Бош мутахассис бўлган бир инсон унинг ўрнига ўтирган. Унинг жойига бошқа бир мутахассис жойлашган. Мутахассиснинг ўрни бўшагач, вакант жойга ҳалиги органга хабар берган ёш инсон жойлашган.

Гўзалликми бу?)

👉 @Zafarbek_Solijonov

Охирги вақтлардаги бир қатор лавозим ўзгаришларига қараган бўлсангиз, ПА тинчгина, интригалардан ҳоли, захира кадрлар ишлайдиган жойга айлантириляпти. Қисқароқ айтсам, иккинчи ижро ҳокимиятидек ваколатларни бажармайдиган аввалги кўринишига қайтаётгандек. Улар шуни хоҳлашяпти, назаримда.

Президент атрофидан интригасевар, "конфликтный", зиддияти одамлар буткул узоқлаштириляпти. "Деньги любят тишину". Ҳаммаси оҳиста, тинчгина бўлишини исташяпти. У жойлардаги, қуйи лавозимларни билмадимку, лекин юқори жойларига жимгина топшириқларни бажарадиган, амалдаги ҳокимият, бошқарувга содиқлар қўйилишда давом этса керак. Кузатамиз.

👉 @Zafarbek_Solijonov

Иқтисодчи блогерларимиз TEMU Ўзбекистонда рўйхатдан ўтмасдан, юридик шахс ташкил этмасдан, солиқ тўламасдан бизнес қилаётгани, бу янги Ўзбекистоннинг иқтисодиёт сиёсатига зид эканини айтиб постлар ёзганди. Ҳукумат бу сафар уларнинг чақириғига бефарқ бўлмади, лаббай деди ва ўз иқтисодиёти, ички бозорини ҳимоя қилиш чораларини кўра бошлади.

Эндиликда 20 март санасидан TEMU Ўзбекистонда блокланмоқда. Ундан буюртма қилсангиз, пулингизга куйиб қолишингиз мумкин. Судма-суд юриб, уни ундиришингиз деярли иложсиз бўлиб қолади. Буюртма қилмаганингиз яхши.

Ўзи ҳозирги кунда ривожланган, ривожланаётган айрим давлатлар ўз иқтисодиёти, бозорини ҳимоя қилиш учун бир вақтлар чет давлат товарларига божни кўтариб, ўзиникиларга маҳсулоти импортида преференциялар бериб ҳимоя қилган. Япония ва унинг дзайбацулари тарихини яхши билганлар буни тушунади. Ёки бўлмаса, Тесла ҳимоясига отланиб, BYD машиналарига божни оширган АҚШ. Маълумот учун:

Индонезия ва Ветнамда TEMU аллақачон блоклангани айтилади. Туркия эса унинг маҳсулотларига 60 фоизлик бож қўйиб қўйган. Европа Иттифоқи ва АҚШ ҳам TEMUʼни чеклаш масаласини муокама қилмоқда. Бизнинг фаоллар ҳавотирини энди тушунгандекман.

Бизни бошқараётганлар ҳам ўша жамоатчилик вакилларининг талабларини ҳисобга олиб, уларни эшитиб, 20 мартдан TEMU иловага расман чеклов қўймоқда. Қонунга амал қилинг. Огоҳлантирмади деманг.

👉 @Zafarbek_Solijonov

Бугунги селектордан асосий хулоса коррупционерларга "сигнал" бериш, ўзингни ўнгла деган маънони тушундим. Яна нималар қилиш шартлиги айтилди. Коррупциявий жиноятларнинг 75 фоизи туман ва маҳаллада маиший коррупция шаклида содир этилаётгани қайд этилди. Масалан, инфратузилмага уланиш, лицензия олиш, имтиёзли кредит ажратиш, ишга қабул қилиш, малака ошириш каби йўналишларда коррупция омиллари кўп.

Терговчи, прокурор ва судьялар қўлидаги иш бўйича идораларга тақдимнома ва хусусий ажрим киритишдан нарига ўтмаётгани, уларнинг муҳокамаси ҳам, жавоби ҳам қуруқ расмиятчилик экани кўрсатиб ўтилди.

Вилоят ҳокимлари раҳбар бўлган коррупцияга қарши курашиш ҳудудий кенгашларининг иши ҳам жуда сустлиги, фаолияти туман, маҳалла билан боғланмагани учун натижа йўқлиги қайд этилди. Парламент масъул қўмиталарининг ҳам ўрни сезилмаётгани таъкидланди.

Коррупцияга қарши курашиш ҳудудий кенгашлари таркибини тўлиқ янгилаш, уларга раис этиб вилоят халқ депутатлари кенгаши раисларини тайинлаш таклиф этилди.

Ҳудудий кенгашлар инсонгача тушиб, коррупциявий омилларни аниқлаши, уларга барҳам бериш учун қайси қонунни ўзгартириш зарур, деган саволларга жавоб топиши кераклиги тушунтирилди.

Кенгашлар ҳар чоракда камида битта соҳада коррупциявий омилларни бартараф этиш, қонун устуворлиги, жазо муқаррарлигини таъминлаш бўйича Миллий кенгашга таклиф киритади. Ўзгаришлар бўлишига умидвормиз. Кузатамиз.

👉 @Zafarbek_Solijonov

Давлат хизматчиларининг даромадини декларациялаш ҳужжатида "исключение"лар кўп бўлса керак. Жуда кўп. Таҳминимча. "Исключение" киритилаверганидан Фанлар академиясининг катта илмий ходимлари қолса керак охирида, декларациялаш мажбурий бўлган. Фанлар академияси, тайёрланиш, шунча чидадик сенларга😌

👉 @Zafarbek_Solijonov

Президент мансабдорларга иномаркадан воз кечиш, миллий мошинчада юриш деди. Қани ким биринчи сотиш. Сергели бозорда иномаркалар нархи тушади шекилли😁

👉 @Zafarbek_Solijonov

Фаренгейт бўйича 451 асарида китоб ёқадиган ўт ўчирувчиларга қараб "ростанам бир вақтлар ўт ўчириш сизларнинг ишингиз бўлганми?" деб сўрашади. Бугун президент:

"Бундан буён секторлар фаолияти билан прокурор, ички ишлар ва солиқ шуғулланмайди", деди.

Энди органдагилар жиноятчилик "оловини ўчириш билан шуғулланасизлар", эсларингдан чиқмаган бўлса.

👉 @Zafarbek_Solijonov

Антикоррупция агентлиги давлат харидлари масаласида, ундан маълумотларни жамоатчиликка етказиш масаласида журналист, блогерлар билан ҳамкорликда ишласаям бўлади. Чунки уларда бор аксар маълумотлар бизда бўлмайди. Президент танқид қилганидек статист бўлишдан қутулишни хоҳласа.

👉 @Zafarbek_Solijonov

Сунъий ҚҚС "возврати"дан миллиардлар ўмарилган

Ўтган йилнинг охирида жиноят ишлари бўйича Шайхонтоҳур тумани суди Солиқ қўмитаси Йирик солиқ тўловчилар бўйича ҳудудлараро давлат солиқ инспекцияси бош инспектори Авазбек Сотволдиев ва унинг 29 нафар жиноий шеригига ҳукм чиқарди.

Гап шундаки, у ўз ваколат ва имкониятларидан фойдаланиб, ҳамтовоқлари билан ўнта МЧЖ орқали ишлаб чиқариш, экспорт билан боғлиқ сохта амалиётлар ташкил этади, бу амалиётлар бўйича ҚҚСнинг салбий фарқини давлат бюджетидан қайтариш схемаларини бажаради, қайтарилган маблағлар эса жиноий гуруҳ аъзолари ўртасида тақсимланади.

Яъни сунъий равишда ҚҚС салбий фарқи яратилиб, давлат бюджетидан миллиардлаб маблағлар олиниб, талон-торож қилинган. Қонунни уни яхши билган бузади, дейишганидек, жиноий гуруҳ аъзолари томонидан ҳужжатлар қалбакилаштирилган, "тўғри расмийлаштирилиб" тизимга киритилган, зарур бўлса, пора берилган, пора олди-бердисига воситачилик қилинган.

Жиноий иш доирасида Авазбек Сотволдиевдан ташқари яна 29 кишига айблов эълон қилинган. Улар орасида МЧЖларни ташкил этган уддабуронлар, “қўғирчоқ” директорлар, Андижон вилояти Солиқ бошқармасининг масъул ходимлари, ҳисобчилар ва бошқалар бор. Судда аниқлашича, жиноий гуруҳ хатти-ҳаракатлари натижасида қарийб 168 млрд сўмлик маблағ транспорт воситалари, кўчмас мулк, тадбиркорлик субъектлари сотиб олиш йўли билан легаллаштирилган.

Суд ҳукмига кўра, Авазбек Сотволдиев 11 йилга озодликдан маҳрум этилди. Жиноий гуруҳнинг бошқа аъзолари ҳам турли муддатларга озодликдан маҳрум этилиб, айримлари шартли жазо олган.

Жиноий гуруҳнинг асосий ташкилотчи ва ижрочилари давлатга етказилган қарийб 168 млрд сўмлик зарарни ҳам солидар тартибда қайтариши керак бўлади.

Манба

👉 @Zafarbek_Solijonov