#хайрли_тадбир
ДОНОРЛАР БАЙРАМ
ҚИЛИШДИХалқаро
донорлар куни Наманган вилоят қон қуйиш марказида ҳам байрам сифатида кенг нишонланди.
Халқ орасида беғараз донорлик ҳаракатини ривожлантириш ва тарғиб этиш ишларида Ўзбекистон «Адолат» социал-демократик партияси вилоят кенгаши саккиз йилдан бери қон қуйиш маркази билан ҳамколик қилиб келмоқда.
Жумладан, «1 июнь – Халқаро болаларни ҳимоя қилиш куни» ва «3 декабрь – Халқаро ногиронлар куни» муносабати билан «Бор меҳримиз сенга, болажон!» шиори остида ўтказиладиган беғараз донорлик акциясини тарғиб қилиш ва ўтказиш партиянинг доимий ишига айланиб қолган.
Вилоят қон қуйиш марказида ўтказилган байрам иштирокчиларга Сиёсий Кенгаш раиси Робахон Махмудованинг 14 июнь — Халқаро донорлар куни муносабати билан йўллаган табриги ўқиб эшиттирилди.
- Ўтган йил давомида вилоят қон қуйиш марказининг сайёр бригадаси 208 маротаба жойларга чиқиб, 3615 нафар кўнгилли фуқародан 1854,495 миллилитр, марказга ташриф буюрган 12180 нафар фуқародан 6,040 миллилитр қон йиғилди,-деди вилоят қон қуйиш маркази бош врачи Илҳомжон Тўланов. - Ушбу йилнинг ўтган беш ойида хайрли акцияда кўнгилли равишда иштирок этган 5214 нафар донордан 2729,933 литр қон йиғилди. Натижада вилоятимиздаги қанчадан-қанча болажонларнинг саломатлигини тиклаш ва ҳаётини сақлаб қолишга эришилди. Бу ишда бўлим мудири Мақсуджон Жўрабоев, врачлар Азимжон Давронов, Зокиржон Ҳожимирзаев, ташкилий-услубий бўлим мудири Адҳамжон Бекмирзаев ҳамда ҳамширалар Марғуба Мирзамиддинова, Муҳайё Каримова, Феруза Мирзаназарова, Ҳуснида Мўминова, Садоқат Дадабоеваларнинг хизматлари катта бўлди.
Вилоят қон қуйиш марказида ўтказилган байрам тадбирига таклиф этилган акция ташвиқотчилари ва фидоий донорлар бир дастурхон атрофида жам бўлиб, дилдан суҳбат қурдилар. Беғараз акцияни ўтказишда фидокорлик намуналарини кўрсатган фаол донорлар, марказ ишчи-ходимлари ва тарғибот-ташвиқот ишларида фаоллик кўрсатган партия ходимларига фаҳрий ёрлиқлар ва эсдалик савғалари топширилди. Мингбулоқ туманидаги Жамашўй қишлоғидан келган, 44 йилдан бери беғараз донор сифатида танилган Мафиза Мирдасга фаҳрий донор кўкрак ношони тақдим этилди.
Барам тадбири иштирокчилари аҳоли саломатлигини сақлаш, жамиятда меҳр-оқибат, инсонпарварлик ғояларининг мустаҳкамланишига хизмат қилувчи хайрли лойиҳаларни бундан кейин ҳам янада кенг ва самарали тарзда давом эттириш ва бу борада вилоят қон қуйиш маркази билан ҳамкор бўлишга келишиб олдилар.
Ўзбекистон "Адолат" СДП Наманган вилоят Кенгаши матбуот хизмати.