Yoshlar kundaligi | Rasmiy

#Даҳонинг_болалиги

Бу мумтоз инсон тарихимизнинг энг мураккаб, энг жозибадор, энг драматик сиймоларидан биридир.

⏳ Дунёйи фонийга келиб, у нисбатан қисқа умр кўрди – бор-йўғи қирқ етти йил ҳаёт кечирди. Лекин шу суронли умри мобайнида у жаҳон тарихидан шавкатли ўрин олиб улгурди.

✨ Ҳали мурғак гўдак экан, ота-боболари уни суюб-эркалаб, яхши ниятлар билан залворли ном бериб атадилар. Исм ва жисмнинг бир-бирига узукка кўз қўйгандек мос келиши ноёб учрайдиган ҳодисадир. Лекин бу азамат шахс тимсолида бу ҳол ўзининг ёрқин ифодасини топган эди.

💪 Эзгу дуойи хайр шарофати ила у суврати сийратига ғоят монанд, муаззам ва қудратли салтанатнинг муносиб вориси ўлароқ вояга етди ва сўнгги нафасига қадар беқиёс шиддат, азим бир шижоат тарк этмади уни.

💎 У фазилат бобида камлиги йўқ инсон бўлиб камол топди. Бу беназир сиймо олмос истеъдодини синаб кўрмаган инсоний фаолият соҳаси жуда кам топилади.

Аслида, унинг умр йўли бошдан-оёқ тақдир имтиҳонларидан иборат эди, десак, янглиш бўлмас.

😔 У ўн икки ёшида отадан етим қолди.

Ҳали айрилиқ кўз ёшлари тинмай туриб, қисмат унинг гўдак бошига тож-у тахт миннатини солди.

⚔ Марҳум падарининг қирқи ўтмасдан у ғанимларга қарши жанг майдонида қилич яланғочлаб чиқишга мажбур бўлди.

Ўн икки ёшдан кейин рамазон ҳайитини бир ерда икки бор қарши олмоқ унга насиб этмади – умри мудом от устида, жанг-у жадалларда, сиёсат гирдобларида ўтди.

📚 Гарчанд маърифатли мурғак кўнгли илм-у зиё сари парвонадек талпиниб турса-да, тақдир унга на Бухоройи шариф мадрасаларида, на Бағдод байтулҳикмаларида таҳсил кўрмоқликни насиб этди.

📜 Лекин даҳо заковати ва илоҳий қалами билан у оламнинг тенгсиз адабий ва илмий мўъжизаларини яратмоқликка мушарраф бўлди.

📌 Зотан, унинг муаллими ҳам, мураббийи ҳам шу бешафқат Ҳаёт эди.

💔 У йигирма икки ёшида туғилган диёрини мангу тарк этди.

👑 Йигирма беш ёшида Афғонистон, Покистон, Ҳиндистон, Бангладеш мамлакатларининг аксарият қисмини қамраб олган улкан салтанатга асос солди ва қирқ уч ёшида бу ишни ниҳоясига етказди.

Унинг мамлакатдорлик сиёсати, ҳарб илми асрлар давомида жаҳон ҳукмдорлари учун ибрат мактаби бўлиб хизмат қилди.

🔥 Шу сабабли унинг бу борадаги ноёб тажрибалари Атилла, Юлий Сезар, Наполеон Бонапарт, Амир Темур сингари мумтоз давлат арбобларининг номлари билан бир қаторга қўйиб ўрганилади.

Адоват ва фитналар, исён ва суиқасдлар туфайли у умр бўйи қиличнинг дамида тургандек беором, беҳаловат кун кечирди. Неча бор муқаррар ўлим чангалида қолиб, ҳар сафар меҳрибон ва марҳаматли Оллоҳнинг қудрати ила яна ҳаётга қайтди.

⚡️ Тириклик чоғида чархнинг жабр-у жафосини ҳадсиз даражада тортган бу зоти бузург вафотидан кейин ҳам узоқ йиллар тақдирнинг машаққатли синовларига дуч келаверди.

👏 У фавқулодда нодир истеъдоди, беқиёс инсоний салоҳияти билан ҳақли равишда жаҳон аҳлининг ҳайрат ва эҳтиромига мушарраф бўлди. Айни фазилатлари билан у миллатимизнинг, халқимизнинг ифтихор байроқларидан бирига айланди.

📖 Дунёдаги не-не фозил инсонлар унинг ҳақида то ҳануз ҳайрат ва эътирофга тўлуғ ҳикоялар сўзлайдилар.

⚜ Бу зот – улуғ аждодимиз, қадим Турон – Туркистон ерининг паҳлавони Заҳириддин Муҳаммад Бобурдир.

✍ Хайриддин СУЛТОН

Yoshlar kundaligi