𝗨𝘇𝗗𝗲𝘂𝘁𝘀𝗰𝗵𝗹𝗮𝗻𝗱

#Ramazon_Muborak

Hayit ayyomingiz muborak bo'lsin aziz musulmonlar. Alloh qilgan solih amallarimizni qabul qilsin va gunohlarimizni kechirsin🤲

#Ramazon_Paket

Bismillahir Rohmanir Rohiim. Kanalni bir necha yildan beri kuzatayotgan obunachilarimiz har yili Ramazon oyida muhtoj oilalarga qiladigan ehsonlarimiz haqida xabari bo'lsa kerak. Turkiyada zilzila bo'lgan vaqtda shundan talofat ko'rganlarga birgalikda yordam bergan edik. Kanalga yangi qo'shilganlar uchun ma'lumot o'rnida bu yil ham Ramazon uchun paketlarni yig'ishni boshlaganimizni aytib o'tmoqchiman.

Bu safar G'azoga ham yordam berishga imkon topildi alhamdulillah. Germaniyada yashayotgan Falastinliklar orqali G'azodagilar bilan kontakt o'rnatdik hamda aloqada bo'lib turibmiz. Nima uchun aynan G'azoga yordam berayotganimiz va G'azodagi musulmonlar holati haqida ko'p gapirishga xojat bo'lmasa kerak.

Rasmda ko'rinib turganidek bitta ramazon paketining narxi 25€.

Yig'ilgan pullar 100% holatda muhtojlarga yetkazib beriladi, hech qanday transaktionsgebühr, bearbeitungsgebühr yoki shunga o'xshash to'lovlar olib qolinmaydi. Pulni yig'ayotganlar ham, uni yetkatib berayotganlar ham faqat Allohni roziligi uchun ishlashmoqda.

Agar siz ham Ramazon oyida Ramazon paketiga o'z hissangizni qo'shmoqchi bo'lsangiz, @abu_umar_2024 ga aloqaga chiqsangiz bo'ladi.

#Ramazon_Muborak

Bismillahir Rohmanir Rohiim. Agar siz ushbu postni o'qiyatgan bo'lsangiz, Allohga hamdlar bo'lsinki, sizni Ramazon oyiga yetkazibdi. Ramazon - gunohlardan poklanib, Allohga yanada yaqin bo'lish oyidir. Ramazon - imkoniyatlar oyidir, bu oyda qilgan yaxshi amallarimiz uchun o'n va undan ko'p barobar savob olish imkoni bor.

Ushbu muborak oy kirib kelgani bilan barcha musulmonlarni tabriklayman. Shu qatorda avvalo o'zimga, so'ngra boshqa musulmonlarga quyidagilarni nasihat qilmoqchiman.

1⃣. Ramazon oyida duolarni, namozlarni, ibodatlarni va yaxshi amallarni ko'paytiraylik. Vaqtimizni faqat va faqat oxiratda bizga foyda keltiradigan ishlarga sarflashga harakat qilaylik. Qo'limizdan kelgancha boshqalarga yordam beraylik, xoh moliyaviy, xoh ma'naviy. Boshliq bo'lsak, qo'l ostidagilarimizga xushmuomala va kechirimlik bo'laylik, zora shu tufayli Alloh bizga kechirimlik bo'lsa.

2⃣. Yaxshilikni ko'paytirish barobarida, gunohlardan va yomon xislatlardan uzoqroq bo'laylik. Bu mavzuda Rasululloh s.a.v dan quyidagi ikki hadisni keltirib o'tmoqchiman

1. "Ro‘za dangasalik yoki faqat uxlash emas. Balki ro‘za - yomon so‘zlardan, gunohlardan va behuda ishlardan tiyilishdir."

2. "Ro‘za tutgan kishi behuda gap va yomon ishlarni qilmasin. Agar kimdir uni haqorat qilsa yoki unga qarshi jahldor bo‘lsa, u faqat 'Men ro‘zadorman' deb aytsin."

3⃣. Uyimizga ramazon shukuhini olib kiraylik. Uyimizni, ishxonamizni, ko'chamizni qo'ldan kelgancha ramazon oyiga oid bezaklar bilan bezaylik. Kichik yoshdagi farzandlarimiz bo'lsa, ular bilan birgalikda uylarni bezataylik, ular ramazon kelgani bilib, xursandchilikni his qilsin.

4⃣. O'zimiz uchun alohida maqsad qo'yaylik.
Ushbu ramazonda yangi ilmlarga va yangi fazilatlarga ega bo'lishga yoki yomon xislatlardan qutulishga harakat qiling.
Misol uchun, tasavvufni o'rganing, ramazondan keyin ushbu mavzuda chuqur bilimlarga erishgan bo'ling. Yoki islom tarixini o'rganing, ramazondan keyin yaqinlaringizga islom tarixidan dars beradigan darajaga yeting. Siyratni o'rganing, kelajakda farzandlaringizga Rasululloh haqida har kuni aytib beradigan darajada. Payg'ambarlar tarixi, Sahobalar tarixi haqida o'rganing. Qur'on o'qishni bilmasangiz, Qur'on o'qishni o'rganing. Farzandlaringizga boshqalar emas, aynan o'zingiz Qur'on o'qishni o'rgating. "Men shu ramazonda Allohning izni bilan shu ishni albatta qilaman, shu maqsadga albatta erishaman" deb qat'iy qaror qiling.

Yomon xislatlardan shu tarzda qutilishga harakat qilaylik. Sigaret cheksangiz, ushbu ramazonda u odatdan qutilib chiqishga harakat qiling. Namoz o'qimasangiz, Ramazonda va undan keyin namoz o'quvchilardan bo'lishni so'rab duo qiling. Hijobsiz bo'lsangiz, Allohdan sizga hijobni nasib qilishini so'rang.

Eng muhimi, ramazondan keyingi iymonimiz ramazondan oldingi iymonimizdan yuksakroq, ramazondan keyingi amallarimiz ramazondan oldingi amallarimizdan ko'proq va ramazondan keyingi gunohlarimiz esa ramazondan oldingi gunohlarimizdan kamroq bo'lsin.

Alloh barchamizni isloh qilsin, gunohlarimizni mag'firat qilsin.

Ramazon muborak bo'lsin aziz musulmonlar❗️

#Siyosat
#Saylov_natijasi

23-fevral kuni Germaniyada Bundestag (Parlament) uchun saylovlar bo'lib o'tdi. Saylov natijasiga ko'ra Friedrich Merz boshchiligidagi CDU/CSU partiyasi eng ko'p ovoz to'pladi. Ular 28,52% bilan parlamentda 208 ta joyga ega chiqqan bo'lsa, Alice Weidel boshchiligidagi AfD 20,8% ovoz bilan 152 ta o'ringa ega bo'ldi. Amaldagi kansler Olaf Scholzning SPD partiyasi esa o'z tarixidagi eng yomon natijani ko'rsatdi va bor yo'g'i 16% hamda parlamentda 120 ta joyga ega chiqdi xalos. Keyingi o'rinda yashillar (11% va 85 ta o'rin) va Die Linke (8,7% va 64 ta o'rin) partiyalari egalladi.

-Endi nima bo'ladi?

-Germaniyada boshqaruvchi hukumat (Regierung) parlamentdagi joylarning eng kamida 50% + 1 tasini egallashi kerak. Hozirda parlamentda 630 ta joy bor. Hukumat esa shulardan 316 tasini egallashi kerak. Aks holda ular amalda davlatni boshqara olmaydi.

CDU/CSU da hozirda 208 ta joy bor. Ular hukumatni boshqarishi uchun boshqa partiyalar bilan Koalitsiya tuzishga majbur bo'ladi. Merz hech qachon AfD bilan koalitsiya tuzilmasligini aytib o'tdi. Yashillar bilan ham koalitsiya tuzish ehtimoli ancha uzoq, chunki Klimani himoya qilish borasidagi o'lchovlarning chegarasi haqida kelisha olishmayabdi.

Demak, Merz boshchiligidagi hukumat yana SPD bilan birga ishlashga majbur bo'lmoqda. Ikkala partiya birgalikda Parlamentda 328 ta joyga ega bo'ladi, bu esa boshqaruvchi hukumat bo'lish uchun kifoya qiladi. Germaniyaning uzoq yillik Kansleri Angela Merkel (CDU) ham asosan SPD bilan hamkorlikda ish qilgan edi.

-Ikkala partiya boshqaruvga keladigan bo'lsa, biz kabi migrantlar uchun nimalar o'zgarishi mumkin?

-Hozircha hech qanday katta o'zgarishlar kutilmayabdi. Migratsiyadagi asosiy o'zgarishlar qochoqlar va Germaniyada noqonuniy yashayotganlar uchun kutilyabdi. CDU saylovoldi dasturlarda noqonuniy yashayotgan migrantlarni tezroq deport qilishini aytib o'tgandi.
Fuqarolik masalasidagi qoidalar ham boshqattan ko'rib chiqilishi mumkin, chunki CDU ikki fuqarolikka ruhsat berilgan paytda bunga norozilik bildirgandi.

Albatta, muhim yangiliklar bo'lsa kanalda yozib borishga harakat qilamiz. Kanaldan uzoqlashmang.

@uzDeutschland

#Saylov

Bugun Germaniyada Bundestag uchun saylovlar bo'lib o'tdi. Hozirda ovoz berish natijalari hisoblab chiqilmoqda.

Hozirgi prognozlarga ko'ra CDU/CSU partiyasi yetakchilik qilmoqda.

Yakuniy natijalar rasman e'lon qilinganda kanalda yana ma'lumot beraman.

#Krankenversicherung.

Bismillahir Rohmanir Rohim. So'ngi kunlarda Germaniyada ishlayotgan joyidan chiqib ketganidan so'ng, Krankenversicherung (sog'lik sug'urtasi) bilan muammoga duch kelayotgan yurtdoshlarimiz haqida bir nechta xabarlar o'qidim. Shu sababdan, Krankenversicherung haqida ba'zi muhim ma'lumotlarni yozishga qaror qildim.

1️⃣. Germaniyada siz har doim sug'urtalangan bo'lishga majbursiz. Ya'ni agar siz ishdan chiqib ketsangiz (Kündigung) yoki ish beruvchi sizni ishdan chiqarib yuborsa ham, siz sug'urtangizni yo'qotmaysiz. Misol uchun, ish beruvchi sizni 28.02.2025 kunidan boshlab Kündigung qildi va ijtimoiy sug'urtadan abmelden bo'ldingiz. Siz shu holatda ham 1-martdan boshlab sug'urtalangan bo'lib qolaverasiz. Bu degani siz ishsiz yurgan vaqtingizda ham sug'urta uchun pul to'lanishi shart.

2️⃣. Ishsiz vaqtingizda sug'urta uchun pulni kim to'lashi kerakligi bu sizning ishsiz vaqtingizda davlatdan pul olasizmi yoki yo'qmi, shunga bog'liq. Misol uchun:

1. Agar siz ishsiz qolgan vaqtingiz uchun Arbeitslosengeld 1 olsangiz, u holda Agentur für Arbeit siz uchun sug'urta pulini to'lab beradi. Kimlar Arbeitslosengeld 1 olishi mumkinligi haqida bu yerda batafsil yozganman.

2. Agar siz ishsiz vaqtingizda, Bürgergeld (oldingi Arbeitslosengeld 2) olsangiz, u holda sug'urta uchun pul Jobcenter tomonidan to'lab beriladi. Agar Elternzeitda bo'lsangiz, sug'urtaga pul to'lashingiz shart emas.

3. Agar siz davlatdan hech qanday yordam puli olmasangiz, u holda sug'urta uchun pulni o'zingiz to'lashingiz lozim. Agar to'lamasangiz, qarz yoziladi va baribir majburan to'latishadi.

3️⃣. Agar o'zingiz pul to'lasangiz, qancha miqdorda to'lashingiz kerakligi sizning daromadingizga bog'liq. "Iye, ishsiz qolgan bo'lsam, hech qanday daromadim bo'lmaydiku" deyishingiz mumkin. Ammo yurtdoshlarimiz bilan muammo aynan shu borada bo'lgan. Nazariy jihatdan oladigan bo'lsak, siz ishsiz qolgan vaqtingizda ham selbständig tarzda ishlab, ko'p pul topishingiz mumkin. Shuning uchun, agar siz ishsiz qolganingizdan keyin Krankenversicherungga ishsiz vaqtingizda hech qanday daromadga ega bo'lmasligingizni ko'rsatib bermasangiz, Krankenversicherung sizni juda ko'p pul topyabdi deb hisoblaydi va eng yuqori summani to'lashingiz kerakligini aytadi. Hozirgi kunda, bu bir oy uchun 1100€ dan yuqori. Ya'ni 4 oy ishsiz qolsangiz va o'sha vaqtda qancha daromad qilishingizni Krankenversicherungga aytmasangiz, 4400€ dan ko'p qarz kelishi mumkin.

Agar siz Krankenversicherungga ishsiz yurgan vaqtingizda, hech qanday daromad qilmasligingizni ko'rsatib bersangiz, u holda Mindesbeitrag to'lashingiz kerak bo'ladi. Bu bir oy uchun 250€ atrofida. "Hech qanday daromad qilmasam, buni Krankenversicherungga qanday isbotlayman?" deb so'rashingiz mumkin. Buni yo'li oddiy, yozma ravishda "Eidesstattliche Versicherung" yozib bersangiz bo'ldi.

4️⃣. "Mindesbeitrag ham qimmat ekan, buni boshqa yo'li bormi" deb so'rayotgan bo'lishingiz mumkin. Men ishsiz qolgan vaqtimda (2018-yil, til kursida edim), Mawistadan oyiga 35€ sug'urta qildirganman. AOKka keyin o'sha sug'urtani jo'natganman. Shundan keyin AOK menga hech qanday Rechnung jo'natmagan. Lekin bu sizda ham o'xshaydi deb kafolat berolmayman. Mawistaga o'xshagan sug'urtalarda ishsiz qolganlar uchun tarif narxi hozir qancha ekanligidan ham xabarim yo'q,

5️⃣. Yuqorida yozilgan ma'lumotlar, siz bir oydan ortiq vaqt mobaynida ishsiz qoladigan holatlar uchun. Ya'ni agar siz 1 oy ichida yangi ish topa olsangiz, u holda sug'urtaga hech qanday pul to'lash shart emas. Misol uchun, siz 28.02.2025 dan Kündigung oldingiz, 01.04.2025 dan yangi ishni boshlaysiz. Bu holatda mart oyi uchun tekinga sug'urta bo'lasiz.

6️⃣. Ishsiz qolishingizni bilgan zahotingiz, sug'urta bilan telefon orqali bog'lanib, vaziyatni tushuntiring. Hujjat jo'natish kerak bo'lsa, xat orqali jo'nating (+Einschreiben).

Ushbu postni yaqinda ishsiz qoladigan tanishingizga jo'natib qo'ying😁

@uzDeutschland

#Ukrainadan_kelganlar

2022-yil Ukrainadagi urush tufayli Ukrainadan🇺🇦 Germaniyaga🇩🇪 kelgan o'zbeklar uchun ma'lumotlar:

1️⃣. Ukraina fuqaroligiga yoki ukrainada doimiy yashash huquqiga (безстроковий дозвіл на проживання) ega bo'lganlar 2026-yil 4-martgacha bemalol Germaniyada ishlab, o'qib yurishlari mumkin.

2️⃣. Germaniyaga kelishidan oldin Ukrainada faqat vaqtinchalik yashash ruhsatnomasiga (misol uchun, ishchi vizasi, talabalik vizasi va hkz) ega bo'lganlar Germaniyada faqatgina 2025-yil 5-martgacha hozirgi vizalari (24§ AufenthG) bilan qolishlari mumkin. Ushbu sanadan so'ng ular Germaniyada noqonuniy yashayotgan hisoblanadi.

-Endi nima qilish mumkin?

-Vizani boshqa turdagi vizaga o'zgartirish mumkin. Misol uchun, hozirgi statusni talabalik vizasiga, Ausbildungga yoki ishchi vizasiga almashtirsangiz bo'ladi. Ammo harakatni tezroq boshlang, aks holda keyinchalik muammo bo'lishi mumkin.

3️⃣. Germaniyada qochoq maqomi olish uchun ariza (Asylantrag) topshirish ham to'g'ri yo'l emas. Chunki, agar siz O'zbekistonda siyosiy yoki diniy sabab bilan qidiruvda ekanligingizni isbotlab berolmasangiz, u holda sizga qochoq maqomi berilmaydi. O'zbekistonda hech qanday urush bo'layotgani yo'q, alhamdulillah.

4️⃣. Hozirgi kunda O'zbekistonga borishni reja qilgan bo'lsangiz, bormay turganingiz ma'qul. Avval vizangizni statusini o'zgartirib, keyin borish maqsadga muvofiq.

Ushbu ma'lumotlarni Ukrainadan Germaniyaga kelgan tanishlaringizga jo'natib qo'ying, balki foydasi tegar.😁

@uzDeutschland

#Deutsche_Post

Bir yurtdoshimiz 2024-yil iyul oyida menga Germaniyaning boshqa shahridan pochta orqali hujjat jo'natgan edi. Oradan 7 oy o'tib bugun hujjat yetib kelibdi😄

(Bu hujjatni biz allaqachon boshqattan tayyorlab, ishlarni ham hal qilib olgandik alhamdulillah).

Pastdagi rasmda Deutsche Postning xatlarni saralash va jo'natish markazi. Ba'zi holatlarda xatlar shu rasmdagi mashinalarning tagiga yoki boshqa ko'rinmaydigan joyga tushib ketadi. Shuni hisobiga xatlar o'z vaqtida egalariga yetkazib berilmaydi.

Ba'zi yurtdoshlarimiz diplom yoki shunga o'xshash kerakli hujjatlarni pochta orqali jo'natilganda yo'qotib qo'yganini eshitgandim. Bugungi post orqali o'sha yurtdoshlarimizga "umidingizni so'ndirmang" demoqchiman, balki hujjatlaringiz endi yetib kelar😄

#Online_Visa

2025-yil 1-yanvardan boshlab Germaniyaga kelishni xohlovchilar viza uchun hujjatlarni elchixonaga bormasdan, online tarzda topshirishlari mumkin bo'ladi. Hozirda 28 turdagi vizalarga online hujjat topshirish mumkin, jumladan ishchi vizasi, talabalik, Ausbildung, oila birlashtirish va shu kabi milliy vizalarga hujjat topshirish mumkin.

-Endi elchixonaga borishni xojati bo'lmaydimi?

-Afsuski, garchi siz online hujjat topshirsangiz ham, elchixonaga borishga majbursiz. Chunki, barmoq izlarini online topshira olmaysiz, shaxsan borishingiz talab etiladi. Bundan tashqari, mabodo elchixona hodimi siz bilan suhbat qilmoqchi bo'lsa ham, barmoq izi topshirish davomida suhbat qilishi mumkin bo'ladi.

-Jarayon qanday kechadi?

-Hozirgi ma'lumotlarga ko'ra, siz hujjatlarni online topshirasiz. Qaysi hujjatlarni topshirishingiz kerakligini sayt sizga ko'rsatib beradi. Hujjatlarni topshirganingizdan so'ng, elchixona hodimi hujjatlaringizni tekshirib chiqadi, agar bironta hujjatda kamchilik bo'lsa, sizga portal orqali xabar qoldirishadi. Hujjatlar to'liq bo'lganda, barmoq izi topshirish uchun elchixonaga borasiz. Buning uchun elchixonadan termin belgilashingiz kerak bo'ladi.

-Viza olish endi tezlashadimi?

-Shunday, elchixonalar ham endilikda Ausländerbehordelar bilan online aloqa qilishlari mumkin bo'ladi. Undan tashqari, hujjatlarida kamchiligi bor odamlarning soni kamaygani hisobiga, konsul ham vizalarni tezda-tezda berib tashlaydi😃

-Online ariza uchun qo'shimcha to'lov bormi?

-Bu haqida hech narsa yozilmagan, faqat viza uchun to'lov qilinsa yetadi menimcha.

-Hujjatlarni qaysi saytda online topshirsa bo'ladi?

-Mana bu yerda.

Shunaqa gaplar. Yana yangi ma'lumotlar chiqsa, sizlar bilan baham ko'ramiz inshaallah.

@uzDeutschland