МИРИШКОРИМ.
"Ипак йўл"да карвон тортиб ном топган.
Бийдек чўлда кетмон чопиб, нон топган.
Ҳалол меҳнат билан обрў, шон топган.
Миришкорим, ифтихорим, она элим.
Болалигим кезган тўпир, сўкмоқ йўл.
Тўртта қудуқ эл ҳалқумин қилган ҳўл.
Қалби нафис, ғурури тоғ, қадоқ қўл.
Миришкорим, ифтихорим, она элим.
Бир туп юлғун, саксовулдан топиб соя.
Лаб гезариб навқон терган ғаллапоя.
Беш гузарга битта эшон, битта доя.
Миришкорим, ифтиҳорим, она элим.
Зоғорага гоҳ тўлмаган эски тандир.
Арпа кулча, кодипечак, тотли патир.
Таомларинг машҳурлиги элга татир.
Миришкорим, ифтихорим, она элим.
Оқ қорани танидим мен сабоғингдан.
Йироқ кетгим келмас иссиқ қучоғингдан.
Лабим босиб бир ўпайин қабоғингдан.
Миришкорим, ифтихорим, она элим.
Давринг сур деб, тулпор от ё той берасан.
Ҳориб қолсам меҳринг қўшиб чой берасан.
Сўнгги дамда пок елкангдан жой берасан.
Миришкорим, ифтихорим, она элим.
Лола билан безанади баҳорлари.
Момолардан мерос, мунчоқ, туморлари
Туҳфа бўлсин Заҳриддиннинг ашъорлари.
Миришкорим, ифтихорим, она элим.
https://t.me/ijod_qalbi