"МУШТУМ" журнали расмий канали 📰

“Ким олади-ё, шугинани-ё – 2025” танловига

БЎРИВОЙНИНГ ШИКОЯТИ

Ёмон қарашар бизга,
Қўй-қўзини ейди деб.
"Тили йўқ экан", – дея,
Ёмонламанг-да ҳадеб.

Сизга ўхшаб, бўғзига
Ўткир пичоқ санчмаймиз,
Тиқиб темир оғзига,
Қийма қилиб янчмаймиз.

Ёғни обдон қиздириб,
Қовурмаймиз қозонда.
Минг бўрини чақириб,
Тўй бермаймиз азонда.

Тўқ қоринга эт тиқиб,
Шиширмаймиз қоринни.
Очиқсак, овга чиқиб,
Топиб еймиз борини.

Оғиздан ортса ташлаб,
Юбормаймиз аҳлатга.
Сўнгаккача қиртишлаб,
Кемирамиз хилватда.

Не қилайлик, ноилож,
Ишимиз зуруратдан.
Қани, бўлсайди илож,
Тўярдик зироатдан.

Аммо худойим бизни
Этхўр қилиб яратган.
Ризқ ила рўзимизни
Қўй-қўзига қаратган.

Биз – жонзотлар бўриси,
Сиз – дунёнинг зўрисиз.
Аммо гапнинг тўғриси:
Биздан баттар бўрисиз!

Худойберди КОМИЛОВ,
Самарқанд вилояти, Ургут тумани

⭕️ Каналга обуна бўлинг 👇👇👇
https://t.me/mushtumjurnali

“Ким олади-ё, шугинани-ё – 2025” танловига

Э ВОҲ...

Э воҳ, замон қизларининг
           дилни ӯртар нози йӯқ,
Сӯзлаётган сӯзларининг
           шарқона пардози йӯқ.

Бӯй йигитлар ажиб танбал,
           эрка, инжиқ, оқбилак,
Кураш тушмас, от кӯрмаган,
           чапдаст чавандози йӯқ.

Кӯп шоирлар маддоҳ бу кун,
          қай олимлар лӯттибоз,
Созанда танбур тутмаган,
          ҳофизнинг овози йӯқ.

Урчиб борар қашқир, тулки,
          бӯрибосар занжирбанд,
Беҳисоб лайчалар изғир,
          овга ярар този йӯқ.

Ӯзин уста деган кӯп, лек
         ҳар мақомга йӯрғалар,
Бундоқ сӯраб борсанг асли
         ҳеч бирин устози йӯқ.

Амал аҳли тужжор тараф,
        фақир харидор мазлум,
Бу дунё бир бозор, бунда
        шайни соз торози йӯқ.

Сув келтирган хору зору,
        кӯза синдирган азиз,
Ҳақни ҳаққа ажратгувчи
        холис, одил қози йӯқ.

Ҳашам замон мезонидур,
        ӯндан тӯққиз нафс қули,
Орифликнинг йӯлларида
        жон бермоққа рози йӯқ.

Хилватларда вайсаб нодон
        ким-кимларни айблагай,
Бу даврон дардига малҳам
        бӯлар танти, ғози йӯқ.

Рустам ҚУРБОНОВ,
Самарқанд вилояти

Telegram  |  Instagram |  Youtube |  Facebook

“Ким олади-ё, шугинани-ё –2025” танловига

ПАЙПОҚ ОЛДИМ

Бир куни:

Хотин айтди:
– Дадаси,
Пайпоғингиз қолмабди.
Йил ўтибди, бу эркак
Битта пайпоқ олмабди.

Маошингиз турибди.
Рўзғор! Биз ҳам биламиз.
Ўлар жонга, якшанба
Бозор қилиб келамиз.

Бозорда:

Ёш боладек етаклаб
Бозор кезиб юрибмиз.
Пайпоқ излаб, пайпоқ йўқ
Расталарга кирибмиз.

Туфли олдик, шарф олдик,
Рўмол олдик, кўйлаклик.
Қишга пальто, ёз учун
Бир нималар кераклик.

Мен пайпоққа тўхтасам,
Тортиб кетар қўлимдан.
Атир-упа, кимхоб бор,
Пайпоқ чиқмас йўлимдан.

Бир пайпоқни кўрсатиб:
“Бу чидамсиз” деб кетди.
Яна бири “Сифатсиз”,
“Кўк киймайсиз” деб кетди.

“Оқ?” дегандим, “Йўқ” деди,
– Бало борми модага?
Топган пулиз кетади
Совун билан содага.

Бир пайпоқни ўпоқ деб,
Сўпоқ деди бошқасин.
Сабр берсин бозорга,
Хотин бозор қилмасин.

Нима дердим, кийган мен,
Хотин ювар пайпоқни.
Қора кийсам кийибман
Ёқтирмаса кўк, оқни.

Кетар чоғда сабабчи
Тўрвамизга солинди.
Пайпоқ учун келдик деб
Бир жуфт пайпоқ олинди.

Хуллас, тонгдан кечгача,
Бозор кезиб бетиним
Пайпоқ йўқ деб камини
Бутлаб олди хотиним.

Али Ал Меҳр.
Андижон вилояти, Асака шаҳри

⭕️ Каналга обуна бўлинг 👇👇👇
https://t.me/mushtumjurnali

Қуйида Алихонтўра Соғуний ҳазратларининг бугунимиз учун долзарб бўлган, ибратли ва ҳикматли фикр ва мулоҳазаларини ўқишингиз мумкин.

«Ҳозирги маданият оламида миллатнинг ўз хуқуқини сақлаш шарафи унинг қурол кучигагина боғланмишдир. Шунинг учун тўлиқ мудофаа кучига эга бўлмаган миллатлар инсоний ҳуқуқларидан бутунлай ажраб, ҳайвонлар қаторида хўрлик билан яшамоққа мажбурдирлар». «Шунга кўра, Ватан болалари олдимиздаги келажак кунларни эскариб, замонавий илм ўқишга чин кўнгиллари билан киришиб, ҳалол мерос ўз Ватанларини эгаллаш учун мудофаа қуввати тайёрлашга тиш-тирноқлари
билан ёпишсинлар».

* * *
«Инсоннинг энг севган қадрлик, қимматлик тўрт нарсаси бордур. Бу тўрт нарсага эга бўлмаган кишилар инсонлик шарафидан маҳрум бўладилар. Аларнинг энг биринчиси шулдурким, ҳар одам ўз эрк ва ихтиёрига эга бўлмокдур. Ўзида эрки йўқ, қўлида ихтиёри йўқ одамларнинг ҳайвондан нима фарқлари бор?
Иккинчиси — шаръий ёки қонуний касблари орқали топган молу дунёси, қилган меҳнатининг меваси шул топгувчининг ўз ҳаққи бўлган хос мулкидур.

Учинчиси — ҳар бир миллатнинг ҳақиқий онаси, у миллатнинг туғилиб ўсган, ота-бобосидан мерос қолган Ватанидур. Она Ватанни бошқалар тасарруфига қолдирмоқ Ватан авлодларининг кечирилмас оғир жиноятларидур, балки инсон ҳуқуқларига қилган хиёнатидур.

Тўртинчиси — ҳар мамлакат халқининг асрлар бўйи асралиб келаётган муқаддас динларидур»

* * *
«Ҳар бир давлат арбоби сиёсатда билимдонлик, сезгирлик, изчиллик ва жасорат каби фазилатларни ўзида мужассамлаштирмоғи керак. Бу тоифадаги ҳукмдорлар ўзлари кучли бўлганлиги учун атрофига мард ва очиқча сўзлаша оладиган кишиларни тўплаб иш юритади. Улуғ бобомиз соҳибқирон Амир Темур шундай зотлардан эди.
Темур султон таърифича, ҳукмдорга ўз фикрини ва мулоҳазаларини айтишга ботина олмайдиган ҳамда ўз соясидан чўчийдиган, қул табиатли мансабдорлар салтанатнинг энг хавфли душманларидур. Чунки улар ўзларининг ожизлиги ва жасоратсизлиги орқасида иккиюзламачилик билан иш юритадилар, кези келганда эса ўз ҳукмдорига ва ҳатто ватанига хиёнат қилишдан тоймайдилар. Шу боисдан буюк Амир Темур қул табиатли амалдорларни ёқтирмай, ўз қадру- қиммати, виждони, ор-номуси ва ғурурини сақлай оладиган кишиларни давлатнинг устуни деб ҳисоблаган».

Алихонтўра СОҒУНИЙ

👉 @mushtumjurnali