Соғлиқни сақлаш вазирлиги | Вакцина – ягона чора!

​❗️Тадқиқот: Стресс саратон касаллигини келтириб чиқариши мумкин

🔎 Шифокорлар тез-тез такрорлайдиган бир муҳим тавсия бор: "Сизга асабийлашиш мумкин эмас!". Бунинг сабабини ЖССТ қуйидаги хулосаси орқали яққол ифодалаган. Яъни бугун инсоният ҳаётига таҳдид солувчи беш асосий хавфли омилдан бири — стресс!

🩺 Руҳий зўриқиш, ортиқча асабийлашиш ва депрессия кўплаб касалликларни келтириб чиқариши маълум. АҚШнинг "Колд-Спринг-Харбор" лабораторияси олимлари ўтказган тадқиқот давомида эса стресс ва саратон касаллиги ўртасидаги боғлиқлик топилди.

🫀 Маълум бўлишича, стрессли вазиятларда организмда бир қатор гормонлар фаоллашуви кузатилади. Шулардан асосийси — адреналин. У туфайли юрак уриши тезлашиб, қон босими кўтарилади ва танада қўшимча энергия ҳосил бўлади.

📈 Худди шундай руҳий ҳолат кортизол гормони ишлаб чиқарилишини ҳам фаоллаштиради. Оқибатда қон таркибида қанд миқдори меъёрдан ошади. Ўз навбатида, таҳдид йўқолиши билан гормонлар яна нормал ҳолатига қайтади.

📌 Бироқ агар инсон доимо стресс остида ҳаёт кечирса ёки тез-тез депрессияга тушса, юқоридаги гормонлар барча органлар фаолиятига салбий таъсир кўрсата бошлайди ва бора-бора турли хавфли касалликларни қўзғатади.

🔬 Хусусан, АҚШ олимлари ўтказган тадқиқот давомида сурункали стресс саратон ҳужайраларини пайдо қилиши аниқланди. Яъни руҳий тушкун ҳолатимизда қон таркибидаги нейтрофиллар тананинг ўсимталарга мойиллигини оширувчи ёпишқоқ тузилмалар ҳосил қилади.

‼️ Олимлар хулосасига кўра, ушбу тадқиқот онкологик касалликларни даволашга доир янги усуллар ва самарали стратегик ёндашувларни ишлаб чиқишда қўл келиши мумкин.

Соғлиқни сақлаш вазирлиги
Матбуот хизмати.

@ssvuz | @ssvmatbuotkotibi | Facebook | Instagram

❗️TIHE 2024 — тиббиёт ривожи учун инновацион майдон

✅ Бугун “O‘zekspomarkaz” да Соғлиқни сақлаш вазирлиги ҳамда бошқа қатор вазирлик ва агентликлар ҳамкорлигида “Соғлиқни сақлаш — TIHE 2024” 28-Тошкент халқаро тиббиёт кўргазмаси ўз ишини бошлади.

🔹 Ушбу анъанавий кўргазмада замонавий асбоб-ускуналар, технологиялар, илғор даволаш ва диагностика усуллари тақдим этилмоқда.

🌐 “TIHE 2024”да рекорд миқдордаги экспонентлар рўйхатга олинган бўлиб, кўргазма бирданига 4 та павильонда бўлиб ўтмоқда. Унда 21 мамлакатдан 310 та компания иштирок этяпти. Уларнинг 154 таси Хитой компанияларидир.

📊 Бу йил доимий иштирокчилар билан бир қаторда АҚШ, Корея Республикаси, Италия, Германия, Туркия, Миср каби давлатлардан дебютантлар ҳам мавжуд бўлиб, улар қатнашчилар умумий сонининг 54 фоизини ташкил этади.

🔬 Компаниялар ташриф буюрувчиларга лаборатория, клиника ва шифохоналар учун замонавий ечимлар, диагностика ва даволаш учун тиббий асбоб-ускуналарнинг кенг ассортименти, тегишли маҳсулотлар, стоматологик амалиёт ускуналари ва фармацевтика соҳасидаги янги ишланмаларни тақдим этмоқда.

📑 Кўргазма доирасида илмий-амалий семинарлар ўтказилиб, унда болалар саломатлиги, гинекология ва акушерлик, косметология, онкология, травматология ва ортопедия соҳасидаги мутахассислар мулоқоти ташкиллаштирилади.

💊 Бу йилги кўргазманинг асосий тенденцияларидан бири маҳаллий фармацевтика ишлаб чиқариш тармоғини ривожлантириш ва қўллаб-қувватлашга, шунингдек, бу йўналишдаги саноатда илғор технологияларни жорий этишга қаратилган. Алоҳида павильонда 13 мамлакатдан 60 дан ортиқ компаниялар бу соҳа учун энг сўнгги ишланмалар, ускуналар, хом ашё ва технологиялар, тайёр дори-дармонларни тақдим этмоқда.

🟢 Кўргазмада 50 дан ортиқ маҳаллий компаниялар соғлиқни сақлаш соҳасидаги ютуқлари ва янгиликларини намойиш этмоқда, бу эса уларнинг чет эллик иштирокчилар билан рақобатлашишга лойиқ эканлигидан далолат. Улар стоматология ускуналари, шифохоналар ва клиникалар учун мебел ва жиҳозлар, дори-дармонлар, тоза хоналар, фармацевтика, диагностика, офтальмология, физиотерапия ва реабилитация, лаборатория, рентген ускуналари кабиларни намойиш эмоқда. Маҳаллий компаниялар сонининг кўпайиши маҳсулот сифатининг юқори даражаси ва ушбу компанияларнинг жаҳон миқёсида ўз манфаатларини муваффақиятли ҳимоя қилиш қобилиятидан дарак беради.

❗️Соғлиқни сақлаш вазири вазифасини бажарувчиси Асилбек Худаяров кўргазмада бўлиб, маҳаллий ишлаб чиқарувчилар фаолияти билан танишди, уларнинг хорижий компаниялар билан ҳамкорлик ўрнатишини ҳамда шу орқали хорижга экспорт салоҳияти оширилишини қўллаб-қувватлади. Юртимизда тиббиёт муассасаларининг моддий-техник базаси ва кадрлар салоҳиятини мустаҳкамлаш, касалликларни ташхислаш ва даволашнинг илғор усулларини кенг жорий этишга катта эътибор қаратилаётганини таъкидлади.

🗓 Кўргазма 18 апрелгача давом этади.

Соғлиқни сақлаш вазирлиги
Матбуот хизмати.

@ssvuz | @ssvmatbuotkotibi | Facebook | Instagram

❓Диабет олди ҳолатни даволаш учун нималарга амал қилиш керак?

📌 Диабет олди ҳолат — бу инсон организмида углевод алмашинувининг эрта бузилиши бўлиб, нормал аҳвол ва қандли диабет ўртасидаги оралиқ ҳолатдир.

💬 Севара Фахрутдинова,
тиббиёт фанлари доктори:

Агар турмуш тарзи ўзгартирилмаса, 70 фоиз беморларда диабет олди ҳолат 3 йилдан 10 йилгача бўлган давр ичида қандли диабетга ўтади. Илмий тадқиқотларга кўра, диабет олди ҳолатда ўз вақтида тайинланган даво муолажалари, парҳез ва соғлом турмуш тарзи 58 фоиз ҳолларда қандли диабет ривожланишининг олдини олади.

‼️ Диабет олди ҳолатни даволаш учун қуйидаги тавсияларга амал қилиш лозим:

🏃‍♂️ 1. Жисмоний фаоллик. Ҳар куни 30-60 дақиқа, ҳафтасига камида 5 маротаба 2-3 км (5000 қадам) пиёда юриш, зинадан тепага чиқиш, велосипед ҳайдаш, рақсга тушиш, сузиш.

🥗 2. Тўғри ва меъёрда овқатланиш. Оқсиллар, шу жумладан ўсимлик оқсиллари, клетчаткага бой бўлган сабзавотларни кўпроқ истеъмол қилиш, овқатда калория миқдорини суткасига 1500 ккал гача қисқартириш, углеводлар, яъни ширинликлар, фаст-фуд, газланган ичимликларни камайтириш, ёғ истеъмолини озиқ-овқат умумий калориясидан 30-35 фоизгача чеклаш.

🛌 3. Кун тартибини тўғри ташкил этиш. Нотўғри уйқу режими қондаги қанд миқдорига таъсир қилиши, бу эса иштаҳанинг ошиши ва вазн ортишига олиб келиши мумкин. Суткасига ўртача 7-8 соат ухлаш тавсия этилади.

🚬 4. Зарарли одатлардан воз кечиш. Тамаки чекишни ташлаш, спиртли ичимликлардан воз кечиш. Ўткир алкоголь маҳсулотлари юқори калорияга эгалигини инобатга олиб, семизлик, диабет олди ҳолат ёки қандли диабети бўлган инсонлар уларни истеъмол қилмасликлари керак.

❌ 5. Стресс ва зўриқишдан сақланиш. Стресс ва сурункали чарчоқ оргнизмдаги гормонал ўзгаришларга сабаб бўлиши мумкин. Бу эса қанд метаболизми билан боғлиқ турли муаммоларни келтириб чиқаради.

🧑‍⚕️ Диабет олди ҳолатни даволаш учун қандай дори воситаларини қабул қилиш лозимлиги тўғрисидаги тавсиялар аниқ ташхис қўйилгандан сўнг оилавий шифокор ёки эндокринолог томонидан берилади.

Соғлиқни сақлаш вазирлиги
Матбуот хизмати.

@ssvuz |@ssvmatbuotkotibi | Facebook | Instagram

❗️“Тез ёрдам” автомашинасига йўл берган ҳайдовчининг жаримаси бекор қилинди

🚗 Кундан кунга пойтахтимиз йўллари серқатнов бўлиб, автотранспорт воситалари ҳаракати ортиб бормоқда. Табиийки, бу ҳолат ҳайдовчилардан атрофдаги жараёнларга янада эътиборли бўлишни тақозо этади.

🚑 Айниқса, эрталабки ва кечки тиғиз пайтларда шофёрларнинг ҳар қачонгидан-да хушёр ва синчков бўлиши жуда муҳим. Боиси айни шу вақтда “Тез ёрдам” машинаси қайсидир юртдошимизнинг ҳаётини сақлаб қолиш, дардига малҳам бўлиш учун шифохонага шошаётган бўлиши мумкин.

📋 Афсуски, кўп ҳолларда баъзи ҳайдовчилар “103” автомашинаси чақирув сигналини ёқиб турса-да бунга парво қилмайди. Айрим фуқаролар эса “Тез ёрдам”га йўл берса, жарима қоғози келишидан хавфсирайди. Ваҳоланки, қонунчиликка кўра, махсус имтиёзли автомашиналарга тақиқланган белгида йўл берган шофёрлар жаримага тортилмайди.

🚦Куни кеча пойтахт кўчаларининг бирида ана шундай ҳолат кузатилди. Ҳайдовчи Чилонзор тумани Катта Ҳирмонтепа кўчаси 48-уй қаршисида светофорнинг тақиқловчи қизил чироғида ўзининг “Cobalt” русумли автомобилида тўхтаб турган пайт ортдан келган “Тез ёрдам” автомашинасига қоидани бузиб бўлса-да йўл берган.

📄Орадан икки кун ўтгач, унинг яшаш манзилига жарима қоғози борган.

— Махсус база орқали текширилганда ушбу фуқаро ўз автотранспорт воситасида светофорнинг тақиқловчи қизил чироғида тўхтаб турган вақт “Тез ёрдам” автомашинасига йўл бергани аниқланди, — дейди Тошкент шаҳар Йўл ҳаракати хавфсизлиги бошқармаси матбуот котиби Қаҳрамон Худойберганов. — Шу сабабли ҳолат ўрганилиб, ҳайдовчи қоидани бузган бўлса ҳам жарима жазоси ўрнатилган тартибда бекор қилинди. Шунингдек, ўз фуқаролик бурчини виждонан бажарган ушбу фуқаро бошқармамиз томонидан тақдирланди.

‼️ Шундай экан барча ҳайдовчилардан йўлларда доимо эътиборли бўлишларини ва махсус товушли сигналлар билан яқинлашиб келаётган имтиёзли транспорт воситаларига йўл беришларини сўраб қоламиз.

Соғлиқни сақлаш вазирлиги
Матбуот хизмати.

@ssvuz | @ssvmatbuotkotibi | Facebook | Instagram

❗️Келажак учун бугун таклиф беринг! Бефарқ бўлманг!

🔹Факт № 1. ЖССТга кўра, электрон сигареталардан фойдаланадиган ўсмирлар кейинчалик одатдаги сигареталарни икки баравар кўпроқ истеъмол қилишни бошлайдилар.

🔹Факт № 2. Юртимизда 2019 йилда ўтказилган тадқиқотларга кўра, 18-29 ёшдаги эркаклар орасида электрон сигареталарни чекиш даражаси 30-69 ёшдаги эркаклар орасидагидан икки марта кўп бўлган.

🔹Факт № 3. Тошкент шаҳар ИИББ Ҳуқуқбузарликлар профилактикаси бошқармасининг маълумотларига кўра, электрон сигареталар вояга етмаганлар ёнидан барча топилган тамаки маҳсулотларининг ўртача 8 фоизини ташкил этган.

🔴 Хавф № 1. Ёш авлод
ЖССТнинг юқорида келтирилган факти шундан далолат берадики, электрон сигареталарга ўрганган ёш авлоднинг никотинга қарамлик касаллигига дучор бўлиш хавфи юқори.

Бундан ташқари, ўсмирлик мия ривожланишида критик давр бўлиб, бу пайтда никотин уларнинг, аввало, миясига зарарли таъсир кўрсатади. Натижада хотира ва билим олиш қобилиятининг пасайиши, кучли қарамлик ва таҳликали неврозларга олиб келади.

🔴 Хавф № 2. Саломатлик
Электрон сигареталар таркибида никотин миқдори 0 мг/мл дан 66 мг/млгача ва ундан юқори бўлиши мумкин, бу эса одатий сигаретадагидан камида икки марта кўпроқ. Бундан ташкари, улардаги суюқликларда никотин миқдори турлича бўлиб, таркибида сув, пропиленгликоль, глицерин, ароматизаторлар ва бошқа бирикмалар мавжуд. Ушбу моддалар буғланиш жараёнида турли бирикмаларни ҳосил қилади ва уларнинг баъзилари ўта заҳарли ҳисобланади. Айниқса, ароматизаторлар электрон сигареталардаги моддаларнинг зарарлилик хусусиятини янада кучайтиради.

Улар инсоннинг иммун тизимига таъсир қилади. Энг ёмони, электрон сигареталарнинг саломатликка зарари ҳали охиригача ўрганилмаган ва кун сайин унинг заҳарли таъсири ҳақида янги маълумотлар аниқланмоқда.

🔴 Хавф № 3. Атроф муҳит
Мутхассисларнинг айтишича, таркибида заҳарли — қўрғошин, кадмий, симоб, никель, руҳ ва бошқа моддалар борлиги сабабли фойдаланилган электрон сигареталарни умумий чиқиндиларга қўшиб бўлмайди. Уларнинг таркибий қисмида литий-ионли батарейка (аккумулятор) бўлиб, қурилма бир марта ишлатилгандан сўнг батарейка билан бирга ташлаб юборилади. Улар бошқа маиший чиқиндиларга аралашиб кетса, аста-секин қопламаси емирила бошлайди, хавфли элементлар тупроққа, кейин ер усти ва ер ости сувларига тушади.

Батарейкалар чиқинди ёқиладиган заводга бориб қолса, заҳарли бирикмалар атмосфера ҳавосини ифлослайди.

🌐 Жаҳон тажрибаси
Электрон сигареталарни тартибга солиш бўйича жаҳон тажрибасига назар соладиган бўлсак, 34 та давлатда уларни сотиш тақиқланган.

87 давлатда электрон сигареталар айланмаси тартибга солинади, улар сарасига Ўзбекистон ҳам киради.

Франция, Бельгия, Буюк Британия, Ирландия, Германия каби Европа мамлакатлари экология учун қўшимча таҳдидлар туфайли электрон сигареталарни тақиқлаш масаласини кўриб чиқмоқда.

✅ Ўзбекистонда қонун лойиҳаси муҳокамада
Ҳозирда regulation.gov.uz сайтида юртимизнинг “Ўзбекистон Республикасининг айрим қонун ҳужжатларига тамакини ҳамда никотинни истеъмол қилиш мосламалари, электрон сигареталар ҳамда тамакини қиздириш тизимларини, шу жумладан айрим турдаги тамаки маҳсулотларининг муомаласини тақиқлаш ва жавобгарлик белгилаш бўйича ўзгартиш ва қўшимчалар киритиш тўғрисида”ги қонун лойиҳаси муҳокама қилинмоқда.

‼️ Юртимизда электрон сигареталарнинг тарқалишини чеклаш ҳар қачонгидан ҳам долзарб. Бу борада юқорида келтирилган фактлар ва хавфларни инобатга олган ҳолда келажак учун масъулиятни ҳис қилинг ва ҳавола орқали ўз таклифларингизни қолдиринг.

Соғлиқни сақлаш вазирлиги
Матбуот хизмати.

@ssvuz | @ssvmatbuotkotibi | Facebook | Instagram

❗️Болангизни “реал” ҳаётда "ушлаб қолинг"!

✅ Номофобия ҳақида бир неча бор ёзган ва мутахассисларнинг бу борадаги хулосаларини ҳам келтирган эдик.

🔶 Эслатиб ўтамиз, ХХI аср эпидемияси дея таърифланувчи номофобия касаллиги, телефонга қарамлик, ундан айрилиб қолишдан қўрқув ҳисси пайдо бўлиши билан кечади ва ҳозирда кўпроқ болалар ва ўсмирларда учрамоқда.

🛜 Ушбу фобиядан азият чекадиган инсон асабий, диққатини жамлай олмайдиган бўлиб қолиши мумкин. Шунингдек, бу ҳолат қўлида телефон бўла туриб, ундан фойдаланиш учун имкон (уяли тармоқ сигнали ёки Wi-Fi) бўлмаслиги сабабидан ҳам юзага келади.

🙇🏻‍♂️ Энг ёмони, телефондан узоқ вақт давомида бетартиб фойдаланиш инсоннинг ҳам жисмоний, ҳам руҳий саломатлигига жиддий таъсир кўрсатади. Гаджетлар қаршисида кўп вақт ўтказиш болада умуртқа поғонаси, бўйин билан боғлиқ турли хасталиклар ривожланиши хавфини ҳам туғдиради.

🤳🏻 Албатта, болаларни телефондан мутлақо айириб қўйиш ҳам нотўғри. Чунки уларнинг зарари билан бир қаторда фойдали томонлари ҳам кўп. Замонавий гаджетлар тақдим эта оладиган имкониятлар болаларга янги билим олишга ёрдам беради, уларга ўқиш жараёнида асқатади.

👨‍👩‍👧‍👦 Шунинг учун ҳам бу борада ота-оналар эътиборли бўлишлари лозим.

🏀 Профилактик мақсадларда болалар ва ўсмирларнинг телефон билан ўтказадиган вақтини қисқартиришга ҳаракат қилиш керак. Бу вақт давомида фарзадингиз билан кўпроқ биргаликда уй юмушларини бажаринг, севимли машғулотларига йўналтиринг. Натижада, бола телефонсиз ҳаёт нафақат мумкин, балки ёрқин ва ҳиссий жиҳатдан бой бўлишини англаб етади.

📱 Уйда телефонини доим ёнида олиб юрмаслиги кераклигини уқтиринг. Гаджет бир жойда тургани маъқул эканини англаб етсагина номофобия касаллигига учраш эҳтимоли камаяди.

⚖️ Дам олиш кунлари оилавий телефонни бир неча соатга ўчириб қўйиш одатини шакллантиринг. Ахир болалар катталардан ўрнак олишади. Аста-секин бу вақтни ошириб бориш мумкин.

🕰 Ижтимоий тармоқларда ўтказиладиган вақтни назорат қилинг.

🎡 Бола учун “реал” ҳаётда қизиқарли бўладиган, шу жумладан оилавий мулоқотни ўз ичига олган севимли машғулотларни топишга ҳаракат қилинг. Дам олиш кунлари биргаликда сайрлар уюштиринг.

📎 Энг асосийси, бу аввалига жуда қийин кўринса-да, болани вақтида “реал” ҳаётда “ушлаб қолиш” ва телефонга қарамлик даражасигача етиб бормаслиги учун замин ярата олишдир.

Соғлиқни сақлаш вазирлиги
Матбуот хизмати.

@ssvuz | @ssvmatbuotkotibi | Facebook | Instagram

​​​​❗️​Якунланган ҳафта давомида каналимизда эълон қилинган энг муҳим хабарлар дайжести

❓Юқори хавф гуруҳига мансуб беморларга қандай эслатмалар берилган?

📋 Бемор шифохонада даволаниш учун йўлланмани қай тартибда олади?

🥙 Бир кунда неча маҳал ва қанча миқдорда овқатланиш лозим?

🗂 Биринчи бор инсонлардаги ноёб генетик касалликлар гуруҳи харитаси тузиб чиқилди

🚑 2024 йилнинг дастлабки 3 ойида “Тез ёрдам”га қанча чақириқ келиб тушди?

🇺🇿🇹🇷 ССВ: 20 нафар талаба ҳамширалик иши бўйича ўзбек-турк қўшма факультетида таҳсил олмоқда

🩺 Бугун болаларда қандли диабет нега тез-тез учраяпти?

🏢 Ўзбек ҳамширалари корейс ҳамкасблари билан тажриба алмашмоқда

🔬 Миллий тиббиёт марказида жигар кўчириб ўтказиш операцияси йўлга қўйиляпти

💊 Витаминлар инсон танасида қандай вазифани бажаради?

📲 Энди имтиёзли тоифага кирувчи шахслар маълумотларни онлайн тарзда олишлари мумкин

📉 "103" хизматида тиббиёт бригадаларининг чақирув манзилига етиб бориш вақти ўртача 25-30 дақиқадан 8-12 дақиқагача қисқарди

☀️ Нега мутахассислар баҳор офтобидан сақланишни тавсия қилади?

Соғлиқни сақлаш вазирлиги
Матбуот хизмати.

@ssvuz | @ssvmatbuotkotibi |Facebook | Instagram

Нега мутахассислар баҳор офтобидан сақланишни тавсия қилади?

☀️ Баҳор офтоби танамиз учун қанчалик ёқимли ва ҳузурбахш туюлмасин, мутахассислар бу мавсумда қуёш тиғи остида узоқ қолмасликни тавсия этади. Айниқса, аллергияга мойил кишилар ушбу фаслда янада эҳтиёткор бўлишлари лозим. Нега?

▶️ Республика ихтисослаштирилган аллергология ва клиник иммунология илмий-амалий тиббиёт маркази директори, тиббиёт фанлари доктори, профессор Илмира Разикова бунга қуйидагича изоҳ берди.

📊 — Баҳорда қуёшнинг ультрабинафша нурланиш индекси ошиши кузатилади, — дейди мутахассис. — Нурланиш қоқ туш пайти максимал даражага яқинлашиб, то 16:00 гача юқори фаоллигини сақлаб туради.

🔬 Хўш, бунинг нимаси хавфли, дейишингиз мумкин. Гап шундаки, худди шундай шароитда терининг қуёш нурига сезгирлиги ошиши натижасида фотодерматоз касаллиги юзага келади. Статистик маълумотларга кўра, ҳозир бу хасталик дунё аҳолисининг тахминан 20 фоизида учрайди.

🔴 Аслида, қуёш нурининг ўзи аллерген ҳисобланмайди. Бироқ ультрабинафша нурланиш тери ёки инсон танасидаги ҳар қандай модда билан ўзаро таъсирга киришганда, аллергик реакция пайдо бўлиши мумкин.

🩺 Оқибатда бўйин, қўл соҳалари ва кўкракнинг юқори қисмида пуфакча, қавариқ, қизил доғ, куйиш кўринишидаги турли тошмалар юзага келади. Баъзан терининг қипиқланиши, қичишиши ва шишлар ҳам кузатилади.

❗️Тошмалар офтоб таъсир қила бошлаган илк соатлардан то ҳафта давомигача ҳосил бўлади. Кўпинча фотодерматоз белгилари муолажалардан сўнг йўқолиб кетади. Аммо бу ҳолат инсонни умр бўйи таъқиб қилиши эҳтимоли ҳам мавжуд.

🕰 Айни сабабдан баҳорнинг офтобли кунларида соат 11:00дан 16:00гача қуёш нурлари остида узоқ вақт юрмаслик, агар зарурат туғилса, бош кийим кийиш ёки соябон тутиш, кўзойнак тақиш ва имкон қадар ёпиқ либослар кийишни тавсия этамиз.

✅ Сезувчан тери учун мўлжалланган қуёш нурига қарши кремлардан фойдаланиш мақсадга мувофиқ. Лекин баъзи дорилар фотодерматозни келтириб чиқариши ёки хасталикни кучайтиришини унутмаслик керак. Шу боис препаратни қўллашдан олдин шифокор билан маслаҳатлашиш зарур.

🚫 Атопик дерматитни даволашда қўлланиладиган Элидел ёки Протопик суртмаларидан фойдаланаётган беморларга қуёшда юриш тақиқланади. Ёки бу воситаларни тушдан сўнг оқшомга қадар ишлатган маъқул.

💊 Шунингдек, Эритромицин, Тетрациклин ва Стрептомицин каби дорилар ультрафинафша нурларини кучли тортиб олиш хусусиятига эга. Ушбу малҳамларни қабул қилган ёки юз соҳаларига суртган беморлар иссиқ кунларда кундузи кўчага чиқишлари мумкин эмас.

‼️ Агар беморларда ультрабинафша нурланиш таъсирида фотодерматоз белгилари пайдо бўлса, Республика ихтисослаштирилган аллергология ва клиник иммунология илмий-амалий тиббиёт маркази ҳамда унинг ҳудудий филиалларига мурожаат қилишлари мумкин.

Соғлиқни сақлаш вазирлиги
Матбуот хизмати.

@ssvuz | @ssvmatbuotkotibi | Facebook | Instagram

#давлат_тиббий_суғуртаси_механизми

❗️Энди имтиёзли тоифага кирувчи шахслар маълумотларни онлайн тарзда олишлари мумкин

Ягона интерактив давлат хизматлари порталида (my.gov.uz) Давлат тиббий суғуртаси жамғармаси фаолиятига боғлиқ янги хизмат ишга туширилди.

Эндиликда имтиёзли тоифага кирувчи шахслар ўзларига тиббиёт ташкилотларида кўрсатилган тиббий хизматлар, дори воситалари ва тиббий буюмлар учун Давлат тиббий суғуртаси жамғармаси томонидан қопланган маблағлар тўғрисидаги тўлиқ маълумотларни онлайн тарзда олишлари мумкин бўлди.

Бунинг учун "my.gov.uz" порталига кириб, "Имтиёзли тоифага кирувчи шахсга электрон йўлланма асосида кўрсатилган тиббий хизматлар маълумоти"ни олиш учун сўров юборилади.

Шунингдек, ота-оналар учун фарзандларига кўрсатилган тиббий хизматлар тўғрисидаги маълумотларни олиш имконияти яратилди.

Мазкур давлат хизмати бепул бўлиб, Давлат тиббий суғуртаси жамғармаси томонидан кўрсатилади.

Хизматдан фойдаланиш учун қуйидаги ҳавола орқали ўтиш мумкин: https://my.gov.uz/uz/service/1008

Соғлиқни сақлаш вазирлиги
Матбуот хизмати.

@ssvuz | @ssvmatbuotkotibi | Facebook | Instagram