Асланов билан футбол

«Ливерпул»дан кейин «Манчестер Сити»ниям чиқариб юборса-я «Плимут»? )

Ҳусанов энди Манчестерга бориб, «Челси»га қарши майдонга тушгач, унинг кейинги ўйинлари сифатида «Плимут»га қарши учрашувни кутгандик. Аммо қандайдир бир ой ичида Абдуқодир шунақа ўсдики, энди у асосий таркиб футболчиси сифатида бу ўйинда дам оляпти. Даҳшат.

Албатта, Ҳусановнинг меҳнати энг аҳамиятлиси, шубҳа йўқ, ҳамма ҳам у босган йўлни ўта олмайди, аммо футболчи фаолиятида омаднинг роли ҳам катта бўлар экан. «Манчестер Сити»нинг бу мавсумдаги омадсизликлари, Ҳусанов келгач, ҳимоячиларнинг бирин-кетин жароҳат олиши табиийки, унинг адаптациясини тезлаштирди, Абдуқодир ўзини кўрсатиш, мослашиш учун майдонда кўпроқ вақтга эга бўлди.

@aslanov_futbol

«Фулҳэм» ўйинчиси Андреас Перейра «Олд Траффорд»даги эртанги ўйин олдидан айтибди: - «мен доим бу стадионда тўп сурганимда уларнинг хато қилганини исботлашга ҳаракат қиламан»

«Мени сотиб» демоқчи албатта. Бундай мавзу сўнгги пайтларда кўпайди, айниқса, манчестерликларнинг ёмон ўйинлари фонида Мактоминей, Антони, Рэшфордларнинг ўзини кўрсатаётган пайтда Андреаснинг гапи ҳам мантиқли туюлади.

«МЮ»да футболчиларга қийин экани, камчилик ва хатолар кўплигини тан олган ҳолда, инсоф билан тан олиш керак, кетган ўйинчилар Италия чемпионатида ёки «Бетис», «Фулҳэм», «Астон Вилла»ларда ўйнашмоқда. Ҳа бу жамоалар айни пайтда «МЮ»дан юқорида, аммо жамоанинг катталиги, босим борасида яқинигаям кела олмайдики, бу муҳим фарқ.

Мактоминей ёки Антони «МЮ» ҳужумчиларидан кўп гол ураётгани ҳақида мемлар бор, ҳа, лекин мен ишонаман, агар Зиркзе «Наполи»га борган бўлганида у гол ураётган бўлар, Мактоминей эса майдонда қийналиб юрган бўларди. Яъни гап конкрет футболчиларнинг аслида кучли эканидамас, уларнинг «МЮ»даги қийинчиликни енга олмай, осонроқ шароит ва лигада ўзини кўрсата олаётганида. Уларнинг кетиши «МЮ»нинг хатоси эмас, аксинча, тўғри қарор эканини ўша голлар ҳам исботлаяпти. Демак бу футболчилар ўзи учун мос вазифа остида яхши кўринишяпти, айни муддао.

Агар Рэшфорд ёки Антони ҳозирги жамоасида зўр ўйнаб юборса, «МЮ» мухлислари бундан фақат хурсанд бўлиши керак - демак, ёзда уларни яхши пулга сотиш мумкин. Бошқа вариантни, масалан улар қайтиб, Манчестердаям шуни такрорлашидан умид қилиш хато - етарлича вақт бўлган бу учун.

Перейранинг гапига қайтадиган бўлсак, у агар «Фулҳэм» сафида келиб, учта гол уриб кетсаям, бу унинг фақат «Фулҳэм»да кучли эканини англатади холос. Қачонки, Антони бўладими, Рэшфордми, Мактоминейми, ҳозирги турган жойида эмас, босим ва вазифалар жиҳатидан ростанам катта клубда, «Реал», «Барселона», «Бавария» ёки «Ливерпул» каби жамоаларда зўр ўйнаб кетса, ана ўшандагина «МЮ» хато қилибди, деб бемалол айтиш мумкин.

Биласизми, сўнгги ўн йилда шундай ўрнак топа олишим қийин бўлди. «МЮ»да ўйнолмай, кетиб, катта жамоаларда юлдузга айланиб, ё юқори даражага қайтиб, ростанам зўрлигини исботлаган кимнидир эслайсизми? Ҳа, Ди Мариядан бошқа?

@aslanov_futbol

Ҳаммамизга ёд бўлиб кетганидек, Абдуқодир Ҳусанов 29 феврал куни туғилган, яъни бу кун тўрт йилда бир марта келади. Ижтимоий тармоқларда инглизлар бу ҳақида ҳазиллашиб, “Ҳусанов атиги 5 ёшга кирган, АПЛ да тўп сурган энг ёш футболчи” деб ҳам роса ёзишди.

Шунда ўйлаб қолдим, ўзи худди Ҳусанов каби 29 февралда туғилган футболчилар кимлар ва ростан ҳам Ҳусанов АПЛ да дебют қилган энг “ёш” футболчими?

Айнан Англия Премьер Лигасини олсак,Ферран Торрес (2000 йилда туғилган, Манчестер Сити), Йаспер Линдстрём (2000, Эвертон), Сафир Таидер (1992, Саутҳэмптон) ва Даррен Амброуз (1984, Ипсвич) бор экан.

Таидер 2014 йилда, Линдстрём эса 2024 йилда дебют қилишган, демак уларни ҳисобдан чиқарамиз.

Ферран Торрес эса 2020 йил августда “Манчестер Сити” таркибига келиб қўшилиб, ўша ойда дебют қилган, бир ой ўтиб илк голини урган. Яъни Торрес Манчестерга келганида 5 ёшу 6 ойлик бўлган. Абдуқодир эса 5 ёшу 11 ойлигида трансфер қилинди. Бундан келиб чиқадики, Ҳусанов “Манчестер Сити” таркибида дебют қилган энг ёш футболчи номини Ферран Торресга беради.

Умуман АПЛда эса юқорида исми келтирилган Даррен Амброуз рекордчи. У 1995 ёшидан “Ипсвич” таркибида бўлиб, Премьер Лигадаги дебютини 2002 йилда “Арсенал”га қарши ўтказган экан. Яъни у илк бор бу турнирда майдонга тушганида ҳали 5 ёшга ҳам тўлмаганди.

Шунақа гаплар. Абдуқодир Ҳусановни эса табриклаймиз.

@aslanov_futbol

Гвардиоланинг сўнгги фикрларидан бир жиҳати кўпроқ эътиборимни тортди - у Ҳусановнинг тўп узатмаларига, бу борада қобилиятли эканига урғу қаратибди.

Негадир, энг биринчи қаердан пайдо бўлган билмайман, Абдуқодирнинг пас беришда камчилиги борлиги кўп тилга олиниб келди. Балким Гвардиола жамоасига ўтаётгани учун у ерда бунга талаб элит даражада бўлишидан, Ҳусанов етарли эмасдек туюлгандир. Рус экспертлари ҳам кўп айтишган - Ҳусанов тез, Ҳусанов жисмоний етук, Ҳусанов яхши подкат қилади ва ҳоказо фазилатлар орасида қўшиб кетиларди - «пас бериш, тўп билан муомалада ўсиши керак». Гўёки Ҳусанов аслида Гвардиолабоп ўйинчи эмас-у, айрим ожиз нуқталарни ёпиш, қарши ҳужумларни қайтариш учунгина керак бўладигандек.

Аммо Пеп Ҳусановнинг айнан пас маданиятига тўхталмоқда, ҳатто «ҳимоячиларимизда етишмаётган жиҳат бор унда» деб, ўзи сотиб олган, ҳеч ким «гвардиолабоп эмас» демаган бошқа ҳимоячилардан устунлигини пайқаяпти.

Бу ўзи Ҳусановда юқори даражада эди-ю, мос услубдаги жамоада ўйнамагани учун сезилмаганми ёки аста секин Гвардиола унда шу қирраларни такомиллаштиряптими, фарқи йўқ, Ҳусанов Манчестерда янада мукаммал футболчига айланади. Пеп ундан ўт ўчирувчи эмас, системанинг муҳим бўлаги сифатида фойдаланмоқчи экани сезилди.

@aslanov_futbol

Муҳаммад Салоҳ мавсумдаги 17-ассистини амалга оширди.

Де Брюйне ва Анрининг рекордига яна 3 та голли пас кифоя.

«Манчестер Юнайтед»:

Магуайр - гол
Де Лигт - гол
Хойлунд - сариқ карточка
Зиркзе - сариқ карточка

Ким ҳужумчи, ким ҳимоячи, топиб олаверинг.

@aslanov_futbol

Футбол жамоасига мураббий услуби, тизим нимага керак, таркибдаги футболчиларнинг устунликларига мослаб, шу тактикада ўйнаш етарлимасми, дейишади.

Осонроқ тушунтираман. Тасаввур қилинг, бир жамоада ҳар бир футболчининг индивидуал даражаси оптимал формада 7 балл атрофида бўлсин. Агар мураббий ҳар бир футболчи потенциалини оптималга олиб чиқса, ўша жамоа 7-7,5 баҳога лойиқ ўйин кўрсатади, натижа ҳам шунга яқин бўлади.

Агар мураббий бир тизим яратса, ўша тизим ичида бир 7 лик футболчи потенциалини 9 гаям олиб чиқиши мумкин. Яъни у ҳар қандай жамоада, индивидуал жиҳатдан 7 баҳолик футболчи, аммо айнан конкрет тизимда 9 даражада ўйин кўрсатади. Агар мураббий тизими тўғри танланса ва мукаммал ишласа, 7 лик футболчилардан тузилган жамоа 9 лик ўйин кўрсатиши, шунга мос натижаларга эришиши мумкин.

Шунинг учун масалан, Рубен Аморимдан жамоа таркибидаги футболчилардан келиб чиқиб услуб танлашни сўрашса, бу нотўғри деб ўйлайман. Чунки ўз вақтида Сулшер ҳам, Тен Хаг ҳам шундай ишлаб кўришди, табиийки, 7 баҳолик футболчилардан энг яхши ҳолатда 7 лик натижа бўлади - топ-4 учун кураш ва кубоклар. Бўлди.

Агар яхши тизим шакллантирилса, 7 лик таркибни 9 лик ўйин ва натижага олиб бориш мумкин. Мақсад шу йўналишда бўлиш керак.

Шунинг учун ҳар қандай муваффақиятли жамоа ортида тизим ётади - «Ливерпул»да Гравенберх аслида 7 лик футболчи бўлиши мумкин, аммо Слот тизимида у шериклари билан 9 га чиқмоқда. Фермин дейсизми, Бареллами, худди шу каби.

Иккинчи йўл билан ҳам, яъни футболчиларнинг маҳоратига таяниб муваффақият қозониш, 9 лик натижаларга эришиш мумкин. Худди «Реал» каби. Аммо бунинг учун ҳар бир чизиқда 9 лик футболчи бўлиши керак. Худди «Реал»дагидек.

@aslanov_futbol