Migratsiya agentligi

🇰🇷Жанубий Кореянинг Улсан шаҳрига тўғридан-тўғри ишчи жалб қилиш лойиҳасининг амалий қисми бошланиш арафасида

Жорий йлнинг 30 ноябрь куни Миграция агентлиги директори ва Корея Республикаси делегацияси ўртасида бўлиб ўтган учрашувда бошланғич даврда “Hyundai Heavy Industries” компанияси учун 350 нафар ишчини мамлакатимиздан жалб қилиш бўйича келишувга эришилган эди.

Бу гал, Миграция агентлиги директори ўринбосари Азим Ҳусанов, Корея Республикаси бандлик ва меҳнат вазирлиги Инсон ресурсларини ривжлантириш (HRD Korea) минтақавий бўлими бошлиғи Park Jin Young ва Кореянинг Ўзбекистондаги элчихонаси биринчи котиби Jo Hyun Hae хоним ушбу лойиҳа деталллари ҳақида гаплашиб олди.

Таъкидландики, “Hyundai Heavy Industries” компаниясига борадиган 350 нафар ишчининг 100 нафари Е-7 (махсус малакага эга бўлган ишчи) визаси асосида тўғридан-тўғри Улсан шаҳар ҳокимлиги таклифига кўра ишга жойлаштирилади.

Ушбу лойиҳа Кореянинг “Бандликка рухсат бериш тизими”даги 16 давлат орасида биринчилардан бўлиб Ўзбекистон билан йўлга қўйилмоқда.

Агарда бу ердан борадиган ишчилар Корея қонунчилигини бузмаса, ўзларидан яхши таасурот қолдирса, Е-9 визаси тизимидаги катта ўзгаришларга сабаб бўлади, дейилди мулоқотда.

@uzmigration

Туркиянинг "Ant Yapi" холдинги Россиядаги лойиҳалари учун ишчи кучини Ўзбекистондан жалб қилмоқчи

Вазирлар Маҳкамаси ҳузиридаги Миграция агентлиги раҳбарияти Туркиянинг йирик қурилиш компанияси асосчиси Hayri Tokman билан учрашув ўтказди.

Холдинг асосчисининг таъкидлашича, бугунги кунда "Ant Yapi" компаниясида 20 000 га яқин юртдошимиз фаолият олиб боради. Миграция агентлигида бўлиб ўтган учрашувда яна 2000 нафар қурилиш мутахассисига талаб борлигини маълум қилди. Шунингдек, бепул авиачипта, ётоқ жой, яшаш манзилига рўйхатга қўйиш, 3 маҳал иссиқ овқат ва яхши маош кафолатланишини билдирди.

Агентлик мутасаддилари ушбу таклифни маъқуллади ва хорижда ишлаш истагидаги юртдошларимизни иш берувчи талаби асосида тайёрлашга келишиб олди.

@uzmigration

Россияда имтиҳонларни қаерларда топшириш мумкин?

Россия Федерацияси Ҳукумати Фармойиши билан (10 декабря 2024 г. N 3641-р) ушбу мамлакатда меҳнат фаолиятини олиб бормоқчи бўлган чет эл фуқаролари рус тили, Россия тарихи ва миграция қонунчилиги бўйича имтиҳонлар топширадиган давлат муассасалари рўйхати тасдиқланди.

🔖 Рўйхатга жами 92 та муассаса киритилган. Уларнинг номи, жойлашув манзилларини ушбу ҳавола орқали кўриш мумкин.

Бунга қадар имтиҳонларни Россия Олий таълим вазирлиги томонидан аккредитация қилинган таълим муассасалари амалга оширган.

@uzmigration

Кафилни “кафансиз" қолдирманг!

Охирги вақтларда Корея Республикасига вақтинча ишлаш учун борган фуқароларимиз орасида ўз иш жойини сабабсиз ташлаб кетиш ҳолатлари учраётгани, бу Ўзбекистонга ажратиладиган ишчи квоталар сонига жиддий таъсир кўрсатиши, мамлакатимиздан борган ишчиларнинг имиджи тушиб кетишига сабаб бўлаётгани ҳақида хабарлар бериб бораяпмиз.

Шу боис, Кореяга ишлаш учун бораётган ҳар бир юртдошимиз кетиш олдидан уч томонлама шартномага имзо чекмоқда. Шартномада:

"Агарда ўз иш жойимни сабабсиз ташлаб кетиб, нолегал фаолият юритадиган бўлсам, мени кафилликка олаётган шахс, яъни яқин қариндошимдан Кореяда нолегал юрган ҳар бир ойим учун 2000 АҚШ долларидан (ҳозирги вақтда) жарима ундирилишига розиман",

-деган жумлалар бор.

Ушбу расмда Кореяга ишлаш мақсадида кетган ва шартнома шартларини бузган қашқадарёлик фуқаро М.Анинг кафилидан суд қарорига асосан МИБ 70 392 000 сўм ундирганини кўриш мумкин.

Рақамларга қарайдиган бўлсак, жорий йилнинг ўтган даврида ўз иш жойини сабабсиз ташлаб кетган қарийб 80 нафар ҳамюртимизнинг кафиллари томонидан давлатга 2 млрд 35 миллион сўм жарима ундирилган.

Қочиб кетишдан олдин ўйлаб кўринг!

@uzmigration

🇷🇺Миграция агентлиги салоҳиятли иш берувчилар билан ҳамкорликни кенгайтиришда давом этади

Вазирлар Маҳкамаси ҳузуридаги Миграция агентлиги Россиянинг яна 3 та йирик иш берувчи компания вакиллари билан учрашув ўтказди.

Хусусан, мулоқотда “Профрезерв” компаниялар гуруҳининг Красноярскдаги қурилиш объектларида 2 500 нафар ишчига талаб борлиги айтилди. Бугунги кунда компанияда 800 нафардан ортиқ ўзбекистонлик фаолият олиб бормоқда.

“Legalons” аутсорсинг компанияси билан эса Агентлик кўмагида 2025 йилнинг бошида омборхона, қадоқлаш, етказиб бериш ва савдо-сотиқ каби малака талаб қилмайдиган йўналишларда 600 нафар юртдошимизни иш билан таъминлашга келишилди. Ҳозирда 200 дан ортиқ фуқароларимиз бу компанияда муносиб меҳнат шароитларида яхши даромад топмоқда.

"Rencons Heavy Industries" вакили ҳам 3 567 нафар Ўзбекистон фуқароси уларда меҳнат қилаётгани ва яна қурилиш соҳасига 2 500 нафар мутахассисга эҳтиёж борлигини билдирди.

Шунингдек, ҳар бир иш берувчи ўзларидаги иш ўринлари, яшаш ва ишлаш шароитларини тақдимотини ўтказди.

Учрашув якунида, таклиф этилаётган иш ўринларида фаолият олиб бориш истагини билдирган юртдошларимизни иш берувчилар талаблари асосида тайёрлаш ва узоқ муддатли ҳамкорлик лойиҳаларини тузишга келишилди.

@uzmigration

🇺🇿🇷🇺Юқори маошли 1750 та иш ўрнига келишилди

Миграция агентлиги раҳбарияти Россиянинг 3 та йирик, қурилиш, кемасозлик компаниялари вакиллари билан учрашув ўтказди.

Хусусан, мулоқотда “СтройПромТорг” компаниялар гуруҳининг Амур, Санкт-Петербург ҳамда Ялтадаги қурилиш объектларида 200 нафардан ортиқ ўзбекистонлик фаолият олиб бораётгани, яна 300 нафар ишчига талаб борлиги айтилди.

“Строй Актив” қурилиш компаниясида 100 дан ортиқ юртдошимиз меҳнат қилмоқда. Учрашувда мазкур компания Агентлик кўмагида 2025 йилнинг бошида яна 600 нафар қурувчини мамлакатимиздан жалб қилишга келишиб олди.

Кемасозлик компанияси вакили ҳам ҳозирда 825 нафар Ўзбекистон фуқароси уларда меҳнат қилаётгани ва яна кемасозлик қурилиши бўйича 850 нафар мутахассисга эҳтиёжи борлигини билдирди.

Ҳар бир иш берувчи қурилиш объекти, иш ўринларини тақдимот қилди. Миграция агентлиги раҳбарияти Ўзбекистондан борадиган ишчиларнинг меҳнат ва яшаш шароитларини намунадагидек ташкил қилиш лозимлигини таъкидлади. Компания вакиллари барча шароитларни яратиб беришга тайёр эканликларини билдирди.

@uzmigration