Abdulloh Shamsutdinov

Tormoz berishni bilish muhimroq

Mashina yoqilg'isini tejash uchun kamroq gaz berishdan ko’ra, kamroq tormoz berish foydaliroq.

Mashhur kompaniyalarda ishga kirishda zo’r mutaxassis bo’lishning o’zi yetmaydi, hozirgi ish joyingizda yaxshi munosabatlarni saqlash va o'rinbosar tayyorlab bo’shash kerak.

Mahsulot yoki xizmatni ko'proq sotish uchun yangi mijozlarni jalb qilish yetarli emas; mavjud mijozlarga berilgan va'dalarni sifatli bajarish zarur.

Yetuk kadrlarni jamoaga qo’shilishga qiziqtirish osonroq, ammo fikriga ega shaxslarni bir jamoada ushlab turish va foydalanish qiyin.

Baxtli oilani qurish uchun solih bo’lish va soliha topish muhim ish, lekin baxtli yashash uchun qiyin vaziyatlarda sabrli bo'lish va g'azabda sukut qilish kerak.

Sodiq do'st topish muhim, lekin ular nafsga yoqmaydigan nasihatlar qilganda qabul qilish kishini rivojlantiradi.

Boy bo'lish uchun ko'p pul topish kerak, lekin boy yashash uchun kamroq pul ishlatish kerak.

@abdulloh_shamsutdinov

Hazil ishda ham muhim

Garvard tadqiqotiga ko‘ra 4 yoshli bola kuniga o‘rtacha 300 marta, 40 yoshli kishi esa atiga 4 marotaba kular ekan.

Hodge assotsiatsiyasi tadqiqotida 737 nafar bosh direktorlarning 98% hazilni his qiladigan xodimlarni afzal ko‘rishini bildirgan.

Ishda ham hazildan foydalanadigan odamlar ko‘proq kreativ, samarador va yaxshiroq qaror qiluvchi hamda hamkasblar bilan tez chiqishuvchanligi isbotlangan.

Qiziq jihati, ular boshqalarga qaraganda kamroq kech qolishadi, kamroq kasal bo‘lishar ekan. Hamkasblarimizni o‘ylab ko‘rsam bizda ham shu holat chiqdi.

Deyarli barchamiz taniydigan, bir qadar havas qiladigan Muhammadali Eshonqulov akamiz ham tabassum va hazilni hech kamda qilmaydilar, latifalari ham bo‘lakcha.

Ishdagi eng katta muammolardan biri qiyin suhbatlarni kechga surish yoki ulardan qochish. Hazilni his qiladigan jamoalarda esa bu muammo kam kuzatiladi.

Ashnaqa, "ishda jiddiy bo‘lish kerak", degan gaplar quruq gap, xolos. Samimiy, o‘rnida hazil qiladigan xodim, rahbar yoki hamkasb bo‘lavering, do‘stlar.

"Qo‘rqsa hurmat qiladi" degandagi qo‘rquvni esa nazardan qolish va ishonchni yo‘qotishdan qo‘rquv, deb tushunish kerak.

@abdulloh_shamsutdinov

Qiziqishingiz yolg’on

Ta’lim va ta’lim menejmentiga qiziqishini aytib, jamoamizga qo‘shilish niyatida keladigan yoshlar juda ko‘pligi bizni quvontiradi.

Lekin, afsus ularning 90%i dan ortig‘i na ta’lim haqida na boshqaruv borasida birorta kitob o‘qigan bo‘lib chiqadi.

250’ga yaqin rezyumelar ichida chet tilini yaxshi bilishini yozgan nomzodlarning ham 90-95% i o‘sha tilda umrida bir dona bo‘lsa ham kitob o‘qimagan, podkast eshitmagan.

Shu vatandoshlarimizga aytgim keladi, qiziqishingiz amalingizga ko‘chmagan bo‘lsa, o‘zingizni ham boshqalarni ham aldayapsiz.

Xuddi, bir qizni sevishini, uylanmoqchi ekanligini og‘izda aytib yurib, lekin sovchi yuborish so‘ralganda ming bir bahonalar qilib yurgan yigitga o‘xshab.

Til borasida ham shunga o‘xshash fikrim, agar undan foydalanmaydigan bo‘lsangiz o‘rganmay qo‘yavering, miyani to‘ldirmasdan.

O‘rganib bo‘lgan bo‘lsangiz undan foydalaning, puli bo‘lsa ham och yurgan kishiga o‘xshamasdan.

@abdulloh_shamsutdinov

Muhabbat kuchli qilsin

Litsey davrim, 1-kursning avvali. Bir qizni yoqtirib qoldim. Juda yaxshi o‘qir ekan, man esa ko‘paytirishni ham bilmayman, bilishni ham istamasdim. Bezori yigitman, litseyga tasodifan kirib qolgan edim.

Vaqt o‘tib oilasini ham surishtirdim. Onasi faqat o‘qimishli yigitga turmushga bermoqchi. O‘zi ham bollar bilan gaplashadigan tipdan emas. Man ham qizlarga ikki og‘iz gapni bir qilib gapiroladigan bola emasdim.

O‘ziga va oilasiga ma’qul kelish uchun o‘qimishli bo‘lishim zarurligini tushunib, 2-kursga yaqin matematika o‘rganishni boshladim. Esimda, o‘shanda ko‘p xonali sonlarni bo‘lishni uydagi kelinoyim o‘rgatgandilar.

U xorijiy yo‘nalishda, man esa aniq fanlar yo‘nalishida o‘qirdik. Shu sabab u ingliz tilini yaxshi bilardi. Repetitorga ham qatnashar edi. 3-kursga yaqin unga yaqinroq bo‘lish niyatida ingliz tilini ham o‘rganishni boshladim.

Man zimdan yoqtirardim, suhbatlashmasdik. Litseyga kelishini ham, ketishini ham uzoqdan kuzatardim. Shu zaylda matematikani juda yaxshi o‘rgandim, ingliz tilidan u o‘qiydigan darajaga chiqib, guruhlariga qo‘shildim ham.

Universitetga ariza topshirishga oz qolgandi, u bizdan hech birimizni tanlamadi (4-5 nafar yigit yoqtirardik), keyinroq bizdan kattaroq boshqa bola bilan unashtirilganini eshitdim. Qabul qilishim qiyin bo‘ldi, tepalikka chiqib yig‘lagandim o‘shanda.

Biz universitetga qabul qilindik, u kirolmadi. Sentyabr oyida to‘yi ham bo‘ldi. O'sha kuni o‘rtoqlarim bilan Toshkentdagi uyimizda tort yeb o‘tirgandik, normal o‘tib ketdi. Keyinchalik man ham uylandim, bir umrlik sevgilimni topdim, farzandli bo‘ldim, shukr.

Hozir u ham man kabi baxtli bo‘lsa kerak, deb o‘ylayman. Endi, bu o‘ta shaxsiy voqealarni nega yozganimga o‘tsam.

Sizni sevma, yoqtirma, deb qaytarolmayman, bu qalb ishi. Lekin muhabbatingiz vaqtingiz isrof bo‘lishiga, sha’n va iffatingiz toptalishiga sabab bo‘lmasin. Ehtimol, birga bo‘lolmassiz va bu sizlar uchun eng xayrlisi bo‘lar, xuddi bizdagi kabi.

Chin muhabbat sizni yanada kuchliroq bo‘lishga undashi kerak. Aksincha bo‘lsa, hali birga bo‘lmasingizdan sizni ortga tortayotgan, o‘sishdan to‘sayotgan hislar keyinchalik ziyoningizga ko‘proq ishlaydi.

Chin muhabbat to‘ydan keyin bo‘ladi, demayman, balki haqiqiy sevgi bugun ham sizga yordam beradi, yuksaltiradi, yaxshiroq inson bo’lishingizga sabab bo’ladi, shuni qidiring.

Birga bo‘lish va bo‘lmaslik taqdir masalasi, xotirjam bo‘ling. Sizga bitilgan sizdan qocholmaydi, sizdan farqli ham bo‘lolmaydi, u sizning juftingiz, vaqtini kutib ulg‘ayyapti, xolos.

Men esa mani bugungi va kelajagimdagi shaxsiyatimni shakllantirishga katta ta’sir qilgan o‘sha vaqtdagi muhabbatimga rahmat aytib so’zimni tamomlayman.

Hammasi uchun rahmat!

@abdulloh_shamsutdinov

Hozir muhimroq

Aksarimizda "Maktab davrimda vaqtimni juda isrof qilgan ekanman…", "Kompyuter o‘ynashga ketgan vaqtimni til o‘rganishga sarflasam hozir qiynalmasdim…" singari o‘tmishimizdan afsuslanishga xotiralarimiz yetarlicha.

Vaqt isrof ketgani rost, lekin u haqida hadeb o‘ylayverish, suhbatlarda qayta-qayta eslash haqiqiy isrof bo‘lsa kerak.

"Kun bugundir" degan gap bor, shu fikrga hozirda to‘liq qo‘shilaman. Faqat, bunga g‘arbcha yondashuvdan farqli qarayman.

Masalan, "Har bir lahzangdan zavq olib yasha" emas, "Har bir lahzang ma’noli bo‘lsin" deyish yaxshiroq deb ishonaman. Hozir to‘g‘ri, foydali ish bilan band bo‘lish yetarli.

Vaqt o‘tib hozirgidan yaxshiroq bandlikni topishimiz mumkin, balki zarur ham, ammo bu ham aynan o‘sha kundagi shaxsiyatimiz, dunyoqarashimiz uchun mos faoliyat bo‘ladi, xolos.


Demoqchi bo‘lganim, o‘tmishimiz yoki kelajagimiz hozirdan ahamiyatsiz, balki ayni daqiqada nima qilayotganimiz, o‘ylayotganimiz muhim.

—

25.08.2023 sanada yozgan ekanman.

@abdulloh_shamsutdinov

Ehtimol, sizni qidiryapmiz

Aziz Rahimov boshchiliklaridagi Rahimov School maktabimiz jamoasiga menejment bo’yicha shogird olmoqchimiz.

Ma’qul nomzod Farg’ona shahridagi yangi loyihamizga “operatsion menejer” sifatida tarbiyalanadi. Keyinchalik poytaxtga chaqirishimiz ham mumkin.

Farg’onalik, ta’lim menejmenti va bizning jamoada o’sishga qiziquvchilar ushbu formani to’ldiring. Talablarimizga moslar bilan aloqaga chiqamiz, suhbatlashamiz.

@abdulloh_shamsutdinov

O‘lchovlar boshqa

Bu mavzuda avval ham yozgandim, hozir farqli yondashuv, xulosam:

Kimnidir boy, mashhur ekanligi faqat qattiq mehnati sababidan emas.

Kimnidir esa kambag‘al, qadri pastligi faqat harakati kamligidan ham emas.

Biz tug‘ilib o‘sgan joy, ota-onamiz, ularning resurs va yondashuvlari ko‘p narsani hal qilib qo‘yadi.

Buni kimdir omad deydi, boshqamiz taqdir. Masala kim nimani muhokama qilishida.

Ba’zilar doim boshqa insonlar harakatini muhokama qiladi, kelajagi bor kishilar bo‘lsa ko‘pincha o‘z harakatlarini va yondashuvlarini.

Omadga ta’sirimiz faqat shu yo‘l bilan bo‘lsa kerak. Siz-chi, kimni ko’proq muhokama qilyapsiz?

@abdulloh_shamsutdinov

Yedirishyapti

Instagramda mashhur ekan, boshqa usta tavsiyasi bilan ishxonasiga bordim. Masalam hal bo‘lgandan keyin, mashinamni ko‘rib yoqilg‘i sarfini kamaytiradigan va tezlanishni yanada yaxshilaydigan programma o‘rnatishni taklif qildi. Xitoyliklarga tayyorlatgandim dedi. Qabul qildim, ancha pulimni oldi.

3 kun ichida sezdim, mashinam ancha og‘ir yuradigan va yoqilg‘i sarfi 100 km/ 8 litrdan 100/ 13 litrga ko‘payibdi. Oldiga bordim, avvalgi tabassumi, muomalasi ko‘rinmaydi. Masalamni eshitib, shogirdlariga bir nimalar dedi-da, mashinasiga o‘tirib, ichkaridan chiqqunimcha ketib qolibdi. So‘rasam ish vaqti tugagan deyishdi.

Adashmasam, shu kuni poytaxtga qaytishim shart edi, qaytdim. Yaxshilab surishtirib, 45 yoshlar atrofidagi Rustam aka ismli avtoprogrammist kishini topdim. Mashinani tekshirdilar, holati o‘g‘ir ekan, viloyatdagi "usta" lar deyarli buzibdi. Rustam aka “usta" olgan pulning yarim narxiga to‘g‘rilab berdilar. "Xitoy" programmasi gapi ham yolg‘on ekan. Dasturni o‘zimizni Qo‘qondagi bollar tayyorlagan, "usta" ulardan sotib olgan bo‘lib chiqdi.

Rustam aka viloyatdagi "usta"chani ham yaxshi tanir, buzgan mashinalarini tuzataverib charchab ketgan ekanlar. Unga tel qilib biroz koyib ham berdilar, bilishimcha. Undan keyin Rustam akaning oldilariga bir necha marta ish bilan keldim, hal qilib berdilar. Pul bersam olmadilar. Muomala esa har doimgidek, samimiy.

Viloyatda o‘sha kunlari mashinaga propan ham qo‘ydirgan edim, u bilan ham xuddi shunday muammo bo‘ldi. Rustam akaga aytsam, Bahrom aka ismli yoshlari katta mutaxassisga uchrashni maslahat berdilar. Ko‘rishdik, tekshirib, ancha xatolarni topdilar, sal qolsa motor ishdan chiqishi mumkin ekan. Turbo motorlarga propan o‘rnatishni qoidalari bor ekan, bo‘lib ham yangi modeldagi mashinam uchun.

Viloyatdagi gaz ustasi mashinam uchun kuchsizroq uskunalarni qo‘yib qo‘ygan, sozlashda esa odatiy GM’ mashinalari kabi sozlagan ekan. Uskunalarni alishtirish kerak, lekin juda qimmat dedilar Bahrom aka. Keyin, 1 soatcha vaqt sarflab shuni ham "odam" qilib berdilar. Hozir mashinam zo‘r yuribdi, shukr.

Bugun boshqa sohalarda ham bu yigitlar kabi "ustalar" ko‘p, o‘xshagan ishlarinigina ko‘pirtirib tarmoqlarda jar solishadi. Rustam aka va Bahrom aka singari haqiqiy mutaxassislar esa kam. Ular na tarmoqlarga chiqishni bilishadi, na maqtanishni, jimgina ishlarini qilishadi.

Aslida, shular kabilar maydonlarga chiqishi kerak, bo‘lmasam o‘rtalik shoqollarga qoladi, bo‘rilar turganda.

@abdulloh_shamsutdinov

To’g’ri joydan so’rang

Internet javob berolmaydigan savollarnigina insonlardan so’rang, bo’lmasa yo ahmoq ko’rinasiz yoki ahmoq bo’lasiz.

#qisqa

Kimlar bilan ishlashingiz muhimroq

Ishxonada hazil aralash bir haqiqat gapimiz bor: "Oila a’zolarimiz bilan ham buncha ko‘p birga vaqt o‘tkazmaymiz-ey"

Oila qurganlar har kuni oilasi bilan 2 soatgacha, ota-onasi bilan esa 30-45 daqiqa, do‘stlari bilan bo‘lsa 1 soatgacha birga vaqt o‘tkazishsa katta gap.

Endi aksarimiz hamkasblarimiz bilan deyarli har kuni 4-5 soat birgamiz. Ongli umrimizning aksar qismi ular bilan o‘tar ekan, hamkasblarimizning shaxsiyatlari juda ahamiyatli.

Ular qiziq bo‘lsa zerikmaymiz, aqlli bo‘lsa rivojlanamiz, halol bo‘lsa o‘rganamiz. Ishga muhabbatimiz yoki nafratimiz sababchilari ham ular.

Loyihalar tugaydi, bizneslar yopiladi. Har gal yangi g‘oyalar topadigan ham, ishni yo‘lga qo‘yadigan ham shu jamoa, do‘stlarimiz.

Shunday ekan, kimlar bilan ishlayotganingizga qattiq ahamiyat bering, chunki vaqt o‘tib yo ular sizdek bo‘lishadi yoki siz ulardek.

—-

Yaqin ukamiz, suhbatdoshlarimizdan Abror "Eng zo‘r hamkasb top" mavzusida o‘z tajribalari va xalqaro tajribalardan kelib chiqib kitob yozibdi.

Tanishib chiqdim, haqiqatdan bizning tadbirkorlarga juda zarur mavzular keltirilgan ekan, til bilmaydigan barchaga o‘qishni tavsiya qilaman.

@abdulloh_shamsutdinov

Majburiyatlar tarbiyalaydi

6 oy sotuv va marketing, 1.5 yil loyiha menejeri sohalarida shogird bo‘lib ishladim.

Orada bir do‘stim bilan o‘quv markaz ochdik, eplolmasdan 4 oyda yopdik.

2021-yil fevral oyida Merit kompaniyasiga ishga kirdim, Aziz Rahimov ustozga shogird tushdim.

Avvalgi ikki yilda olgan tajribam bu yerda ish berishni boshladi, ko‘proq majburiyatlar olaverdim.

2 yil ichida shogirdlikdan kompaniya Bosh Operatsion Direktori (COO) lavozimigacha ko‘tarishdi.

Qo‘limdan ish kelib qolganligi atrofimdagilarga tez tarqaldi, daromadi yuqori ishlar taklifi ko‘payib boraverdi.

O‘zimga ishonchim ortdi, ko‘p ishlarni o‘zim mustaqil qilolaman, degan fikrlar kelishni boshladi.

Shunda Azizbek akam "Sizni siz qilgan narsa bilan band bo‘lavering, eng to‘g‘risi shu" degandilar.

Maslahatga amal qildim, boshqa loyihalarga qo‘shilishga, qo‘shimcha ishlab ko‘proq pul topishga intilmadim.

O‘rniga ish va oiladagi majburiyatlarimni bajarish va o‘z ustimda ishlash bilangina band bo‘ldim.

2023-yil fevral oyida Meritdan ketdim. 1 oy dam oldim. Shu vaqtda 10 ga yaqin ish, biznes hamkorlik takliflari bo‘ldi.

Shunda yuqoridagi maslahat foydasini birinchi marta his qilgandim.

Takliflarga qaytdik, hech birini tanlamadim. Meritdan boshqa top menejerlarimiz ham ketishayotgan edi.

2023-yil, aprel oyida top menejerlarimiz va Azizbek akam bilan yangi maktabimizga asos soldik.

Shukr, yangi maktabimiz o‘zini oqladi, o‘quvchilarimizda ajoyib natijalar ko‘rishni boshladik ham.

Bularni nega yozdim? Atrofimdagi yaqin ukalarimiz, boshqa yoshlarimiz qo‘llaridan ish kelib qolishi bilan oldlarida yangi imkoniyatlar ko‘rinib qoladi.

Mustaqil, tadbirkor bo‘lishga intilish juda yaxshi, albatta. Faqat hali tayyor bo‘lmasdan, yoki boshqa sohalarga sakrayverishda umrni isrof qilib qo’yish mumkin.

Tayyor bo‘lish belgilaridan eng muhimi rahbarlaringiz sizni olib qolish uchun sizni o‘z bizneslariga sherik yoki eng kamida daromadiga sherik qilishga ham tayyor bo‘lishlari kerak.

Boshqa sohaga kirish vaqti esa o‘z sohangizda kuchli kadr, muvaffaqiyatli biznes egasi bo‘lganingizda bo‘lsa kerak.

Ikkisiga ham yo‘l bitta — hozirgi majburiyatlaringizni bajarish va o‘z ustingizda ishlash, imkoniyatlarga chalg‘imasdan.

Namozda ham avval farzlar, keyin qazolar, undan keyingina nafllar o‘qiladi. Farzlarni bajarmagan va qazolarni tugatmaganga nafllar foyda bermaydi, azizlar.

@abdulloh_shamsutdinov

Davlat Artel Group’ga yordam bergan(mi?)

Ishxonada bir dasturchi ukamizga MacBook olishga pul berdik, bir necha oy oyligidan ma’lum qismini ushlab qolish sharti bilan.

Noutbuki kuchli bo‘lishi avvalo o‘ziga qiziq va ishini osonlashtiradi, tezlatadi. Xodimni samarasi oshishi esa bizga ham foydali.

Sharti, u haqiqatda ajratilgan pulga yarasha sifatli kompyuter olishi kerak. Bo‘lmasa, kompaniya maqsadi hosil bo‘lmaydi.

Endi, u bizni aldab, arzon komp olib, qolgan pulni ishlatib yuborsa kelasi safar unga yordam bermaymiz, ehtimol imkon bo‘ldi deganda ishdan haydarmiz ham.

Aytaylik, u bizni aldamadi, pulni hammasini avvalida so‘ragan joyiga - samaradorligini oshirishga ishlatdi.

Bunda bizning unga ishonchimiz ortadi, yana yordam so‘rasa berishimiz mumkin, chunki yakunda biz ham yutyapmiz.

Xuddi shu imkoniyat deyarli har bir hamkasbimizda bor, farqi kimdir samaradorligini oshirishga so‘raydi, boshqasi komfortini oshirishga. Va kimdir aldaydi, boshqasi va’dasidan chiqadi.

Endi, davlat ham eng katta kompaniya. Ichkarisidagi kompaniyalar, masalan Artel va GM uning xodimlaridan.

Ikkisi ham o‘ziga ham, davlatga ham foyda olib keladigan loyihani rahbariyatga taqdim qildi va yordam oldi.

Yagona farq, Artel yordamni to‘g‘ri joylarga sarflab keldi va ko‘proq yordam olaverdi (olgan bo‘lsa, albatta), chunki bundan davlat yakunda soliq tushumi va ish bilan ta’minlash sabab foyda ko‘raverdi.

GM bo‘lsa, xususiy bo‘lmagani sabab, hech kim uni yanada rivojlantirishni chindan istamadi, balki uning rahbariyati ajratilgan pullarni ko‘proq cho‘ntak qilish bilan band bo‘ldi, deyishadi.

Yakunda, Artel group xalqaro darajada raqobatga bemalol bardosh beradigan kompaniyaga, GM esa boqimonda farzandga aylandi, qo‘ydi. GM jiyan edi, Artel begona xodim.

Bu mening tadbirkor va rahbar sifatida shaxsiy tahlilim, fikrlarim. Talaba yoki xodim bo‘lgan vaqtlarimda bu mavzuda boshqacha fikr aytardim.

@abdulloh_shamsutdinov

Jahongir Ortiqxo’jayevning 4.5 soatli intervyusini bugun ko’rib tugatdim.

Menimcha, O’zbek tilida biznes borasida ko’rishga eng yaxshi kontent bo’libdi.

Katta energiya oldim. Jamoa shakllantirish, ular bilan oiladek yashash, ularni qo’llash.

Samimiy va kamtar inson. Soxta samimiylikni 4.5 soat, har xil holatlarda ushlab turish mumkin emas.

Aytgan gaplariga to’liq ishondim. Yolg’on bilan kuchli jamoani shakllantirib bo’lmaydi. Bo’lib ham o’zining do’st va ukalari bo’lsa.

Ular-ki, shuncha yillardan beri rahbariga ishonib kelyapti ekan, haqiqatda Jahongir aka kuchli lider.

@abdulloh_shamsutdinov

Yiqilib tushmaylik

Yoshimizni farqi yo’q, “Shuni ham bilmaysanmi?” savolini har birimiz eshitganmiz.

Katta shaxsiyatlardan sodda savollar so’ralganda biz ham iymanib qo’yamiz, eng ozi ichimizda.

O’zimiz ham bilgan narsalarimizni kimgadir yetkazishda deyarli qiynalmaymiz, eshituvchilar xayron qolsa ham.

Bizga oson, boshqalarga qiyin, xuddiki. Aslida bizga ham avvalida qiyin edi, o’rgandik.

Keyin esa bilmaydigan vaqtlarimizni unutdik, o’zimizni yuqori olib. Narvon tepasiga chiqib olgan odam singari.

O’zi bu narvonning oxiri yo’q tugatgani, kishi bilmaydi. Teparoqdagi odam yiqilsa qattiqroq tushadi, pastagilarga qaraganda.

Narvonda pastga qarayversang yiqilasan, deyishadi. Bilim narvonida bo’lsa pastdagilarga qaramagan yiqiladi.


@abdulloh_shamsutdinov

Kichiklarni qiynamaylik

1 yoshli qizalog‘im qovoq solishni o‘rganibdi, bizdan.

Endi kulib qarasam kuladi, qovoq solsam qovoq solyapti.

Xuddiki kattalarni kayfiyatiga qaraydi, mitti bo‘lsa ham.

Biz ham shundaymiz, kattalarimiz kayfiyatiga qaraymiz.

Ustozlarimiz mavzu ochmaguncha gapirmaymiz.

Rahbarlarimiz kayfiyati yaxshi bo‘lmaguncha xotirjam bo‘lmaymiz.

Opa-singillarimiz erlari, otalari va ukalari o‘tirmaguncha tinmaydilar.

Odobimiz ham, madaniyatimiz ham shu, aslida.

O‘zimiz qiynalayotgan holatimizda ham kichiklarga bildirmayotgan bo‘lsakkina kattalar safida bo‘lamiz.

Ungacha katta ko‘rinishidagi kichik bir bolajon bo‘lib yashayveramiz, boshqalarni qiynab.

@abdulloh_shamsutdinov

Bizsiz ham yuraveradi

Real Madrid Ronaldo klubdan ketganidan so‘ng 5 marotaba turli nufusli musobaqalarda ketma-ket g‘olib bo‘ldi.

Stiv Jobs o‘lganda Apple kompaniyasining bozor qiymati $350 mlrd edi. Hozir dunyoning eng qimmat kompaniyasiga aylandi — $2.7 trillion.

SSR asoschilari kichik davlatlarni bu tuzumsiz yasholmaydigan qilishganiga ishonishardi. Hozir SSR yo‘q, ammo u davlatlar bor.

Tizimlar, davlatlar, kompaniyalar bizdan oldindan ham bo‘lgan, keyin ham bo‘laveradi. Farqi yomonroq bo‘lishi ham mumkin, yaxshiroq ham.

Kemani boshqarganlar ham ketdi, eshkak eshayotganlar ham. Lekin, kemalar hali ham dengizda suzib yuribdi.

O‘zimizni juda muhim sanab yubormaylik, do‘stlar.

@abdulloh_shamsutdinov

Fundamentni mustahkamlang

Suzishni boshlaganimga 1 oy bo‘lganda ustoz maxsus suv ko‘zoynagi sovg‘a qildilar. Taqib suzib ko‘rib, shuncha vaqt maza qilib suzmagan ekanman, deb qoldim.

Hozirgacha yoshlikda qanday o‘rgangan bo‘lsam, shunday suzib yurgandim. Bugun boshlang‘ich o‘rganuvchilar uchun video darslar ko‘rishni boshladim.

10 daqiqadan ikkita video qo‘llanmani ko‘rib chiqdim. Keyin, suzdim. Nafasni to‘g‘ri boshqarishning o‘zi “vov!” natija berdi.

Keyin, o‘ylab qarasam, boshqa har bir kasbda ham avval boshlang‘ich bilimlarni olish sohani o‘rganishni qiziq va oson qilar ekan.

Endi kurashda nega yiqilish eng birinchi o‘rgatilishini tushundim. O‘g‘ir jarohat olmagan havaskor sportchi asta-sekin qolgan texnikalarni ham o‘rganaverar ekan.

Marketingda nega 4P’ni eng boshlarida o‘rgatilishini tushundim. Nima mahsulotni (Product), qancha narxda (Price), qaysi joyda (Place), nima deb ishontirishni (Promotion) bilgan o‘rganuvchi, SMM, Targeting va Copywriting kabi vazifalarni keyin to‘g‘ri bajarar ekan.

Sotuvda nega eshitish va to‘g‘ri savol berishni eng birinchi o‘rganish kerakligini tushundim. Mijozni gapirtirolgan va uni taniy olgan sotuvchi, mijozga istagan narsasini, istagan narxda sotolar ekan.

IT’da nega algoritm eng boshidan o‘quvchilarga o‘qitilishini tushundim. Buni yaxshi o‘rgangan, keyingi muammolarini ham shu algoritmga qo‘yib yecholar ekan.

Uyni fundamenti mustahkam bo‘lmasa, zilzilada bardosh berolmaydi. Bizda hozircha zilzila yo‘q, lekin bo‘lganda vayron bo‘lmaslik uchun fundamentlaringizni mustahkamlang.

Marketingda Kotlerning “Marketing asoslarini”, sotuvda Rakxemni “SPIN sotuv”ni, boshqaruvda Gruvni “Yuqori samarali boshqaruvini”, muzokarada Chaldinini “Ta’sir psixologiyasi” kabi kitoblar bunda asqotadi.

@abdulloh_shamsutdinov

Bilganimiz yaxshiroq

Universitetni tamomlagunimcha 100 mln so‘mdan ko‘p pul ketgan. Toshkentga kelib, o‘qimaganimda qancha narsa yo‘qotar edim?

IELTS imtihonimga 20 kuncha qolganda 1.2 mln so‘mli individual 12 ta dars olganman. Birga-bir shug‘ullanmaganimda ballim qancha past chiqardi?

$5500 atrofida pul sarflab, do‘stim bilan 2018-yilda o‘quv markaz ochib, 4 oyda yopganmiz. Mustaqil shu loyihani boshqarmaganimda qancha tajriba yo‘qotardim?

Yoshlikdagi eng yaqin aksar o‘rtoqlarim va jamoalardan o‘zimni majburlab ajratganman. Shu qarorni qilmaganimda hozirgidek bo‘lolarmidim?

Bizni ko‘pincha ma’lum xarajatlar qo‘rqitadi. Aslida, bilgan xarajatlarimiz bilmagan xarajatlarimizdan yaxshi, eng kamida nima yo‘qotishimizni oldindan bilamiz.

@abdulloh_shamsutdinov