Маҳбуба Баҳодир қизи

Ин Шаа Аллоҳ, янги ҳикояни бошлаб олдик, Аллоҳим икки дунёмиз учун манфаатли қилсин, илоҳим.
Бу бир қизнинг хотиралари, ҳасратлари асосида ёзилаётган ҳикоя. Реакция билдириб ўтинг...

2#

Келинойим Шаҳзодни бешикка белаб бердилар, бувимнинг хонасида болани тебратиб ўтириб зерикдим. Бувим "сервант" деб атайдиган шкафдан оилавий расмлар турадиган альбомни олиб, вароқлай бошладим. Шу альбомни яхши кўраман . Аввал, оқ -қора, кейин рангли расмлар келади. Оқ -қора суратларда бувим билан бувамнинг бир -бирига суяниб тушган расмлари ва дадам, амаким, аммаларимнинг болаликда тушган суратлари ҳам бор. Менга энг ёқадигани ойим билан адамнинг хиёбонда қўл ушлашиб тушган суратлари.Кейин мен ва укамнинг зоопаркда, кафеда, хиёбонда дадам ва ойим билан тушган расмларимиз ҳам ёқади. Ойим жудаям чиройли бўлганлар, ҳалиям маҳалладаги ўртоқларимнинг ойисидан ёш кўринадилар. Доим ўзларига қараб юрадилар. Шунинг учунми, адам бувимнинг тили билан айтганда" ер-у кўкка ишонмайдилар". Ойим ҳам дадамга фақат жилмайиб гапирадилар. Бувам кулиб: "Хўжақўғонлик доданг ойингни исмини Ширин қўйиши керак эди. Ахир булар Фарҳод ва Ширин бўлса, -кейин ҳар доимгидай бувимга қараб, -Нима дединг, онаси"-дейдилар. Бувим бўлса, бувамга қараб ўйчан:
-Балки яхшиям, Ширин бўлмагандир, қўша қарисин, -деб қўядилар. Бувам эса:
-Ҳа, онаси адабиётчисанда, ҳамма асарнинг хулосасига қарайсан, -дейдилар.
Яхши бўлди, Шаҳзод ухлаб қолди. Секин ҳовлига чиқдим. Ойим Хўжақўрғонлик бувим билан телефонда гаплашаётган эканлар:
-Шу, соат олтиларга бораверинглар. Ўзимиз ҳам ўша пайтларда борамиз, куёвингиз келсинлар, ҳали йўқлар, ҳайронман. Туғилган кунлари ҳам ёдида йўқми дейман, телефон қилсам, ўзим қўнғироқ қиламан деб ўчирдилар, шу баравар жим. Қайинопаларим ҳам тўғри кафега борадиган бўлишди. Бўпти, укаларимга айтинг, келинлар қолиб кетмасин. Катта жой гаплашганмиз. Майли, биз секин тайёргарликни бошлайликчи, -деб суҳбатни якунладилар.
Бувам ҳар доимги одатлари бўйича ҳаммадан аввал кийиниб олиб, бувимни шоширишни бошладилар. Ойим, мен, укам, келинойим ва жиянларим- ҳаммамиз тайёр бўлдик, аммо ҳамон дадамдан дарак йўқ. Келақолсаларчи, кун кеч бўляпти. Машинанинг овози эшитилса, узун кўйлагимнинг этагини кўтариб, дарвозага югураман. Йўқ, дадамнинг машинаси кўринмайди. Энди ойим бетоқат бўла бошладилар. Бувам, бувим ҳамма қўнғироқ қилиб кўрди. Жавоб йўқ.
Бир пайт эшигимиз тагида машина келиб тўхтади ва дадамнинг кимлар биландир ҳазул -ҳузул қилиб , баралла кулишган овози келди. Ҳаммадан аввал бувам дадамнинг истиқболига чиқди. Дадам билан келганлар бувам билан сўрашишди.
Ойим ясаниб олган, аммо оёғида шиппак билан чиқиб, дадамга салом берди. Дадам шерикларига "юринглар" ишорасини қилиб ойимга:
-Ширин, залга жой тайёрла, тезроқ, -деди. Ойим кутилмаганда овозини баландлатиб:
-Ғалатимисиз, "Ором" да ҳамма сизни кутиб ўтирибди-ку, биз ҳам йўл қараб кўзимиз тешилди. Жой "заказ" қилинган бўлса, ўртоқларингизниям ўша ёққа олиб бора қолинг, Фарҳод. ака, -деди. Мен хурсанд бўлиб кетдим. Хайрият, борарканмиз. Шу пайт дадамнинг ўртоқларидан бири аввал ойимга, кейин дадамга қараб:
-Фарҳод аввал, хотинчангдан рухсат олиб, кейин бизни чақирмайсанми, кўчани ҳеч кимга бермай кериласан, қойил -деди. Келганлардан яна бири зарда билан баланд овозда:
-Этдим, бормайлик, деб, ҳамманг чиқ, машинага -деди ва дадамга қараб, -Тфу, эркак, -деди. Дадам чайқалиб кетди. Биринчи марта шунчалик ғазабли кўрдим дадамни. Аввал, ўртоқларига сўнг ойимга қаради ва баланд овозда:
-Талоқсан, уч талоқ. Минг талоқ, -деди. Боядан бери индамай ўтирган бувим додлаб юборди:
-Воййй, шўрииим...

Давоми бор.


https://t.me/Mahbuba_Bahodir_qizi

Бисмиллаҳир роҳманир роҳийм

1#

Сўнгги сўз

Матлубани шундай ёмон кўраман, доим ғирром қилади. Ҳозир ҳам қизлар билан ўртага тушар ўйнаётганимизда кўзини лўқ қилиб "менга копток тегмади" деб туриб олди. Бўлмаса, тўпни ўзим отдим, шундоқ қўлига тегди, ҳатто оғриқдан кўзини бир юмиб очди. Комила копток текканини ҳарчанд айтса ҳам, "тегмади, тегмади" деб ўртадан чиқмади. Жаҳлим чиқиб кетди, коптокни отиб юбордимда:
-Мен, ўйнамайман, ўзи шундоғам уйга киришим керак, -ўзимга тикилиб турган дугоналаримга қараб янаям дадиллашдим, ахир мақтанишнинг айни фурсати эдида,

-Бугун дадамнинг туғилган куни, ресторанда оилавий нишонлаймиз, келинойим сочимни жингалак қилиб қўймоқчи эдилар, бўпти қизлар, -шундай деб, ортимдан алами келиб қолган Матлубага бир қараб, мағрур даврани тарк этдим.
Уйга кирсам, бувим билан бувам супада чой ичиб, гаплашиб ўтиришган экан, мени кўриб бувим ҳайрат тўла оҳангда:
-Рухсора, наҳотки, ўн марта чақиришимизни кутмасдан кириб келдинг, қизим, -деб, кулдилар ва бувамга қараб, -Қизингизга эс кирибдими?-дедилар, мен томонга имо қилиб. Буважоним бўлса ҳар доимгидай эркалаш оҳангида:
-Онамни урушма, бувиси. Менинг қизимдек қиз бор эканми!? Етти иқлимда йўқ. Онамку, ўзимни-деб, менга қараб икки кўзларини қисиб жилмайиб қўйдилар.
Аслида бувим ҳам бувамдан кам яхши кўрмайди. Фақат шомда ўйнасам жаҳллари чиқади.
Тўғрисини айтсам, бу катта оилада энг эркаси ўзимман.
Яхшиси, оиламизни бир бошдан таништираман.
Бувам мактабда тарихдан дарс берганлар. Бувим эса она тили ва адабиётдан. Иккалалари ҳам мен ўқийдиган мактабда ишлашган экан. Ҳозир нафақадалар. Иккита аммам турмушга чиқиб кетишган, иккала аммамда ҳам мен қатори қизлари бор. Улар келса, эҳҳе, уйимиз байрам бўлиб кетади. Ойим билан Дилнура келинойим (Шерзод амакимнинг аёли) бир кун олдин нарса пишириб, ҳаракатни бошлаб юборишади. Яна чалғиб кетдим. Хуллас, дадамнинг исми -Фарҳод ўттиз беш ёшдалар, ойимнинг исми -Дилором, аммо дадам негадир Ширин деб чақирадилар. Дадам банкда ишлайдилар, бувамнинг айтишича, бўлим бошлиғи экан. Онам институтда математикадан дарс берадилар. Ўзи ойим билан дадам курсдош бўлишган экан.
Укам бу йил биринчи синфга чиқди, мен эса олтинчи синфга ўтдим.Оиламизда яна адамнинг укалари Шерзод амаким ва Дилнура келинойим, ҳамда иккита тўпалончи Илёс ва Шаҳзод ҳам бор. Шунча ўғил болаларнинг ичида битта қиз ўзимман. Ёлғиз қиз бўлиш яхшику-я, аммо бола боқиш ёқмайдида. Ҳозир ҳам келинойим мени кўриб қувониб кетдилар
-Рухсорахон, Шаҳзодга қараб турасизми, шундоқ акангизнинг кийимларини дазмол қиламану, кейин сизнинг сочингизни плойкада жингалак қиламиз, хўпми, -дедилар, қовоғим осилиб кетганини кўриб, юзимдан чимдиб, сочларимни силаб қўйдилар. Охирги жумлалари ёқиб, болани олақолдим.

https://t.me/Mahbuba_Bahodir_qizi

Янги асар ёзилмаяпти, деб канални тарк этаётганлар -хуш борсинлар. Тўғриси, ҳеч ҳам хафа бўлмайман. Ёзишга илҳом берса, битта одам учун ҳам ижод қилавераман, аммо ўзимни мажбурлаб ёза олмайман.
Ҳозирча ўзимга ёққан ибратли постлар бўлса имкон қадар илиниб тураман.

Шеър ёзадиган кунингиз тонг бошқача отади. Қалбингизда оғир бир нарса бўлади-ю, уни қоғозга тўкиб соласиз. Шеър пайдо бўлади. Кўнгилнинг тубини мана шундай оғритиб, безовта қилиб яралган шеър ҳақиқий шеърдир.

Мунаввара УСМОНОВА


Менимча, насрда ҳам шундай.
Янги асар бошлайсизми, деб сўраган азизлар, Мунаввара Усмонова айтганларидек, тонг бошқача отишини кутяпман.
Мени маъзур тутинг...
Қачон янги асар бошлашим ўзимга ҳам аён эмас.

https://t.me/Mahbuba_Bahodir_qizi

Олишув

Хуршида турмушга чиқиб, боласи билан қийналиб қолгач, отасининг маслаҳати билан ўқишини сиртқи бўлимга ўтказди. Уч йил бирга ўқиган курсдош дугоналари билан хайрлашиш, қолаверса, талабаликнинг тотли дамларини тарк этиш анча мушкул бўлдими, кўникишга бироз қийналди. Кейин уйи яқинидаги мактабга ишга кирди-ю, севган касби билан шуғулланиш бу ҳақиқий завқ эканини англади. Энди унинг фикр-у зикри янгича методлару, дарс учун қувноқ ўйинлар топишдан иборат эди. Ёш эмасми ғайрати ичига сиғмайди, ҳатто баъзи кунлари эртанги дарс учун хонани безатаман деб, эндигина икки ёшга тўлган қизини яслидан олишга ҳам кечикиб, боғча опалардан дашном эшитиб олади .
Майнинг охирлари, мактаб фойесига имтиҳон жадваллари акс этган эълонлар илинганини кўриб шунчаки кўз югуртириб, яна қайта ўқиди. Ёш бўлишига қарамай уни битирувчи синфлар имтиҳонига ҳайъат аъзоси сифатида олишибди. Бироз довдираб турдию, кейин негадир кўнгли ёришди. Ўзини катта ўқитувчилардек имтиҳон олаётгани кўз олдига келиб жилмайди.
Имтиҳонни ёзма шаклда олиб, текширишга ўтирдилар. У танимайдиган қандайдир ёши ўзидан каттароқ аёллар мулозамат билан чой дамлаб келди.Кейин билса ота -оналар қўмитасидан экан.
Ишларини тугатиб, шерикларига бугун шанбалигини, қизалоғи ясли ишламагани боис қўшни аёлда қолганини айтиб , кетишга ижозат сўради.Шунда боя чой дамлаб келган аёл:
,, Вой, ўргилай, ҳозир иссиқина ош келади, сизлар учун атай дамладик, раҳмат шунча таълим бердинглар, озгина кутиб туринг, "_деди қўли кўксида.Хуршида ёш эмасми жуда ўнғайсизланиб ,қўлини кўксига қўйиб узурини айтиб кетишга чоғланди.Шунда ҳалиги аёл чаққонлик билан орқасидан келиб ,яна ўша табассум билан: ,, Шошманг, мана шунга ўзингиз бир пиёла чой ичарсиз, чин дилдан "-деди-ю, қўлига конверт тутқазиб, оғиз очиб эътироз билдиргунича кўздан ғойиб бўлди.
Хуршида йўлда кетаяпти -ю, ўзи билан, балки нафси олишиб борарди. ,, Орқасидан бориб қайтариб берсам бўлардию, нега ундай қилмадим. Э, бу ўзи табиий ҳол, институтда, эҳҳей , бунақа ошларни талайини дамлардик... Лекин ўшандаям кўпчилик норози бўлиб берарди-да " Узоқ олишди, ўзи билан, балки нафси билан..Шу алпозда уйига етиб келганини ҳам сезмай қолди. Узоқдан қизидан каттароқ қўшни қизча ўзи томонга югуриб келиб:
,, Дилоромни боши ёрилди, "- деб , уч-тўрт хотин тўпланиб турган томонга югуриб кетди. Борса қизалоғини ташлаб кетган қўшни аёл ҳижолат билан : ,,Кўрмайсизми, гилам ёваётгандик, сирпаниб ариқчага йиқилибди, докторга оборайми деб тургандим, "-деди, жовдираб.
Хуршида қон тўхтамаётганини кўриб, юраги қинидан чиқай деди. Кеч бўлиб қолгани учун зудлик билан яқинроқдаги хусусий шифохонага югурди.
Хайрият ,хирург ўз ўрнида экан, қизалоғини диққат билан текшириб : ,,Тикиш керак,"–деди қатъий.Ва ишга киришиб кетди.Боласининг қўрқиб, додлаши Хуршиданинг юрагини баттар эзиб юборди. Доктор ишини тамомлаб: " Олтмиш минг сўм бўлди, кассага тўлайсиз,"- деб қоғоз тутқазганида бирдан пулсиз югуриб келавергани ёдига тушди-ю, довдираб қолди. Касса дарчасига яқинлашганида бояги аёл тутқазган конверт ёдига тушди. Дарров очиб қаради-ю, қотиб қолди.Конверт ичида олтита ўн минг сўмлик пул турарди. Шунда бир зум хаёлидан нафсини енгиб шу пулни олмаганида ҳозир гўдаккинаси қийналмаган бўлармиди, деган ўй ўтиб, ичини кемирди

Маҳбуба Баҳодир қизи

https://t.me/Mahbuba_Bahodir_qizi

ХОЛИҚ ЗОТНИНГ МЎЪЖИЗАСИ

  Фақат хурмо ва сув истеъмол қилиб бўлса-да, яшай оласиз. Расулуллоҳ соллаллоҳу алайҳи ва саллам: «...Хурмоси бўлмаган хонадон аҳли очдир», деганлар (Имом Абу Довуд ва Имом Ибн Можа ривояти).
  Хурмо таркибида 23 хил аминокислота бор.
  Масалан, триптофан аминокислотаси миянинг функционал ва руҳий ҳолатини меъёрда ушлаб туради. Тинчлантирувчи ва бироз уйқу чақирувчи хусусиятга эга. Натижада мия ҳужайралари фаолияти тезлашади, склероз олди олинади.
  Глютамин аминокислотаси ошқозон кислотасини (ширасини) камайтиради.
  Хурмо таркибидаги глюкоза ва фруктоза (26–55 фоиз) витамин В5 билан организмда фаол сўрилиб, очлик ҳиссини йўқотади, жисмоний қувватни оширади. Мия ва асаб тизими фаолиятини тўлиқ тиклайди.
  Бошқа мевалар каби хурмо таркибида холестерин сақланмайди.
  Олимларнинг фикрича, бир кунда 10 дона хурмо еса, одамнинг суткалик магний, мис, олтингугурт, темир, кальцийга эҳтиёжи қопланади. Эътибор беринг, фақат хурмо ва сув билан инсон бемалол бир неча йил яшаши мумкин.

Демак, хурмо – бу таом, дори, ширинлик ва шарбатдир.

@интернет

https://t.me/Mahbuba_Bahodir_qizi

РИЗҚ ҲАҚИДА

Бир фақир киши бор эди. У онасини, аёлини ва зурриётини боқар эди. У бир бойнинг қўлида хизматкор бўлиб ишлар, ишига холис ва ишини комил суратда адо қиларди. Кунларнинг бирида у ишга келмади. Шунда хўжайини ўзига ўзи:
"У ишга келмай қўймаслиги учун унинг маошини бир динорга зиёда қилишим керак. Аминманки, у маошини кўтарилишини таъма қилиб, ишга келмади. Чунки мени унга муҳтож эканимни билади-да" деди.

Иккинчи кун бўлгач хўжайин унга маошини бераётиб, бир динор зиёда қилди. Хизматкор ҳеч нарса демади ва хўжайиндан сабабини ҳам сўрамади. Бир қанча муддатдан кейин хизматкор яна келмади. Хўжайин жуда қаттиқ ғазабланиб:
"Ўша зиёда қилган бир динорни камайтираман" деди. Камайтирди ҳам, хизматкор ҳеч нарса демади ва маошининг камайгани сабабини ҳам сўрамади. Хўжайин ҳодимни олдинги ишини такрорлагани (маоши кўпайса ҳам, камайса ҳам индамагани)дан ажабланиб, сўради:
-Маошингни зиёда қилдим сабабини сўрамадинг, камайтирдим, ҳеч нарса демадинг?
Хизматкор:
-Биринчи марта келмаганимда Аллоҳ менга бир чақалоқ туҳфа этганди, ўшанда маошимни кўпайтириб, мукофотлагандингиз. Айтдимки: "Бу чақалоғимнинг ризқи, ўзи билан келди”. Иккинчи марта келмаганимда эса, онам вафот этгандилар, маошимни камайтирганингизда дедимки: "Бу онамнинг ризқи, онам кетди, ризқи ҳам”.

@интернет

https://t.me/Mahbuba_Bahodir_qizi

Ассалому алайкум, кўпчилик обуначиларимиз узатишни ўчириб қўйганимизга ҳайрон бўлишган, шекилли.
Азизлар, охирги ёзилган ҳикояни кўпчилик ҳали тўлиқ ўқиб чиқиб улгуришмади. Ҳикояни ўқиб бўлишгандан кейин "Қуёш ботиб борар" каналдан ўчирилади ва яна бошқа постларни узатиш имкони бўлади. Илтимос, тўғри тушинасизлар, деб умид қиламан.
Баъзи ҳикояларни муаллиф номисиз беришганини кўриб дилим хира бўлади. Шунинг учун бошқа каналлар олишмагани маъқул деб ҳисоблайман

Маҳбуба Баҳодир қизи

Қуёш ботиб борар...

Ҳикоя (кўп қисмли)

1-қисм
2-қисм
3-қисм
4-қисм
5-қисм
6-қисм
7-кисм
8-қисм
9-қисм
10-қисм
11-қисм
12-қисм
13-қисм
14-қисм
15-қисм
16-қисм
17-қисм
18-қисм
19-қисм
20-қисм
21-қисм
22-қисм
23-қисм
24-қисм
25-қисм
26-қисм
27-қисм
28-қисм
29-қисм
30-қисм


https://t.me/Mahbuba_Bahodir_qizi