yozilganiga ancha boʻlgan boʻlsa-da har vaqt dardini yoʻqotmagan sheʼrlarimdan...
BAXT NASIB BOʻLMADI BIZLARGA JONIM
Koʻksimiz aylandi muzlarga jonim,
Sevgimizning bogʻi kuzlarga jonim...
Nasib boʻldi sevgi muhabbat bizga,
Baxt nasib boʻlmadi bizlarga jonim.
Ikkimiz ikki yon ketgan bulutmiz,
Qalblarda bor ammo yoddan unutmiz.
Yuragi qaltirab toʻkilgan tutmiz,
Baxt nasib boʻlmadi bizlarga jonim.
Alvido aytilib ayro yoʻlimiz,
Bir birin ushlolmas endi qoʻlimiz...
Bizlar koʻngil emas gʻurur qulimiz,
Baxt nasib boʻlmadi bizlarga jonim.
Kecha yaqin edik bugun biz yiroq,
Boshimizga tushdi ayriliq firoq.
Biz baxtdan orzular qildigu biroq,
Baxt nasib boʻlmadi bizlarga jonim.
Sen oʻzga yor bilan baxtlisan yoki,
Men seni sevaman tirikman toki.
Men uchun ishq boqiy, sadoqat boqiy,
Baxt nasib boʻlmadi bizlarga jonim.
Gunohkor yoʻq ahir taqdirimiz shu,
Bizni qismat ajib oq qaro rangu.
Endi begonamiz begona mangu,
Baxt nasib boʻlmadi bizlarga jonim.
✍ Odilbek Qodirov
❤️ 𝗞𝗮𝗻𝗮𝗹 |
𝙾𝚍𝚒𝚕𝚋𝚎𝚔 𝚀𝚘𝚍𝚒𝚛𝚘𝚟