Shohjahon Ergashevga nimaga raqib yo‘q? Vaziyatni aslida qanday ekanini tahlil qilamiz
Professional boksning super engil vazn toifasida (63,5 kg) faoliyat olib borayotgan bokschimiz Shohjahon Ergashevga nima sababdan chempionlik jangi berilmadi yoki nega kuchli bokschilar bilan tushmayabdi, kabi savollarga aniq javob olish ehtimoli yo‘qdek go‘yo. Ergashev atrofidagi bu kabi savollar yomg‘iri nafaqat bosk muxlislarini, balki boksga qiziqmaydigan odamlar orasida ham kuzatilmoqda.
Keling avvalo super engil vazndagi holat bilan tanishamiz. So‘ngi yillarda bu vaznda o‘zgaruvchanlik oshib bormoqda va chempionlar almashinuvi tezlik bilan amalga oshmoqda. Ergashev uchun chempionlikka eng yaqin yo‘nalishi bu IBF bo‘lib, ushbu yo‘nalishdagi yangi chempion nomi ham yaqindagina aniqlandi. Puerto Riko vakili Sabriel Mattias va argentinalik Ieremiya Ponse o‘rtasidagi murosasiz jangda kutilganidek Mattias muddatidan oldin g‘alaba qozondi va IBF jahon chempionlik kamarini qo‘lga kiritdi.
Endi tashkilot Matiasning birinchi majburiy himoya jangiga da’vogar izlashga kirishdi. Bu borada eliminator (majburiy da’vogarni aniqlab beruvchi saralash jangi) uchun nomzodlar reytingning 3-pog‘onasida turgan Britaniya vakili Jek Ketteral va 4-o‘rinda borayotgan hamyurtimiz Shohjahon Ergashev edi.
Kutilganidek, Ketteral ushbu taklifni rad etdi. Chunki Ketteralning promoterlari Rejis Progreys bilan chempionlik jangini tashkil etish bo‘yicha muzokaralarga kirishgan. Boshqa tomondan esa bu holat biz muxlislar uchun yaxshi xabardek ko‘rinmoqda. Aslida juda yuqori texnika sohibi bolgan Jek Ketteral buni Josh Teylor bilan mutlaq chempionlik jangida ham isbotladi. Ko‘p mutaxassislar fikriga ko‘ra, bu jangda aynan Ketteral g‘alaba qozongan edi, ammo rasmiy natija Josh Teylor foydasiga bo‘ldi. Ergashevning darajasi hali mutloq ayon bo‘lmagan holatda dunyoning eng kuchli bokschisini “xafa” qilgan Ketteral bilan bahsi qizqarli bo‘lishi bilan bir qatorda Ergashev uchun ham xavfli bo‘lishi mumkin edi.
Keyingi da’vogar sifatida ko‘rilgan avstraliyalik Liam Paro hamon jarohatdan tiklanayotgani sababli Ergashevga qarshi eliminatorni qabul qilmagan bo‘lsa, vaznini ko‘targan sobiq mutlaq champion Teofimo Lopes 10 iyun kuni Josh Teylor bilan jang o‘tkazishi aniq bo‘lib ulgurgan va biz yaqin orada super jang guvohi bo‘lishimiz mumkin.
Reytingning 7-pog‘onasidan borayotgan yana bir kuchli bokschi, sobiq WBC chempioni amerikalik Xose Karlos Ramires va 12-pog‘onadagi ganalik bokschi Richard Kommi 26 mart tongida o‘zaro jang o‘tkazishi ma’lum bo‘lgani bois, ushbu variantlar IBF tomonidan inobatga olinmagan.
Shohjahon Ergashev bilan jang qilishni rad etgan navbatdagi bokschi yana bir avstraliyalik Stiv Spark bo‘ldi. U Shohjahondan qo‘rqdimi deysizmi? Yo‘q, unday emas. Matchroom kompaniyasi mijozi bo‘lgan ushbu charm qo‘lqop ustadi 6 may kuni bo‘lib o‘tadigan Saul Alvares va Jon Rayder jangi oqshomida ringga qaytishi reja qilingani, uni eliminatorni olmasligiga sabab bo‘ldi.
Yaponiyalik Endi Hiraokada taklifni qabul qilmaslikka hech qanday sabab yo‘q edi. Lekin afsuski u bu jangga o‘zini tayyor emas, deb hisobladi shekilli sekingina safdan chiqa qoldi.
Reytingning 11-o‘rinidagi bokschining nomi sizga juda yaxshi tanish. Bu o‘sha mashhur tarmoq yulduzi Rayan Garsiya. Garsiya so‘nggi jangini 63.5 kgda o‘tkazgan bo‘lsa-da, uning asosiy vazni hamon engil vazn (61,2 kg) hisoblanadi. Qolaversa, Garsiyani boshqa bir mega jang, 22 aprel kuni barchaning diqqat markazida bo‘ladigan Jervonta Devisga qarshi to‘qnashuv sabab, IBF bu variantni ham ko‘rib chiqmadi.
Bizga ma’lum bo‘lishi, IBF tashkiloti 13-o‘rindagi amerikalik yosh iqtidor Richardson Hitchinsga so‘rov yuborgan va undan javob kutmoqda. 25 yoshli Hitchins faoliyati davomida 16 ta jang o‘tkazib, ularning barchasida g‘alaba qozongan. 7 ta jangda raqiblarini muddatidan avval taslim etgan. Boks ommasining fikriga ko‘ra, bu bokschi taklifni qabul qilsa, Shohjahon Ergashevga haqiqiy bosh og‘riq bo‘lishi mumkin.
🎗
A'ZO BO'LISH❗️❗️❗️❗️
⬇️⬇️⬇️⬇️⬇️⬇️⬇️⬇️⬇️⬇️
https://t.me/joinchat/TC6SqFPuIQPloEpE