Nodir Jonuzoq | she’r va shuur

​​ASILA

Asil elning asil qizi Asila,
Asil tilla jarangi bor sasida.
Yangiladi oʻttiz yillik marrani,
Yengil uchib chopagʻonlar asrida.

Parijdan-ku avval gʻolib qaytgandi,
Tokiodan kumush olib qaytgandi,
Hali oltin olaman, deb aytgandi,
Malikadir oltin-kumush qasrida.

Parvozidan qummas, zarlar sachradi,
Yetolmayin ne ohular charchadi,
Ildam chopib, eng uzoqqa sakradi,
Bu – elimning qadamidir aslida!

Yurt Sarvari jondan suyib, qizim, der,
Surma qilar har bir bosgan izin yer...
Ogʻang boʻlay, jon singiljon, izn ber,
Qoʻzgʻalaman qalqon boʻlmoq qasdida.

Yeldek uchar, yoʻllaridan qoch, dunyo,
Toʻqnashmagil, koʻzlaringni och, dunyo!
Shu tilla qiz – boshingdagi toj, dunyo,
Tashbehlar ham ojiz uning vasfida.

Omad derlar... Hurkakkina qush – omad,
Kuchliga doʻst, kuchsizlarga tush – omad.
Qahramon qiz! Soʻzimda yoʻq xushomad,
Bagʻishlasam arzir yuzta qasida.

Asil elning asil qizi Asila,
Har gʻalabang – suyunchiga  vasila.
Shohsupaning ziynatisan – tengi yoʻq,
Doʻst-u raqib kuzatgay havas ila!

———————

АСИЛА

Асил элнинг асил қизи Асила,
Асил тилла жаранги бор сасида.
Янгилади ўттиз йиллик маррани,
Енгил учиб чопағонлар асрида.

Париждан-ку аввал ғолиб қайтганди,
Токиодан кумуш олиб қайтганди,
Ҳали олтин оламан, деб айтганди,
Маликадир олтин-кумуш қасрида.

Парвозидан қуммас, зарлар сачради,
Етолмайин не оҳулар чарчади,
Илдам чопиб, энг узоққа сакради,
Бу – элимнинг қадамидир аслида!

Юрт Сарвари жондан суйиб, қизим, дер,
Сурма қилар ҳар бир босган изин ер...
Оғанг бўлай, жон сингилжон, изн бер,
Қўзғаламан қалқон бўлмоқ қасдида.

Елдек учар, йўлларидан қоч, дунё,
Тўқнашмагил, кўзларингни оч, дунё!
Шу тилла қиз – бошингдаги тож, дунё,
Ташбеҳлар ҳам ожиз унинг васфида.

Омад дерлар... Ҳуркаккина қуш – омад,
Кучлига дўст, кучсизларга туш – омад.
Қаҳрамон қиз! Сўзимда йўқ хушомад,
Бағишласам арзир юзта қасида.

Асил элнинг асил қизи Асила,
Ҳар ғалабанг – суюнчига васила.
Шоҳсупанинг зийнатисан – тенги йўқ,
Дўсту рақиб кузатгай ҳавас ила!

2024

@n_jonuzoq

​​HURRIYAT

Istibdodning jodisidan omon qolgan jonim – Sen,
Qizil dajjol jodusidan buzilmagan qonim – Sen.
Jadidlarning yurakdagi yarasida ungan gul,
Yangi oydek balqib, yana   yaraqlagan nomim – Sen!

Mustaqilligimizning 33 yilligi barchamizga muborak boʻlsin!

———————

ҲУРРИЯТ

Истибдоднинг жодисидан омон қолган жоним – Сен,
Қизил дажжол жодусидан бузилмаган қоним – Сен.
Жадидларнинг юракдаги ярасида унган гул,
Янги ойдек балқиб, яна ярақлаган номим – Сен!

Мустақиллигимизнинг 33 йиллиги барчамизга муборак бўлсин!

@n_jonuzoq

​​HAYOT

Usmon Nosir xotirasiga

Uzum donasini choʻqilab qochgan
Maynaday qalbimni taladi hayot.
Doʻst edim men unga sirini ochgan,
Sirimni pulladi – aldadi, hayhot.

Mergan u – koʻzlaydi dilning sogʻini,
Sanamas qurbonlar son-sanogʻini,
Ayamay boʻshatar yoy sadogʻini,
Oʻqlarin koʻksimga qadadi sayyod.

Mehmon deb chorladi avval toʻriga,
Sovqatsam – muzkoʻrpa soldi soʻriga,
Terlasam – oʻt yoqib qalbim qoʻriga,
Hasrat koʻmirini qaladi bot-bot.

Mastona sayragan bir bulbul edim,
Kuyimga begona zanjir, gʻul, dedim,
Qul boʻlsam, koʻnglimga faqat qul edim,
Tikonzor ichiga qamadi jallod.

Chirpirak boʻldi-ku chechak chogʻlarim,
Qoraygan qaygʻuzor – chaman, bogʻlarim,
Bagʻrimdan qabarib chiqdi dogʻlarim,
Koʻnglimmas, qoʻlimga qaradi – ha, yot.

Kulgiday yoyildi zardasi tashda,
Aldamchi chashma u adoqsiz dashtda,
Qoningga tashna-yu, joningga tashna,
Billur yoshlarimni yaladi shaddod.

Aylanib avradi, baxting mangu, deb,
Oʻchmagay hech qachon toleng rangi, deb.
Mana, koʻr, yuraging qanday yangi, deb,
Juvoldiz ignada yamadi, ay, dod!

Garchi yuragimni tinmay choʻqidi,
Chuqurroq sanchsa-da paykon-oʻqini,
Xilvatda sheʼrimni yigʻlab oʻqidi,
Soʻnggi dam tavbaga yaradi shoyad...

Hurriyat!
Jilvangdan yorugʻdir yuzim,
Elimda jaranglar bu kun har soʻzim.
Yoʻqlik oʻpqoniga ketdi u tuzum –
Men hayotman, uni yamladi mamot...

———————

ҲАЁТ

Усмон Носир хотирасига

Узум донасини чўқилаб қочган
Майнадай қалбимни талади ҳаёт.
Дўст эдим мен унга сирини очган,
Сиримни пуллади – алдади, ҳайҳот.

Мерган у – кўзлайди дилнинг соғини,
Санамас қурбонлар сон-саноғини,
Аямай бўшатар ёй садоғини,
Ўқларин кўксимга қадади сайёд.

Меҳмон деб чорлади аввал тўрига,
Совқатсам – музкўрпа солди сўрига,
Терласам – ўт ёқиб қалбим қўрига,
Ҳасрат кўмирини қалади бот-бот.

Мастона сайраган бир булбул эдим,
Куйимга бегона занжир, ғул, дедим,
Қул бўлсам, кўнглимга фақат қул эдим,
Тиконзор ичига қамади жаллод.

Чирпирак бўлди-ку чечак чоғларим,
Қорайган қайғузор – чаман, боғларим,
Бағримдан қабариб чиқди доғларим,
Кўнглиммас, қўлимга қаради – ҳа, ёт.

Кулгидай ёйилди зардаси ташда,
Алдамчи чашма у адоқсиз даштда,
Қонингга ташнаю, жонингга ташна,
Биллур ёшларимни ялади шаддод.

Айланиб авради, бахтинг мангу, деб,
Ўчмагай ҳеч қачон толенг ранги, деб.
Мана, кўр, юрагинг қандай янги, деб,
Жуволдиз игнада ямади, ай, дод!

Гарчи юрагимни тинмай чўқиди,
Чуқурроқ санчса-да пайкон-ўқини,
Хилватда шеъримни йиғлаб ўқиди,
Сўнгги дам тавбага яради шояд...

Ҳуррият!
Жилвангдан ёруғдир юзим,
Элимда жаранглар бу кун ҳар сўзим.
Йўқлик ўпқонига кетди у тузум –
Мен ҳаётман, уни ямлади мамот...

2024

@n_jonuzoq

​​MAKTUB

Tongda maktub yozdim.
Boshqa gapim yoʻq,
Ammo yana senga yozgim keladi.
Ayriliq savdosi tobora quyuq,
Telbarib, aqldan ozgim keladi.

Dunyo – gʻam boʻyicha zoʻr mutaxassis,
Hijronga saxiy-u, visolga xasis,
Barmoqlaring tekkan har bitta aziz
Buyumga labimni bosgim keladi.

Sogʻinch – olov, derlar...
Yutyapman ichga,
Ey, toqati qalin, qoshi ingichka!
Bir payt paltong turgan kiyimilgichga
Chidolmay oʻzimni osgim keladi!

Telefon bir chetda yotar soqov, gung,
Uning ham quvvatin olgan gʻussa, mung...
Bexos jaranglaydi qoʻngʻiroq kulging –
Yoprilib roʻyoli bosqin keladi.

“Oʻldiraman!” debsan,
Qulluq, ming rahmat!
Yuzta maktubimga javob – shu bir xat,
Hukmingga roziman. Bilayin, faqat,
Meni oʻldirmakka, yoz, kim keladi?!

————————

МАКТУБ

Тонгда мактуб ёздим.
Бошқа гапим йўқ,
Аммо яна сенга ёзгим келади.
Айрилиқ савдоси тобора қуюқ,
Телбариб, ақлдан озгим келади.

Дунё – ғам бўйича зўр мутахассис,
Ҳижронга сахию, висолга хасис,
Бармоқларинг теккан ҳар битта азиз
Буюмга лабимни босгим келади.

Соғинч – олов, дерлар...
Ютяпман ичга,
Эй, тоқати қалин, қоши ингичка!
Бир пайт палтонг турган кийимилгичга
Чидолмай ўзимни осгим келади!

Телефон бир четда ётар соқов, гунг,
Унинг ҳам қувватин олган ғусса, мунг...
Бехос жаранглайди қўнғироқ кулгинг –
Ёприлиб рўёли босқин келади.

“Ўлдираман!” дебсан,
Қуллуқ, минг раҳмат!
Юзта мактубимга жавоб – шу бир хат,
Ҳукмингга розиман. Билайин, фақат,
Мени ўлдирмакка, ёз, ким келади?!

2024

@n_jonuzoq

​​SAMARQAND. SHARQ TARONALARI

Sohibqiron koʻzga surib, poytaxt qilgan
Samarqandga xush keldingiz, Samarqandga.
Zar sochishni Quyosh tole, Oy baxt bilgan
Samarqandga xush keldingiz, Samarqandga.

Bobo Tarix bolaligin koʻrgandir u,
Bobil bilan uzun suhbat qurgandir u,
Boqiy shahar – muhabbatga qoʻrgʻondir u,
Samarqandga xush keldingiz, Samarqandga.

Bibixonim atirlarin isi shunda,
Ulugʻbekning charaqlagan “Ziji” shunda,
Navoiyning pok, munavvar izi shunda,
Samarqandga xush keldingiz, Samarqandga.

Kimlar kelib tarix yozdi davron bilan,
Koʻngil uzmay ketdi kimlar armon bilan…
Buyuk Ipak Yoʻlidagi karvon bilan
Samarqandga xush keldingiz, Samarqandga.

Ona Yerning taftin olgan issiq noni,
Duo toʻla ochiq kaftday Registoni,
Ey, qadrdon, ey, jonimning egiz joni,
Samarqandga xush keldingiz, Samarqandga.

Koʻring, qanday yosharmoqda eski shahar,
Har niyati, har amali ezgu shahar,
Yangi davr shiddatiga koʻzgu shahar,
Samarqandga xush keldingiz, Samarqandga.

Dunyo bugun hofiz, olam mashshoq bugun,
Taralgaydir “Tanavor”u “Ushshoq” bugun,
Roʻyi zamin koʻrki Sizga mushtoq bugun,
Samarqandga xush keldingiz, Samarqandga.

Navolarning toʻlqinida sel boʻlamiz,
Ohang bilan koʻchgan epkin, yel boʻlamiz,
Bir qoʻshiqni kuylab, bitta el boʻlamiz,
Samarqandga xush keldingiz, Samarqandga!

– – – – – – – 

САМАРҚАНД. ШАРҚ ТАРОНАЛАРИ

Соҳибқирон кўзга суриб, пойтахт қилган
Самарқандга хуш келдингиз, Самарқандга.
Зар сочишни Қуёш толе, Ой бахт билган
Самарқандга хуш келдингиз, Самарқандга.

Бобо Тарих болалигин кўргандир у,
Бобил билан узун суҳбат қургандир у,
Боқий шаҳар – муҳаббатга қўрғондир у,
Самарқандга хуш келдингиз, Самарқандга.

Бибихоним атирларин иси шунда,
Улуғбекнинг чарақлаган “Зижи” шунда,
Навоийнинг пок, мунаввар изи шунда,
Самарқандга хуш келдингиз, Самарқандга.

Кимлар келиб тарих ёзди даврон билан,
Кўнгил узмай кетди кимлар армон билан…
Буюк Ипак Йўлидаги карвон билан
Самарқандга хуш келдингиз, Самарқандга.

Она Ернинг тафтин олган иссиқ нони,
Дуо тўла очиқ кафтдай Регистони,
Эй, қадрдон, эй, жонимнинг эгиз жони,
Самарқандга хуш келдингиз, Самарқандга.

Кўринг, қандай ёшармоқда эски шаҳар,
Ҳар нияти, ҳар амали эзгу шаҳар,
Янги давр шиддатига кўзгу шаҳар,
Самарқандга хуш келдингиз, Самарқандга.

Дунё бугун ҳофиз, олам машшоқ бугун,
Таралгайдир “Танавор”у, “Ушшоқ” бугун,
Рўйи замин кўрки Сизга муштоқ бугун,
Самарқандга хуш келдингиз, Самарқандга.

Наволарнинг тўлқинида сел бўламиз,
Оҳанг билан кўчган эпкин, ел бўламиз,
Бир қўшиқни куйлаб, битта эл бўламиз,
Самарқандга хуш келдингиз, Самарқандга!

@n_jonuzoq

​​ONAM

Tovonimga kirgan tikanning uchi
Onam yuragiga borib qadalar.
Junjikib, chuchkirsam – tushda koʻrguvchi,
Sahardan duosi menga atalar.

Jismidin jon uzib ato qilganim,
Balki tugʻilganim – xato qilganim...
Yoshin mildiratib, ado qilganim,
Sogʻinchi koʻksida silqib, maddalar.

Garchand malikaday koʻrinar  begʻam,
Oltin bekaman, der, baxti but, bekam.
Onalar otaga aylanar ekan –
Xudoning qasriga ketsa dadalar.

Shoir yuragim bor, kim nima desin,
Har kim oʻz yoʻlida yugurib-yelsin.
Mengamas, onamga rahmingiz kelsin,
Sheʼrimdan bezor-u mendan zadalar.

Kuygan koʻkayimga puflayman goho,
Oʻchmasa, tutayman – uflayman goho.
Ochiq qalbimni ham qulflayman goho,
Koʻmilar oʻzimga bergan vaʼdalar...

Kelsa, olib kelar qishloq  gardini,
Yoʻlma-yoʻl taratib rayhon atrini.
Mendan yaxshi bilar onam qadrini
Boshiga soyabon oʻrik, sadalar.

Yoʻl qarab qarigan onajonginam!
Hech kimga taʼnam yoʻq, oʻzimga – ginam.
Koshki poyingizda boʻlsaydim  gilam,
Kerak boʻlmas edi taskin-daldalar...

–––––––––

ОНАМ

Товонимга кирган тиканнинг учи
Онам юрагига бориб қадалар.
Жунжикиб, чучкирсам – тушда кўргувчи,
Саҳардан дуоси менга аталар.

Жисмидин жон узиб ато қилганим,
Балки туғилганим – хато қилганим...
Ёшин милдиратиб, адо қилганим,
Соғинчи кўксида силқиб, маддалар.

Гарчанд маликадай кўринар  беғам,
Олтин бекаман, дер, бахти бут, бекам.
Оналар отага айланар экан –
Худонинг қасрига кетса дадалар.

Шоир юрагим бор, ким нима десин,
Ҳар ким ўз йўлида югуриб-елсин.
Менгамас, онамга раҳмингиз келсин,
Шеъримдан безору мендан задалар.

Куйган кўкайимга пуфлайман гоҳо,
Ўчмаса, тутайман – уфлайман гоҳо.
Очиқ қалбимни ҳам қулфлайман гоҳо,
Кўмилар ўзимга берган ваъдалар...

Келса, олиб келар қишлоқ  гардини,
Йўлма-йўл таратиб райҳон атрини.
Мендан яхши билар онам қадрини
Бошига соябон ўрик, садалар.

Йўл қараб қариган онажонгинам!
Ҳеч кимга таънам йўқ, ўзимга – гинам.
Кошки пойингизда бўлсайдим  гилам,
Керак бўлмас эди таскин-далдалар...

17.08.2024

@n_jonuzoq

​​Olimpiada daftari

XUSH KELDINGIZ

“Oq yoʻl!” deb kuzatgandi Sizni xalqim safarga,
Koʻzlarimning ziyosi, darmonim, xush keldingiz!
Xurjunlarin toʻldirib oltin-kumush zafarga,
Oy borib, omon qaytgan karvonim, xush keldingiz!

Baxt-u sururga toʻldi ota yurtim uylari,
Uylardan toshib, yana toʻldi koʻcha-koʻylari,
Bayramlarga ulandi shodiyona kuylari,
Mushak kabi porlagan har onim, xush keldingiz!

Oʻn uch raqami balki omadsiz kimlar uchun,
Ammo bizga saodat timsoli boʻlgani chin,
Oʻn uchinchi oʻrin-u, oʻn uch medal – sevinchim,
Koʻzlarni qamashtirgan xirmonim, xush keldingiz!

Abdumalik, Lazizbek, Asadxoʻja, Bahodir,
Hasanboy, zarbingizga yuragim zarbi jodir,
Koʻrsatdingiz jahonga – oʻzbek nelarga qodir,
Maydonlarni qalqitgan mardonim, xush keldingiz!

Diyora, Svetlana – kunchehra, oyyuzlarim,
Samodan yerga tushgan charogʻon yulduzlarim,
Siz bois yorugʻ boʻldi oqshomu  kunduzlarim,
Boʻynida – tilla zebigardonim, xush keldingiz!

Alisherbek, Ulugʻbek – ulugʻ beklar vorisi,
Muzaffar, Akbar, Gʻulom quvvati – diyor isi,
Razambekka kuch berdi Bobotogʻday or hissi,
Elni yuksaltgan yangi dovonim, xush keldingiz!

Balki qay biringizdan omad uzoq boʻldi sal,
Yo hayajon berdi pand kurash qizigan mahal...
Xalqim ishonar sizga – yutuqlar qilmas mahtal,
Baxti kutib turgan qiz-oʻgʻlonim, xush keldingiz!

Har soniya suyanchdir sizga  Millat Sardori,
Har tilagi, daldasi – koʻngil va ruh madori,
Ulugʻvor marralarga boshlar azmi qarori,
Boshingizda soyabon davronim, xush keldingiz!

Siz yengsangiz, sururdan osmon qadar oʻsganlar,
Yelkangiz yer iskasa – ichi kuyib, toʻzganlar,
Jonini fido qilib, har balodan toʻsganlar,
Murabbiylar – mehribon qalqonim, xush keldingiz!

Ishqibozlar – qiziqqon xalqim tovushi asli,
Goʻzal yurishi bilan Parijni qildi taslim,
Eyfel minorasin ham titratdi chaqmoq sasi,
Olqish-u shiddatga boy zabonim, xush keldingiz!

Sizni alqab shoirlar qalami biyron boʻldi,
Bellashuv bir yon boʻldi, sheʼr zavqi bir yon boʻldi,
Sizdan olgan ilhomim yangi bir devon boʻldi,
Kamtarin zafarnomam, dostonim, xush keldingiz!

Boshim osmon, shu yerga tegib tursa tovonim,
Gʻolib pir-qutblarga eltgay har toʻrt tomonim,
Gʻalabalar maskani – Yangi Oʻzbekistonim,
Shohsupaga chiqqan zoʻr zamonim, xush keldingiz!

12.08.2024

@n_jonuzoq

​​Olimpiada daftari

SVETA

“Sveta kim?” – der farang,
Havas bilan qarashar.
Raqiblari, tugab jang,
Jim muzqaymoq yalashar.

Yogʻdu sochar, ana, koʻr,
Oyning qizi Sveta.
“Oʻzbekiston” degan zoʻr
Joyning qizi Sveta!

Kumush qiz u!
Xush koʻrib,
Oshiqlar soch tarashar.
Otabeklar tush koʻrib,
Xayolida talashar.

Qoʻl-oyogʻi chaqqon qiz,
Abjir qizdir Sveta.
Oʻzimizdan chiqqan qiz,
Gajir qizdir Sveta.

Shon qoʻshdi yurt shoniga,
Qarab koʻzlar qamashar.
Shoirlar ham shaʼniga
Endi maqtov qalashar.

El alqab, oqishini
Xohlagan qiz, Sveta.
Muxlislar olqishini
Oqlagan qiz, Sveta.

Shod uchar u uyiga,
Niyatiga yarasha.
Kumush qizning boʻyniga
Kumush qanday yarashar!

Yoʻq, adashdim...
Tilla qiz!!
Yana porlar Sveta.
Hali bir kun, koʻrasiz,
Oltin olar Sveta!

–––––––––

СВЕТА

"Света ким?" – дер фаранг,
Ҳавас билан қарашар.
Рақиблари, тугаб жанг,
Жим музқаймоқ ялашар.

Ёғду сочар, ана, кўр,
Ойнинг қизи Света.
“Ўзбекистон” деган зўр
Жойнинг қизи Света!

Кумуш қиз у!
Хуш кўриб,
Ошиқлар соч тарашар.
Отабеклар туш кўриб,
Хаёлида талашар.

Қўл-оёғи чаққон қиз,
Абжир қиздир Света.
Ўзимиздан чиққан қиз,
Гажир қиздир Света.

Шон қўшди юрт шонига,
Қараб кўзлар қамашар.
Шоирлар ҳам шаънига
Энди мақтов қалашар.

Эл алқаб, оқишини
Хоҳлаган қиз, Света.
Мухлислар олқишини
Оқлаган қиз, Света.

Шод учар у уйига,
Ниятига яраша.
Кумуш қизнинг бўйнига
Кумуш қандай ярашар!

Йўқ, адашдим...
Тилла қиз!!
Яна порлар Света.
Ҳали бир кун, кўрасиз,
Олтин олар Света!

11.08.2024

@n_jonuzoq

​​Olimpiada daftari

YIGITLAR

Aql va yurak kuchin bilagida jam qilib,
Raqiblar tomiriga titroq solgan yigitlar.
Sovrin yo shon uchunmas, nomus uchun jang qilib,
Ringdan chiqsa ham, qalbda muqim qolgan yigitlar.

Chayir mushagi pishgan ketmon bilan dalada,
Qamchi ostida uloq tortgan qor-u jalada.
Vatan ori tikilgan olatasir pallada
Oʻz oromi, tinchidan oson tongan yigitlar.

Temur boboning temir zarbasi sizda bugun,
Nokaslarni qulatgan zardasi sizda bugun,
Buxoriy, Termiziylar daldasi sizda bugun,
Alp mushtingiz Alp togʻin qilur talqon, yigitlar.

“Oltin olma, duo ol!”  – yangrar qadimiy ovoz,
Ham oltin-u ham duo olsang ammo, qanday soz!
Duo bergan xalqing ham, oltin ol, deb tursa boz,
Oltin olib, bir umr duo olgan yigitlar.

Abdumalik, Bahodir, Asadxoʻja, Hasanboy,
Lazizbek – Olimp uzra oldingiz-ku oliy joy,
Boshingizda yuksaldi hilol – yangi balqqan oy,
Koʻzingizdan jimirlab yulduz tomgan yigitlar.

Olam bugun gʻavgʻoli, dunyo bugun katta ring,
Mushtini doʻlaytirar mushtumzoʻrlar, desang gʻing.
Halol kurashgan kamyob, hiyla-nayrang esa ming,
Siz borsizki, el omon, yurtga qalqon yigitlar.

Shaksiz, Zamin tozargay gʻaraz-u kin gardidan,
Yer-u koʻk zada boʻlmish  kattazanglar harbidan,
Kim zoʻravon – yiqilgay  Xudoyimning zarbidan,
Adolat chin, zolimning kuchi yolgʻon, yigitlar.

Siz gʻolibsiz!
Tantana bugun har kent, qishloqda,
Qirq quloqli qozonda zafar oshi pishmoqda.
Yurt Sarvari va millat  mehrini sochgan chogʻda
Baxtiyorlik shavqiga toʻyib-qongan yigitlar.

Raqiblar tomiriga titroq solgan yigitlar,
Ringdan chiqsa ham, qalbda muqim qolgan yigitlar.
Aql va yurak kuchi bilagida mujassam,
Oltin olib, bir umr duo olgan yigitlar!

–––––––––

ЙИГИТЛАР

Ақл ва юрак кучин билагида жам қилиб,
Рақиблар томирига титроқ солган йигитлар.
Соврин ё шон учунмас, номус учун жанг қилиб,
Рингдан чиқса ҳам, қалбда муқим қолган йигитлар.

Чайир мушаги пишган кетмон билан далада,
Қамчи остида улоқ тортган қору жалада.
Ватан ори тикилган олатасир паллада
Ўз ороми, тинчидан осон тонган йигитлар.

Темур бобонинг темир зарбаси сизда бугун,
Нокасларни қулатган зардаси сизда бугун,
Бухорий, Термизийлар далдаси сизда бугун,
Алп муштингиз Алп тоғин қилур талқон, йигитлар.

"Олтин олма, дуо ол!"  – янграр қадимий овоз,
Ҳам олтину ҳам дуо олсанг аммо, қандай соз!
Дуо берган халқинг ҳам, олтин ол, деб турса боз,
Олтин олиб, бир умр дуо олган йигитлар.

Абдумалик, Баҳодир, Асадхўжа, Ҳасанбой,
Лазизбек – Олимп узра олдингиз-ку олий жой,
Бошингизда юксалди ҳилол – янги балққан ой,
Кўзингиздан жимирлаб юлдуз томган йигитлар.

Олам бугун ғавғоли, дунё бугун катта ринг,
Муштини дўлайтирар муштумзўрлар, десанг ғинг.
Ҳалол курашган камёб, ҳийла-найранг эса минг,
Сиз борсизки, эл омон, юртга қалқон йигитлар.

Шаксиз, Замин тозаргай ғаразу кин гардидан,
Еру кўк зада бўлмиш  каттазанглар ҳарбидан,
Ким зўравон – йиқилгай  Худойимнинг зарбидан,
Адолат чин, золимнинг кучи ёлғон, йигитлар.

Сиз ғолибсиз!
Тантана бугун ҳар кент, қишлоқда,
Қирқ қулоқли қозонда зафар оши пишмоқда.
Юрт Сарвари ва миллат  меҳрини сочган чоғда
Бахтиёрлик шавқига тўйиб-қонган йигитлар.

Рақиблар томирига титроқ солган йигитлар,
Рингдан чиқса ҳам, қалбда муқим қолган йигитлар.
Ақл ва юрак кучи билагида мужассам,
Олтин олиб, бир умр дуо олган йигитлар!

11.08.2024

@n_jonuzoq

​​TUHFA

(Bahodir Jalolov jangidan soʻng)

Gʻalaba!
Bu qanday totli, goʻzal his!!
Butun borligʻimni shodlik oʻradi.
Tantana paytida bir ispan muxlis
“Doʻppingni ber menga!” – deya soʻradi.

Berdim.
Baxtli edi goʻyo hammadan!
Oʻzbek toʻyda borin tuhfa etadi.
Halol bahsimizga oxir berib tan,
Raqib oʻzbek boʻlib, shodon ketadi!

–––––––––

ТУҲФА

(Баҳодир Жалолов жангидан сўнг)

Ғалаба!
Бу қандай тотли, гўзал ҳис!!
Бутун борлиғимни шодлик ўради.
Тантана пайтида бир испан мухлис
"Дўппингни бер менга!" – дея сўради.

Бердим.
Бахтли эди гўё ҳаммадан!
Ўзбек тўйда борин туҳфа этади.
Ҳалол баҳсимизга охир бериб тан, 
Рақиб ўзбек бўлиб, шодон кетади!

11.08.2024

@n_jonuzoq

​​Olimpiada kundaligi

KERAKLI TOSH

Mayli, damin olsin osh koʻtarganlar,
Yostiqdan erinib bosh koʻtarganlar.
Kerakli toshning hech ogʻirligi yoʻq –
Yashasin el uchun tosh koʻtarganlar!

–––––––––

КЕРАКЛИ ТОШ

Майли, дамин олсин ош кўтарганлар,
Ёстиқдан эриниб бош кўтарганлар.
Керакли тошнинг ҳеч оғирлиги йўқ –
Яшасин эл учун тош кўтарганлар!

10.08.2024

@n_jonuzoq

​​Olimpiada daftari

ZAFAR

Kamolga yetgaydir har qanday reja,
Yorliq tushsa agar Tangri qoshidan.
Laylatulqadrga oʻxshar bu kecha –
Oltin yogʻilmoqda xalqim boshidan!

Zarrin yogʻdularga toʻlsin har dovon,
Izlaringni, elim, zafarlar koʻmsin.
Sohir lahzalaring boʻlsin bardavom,
Har bitta yorligʻing tilladan boʻlsin!


———————

ЗАФАР

Камолга етгайдир ҳар қандай режа,
Ёрлиқ тушса агар Тангри қошидан.
Лайлатулқадрга ўхшар бу кеча –
Олтин ёғилмоқда халқим бошидан!

Заррин ёғдуларга тўлсин ҳар довон,
Изларингни, элим, зафарлар кўмсин.
Соҳир лаҳзаларинг бўлсин бардавом,
Ҳар битта ёрлиғинг тилладан бўлсин!

@n_jonuzoq

​​​​Olimpiada daftari

PARIJ BRONZASI

Gʻulomjon, el koʻrkidir sen kabi polvon erlar,
Shohsupani zabt etding, bosavergin oldinga:
Parij bronzasining bir xislati bor, derlar:
Toʻrt yilda aylanarmish u, shubhasiz, oltinga!

———————

ПАРИЖ БРОНЗАСИ

Ғуломжон, эл кўркидир сен каби полвон эрлар,
Шоҳсупани забт этдинг, босавергин олдинга:
Париж бронзасининг бир хислати бор, дерлар –
Тўрт йилда айланармиш у, шубҳасиз, олтинга!

9.08.2024

@n_jonuzoq

​​Olimpiada daftari

ULUGʻBEK

Ulugʻbek bobomizning kenjatoy nabirasi –
Parij kahkashonini koʻzlab keldi Ulugʻbek.
Oʻzgalar koʻzi tinib, ichga tushsa nafasi,
Oyogʻi bilan oltin yulduz terdi Ulugʻbek!

Kiftga olib Vatanning oʻn ikki burj, oyini,
Shohsupa choʻqqisida egalladi joyini.
Qilich-u kamon kabi sermab-tortar poyini –
Temurbek navkaridek chapdast edi Ulugʻbek.

Dosh bermadi zarbiga Gʻarb-u Sharq  sarbozi ham,
Tushov soldi jarohat – kelmadi parvosi ham,
Qoʻsh oltinli yigitning balanddir parvozi ham,
Shoshga qarab shoshilib uchib-yeldi Ulugʻbek.

Tokioda ilk marta tilla tarix yozgandi,
Mehrini medal kabi el boʻyniga osgandi,
Yurt Otasi “Balli!” deb bagʻriga ham bosgandi,
Oliy izzatga goʻzal javob berdi Ulugʻbek!

Xalq ishonchin oqlamoq – er yigit  oʻyidadir,
Er yigitning maslagi raso-yu oʻyi dadil.
To oyogʻing raqiblar boshi-yu boʻynidadir,
Boshi osmon oʻzbegim koʻksin kerdi, Ulugʻbek!

———————

УЛУҒБЕК

Улуғбек бобомизнинг кенжатой набираси –
Париж каҳкашонини кўзлаб келди Улуғбек.
Ўзгалар кўзи тиниб, ичга тушса нафаси,
Оёғи билан олтин юлдуз терди Улуғбек!

Кифтга олиб Ватаннинг ўн икки бурж, ойини,
Шоҳсупа чўққисида эгаллади жойини.
Қиличу камон каби сермаб-тортар пойини –
Темурбек навкаридек чапдаст эди Улуғбек.

Дош бермади зарбига Ғарбу Шарқ  сарбози ҳам,
Тушов солди жароҳат – келмади парвоси ҳам,
Қўш олтинли йигитнинг баланддир парвози ҳам,
Шошга қараб шошилиб учиб-елди Улуғбек.

Токиода илк марта тилла тарих ёзганди,
Меҳрини медал каби эл бўйнига осганди,
Юрт Отаси "Балли!" деб бағрига ҳам босганди,
Олий иззатга гўзал жавоб берди Улуғбек!

Халқ ишончин оқламоқ – эр йигит  ўйидадир,
Эр йигитнинг маслаги расою ўйи дадил.
То оёғинг рақиблар бошию бўйнидадир,
Боши осмон ўзбегим кўксин керди, Улуғбек!

9.08.2024

@n_jonuzoq

​​Olimpiada daftari

TASHAKKUR

Rustam Assakalovga

Asotirlar qaʼridan chiqib kelgan qahramon
Olamga dovruq solgan Rustami doston oʻzing.
Yelka bilan togʻlarni surib oʻtgan pahlavon,
Raqiblarni qulatgan chaqmoqli osmon oʻzing.

Qirq yilda bir er yigit yoʻqdan bunyod boʻlarmish,
Davra aylansa qirq yil, elga u yod boʻlarmish,
Maydon chorlagan chogʻda qochsa, uyat boʻlarmish,
Sochga oq tushganda ham nomusga posbon oʻzing.

Oltin lahzalar, kumush onlar uchun tashakkur,
Shoda-shoda qoʻshilgan shonlar uchun tashakkur.
Sohir saharlar, shavqli shomlar uchun tashakkur,
Oʻn besh bor shohsupaga chiqmading oson oʻzing.

Vaqt – hakam. Ha, sevsang ham sen kurashni qanchalar,
Koʻrpa solgay sen uchun sokin soʻri, tanchalar...
Oʻksima, bosgay izing necha yoʻlbarspanjalar,
Sheryuraklarga umid ulashgan arslon oʻzing.

El koʻtarmish boshiga – qadding quyi inmagay,
Yuraklarda yuksalgan qadring quyi inmagay,
Shaʼningni alqab turgan sharaf kuyi tinmagay,
Shu eʼzozga munosib oqsoqol polvon oʻzing!

———————

ТАШАККУР

Рустам Ассакаловга

Асотирлар қаъридан чиқиб келган қаҳрамон
Оламга довруқ солган Рустами достон ўзинг.
Елка билан тоғларни суриб ўтган паҳлавон,
Рақибларни қулатган чақмоқли осмон ўзинг.

Қирқ йилда бир эр йигит йўқдан бунёд бўлармиш,
Давра айланса қирқ йил, элга у ёд бўлармиш,
Майдон чорлаган чоғда қочса, уят бўлармиш,
Сочга оқ тушганда ҳам номусга посбон ўзинг.

Олтин лаҳзалар, кумуш онлар учун ташаккур,
Шода-шода қўшилган шонлар учун ташаккур.
Соҳир саҳарлар, шавқли шомлар учун ташаккур,
Ўн беш бор шоҳсупага чиқмадинг осон ўзинг.

Вақт – ҳакам. Ҳа, севсанг ҳам сен курашни қанчалар,
Кўрпа солгай сен учун сокин сўри, танчалар...
Ўксима, босгай изинг неча йўлбарспанжалар,
Шерюракларга умид улашган арслон ўзинг.

Эл кўтармиш бошига – қаддинг қуйи инмагай,
Юракларда юксалган қадринг қуйи инмагай,
Шаънингни алқаб турган шараф куйи тинмагай,
Шу эъзозга муносиб оқсоқол полвон ўзинг!

7.08.2024

@n_jonuzoq

​​Olimpiada daftari

TANTANA

Kurash ruhi bilan oʻtmakda damlar,
Parij koʻchasida tantana toʻkis.
Jilmayib soʻz qotar bizga odamlar:
“Uzbekistan – dzyudo!
Uzbekistan – boks!!”

Bosh barmogʻi bilan tasdiqlar xursand
Qalbidan otilgan eʼtirofini.
Oʻzbek muxlislari kuy chalib tursa,
Xaloyiq oʻraydi gir atrofini.

Quyunday falakka uchirar goʻyo
Sarxush ruhimizni chirmagan faxr.
Bir paytlar bu kibor, zodagon dunyo
Faqat paxtamizni bilardi, axir.

“Oʻzbekiston” desa labini burgan
Bepisand kaslarni koʻrganmiz necha.
Bugun “Ofarin!” deb hayqirib turgan
Kimsalar bosh chayqab turardi kecha.

Dunyo oʻzgarmoqda,
Oʻzgardik biz ham,
Toʻzgʻidi ruhlarni siqqan qoliplar.
Millat oʻz qudratin anglab yetgan dam
Koʻpayar tushovin uzgan gʻoliblar.

Erkin havolarda dillar osuda,
Tole yolqiniga orzular qalov.
Bugun osmonoʻpar Eyfel ostida
Faranglar “Mersi!”deb tushirar palov!

Bu keksa, oqsuyak, injiq dunyoni
Tiniq, yosh idrok-la etayapmiz rom.
Tobora zaminning u yon, bu yoni
Sofyurak yurtimga tuyar ehtirom.

Qaltis kurashlarda qahramonlarcha
Orin pok saqlagan polvon diyormiz.
Yorugʻ manzillarga talpinar barcha,
Ne baxtki, shu ulkan poygada bormiz.

Marra chizigʻini kesib oʻtgan payt
Hammadan ilgari, surʼat olib tez –
Olqishlar yogʻilgay bizga paydar-pay:
“Uzbekistan – super!
Uzbekistan – best!!”

———————

ТАНТАНА

Кураш руҳи билан ўтмакда дамлар,
Париж кўчасида тантана тўкис.
Жилмайиб сўз қотар бизга одамлар:
“Узбекистан – дзюдо!
Узбекистан – бокс!!”

Бош бармоғи билан тасдиқлар хурсанд
Қалбидан отилган эътирофини.
Ўзбек мухлислари куй чалиб турса,
Халойиқ ўрайди гир атрофини.

Қуюндай фалакка учирар гўё
Сархуш руҳимизни чирмаган фахр.
Бир пайтлар бу кибор, зодагон дунё
Фақат пахтамизни биларди, ахир.

“Ўзбекистон” деса лабини бурган
Беписанд касларни кўрганмиз неча.
Бугун “Офарин!” деб ҳайқириб турган
Кимсалар бош чайқаб турарди кеча.

Дунё ўзгармоқда,
Ўзгардик биз ҳам,
Тўзғиди руҳларни сиққан қолиплар.
Миллат ўз қудратин англаб етган дам
Кўпаяр тушовин узган ғолиблар.

Эркин ҳаволарда диллар осуда,
Толе ёлқинига орзулар қалов.
Бугун осмонўпар Эйфел остида
Фаранглар “Мерси!”деб туширар палов!

Бу кекса, оқсуяк, инжиқ дунёни
Тиниқ, ёш идрок-ла этаяпмиз ром.
Тобора заминнинг у ён, бу ёни
Софюрак юртимга туяр эҳтиром.

Қалтис курашларда қаҳрамонларча
Орин пок сақлаган полвон диёрмиз.
Ёруғ манзилларга талпинар барча,
Не бахтки, шу улкан пойгада бормиз.

Марра чизиғини кесиб ўтган пайт
Ҳаммадан илгари, суръат олиб тез –
Олқишлар ёғилгай бизга пайдар-пай:
“Узбекистан – супер!
Узбекистан – бест!!”

5.08.2024

@n_jonuzoq