Хоразм вилояти судлари | Расмий канал

Ижтимоий тармоқларнинг бирида эълон қилинган билдириш юзасидан

Жиноят ишлари бўйича Ҳазорасп туман судининг 2024 йил 11 сентябрдаги ҳукми билан Ш. Машариповга Жиноят кодексининг 210-моддаси 3-қисми “а” банди (жуда кўп миқдорда пора олиш) билан ЖКнинг 45-моддаси қўлланилиб 2 йил муайян ҳуқуқлардан маҳрум қилиниб, 10 йил озодликдан маҳрум қилиш жазоси тайинланган.

Жиноят иши судланувчининг адвокати томонидан берилган апелляция шикоятига асосан Хоразм вилоят суди жиноят ишлари бўйича судлов ҳайъатида кўриб чиқилиб, Ш. Машариповнинг жиноий қилмиши Жиноят кодексининг 210-моддаси 3-қисми “а” бандидан Кодекснинг 25,168-моддаси 4-қисми “а” бандига қайта квалификация қилинган. Унга мазкур модда билан Кодекснинг 45-моддаси қўлланилиб, БҲМнинг 500 баравари миқдорида жарима жазоси тайинланган ва уни қамоқда сақланган вақти тайинланган жазодан чегирилиб, тўлаш учун базавий ҳисоблаш миқдорининг 374,5 баравари миқдорида жарима жазоси қолдирилган.

Судда аниқланишича, Ш. Машарипов 2024 йил 28 февраль кунидан Қўшкўпир туман ҳокимининг қишлоқ ва сув хўжалиги масалалари бўйича ўринбосари бўлгани ҳолда, “Y.A.R.” МЧЖ мавсумий иш бошқарувчиси Д.Ш.га Қўшкўпир туманида фаолият юритувчи фермер хўжаликлари экин майдонларига томчилатиб суғориш технологияларини жорий қилиш, яъни ускуналарни сотиб олиш ва ўрнатиш бўйича шартнома тузишини ташкиллаштириш, пулларини ўз вақтида банк кредити маблағлари орқали ўтказиб беришини айтган. Бунинг эвазига тузиладиган шартномаларда томчилатиб суғориш технологиялари жорий қилинадиган ҳар бир гектар ер майдони учун 250 АҚШ долларидан 200 гектар ер майдони учун жами 53.000 AҚШ доллари талаб қилиб, Д.Ш.дан дастлаб бўнак сифатида 3.000 АҚШ долларини ва кейин таниши орқали 50.000 AҚШ долларини қўлга киритган вақтида тезкор ходимлар томонидан ушланган. Шу сабабли жиноий ҳаракатини ўзига боғлиқ бўлмаган ҳолда охирига етказа олмасдан, ўзганинг жуда кўп миқдордаги 53.000 AҚШ доллар пулларини фирибгарлик йўли билан қўлга киритишга суиқасд қилган.

Маълумки, Жиноят кодексининг 210-моддасида “пора олиш, яъни давлат органи, давлат иштирокидаги ташкилот мансабдор шахсининг ўз хизмат мавқеидан фойдаланган ҳолда содир этиши лозим ёки мумкин бўлган муайян ҳаракатни пора бераётган шахснинг манфаатларини кўзлаб бажариши ёки бажармаслиги эвазига қонунга хилоф эканлигини била туриб, моддий қимматликлар олиши ёхуд мулкий манфаатдор бўлиши” лозимлиги аниқ белгилаб қўйилган.

Шу сабабли судлов ҳайъати иш ҳолатларини қайта ўрганиб, тегишли мутахассисларнинг кўрсатувлари ва хулосаларини олган ҳолда Ш. Машариповнинг эгаллаб турган лавозими ваколатига юқоридаги ҳаракатларни бажариш кирмаслигини аниқлаган. Натижада суд ҳукмини ўзгартириб, унинг қилмишини пора олиш эмас, балки фирибгарлик дея қайта малакалаб, қонун доирасида жазо тайинлагани маълум қилинади.

Каналга уланиш: @Xorazmviloyatisudlari