Paziyletuz | Рәсмий канал

#ҳәдис #тәрбия

ҲАДАЛ ЫРЫСҚЫ ТАБЫЎ ҲАҚҚЫНДА

     Ҳадал ырысқы жолында қылынған ҳәрекетлер ушын үлкен саўаплар ўәде етилген болып, ҳәттеки бул нәрсе парыз дәрежесине көтерилген. Бул ҳаққында Пайғамбарымыз саллаллаҳу алайҳи ўа саллам өзиниң ҳәдислериниң биринде айтады:
       “Ҳадал кәсип қылыў (мийнет етиў) парыздан кейинги парыз” (Имам Байҳақий рәўияты).
      Уламалар бул ҳәдистеги “парыздан кейинги парыз” деген сөзин түсиндирип айтады: “Бул парыздан кейинги парыз дегени, ҳәр бир мусылман ушын парыз болған намаз, ораза, ҳаж ҳәм закат сыяқлы парызлардан кейинги мәртебеде туратуғын парыз”, деген. Халқымызда бир түсиник бар, динниң парызлары дегенде намаз, ораза, закат, ҳаж киби ислерди түсинеди. Бирақ билип алыўымыз керек, динде парызлар жүдә көп. Мине ҳадал мийнет етиў де дин парызларынан бирии екенин билип алдық.
      Имам Муҳаммад аш-Шайбаний: “Илим талап етиў қандай парыз болса, ҳадал кәсип қылыў да тап сондай парыз”, – деген.
      Мөмин адам ҳадал ырысқы табыў ҳәрекетинде болған ўақытта, Аллаҳ тааланың буйрығына әмел етиў менен бирге Расулуллаҳ саллаллаҳу алайҳиссаламның көрсетпелерине де тийкарланып ис алып барып атырған болып есапланады. Себеби, Расулуллаҳ саллаллаҳу алайҳи ўа саллам айтады:
       «Адам өз қол мийнети менен таўғанынан көре жақсырақ ҳәм пәкизерек тағам жемейди», деген (Имам Ибн Мәжа рәўияты).

🙂🙂🙂🙂🙂🙂      🙂🙂🙂🙂🙂🙂

⬅️Бизди социаллық тармақларда бақлап барың!

🥺Телеграм| 🤪Facebook| 🛍Instagram| 😍Youtube

🧐 Интернет сайтымыз: paziylet.uz

🧎‍♂️"Намазлыгерди оқыдың ба?"
(ерли-зайыплылар арасындағы сәўбет)

- Намазлыгерди оқыдың ба?

- Яқ.

- Шамды ше?

- Оқығаным жоқ.

- Не ушын?

- Жумыстан шаршап келген едим. Соған бираз жатып, дем алдым.

- Түсиникли. Қуптанға азан айтылмастан турып тез де намазлыгер ҳәм шамды оқып ал.

Ертесине күйеўи хызмет сапарына кетти. Әдетте мәнзилине жетип барған соң, ҳаялына қоңыраў етип қояды. Бирақ, бүгин қоңыраў етпеди ямаса "Жетип келдим" деп смс жазбады. Ҳаял өзи күйеўине қоңыраў етти. Ал, күйеўи телефонды көтермеди. Қайта-қайта қоңыраў етти, бәри бир түсе алмады. Тынышсызлана баслады. Күйеўиниң бундай әдети жоқ еди. Бул сапары болса өзи қоңыраў етпегени жетпегендей, ҳаялының қоңыраўына да жуўап бермей атыр. Арадан бир неше саат өткеннен кейин күйеўи қоңыраў етти. Ҳаял асығыс түрде телефонды көтерип, сөйлей баслады:

- Аман-есен жетип бардыңыз ба?

- Аўа, жетип келдим. Әлҳамдулиллаҳ.

- Қашан жетип бардыңыз?

- Төрт сааттай болды.

Ҳаял ашыўланды, даўысы өзгерген сес пенен:

- Төрт саат болды? Неге хабар бермедиңиз?

- Жолдан шаршап келдим, жатып бираз дем алдым.

- Мениң менен бир неше минут сөйлессеңиз не болар еди? Телефон даўысын еситпедиңиз бе?

- Еситтим.

- Еситтиңиз де, бирақ жуўап бермедиңиз. Неге? Мени ойламадыңыз ба?

- Ойладым. Бирақ, сен де кеше намазға азан айтылғанда Аллаҳтың ибадатына асығыўды ойламадың. Бир неше минутта намазыңды оқып алсаң не болар еди?

Ҳаял бираз үнсизликтен кейин "Аўа, дурыс. Сиз ҳақсыз. Мен қәте иследим. Бул исимнен өкинемен" деп өкирип жылап жиберди.

Күйеўи ҳаялының өзинен кеширим сорағандай болғанын сезип, былай деди:

- Сен кеширимди меннен емес, Аллаҳ тааладан сора! Басқа ҳеш қашан намазыңды қаза қылма! Билесең бе, мениң ең үлкен әрманларымның бири - сениң менен жәннетте де бирге болыў.

Күйеўиниң бул нәсиятынан соң ҳаял намазларына және де итибарлы болып, оларды өз ўақтында орынлайтуғын болды.

Аўа, әзизлер, сизди шын жүректен сүйетуғын адам – сизди Аллаҳ тааланың разылығына қарай жоллайтуғын, гүнаға қол урыўыңыздан тосатуғын адам.

Себеби, әлемлердиң Рабби Қураны кәриймде былай деген:

"Шаңарағыңды намаз (оқыў)ға буйыр ҳәм (өзиң де) буған (намазға) сабырлы бол! Биз сеннен ырысқы сорамаймыз. (Керисинше,) Биз саған ырысқы беремиз. Ақыбет (жақсылығы) – тақўалыларға" 📖(Тоҳа сүреси, 132-аят).(muslim.uz)

Аллаҳ таала бәршемизди намазын өз ўақтында орынлайтуғын бенделеринен қылсын!

🙂🙂🙂🙂🙂🙂      🙂🙂🙂🙂🙂🙂

⬅️Бизди социаллық тармақларда бақлап барың!

🥺Телеграм| 🤪Facebook| 🛍Instagram| 😍Youtube

🧐 Интернет сайтымыз: paziylet.uz