Javohir Izzatulloh | blog

Birov aytapti: Koreya, Amerika oʻz yoʻliga. Lekin yangi avlodga birorta kasb mukammal oʻrgatilsa, u Rossiyaga ketmay, musaffoda kunini koʻroladimi?

Men deymanki, masala ancha murakkab. Shunchaki kasb o'rgatish yechim emas. Hozirgi kunda yaxshi kadrga juda ko'p bilim va ko'nikmalar kerak bo'lyapti. Qandaydir kasbdagi texnik bilimlarning o'zi yetarli bo'lmayapti.

Masala insonning yoshligidan boshlab to'liq ta'lim davri mobaynida sifatli ta'lim olishi haqida!

📌 @javharuz 📌

O'zbekistondagi ko'plab davlat tashkilotlarida boshlangan milliy liboslar targ'ibotiga ko'zim tushdi. Hatto Toshkent shahar hokimi o'z xodimlariga milliy liboslar kiyishni tavsiya qilib qaror chiqardi.

Shu voqealar so'nggi turtki bo'ldi-yu, men ham bir muncha vaqtdan beri o'ylab yurgan ishimni qilishga qaror qildim. Bosh kiyimimni milliy shakllar tushirilgan do'ppiga almashtirdim.

Bunga bosh sabablardan biri hozirgi ajabtovur zamonda o'zlikni asrash masalasidir! Muhimi, xayrli bo'lsin. Sizlarga ham milliy do'ppilarni tavsiya qilaman. )

📌 @javharuz 📌

Farzandingiz necha yoshda bo‘lishidan qat'i nazar, u bilan katta odamlardek muomala qiling.

Bolaga qanot beradigan so‘zlarni ko‘p ayting. Bolangizni seving. Sevilgan, muhabbatga to‘yib o‘sgan bolada o‘ziga ishonch bo‘ladi.

Bolangizga sifatli poyabzal olib berolmasangiz ham, albatta kitob olib bering.

Bolaning shaxsiy xonasi bo‘lmasa ham, shaxsiy kutubxonasi bo‘lsin.

Farzandingiz haqqiga ko‘p-ko‘p duo qiling. Farzandingizni hech qarg‘amang.

Bugungi befarqligingiz ertaga qimmatga tushmasidan oldin harakat qiling.

©️ Jamoliddin Muhammadjon

Biznesda eng muhim qarorlar nimani qilish bilan emas, balki buni kim qilishi bilan bog'liq.

© Jim Kollinz ("Yaxshidan buyukka" muallifi)

Kecha xorijdan kelib O'zbekistonda bir muddat yashagan va mahalliy biznesmenlar bilan ishlab ko'rgan vatandosh akamiz aytyaptilar: biz ommaga olib chiqishimiz va muhokama qilishimiz kerak bo'lgan mavzulardan biri — bu pul masalasi ekan.

Boshida tushunmadim, keyin bilsam, masala mehnat uchun o'z vaqtida haq to'lash haqida ekan. Akaniyam yaxshigina tushirishganmi deyman, achinib, og'rinib gapirishlarini biroz kuzatib o'zim ham ezildim.

"Va'dago vafo — bu tarbiya va axloq masalasi, bu bizning katta og'rig'imiz", deyish bilan kifoyalandim. Chunki rostan ham atrofimizda aldanganlar, mehnat qilib o'z peshona terisi uchun haqqini ololmay yurganlar kammi?

Qachon shu tubanlikka tushdik, hayronman...

📌 @javharuz 📌

Inson o'zi jamiyatda og'riq deb hisoblagan masalaga o'zini bag'ishlamaguncha katta o'zgarishlardan umid yo'q.

📌 @javharuz 📌

100 yildan keyingi Tarix fani kitoblarida bugungi jarayonlar qanday tasvirlanishini taxmin qilib ko'rgim keladi. Juda qiziq.

📌 @javharuz 📌

Bugungi ziyolilar kim? Dostoyevskiyni o‘qimasdan ziyoli bo‘lish mukinmi? Pushkinnichi? Ehtimol, "Kichkina shahzoda"ni o‘qimaganlarni yosh ziyolilar qatoriga qo‘shishmas?!

Balkim, ziyoli Abdulla Qodiriyning asarlarini to‘liq bilgan odamdir? Ehtimol, ziyoli jadidlar haqida tadqiqot qilib, doktorlik darajasini olgan odamdir? Shumi ziyoli?!

"Xix, kutubxonaga Lermontovni qidirib kirsam, turk adabiyotini olib tashlashibdi", deyish ziyolilikmi?!

Aslida, ziyoli degani nurli deganidir. Nurli odam o‘zidan nur tarqatadi, boshqalar esa o‘sha nurdan foydalanadi. Bu xuddi sirotdan o‘tayotganda orqadagilar "nuringizdan bizga ham bering" deb so‘ralganidek, o‘ziga ham boshqalarga ham manfaat keltiradigan nur bo‘ladi.

Barcha fanlarning otasi, birinchi muallim unvoniga ega bo‘lgan yunon mutafakkiri Arastu ziyolimi? O‘z davri uchun ha, lekin bugun uchun yo‘q. Nimaga? Chunki uning ziyosi bugunni yoritolmaydi. Xuddi o‘ninchi asrni ham yoritolmagandek.

O‘shanda nima bo‘ldi? Oramizdan Forobiy chiqib, Arastuning fikrlarini zamonasiga moslab berdi. Uning fikrlaridagi hikmatni topib, o‘zining falsafasi bilan sayqallab, o‘z davridagi eng ilg‘or g‘oyalarni ilgari surdi. Shuning uchun ham, u Arastudan keyingi Ikkinchi muallim unvoniga sazovor bo‘ldi.

Bugun Forobiyning asarlarini ming marta o‘qigan ziyolimi? Yo‘q, bugun uning asarini o‘qigan inson xuddi Ibn Sino Arastuning asarini o‘qib tushunmaganidek, qirq marta o‘qisa ham darrov tushunmaydi. Bugungi ziyoli, xuddi Forobiy qilganidek, Ibn Sino, Beruniy, Ibn Xoldun, Ibn Rushd, Ibn Arabi, Ibn Tufayl, Kindi kabi sharq allomalarining asarlarini o‘qib, undagi hikmatni bugungi kun haqiqatlari bilan sayqallab, bugungi kun o‘quvchisining qalbiga yetkazib berolgan kishidir.

Ming kitob o‘qiganing bilan undan jamiyatga manfaat chiqarib bermasang, ilmli bo‘lasan, ziyoli emas. O‘sha ilmga amal qilsang qilding, agar qilmasang, kitob ortilgan eshak bo‘lasan, ilmli emas. Garchi u kitoblar Lermontovniki bo‘lsa ham.

©️ Said Komil Muhammad Karim