Бухоро. Ёзувчилар уюшмаси

* Дил дафтари

МАКТУБ

Дунё асли такрор-такрор юрагингдан тонишмасми?
Ишқ оташи армонларга айланганда, ёнишмасми?
Ҳавво янглиғ Одам излаб кўкка учган кабутарим,
Бу савдолар, бу савдолар сенга асло танишмасми?!

Карвон шошиб ўтган маҳал мен томонга қарайсанми,
Шеърингизнинг давомини айтинг, дея сўрайсанми?!
Бир тумор бор, осмон ҳадя этган тумор, юрагимда,
Уни сенга ҳадя этсам, асрамоққа ярайсанми?

Маъюс-маъюс термуласан Ой балқиган ҳовузларга,
Оғушимда Ойдек балқи, термулганча юлдузларга.
Капалакнинг қанотига мактуб битиб юбор, қумрим,
Даҳри дуннинг не иши бор сендек, мендек ёлғизларга?!

Қояларни титратмайди ёлғиз шернинг наъралари,
Овозимни ютиб кетди дунёнинг тор даралари.
Қалдирғочнинг қанотига кўнглинг илиб юбор, қумрим,
Ахир, сен ҳам, мен ҳам ўтли муҳаббатнинг болалари.

Ортга боқсам, изим йиғлаб ўтса, бундан кимга фойда,
Мангу уйғоқ кўзим йиғлаб ўтса, бундан кимга фойда?!
Юрагимни бир тўп қузғун талашганда, қараб турдим,
Маҳшаргача сўзим йиғлаб ўтса, бундан кимга фойда?!

Не бўлибди бизнинг тонгдек тоза, мунглиғ нафасларга,
Ҳали йиғлаб хат битгаймиз бу оташлар, бу сасларга.
Ҳаввогинам, минг йил кутган Одамингдан тонасанми?!
Минг йил излаб топганим – сен, ташлаб кетма нокасларга...

Шодмон СУЛАЙМОН

Уланиш учун: https://t.me/ijod_bustoni

Муҳаббат, сен...

Муҳаббат, сен чиройли,
Муҳаббат, сен гўзалсан.
Тағин бир зум турайлик,
Гапирмайман, уялсанг...

Сўнг кетармиз. Сездимки,
Мен орзуга етмадим.
Сени шундай севдимки,
Қўлингдан ҳам тутмадим.

Қўлинг... сенинг қўлларинг,
Мулойимдир, эҳтимол.
Айри тушди йўлларим,
Севар ёрим, яхши қол.

Муҳаббат, унут мени,
Ва мен ҳам... унутмайман.
Тушларингда кут мени,
Тушларингга киргайман...

Муҳаббат, сен чиройли,
Муҳаббат, сен гўзалсан.
Кел, кўришиб турайлик,
Саломлашмай, уялсанг...

Муҳаммад ЮСУФ

Уланиш учун: https://t.me/ijod_bustoni

***
Сийратдаги сирлар кўчганда тилга,
Не гўзал туйғулар сиғмаса дилга,
Минг йиллик умидлар бўлганда сароб,
Нима таскин бўлар куйган кўнгилга?

Уммон бўлиб тошса кўзимдаги нам,
Тор кўринса кўзга шундай кенг олам,
Яшамоқдан безиб кетган чоғларим,
Фақат бир зот бўлар жонимга малҳам:
Кундузи дуода тунлари бедорим,
Онаизорим.

Омадим келмаса йиғлаганим у,
Изтиробда бағрин тиғлаганим у,
Ғанимларим қоним ичиб шодланса,
Шундай кенг дунёга сиғмаганим у.

Мен бир содда касман, найрангдан йироқ,
Тортганим изтироб, топганим фироқ.
Кўксимда осиғлиқ турар ҳануз ҳам
Онам ёшлигимда таққан кўзмунчоқ.
Мени балолардан асрар туморим,
Онаизорим.

Яримта нонимни илиб кетса дўст,
Эл бўлиб, теримни шилиб кетса дўст,
Боримни қўлимдан юлиб кетса дўст,
Дилдаги сиримни билиб кетса дўст,
Куйдириб бағримни тилиб кетса дўст,
Йиқилсам, устимдан кулиб кетса дўст.

Дўст дедим, дўстимдан панд едим охир,
Дил бериб, оқибат дард едим охир.
Аросат ичинда тўлғониб, ёниб,
Ўртаниб яшамоқ нақадар оғир.
Бу ёруғ дунёда топганим, борим,
Онаизорим.

Топганим-тутганим боламга деган,
Ҳар луқма ютганин боламга деган,
Мен кўрмаган кунлар ўғлимга тортиқ,
Бир умр кутганим боламга деган.
Боласидан тортса, куйганим ўша,
Дуосида айтиб, суйганим ўша,
Олисларга кетсам, соғиниб, алқаб,
Суратим кўксига қўйганим ўша.
Фарзанд қайғусида сочлари қорим,
Онаизорим.

Сенга не улашдим, сенга не бердим?
Фақат ғамни тутдим, фақат дард, озор.
Кўзларингда фарзанд ташвишин кўрдим,
Азобимдан мерос сочингдаги қор.
Бу телба дунёда топганим, борим,
Онаизорим.

Камолиддин ШУКУР

Уланиш учун: https://t.me/ijod_bustoni

* Сиз соғинган сатрлар

СИНГИЛЛАРИМ

Ота уйида ўтар умр тушдайгина,
Худо сизга сабр берсин, сингилларим.
Бир кун учиб кетасизлар қушдайгина,
Худо сизга сабр берсин, сингилларим.

Кўпга келган тўйда кўнгил сўрамаслар,
Росту ёлғон йиғингизга қарамаслар.
Ака бўлиб ҳол сўрашга ярамаслар,
Худо сизга сабр берсин, сингилларим.

Сиқилсангиз, кўз ёш – топган давлатингиз,
Бешик билан бўлар энди суҳбатингиз.
Қизил гулдай оқиб кетар қиз пайтингиз,
Худо сизга сабр берсин, сингилларим.

Билганимиз – ўзимизга эътиборлар,
Бир чўп олиб қўймаймиз-а, биз беорлар.
Сигир соққан экан ҳатто пайғамбарлар,
Худо сизга сабр берсин, сингилларим.

Зеро, халқ ҳам бутун аёл азиз жойда.
Аёл яшамаса, миллат бўлур қайда.
Юрибмиз-да, йигитман деб, сиз бор жойда,
Худо сизга сабр берсин, сингилларим!

Муҳаммад ЮСУФ

Уланиш учун: https://t.me/ijod_bustoni

“МЎЪЖИЗА ҚАЕРДА СОТИЛАДИ?...”

Бемор акасининг хонаси олдида турган қизалоқ ота-онасининг ташвишли суҳбатини эшитиб қолди.
― Энди нима қиламиз, онаси? Ўғлимиз ўлим ёқасида. Шифокорлар зудлик билан жарроҳлик амалиётини ўтказиш керак, дейишяпти. Лекин бизда етарли маблағ йўқ. Нима қилсак экан-а? ― деди отаси.
Она аламли йиғи билан:
― Бунинг учун мўъжиза керак! Қўлимиздан нима ҳам келарди... ― деди.
Қизча ортиқ чидаб тура олмади. Югуриб хонасига кирди. Пул тўплайдиган қутичасини очди. Ундан 1 доллар 4 цент маблағ чиқди. Қизалоқ унинг миқдорига ишонч ҳосил қилиш учун уч марта қайта санади.
Шундан сўнг, ота-онасидан изн сўрамай, чақмоқ тезлигида чиқиб, уйларига яқин дорихонага борди. Кириб қараса, дорихоначи бир киши билан гаплашаётган экан. Суҳбат қизиганидан, сотувчи дорихона пештахтасига бармоқларини қўйиб олган қизчага аҳамият берай демасди.
Ниҳоят:
― Сенга нима керак, қизалоғим? ― сўради у.
― “Мўъжиза” ― деди қизалоқ.
Сотувчи ҳайрон қолиб:
― Нима? ― деди.
― Акамнинг тузалиб кетиши учун “Мўъжиза” сотиб олмоқчиман! – деди қизча.
Дорихоначи оҳисталик билан:
― Қизалоғим, бизда мўъжизалар сотилмайди! ― деди.
― Унда, уни қаердан сотиб олсам бўлади? ― сўради қизча.
Сотувчи ўйга толди. Шу асно унинг суҳбатдоши гапга қўшилди:
― Қанча пулинг бор?
Қизча:
― Бир доллар тўрт цент пулим бор. Бори шу, амакижон! ― деди.
― Қизалоғим, мўъжизани сотиб олсанг, нима қиласан? ― сўради амаки.
― Акамни даволаш учун керак. Ойимнинг айтишларича, акам усиз тузалмас экан.
Қизалоқ унга ота-онасининг суҳбатини ҳикоя қилиб берди. Амаки қизалоқдан уйининг қаердалигини билиб олгач, унга қўлини узатди:
― Қани, пулингни бер-чи. Мен сенга мўъжизани топиб беришга уриниб кўраман...
Қизалоқ жажжи қўлчаларини чўзиб, амакининг кафтига “Мўъжиза”нинг пулини қўйди.
Амаки унинг қўлидан тутиб:
― Мен билан юр! ― деди.

Қизча “Мўъжиза” сотиладиган бошқа дорихонага борсак керак”, деб ўйлади. Лекин улар тўғри қизчанинг уйига келишди.
Ҳалиги киши унинг ота-онаси билан танишди. У етук мия жарроҳи эди. Ҳолатни ўрганиб, болакайни ўз клиникасига олиб борди ва жарроҳлик амалиётини ўтказди. Амалиёт муваффақиятли ўтди.
Орадан бироз вақт ўтиб, болакай уйига қайтди. Она ўғлини бағрига босар экан, унинг бошини силаб:
― Яратганга шукр! Бу докторни бизга айни керакли дамда унинг Ўзи юборди. Бу ― мўъжиза! ― деди.
Қизчанинг кўзларидан икки томчи ёш думалади...

Инглиз адабиётидан

Уланиш учун: https://t.me/ijod_bustoni

* Рамазон туҳфаси

“Қизим менга эшик очади...”

Келин-куёв турмуш қурганларининг биринчи кунида эшикни ҳеч кимга очмасликка қарор қилишди.
Биринчи бўлиб куёвнинг ота-онаси ёш оилани кўришга келди. Келин-куёв бир-бирига қаради, куёв эшикни очишни истади, лекин қарорлари туфайли шаштидан қайтди. Шундай қилиб, ота-она кўп кутмай қайтиб кетишди.
Ўша куни бироз вақтдан кейин келиннинг ота-онаси келди. Келин-куёв бир-бирига термулди. Келин кўзида ёш билан “Бундай қилолмайман“, деди ва эшикни очди. Куёв ҳеч нима демади...
Йиллар ўтиб эр-хотин бирин-кетин тўрт ўғил кўришди. Кейин улар ортидан қиз фарзанд дунёга келди. Ота янги туғилган чақалоқ учун катта тантана ўтказишни истади ва ҳамма танишларини таклиф қилди. Хотини эридан нима учун ўғилларига бундай тантана ўтказмай, бу сафар бундай қилганини сўради. Эр ўйчан нигоҳ билан шундай жавоб берди:
— Чунки қизим менга эшик очади!..

Турк халқ ривояти

Уланиш учун: https://t.me/ijod_bustoni

Ҳамдардлик

Ўзбекистон Ёзувчилар уюшмаси вилоят бўлими жамоаси уюшма аъзоси Самад Муҳаммад Даминга опаси Мавжуда ая Аҳмедованинг вафоти муносабати билан таъзия изҳор этади.

Онахоннинг охиратлари обод бўлсин!

Уланиш учун: https://t.me/ijod_bustoni