Yozmoqdamiz...

#Қурбонлик
1922-масала
Бир одам қурбонликка ҳайвон сотиб олди. У ўғирланди ёки йўқолиб қолди. Кейин у одам яна бошқа қўй сотиб олди. Уни сўймоқчи бўлиб турганида йўқолган қўй топилиб қолди. Бу ҳолатда бу киши бой одам бўлса, шу икки қўйдан бирини сўяди. *Агар у фақир киши бўлса, иккала қўйни ҳам сўяди.
*Агар аввалги қўйни сўйса, яхши. Агар иккинчи қўйни сўйса, аввалги олган қўйидан буниси ноқисроқ бўлса, нуқсон миқдорини эҳсон қилиши керак бўлади.
Изоҳ: Чунки камбағалга қурбонлик қилиш шарт эмасди, қурбонлик қиламан деб ҳайвонни сотиб олиши билан, сотиб олган ҳар икки ҳайвонни сўйиш камбағалга шарт бўлиб қолади.

1923-масала
Агар икки ёки ундан кўпроқ киши шерик бўлиб қурбонлик қилишса, қурбонлик гўштини баробар тақсимлашлари лозим бўлади.
Гўштни тарозида тортиб, вазнига кўра шериклар ўртасида тенг қилиб тақсимлаш керак. Чамалаб бўлиш дуруст бўлмайди. Шериклар ичида бирортасига гўшт кўпроқ тегса, мана шу зиëдаси рибо бўлиб қолади. Лекин шерикларнинг насибасига гўштидан бошқа қисмлари, яъни териси, ичак-чавоқлари кабилар қўшилса, бунинг зарари йўқ.

1924-масала
Қурбонлик учун бир ёшга етган қўй ёки эчки сўйиш дуруст бўлади. Бир ёшга етмаган қўй ёки эчки қурбонлик қилинса, бу қурбонлик дуруст бўлмайди.
Изоҳ: Аммо қўй бир ёшга тўлмаган бўлса ҳам, жуссаси катта бўлиб, кўриниши жиҳатидан бир ёшли қўйлар каби бўлса, уни қурбонлик қилиш жоиз бўлади.
Буқа ёки сигирнинг икки ёшга етганини қурбонлик қилиш жоиз бўлади. Икки ёшга етмаган сигир ёки буқани қурбонлик қилиш дуруст эмас.
Туянинг беш ёшга етганини қурбонлик қилиш жоиз.
Аммо қўй олти ойга етиб, жазаъа (бир ёшли қўйнинг номланиши) деб номланса ва у бир ёшли қўйлар орасига кирганда жуссаси кичиклиги билан улардан ажралиб қолмайдиган бўлса, уни қурбонлик қилиш дуруст бўлади. Агар олти ойлик қўй бир ёшли қўйлар орасига кирганда жуссаси кичиклиги билан улардан ажралиб қоладиган бўлса, уни қурбонлик қилиш дуруст бўлмайди.

1925-масала
Агар қурбонлик қилинаётган ҳайвон кўр, ғилай ёки кўзининг 1/3 қисмидан кўпроқ қисми нуқсонли бўлса ёхуд икки қулоғи ёки икки қулоғининг учдан бир қисмидан кўпроғи кесилган бўлса, уни қурбонлик қилиш дуруст бўлмайди.

1926-масала
Юрганда чўлоқ оёғини ерга босмай, уч оёқлаб юрадиган чўлоқ ҳайвонни қурбонлик қилиш дуруст эмас. Юрганда чўлоқ оёғини ҳам ерга босиб, оқсоқланиб бўлса-да, тўрт оёқлаб юрадиган чўлоқ ҳайвонни қурбонлик қилиш жоиз.

1927-масала
Суягида умуман ёғ қолмаган ўта ориқ ҳайвонни қурбонлик қилиш қилиш дуруст эмас. Аммо озғин бўлса-да, суягида ёғи бўлган ҳайвонни қурбонлик қилиш жоиз.

1928-масала
Тиши йўқ қўйнинг қурбонлиги дуруст эмас. Лекин кўпроқ тиши бор-у, баъзи тишлари тушган қўйнинг қурбонлиги жоиз.

1929-масала
Шохсиз туғилган қўйни қурбонликка сўйиш дуруст. Шохи бор, лекин шохининг баъзи жойлари синган қўйни қурбонликка сўйиш дуруст. Аммо шохи бош суягидан тўлиқ кўчиб кетган қўйни қурбонликка сўйиш жоиз эмас.

1930-масала
Икки қулоғи ҳам кесилган ёки умуман қулоғи йўқ бўлган ҳайвон қурбонликка ярамайди.

1931-масала
Бичилган ҳайвонни қурбонликка сўйиш жоиз. Қўтир тошган ҳайвонни қурбонликка сўйиш жоиз. Аммо қўтир сабабли ўта озиб кетган ҳайвонни қурбонликка сўйиш жоиз эмас.

"Жаннат зийнати" китобидан.
•┈•┈•┈•┈•❁✿❁•┈•┈•┈•┈•

☝️ДЎСТЛАРИНГИЗГА ҲАМ УЛАШИНГ!!!

@Yozmoqdamiz ✍️