Yaxshiroq blog yuritish uchun 11 maslahatBlog yuritish uchun “HubSpot” platformasini eshitgandirsiz. U yerda asosan marketing haqida maqolalar chiqadi. Aynan shu platformada anchadan beri blog yuritadiganlar kontent yozish bo‘yicha o‘zlari bilgan eng muhim maslahatlar berishibdi. Ko‘p gapirib o‘tirmaymiz — keling, blog yuritishni osonlashtiradigan 11 maslahatni ko‘rib chiqamiz.
1. Ekspertlarni topingAgar siz yozayotgan sohangizda yetarlicha bilimga ega bo‘lmasangiz, o‘sha sohaning haqiqiy mutaxassisini toping. Ularni topganingizdan so‘ng esa yo‘nalishingiz, uslubingiz to‘g‘riligini tekshirtirib oling. Chunki eng samarali blog mutaxassislar yordamida yaratiladi. Bunday odamlarni topish uchun uchrashuvlar, tadbirlarga boring, ularga xolis yordam bering, o‘zingizni soting, xullas. LinkedIn’da shunchaki kontakt almashishdan foyda yo‘q ;)
2. Fidbek olingYana bir asosiy jihat — yozganlaringizni fikr-mulohaza qilish. Bir-nimalardir yozib ko‘ring, o‘zingiz tekshiring va tepada aytilgan tanishlarga tekshirtiring. U esa qilgan ishingizni o‘rganib chiqib, sizga fidbek bersin.
3. Kerakli mavzuda yozingShunchaki matn hech kimga kerak emas, hatto chiroyli yozilgan bo‘lsa ham. Algoritmlar nimani ko‘taryapti, qaysi gapni yozsam tarqalib ketarkan, hozir trend mavzu nima, deb qaramang. Siz gapirilishi kerak mavzularni, avval boshingizdan o‘tkazganlarni yozing. Agar foydali bo‘lsa, ergashadiganlar o‘zi topiladi.
4. Gaplaringizni isbotlaydigan ma’lumot bo‘lsinOdamlarga nima desangiz, o‘ylamasdan rozi bo‘lishini kutmang. Agar fikringiz dalil talab qilsa, uni isbotlash uchun isbot qidiring. Yozayotgan mavzungiz bo‘yicha qanchalik bilim va tajribaga ega bo‘lishingizdan qat’iy nazar, doimo tashqi manbalarni qidiring. Iqtibos bo‘ladimi, ilmiy tadqiqotmi — farqi yo‘q. Siz aytayotgan g‘oya eng yaxshiligini isbotlang.
5. Dam olingYozayotgan gaplaringizda o‘rinsiz so‘zlar, hamma joyda vergullar paydo bo‘layotgan bo‘lsa, bir aylanib keling. Bir necha vaqt boshqa ishingizni qiling, qahva iching, qushlarni tomosha qiling. O‘zingizga kelsangiz, yozayotganlaringiz mantiqiy, tabiiy chiqadi. Bu postni yozgungacha ham uch marta tanaffus oldik.
6. Aniq bir odam uchun yozingMasalan, qiziqarli narsa yozmoqchi bo‘lsangiz, u matndagi hazillarni tushunadigan do‘stingizga ko‘rsating. Agar rasmiyroq bo‘lsa, o‘sha matnni tushunadigan auditoriyaga tekshirtiring. Shunda maqolani to‘g‘ri yo‘nalishda berish oson kechadi.
7. Sevimli yozuvchilaringizga taqlid qilingMatn yozish uchun iqtidor kerak emas. Bilim, mehnatsevarlik, telbalik va o‘zingizning uslubingiz bo‘lsa, yetarli. O‘zingizni uslubingizni topish uchun esa boshqalarnikini kuzatishingiz kerak. Shunchaki yoqtirgan odamingizni kuzating, so‘z tanlashini, qo‘llaydigan hazillarini o‘rganing.
8. Yozganlaringizni o‘qingMiyangizda nimani nazarda tutayotganingizni qolganlar o‘qib, tushunmasligi mumkin. Shu sabab, yozganingizni o‘qib ko‘ring. Agar bir nafasda ketmasangiz, qolganlar nima haqida gapirayotganingizni bilishmaydi.
9. Yangiliklarni kuzatingEng kuchli blog egalari — soha kuzatuvchilari. Sohangizni doimiy ravishda kuzatib borsangiz, yozish uchun kontent doim tayyor bo‘ladi, shuningdek, mutaxassisligingiz bo‘yicha yangi bilimlarni olasiz.
10. Ko‘proq kitob o‘qingMiyangizni bo‘shatishni yana bir yo‘li — boshqa bir odamning miyasiga kirish. Badiiy adabiyotni ko‘p o‘qishingiz shart emas. Ishingizga aloqasi bo‘lmagan mavzularda yozadigan odamni toping. Sizga yozganlari go‘zal, tushunishga oson, qiziqarli tuyuladigan odamning asarlarini o‘qing. So‘z boyligini oshirib, tabiiy yozishni o‘rganishni eng samarali yo‘li.
11. Yozayotganda tahrir qilmangBiror so‘zni topishga qiynalgan payt bo‘ladi-ku, topolmasdan bitta gapga besh daqiqa sarflaydigan. Aynan shunday paytda o‘sha so‘z yoki jumlani o‘rniga qandaydir belgi qoldiring. Matnni tugatganingizdan so‘ng esa shu belgini qidirib, bo‘sh o‘rinlarni to‘ldiring, kerakli joylarini tahrirlang. Maqolangiz kichik bo‘lsa ham hammasini oxirida qiling.
Marketing o‘zbek tilida —
@marketingbolimi
