Ferghana_tourism_official

#jarayon

Oʻzbekiston Respublikasi Prezidentining 2024-yil 12-yanvardagi PF-9-son Farmoniga koʻra, Oʻzbekistonga xorijiy turistlarni keng jalb qilish, ularga zarur shart-sharoitlar yaratish, turizm namoyishi obʼektlaridan samarali foydalangan holda hududlarni oʻzaro bogʻlovchi turizm xizmatlarini yanada kengaytirish, sohada yangi ish oʻrinlarini yaratish maqsadida, Fargʻona vodiysida Turizm qoʻmitasi huzuridagi Turizmni rivojlantirish ilmiy-tadqiqot instituti va Rossiya Federatsiyasi Oltoy davlat universiteti bilan hamkorlikda xorijiy mutaxassislar ishtirokida xalqaro etnografik-ilmiy ekspeditsiya rejalashtirilgan.

Bugun, 2025-yil 21-aprel kuni Fargʻona shahridagi "Grand Fergana" mehmonxonasi majlislar zalida ushbu tadbirni ochilish marosimi boʻlib oʻtdi.

Ochilish tadbirida Fargʻona  viloyati hokimining turizm masalalari boʻyicha oʻrinbosari Xurshidjon Axmedov, "Oʻzbekiston Respublikasi Iqtisodiyot, turizm" NNT katta ilmiy xodimi Golisheva Yelena Vyacheslavovna soʻz olib, oʻzlarining fikr va mulohazalarini bildirishdi hamda ekspeditsiya haqida toʻliq maʼlumot berishdi.

Mazkur ekspeditsiyaning asosiy maqsadi Fargʻona vodiyida etnoturizmni rivojlantirish, uning salohiyatini tahlil etish, etnoturizm obʼektlarni aniqlash va ularning yagona reyestrini yaratish, yangi turistik marshrutlarni ishlab chiqish, vodiy aholisi etnografiyasiga doir maʼlumotlarni toʻplash, moddiy va maʼnaviy madaniyatni yorituvchi video filmni surʼatga olish hamda xorijiy davlatlarda hududning etnoturizmini keng targʻib qilishdan iborat.

Tadbirda viloyat Turizm boshqarmasi xodimlari, OAV vakillari, Turizm elchilari va mutasaddi tashkilotlar bilan bir qatorda Rossiya va Qirgʻiziston Respublikasidan tashrif buyurgan geologiya va etnografiya markazlari vakillari ham ishtirok etishdi.

Tadbir yakunida ishtirokchilar tomonidan berilgan savollarga tegishli javoblar berildi.

Fargʻona viloyat Turizm boshqarmasi matbuot xizmati