XOLID.UZ

#НАСИҲАТ

ГАПИМИЗГА ЖАВОБ БЕРАМИЗ !!!

Мутаҳасислар томонидан, инсон бир дақиқада қанча сўз ёза олиши, ўқий олиши ёки тушуна олиши ҳақида бир-биридан қизиқ маълумотларни келтиришган. Буниси муҳим эмас, энг муҳими тўғри-рост ва манфаатли, сўз гапира олишидадир. Чунки, Пайғамбаримиз соллаллоҳу алайҳи васаллам: "Ўзига аҳамиятсиз нарсаларни тарк қилиши киши Исломининг гўзаллигидандир", деганлар. Ахлоқ уламолари гапларни тўрт қисмга бўлганлар.
1- Фақат фойдали.
2- Фақат зарарли.
3- Фойдаси ҳам, зарари ҳам бор.
4- Фойдаси ҳам, зарари ҳам йўқ.
Биринчи қисмдаги гаплар фақат фойда бўгани учун гапиришимиз керак. Яъни, агар гапирадиган гапимиз ўзимизга гуноҳ, ўзгага озор бўлмаса, фойдали, манфаатли бўлса, уни гапиришимиз мумкин.
Иккинчи қисмдаги гаплар фақат зиён бўлгани учун, ундан сақланишимиз ва умуман гапирмаслигимиз лозим.
Учунчи қисмдаги фойдаси ҳам, зиёни ҳам бор гапларга қаралади, агар фойдаси оз, зиёни кўп бўлса гапирмаслик муҳим. Агар, фойдаси кўп, зиёни оз бўлса, гапиришга рухсат. Масалан, эр-хотин, икки урушган дўст ёки қариндошларни яраштиришда, оз-моз зиён бўлишиши мумкин, бироқ уларни яраштириш кони фойдадир.
Тўртинчи турдаги фойдаси ҳам, зарари ҳам йўқ гаплар, беҳуда гаплар ҳисобланади. Мазкур ҳадиси шарифда, айнан шу турдаги гаплар ҳам назарда тутилган. Ҳа, шу турдаги гаплар ер юзидан, табора йўқолиб бормоқда ва ноёб турга кириб қолди десак, муболаға ҳам бўлмайди. Хуллас, мусулмон киши ўзига аҳамиятсиз нарсаларни тарк қилса, ҳадисларда айтилгандек, унинг Исломи албатта гўзал бўлади.
Муҳаммад ибн Каъбдан ривоят қилинади: Расулуллоҳ соллаллоҳу алайҳи васаллам айтдилар: "Албатта бу эшикдан биринчи бўлиб жаннат аҳлидан бўлган киши киради". Шунда Абдуллоҳ ибн Салом розияллоҳу анҳу кирдилар. Расулуллоҳ соллаллоҳу алайҳи васаллам саҳобаларидан бир неча киши ўринларидан туриб унга бу хабарни бердилар ва: "Ўзингиз у билан умидвор бўлган энг ишончли амалингиз хабарини беринг", дейишди. У киши: "Мен бир заиф бандаман. Аллоҳдан умид этадиган энг ишончли амалим қалб саломатлиги ва ўзимга аҳамиятсиз нарсаларни тарк этишдир", дедилар.
Яна бир ҳадиси шарифда
Абу Зарр розияллоҳу анҳу айтадилар: "Менга Расулуллоҳ соллаллоҳу алайҳи васаллам: дедилар: "Мен сенга бадан учун енгил, тарозида оғир бўлган бир амални ўргатайми?". Мен: "Ҳа, ё Расулуллоҳ", дедим. "У сукут, чиройли хулқ ва сенга аҳамиятсиз нарсани тарк қилишдир", дедилар.
Демак, мусулмон одам беҳуда, аҳамиятсиз гаплардан парҳез қилса, ўзи учун жаннат эшикларини очган бўлади. Аҳамиятли бўлса ҳам ўз ўрни бўлмагунча гапирмаслик зарур. Чунки, аҳамиятли гапни ҳам, ўз ўрнида гапирилмаса, у ҳам ўз аҳамиятини йўқотади. Барчамизга, бадан учун енгил, тарозида оғир бўлган амалларни қилишимизда Роббимнинг ўзи ёру мададкор бўлсин. Дунё ва динимизга аҳамияти йўқ гаплардан, ишлардан Аллоҳ таолонинг ўзи сақласин.

"Холид ибн Валид" жомеъ
масжиди имом хатиби
О. Рахимов.

♻️ Дўстларингизга ҳам улашинг!!!

@Olimvamutaallimuz

Каналга уланиш учун линк устига босинг  🔽 🔽 🔽

@Asaka_xolid

#БИЛАСИЗМИ

НАСИҲАТ ДИНДАНДИР ЁҲУД ОХИРГИ ПУШАЙМОН !!!

Етук олим, форсий ва туркий тилларда моҳирона ижод қилган адиблардан Сўфи Оллоҳёр бобомиз "Саботул ожизийн", китобида шундай ёзган:

Насиҳат тингламас дил сахти маҳжуб,
Кўкармас тошқа ёмғур ёғса ҳам кўп

Насиҳатни ёқтирмаслик ва қабул қилмаслик қалбни қаттиқлигидан экан. Демак, насиҳатга қулоқ солиш ва унга амал қилиш керак.
Ибн Нажжордан:
" Ҳасан розияллоҳу анҳу насиҳат қилаётиб:
- Дунёни қидирган кимсани дунё ерга уради. Дунёдан юз ўгирган киши эса дунёни ким еса ҳам, парво қилмайди. Дунёни севган кимса мол-дунёси кўп бўлганларнинг қули бўлади. Дунёнинг ози етарли, кўпи эса тўйимли эмас. Кечаси ва бугуни бир бўлган кимса алданибди. Кечаси бугунидан хайрли бўлган кимса эса зарарга йўлиқибди. Ўзида нуқсон кўрмаган кимсанинг нуқсони кўп. Нуқсони кўп бўлганга эса ўлим хайрлироқдир, - деган эди".
Ҳикоя қилинишича, бир катта одамнинг ўғлига амакиларидан ҳисобсиз мол-дунё қолди. У бу маблағларни айш-ишратга харжлаб, исроф қила бошлади. Қилмаган ярамас иши, ичмаган ичимлиги қолмади. Бир кун унга насиҳат қилиб дедим: "Эй, ўғлим, даромад - оқар сув, маишат эса тегирмондир, яъни катта харжлаш доимий даромади бор одамга ярашади.

Кириминг бўлмаса, чиқимни тўхтат,
Қайиқчилар куйлар шундай бир қўшиқ:
"Агар тоққа ёмғир ёғиб турмаса,
Бир йилда Дажла ҳам бўлар қуп-қуруқ".

Ақл-ҳушингни йиғиштириб, айш-ишратни бас қил, чунки пулинг тугагач, мушкул аҳволга тушиб, пушаймон қилиб қоласан. Бироқ айш-ишрат, кайфу-сафога берилган ўғлон насиҳатимга қулоқ солмади ва менга эътироз билдириб, деди: "Эртанги ғам-ташвиш қайғуси учун бугунги кайф-сафони барбод бермоқ донишмандлар раъйига хилофдир".

Орзуга етишган бахтиёр нечун,
Қаро кун ғамида чекади алам.
Шодлик-ла еб-ичиб, яша, эй дилкаш,
Эртанги кунни деб, бугун чекма ғам.

Бунинг устига мен саховат тахтида ўлтириб, лутфу эҳсон камарини белимга боғлаганидан, қўли очиқ одамлигим овозаси авом халқ тилида достон бўлган.

Насиҳатимни қабул этмаётгани ва иссиқ нафасим унинг совуқ темирдай худбин қалбига таъсир этмаётганини кўриб, насиҳатгўйликни йиғиштириб, доноларнинг: " Сен билганингни гапир, агар айтганингга қулоқ солмасалар, ўзлари айбдордирлар", деган сўзларига амал қилдим.

Яхши кишилар сўзини сўзлагин,
Гарчи сенга солмасалар ҳам қулоқ.
Тинглагучи қанча ўжар бўлса ҳам
Бандга тушар икки қўл икки оёқ.
Сўнгра чарак чалга-ю айтар ўзи;
"Тингламай доно сўзин ҳолим Чатоқ!"

Орадан сал вақт ўтгач, кўрсам, худди мен тусмол қилганимдай, оғир аҳволга тушибди. Кийим-бошлари жулдур-жулдур, ямоқ-ямоқ ҳолда тиланчилик қилиб, юрибди. Унинг аянчли аҳволини кўриб, юрагим ачиди, лекин шу ҳолатида уни таъна-маломат қилиб, ярасига туз сепишни эп кўрмадим. Кейин ўз-ўзимга дедим:

"Паст нодон мастликда ўйламас асло
Не кечар аҳволи йўқлик кунида
Баҳорда барги мўл дарахтлар ночор
Яланғоч қолар қиш изғиринида".

Албатта, ушбу ҳикоядаги ёш йигит ўз қилмишидан пушаймон бўлгани ҳақиқат, у ўзининг қилмишига яраша жазосини ҳам олди.
Бошқа томондан, агар мазкур йигит ёки шу каби ёшлар ўзларига тегишли хулоса чиқариб олсалар эди, бу каби нохуш ҳолатлардан ўзларини сақлаган бўлардилар.

"Холид ибн Валид" жоме масжиди имом хатиби О. Рахимов

♻️ Дўстларингизга ҳам улашинг!!!

@Olimvamutaallimuz

Каналга уланиш учун линк устига босинг  🔽 🔽 🔽

@Asaka_xolid

#НАСИҲАТ

ЁШЛАР ИНТЕРНЕТГА ҚУЛ БЎЛИБ ҚОЛМАСИН !!!

Фарзанд Аллоҳ таоло томонидан ато этилган улуғ неъмат бўлиши билан бирга у ота-онага берилган омонат ҳамдир. Шунинг учун ота-оналар фарзанд олдидаги бурчларини чиройли адо қилишлари, Аллоҳни розилигини топадиган, ўз миллатига, Ватанига садоқатли, ота-онасига муносиб фарзанд қилиб тарбиялашлари лозим бўлади. Бугун аксарият ёшларимиз бўш қолди дегунча дарров қўл телефони билан машғул бўлиши одатий ҳолга айланиб қолди. Қандайдир ўйин ўйнайди, қўшиқ эшитади, фильм томоша қилади, ижтимоий тармоқлардаги турли-туман маълумотлар билан танишади. Бир томондан қараганда бироз яхши кўринсада, бироқ
ёшларимизнинг уяли телефонга асир бўлиб қолаётгани, интернет ва ижтимоий тармоқлардан кўр-кўрона фойдаланишлари барчамизни жиддий ховотирга солмоқда.
Зотан, ёшларнинг мобиль телефон, интернетга бу қадар боғланиб қолишларини асло оқлаб бўлмайди. Бу энг аввало, уларнинг саломатлигига, маънавиятига салбий таъсир кўрсатади.
Интернет тармоқларида алдов ва ғаразли мақсадлар йўлида тарқатилаётган турли маълумотларга айрим ёшларимиз осонгина ишониб қолишлари, дард устига чипқон бўлмоқда. Натижада оқни қорадан, ҳақни ноҳақдан ва яхшини ёмондан ажрата олмай, кимларнингдир қурбонига айланаётгани ачинарли ҳолдир.
Аллоҳ таоло Қуръони Каримда марҳамат қилиб шундай дейди: “Эй, иймон келтирганлар! Ўзларингизни ва оила аъзоларингизни ёқилғиси одамлар ва тошдан бўлган дўзахдан сақлангки, унда дағал ва қаттиққўл, Аллоҳ буюрган нарсага итоатсизлик қилмайдиган, фақат буюрилган ишни қиладиган фаришталар (хизмат қилур)”.(Таҳрим 6)
Бу ояти карима билан Аллоҳ таоло бизга хитоб қилиб, фақат ўзимизни ўйламасликка, балки бизга омонатга берилган фарзандларимизнинг тарбияси билан ҳам қаттиқ шуғулланиб, уларни ахлоқсиз, итоатсиз, бебош бўлиб ўсиб, охир оқибат дўзахийлардан бўлиб қолмасликлари учун доимо ҳаракатда бўлишимиз кераклигини уқтирмоқда. Ҳикоя қилинишича, қадимда бир кибор одамнинг такасалтанг ўғли бор эди. У ўғлини бир донишманд ҳузурига элтиб: "Шуни тарбия қил, шояд, ақли кириб одам бўлса", деди. Донишманд унинг ўғлини узоқ тарбия қилди, фойдаси бўлмади. Боланинг отасига бир одам орқали: "Ўғлинг одам бўмади, мени ҳам ақлдан оздирди", деб хабар қилди.
Дарҳақиқат, кўп йиллик илмий кузатиш ва тадқиқотлар шуни кўрсатадики, инсон ўз умри давомида оладиган барча маълумотларнинг 70 фоизини 5 ёшгача бўлган даврида олар экан. Кейин эса, кеч бўлар экан. Шунинг учун ҳам Пайғамбаримиз саллаллоҳу алайҳи ва саллам: “Болаларингизга одоб беринглар ва одобларини чиройли қилинглар”деб марҳамат қилганлар.
Демак, биз ота-оналар ва устозлар фарзандларимизни ёшлик чоғларидан бошлаб одоб-ахлоқли ва касб-ҳунарли қилиб тарбиялаш ҳамда уларни бекор қолдирмаслик билан бирга, ўзимиз ҳам айтганларимизга амал қилиб уларга шахсий намуна бўлишимиз лозим бўлади.

"Холид ибн Валид" жоме масжиди имом хатиби О. Рахимов

♻️ Дўстларингизга ҳам улашинг!!!

@Olimvamutaallimuz

Каналга уланиш учун линк устига босинг  🔽 🔽 🔽

@Asaka_xolid