Ўзбекистон техник жиҳатдан тартибга солиш агентлиги | Расмий канал

O‘zbekiston texnik jihatdan tartibga solish agentligida mahalliy ishlab chiqaruvchilar va tadbirkorlar uchun oziq-ovqat va qishloq xo‘jaligi mahsulotlarini eksportini kengaytirish va eksportda keng qo‘llanilayotgan SMIIC standartlari bo‘yicha o‘quv seminari tashkil etildi.

Ishtirokchilarga SMIIC standartlari talablari, sinov metodlari, audit va sertifikatlashtirish jarayonlari bo‘yicha to‘liq ma’lumotlar berilib, "O‘zbekiston ilmiy-sinov va sifat nazorati markazi" davlat muassasasi laboratoriyalarida mahsulotlar sinovini amalga oshirish jarayonlari bilan yaqindan tanishtirildi.

Tadbirda O‘zbekiston Musulmonlar idorasi fatvo bo‘limi xodimi Xikmatullox domla Toshtemirov hamda standartlashtirish va muvofiqlikni baholash idoralari xodimlari ham ishtirok etdi.

O‘zbekiston texnik jihatdan tartibga solish agentligi direktori Akmal Jumanazarov tomonidan Agentlik va uning tizim tashkilotlarida ilm-fan va innovatsiyalar yo‘nalishlarida olib borilayotgan ishlar tahlili yuzasidan yil yakuniga bag‘ishlangan hisobot yig‘ilishi o‘tkazildi.

Unda oliy ta’lim muassasalari bilan hamkorlikda "dual ta’lim" tizimini joriy etish, kadrlarning malakasi bilan birga ilmiy va chet tillarini bilish darajasini oshirish, ilmiy izlanishlariga keng imkoniyatlar yaratish, o‘quv qo‘llanmalarini chop etish hamda bu boradagi ishlarni qayta ko‘rib chiqish masalalariga alohida to‘xtalib o‘tildi.

Sohada ilmiy innovatsiyalarni keng joriy qilish, yosh mutaxassislarni tadqiqot ishlariga jalb etish, ularni har tomonlama qo‘llab-quvvatlash hamda ilmga asoslangan ishlanmalarni yo‘lga qo‘yish borasidagi ishlar tahlil qilindi.

Bundan tashqari, yig‘ilish davomida xodimlarning tashabbus va takliflari eshitilib, tegishli masʼullarga aniq chora-tadbirlar belgilab berildi.

O‘zbekiston texnik jihatdan tartibga solish agentligi direktori Akmal Jumanazarov Adliya vazirligi departament boshlig‘i Baxrillo Xasanov hamda "Intellektual mulk markazi" davlat muassasasi direktori Baxodir Sagdullayev bilan uchrashdi.

Unda texnik jihatdan tartibga solish sohasida innovatsion g‘oyalar va ishlanmalarni rivojlantirish borasida amalga oshirilayotgan ishlar natijadorligi ko‘rib chiqildi.

Mazkur uchrashuvda Agentlik va uning tizim tashkilotlari xodimlarining intellektual mulk sohasida malakasini oshirish, yaratilgan intellektual mulk obyektlarini huquqiy muhofaza qilish, tijoratlashtirishga ko‘maklashish, shuningdek, intellektual mulk obyektlari bo‘yicha taqdim etilayotgan talabnomalar sifatini oshirish, xususan, talabnomalarni to‘g‘ri tuzish, topshirish, ular bo‘yicha ish yuritish masalalari bilan bog‘liq amaliy yordamlar ko‘rsatishda Markaz bilan hamkorlik o‘rnatish masalalari muhokama markazida bo‘ldi.

Muloqot davomida tomonlar o‘rtasida Hamkorlik Memorandumi imzolash hamda intellektual mulk sohasida texnologiyalarni qo‘llab-quvvatlash markazini tashkil etish bo‘yicha kelishuvga erishildi.

O‘zbekiston texnik jihatdan tartibga solish agentligi direktori Akmal Jumanazarov "Toshkent irrigatsiya va qishloq xoʻjaligini mexanizatsiyalash muhandislari instituti" milliy tadqiqot universiteti rektori, professor Bahodir Mirzayev bilan uchrashdi.

Uchrashuvda universitet professor o‘qituvchilarini Standartlar institutida soha bo‘yicha malakasini oshirish, hamkorlikda ilmiy va o‘quv adabiyotlar yaratish, sohaga sun’iy intellektni tadbiq etish bo‘yicha hamkorlik qilish, bakalavr va magistratura talabalarini dual ta’lim tizimini yo‘lga qo‘yish, texnik qo‘mitalar faoliyatiga professor o‘qituvchilarni keng jalb etish masalalari muhokama qilindi.

Bundan tashqari, oliy ta’lim muassasasidagi standartlashtirish va metrologiya innovatsion laboratoriyasi bilan yaqindan tanishish jarayonida akustika laboratoriyasini tashkil etish yuzasidan hamkorlik qilish bo‘yicha kelishuvga erishildi.

Texnik jihatdan tartibga solish sohasida nazorat inspeksiyasining Surxondaryo viloyati bo‘limi, Viloyat sanitariya-epidimologiya osoyishtalik va jamoat salomatligi boshqarmasi hamda Bosh prokuratura huzuridagi iqtisodiy jinoyatlarga qarshi kurashish departamenti viloyat boshqarmasi xodimlari bilan hamkorlikda tumanlarda tashkil etilgan yangi yil oziq-ovqat yarmarkalarida sotilayotgan oziq-ovqat (qandolat, kolbasa va konserva) mahsulotlari o‘rganildi.

Oʻrganishlar davomida mahsulotlarning qadoqlanishida texnik reglamentlar va qonunchilik talablariga amal qilinmagan holatlar aniqlandi.

Xususan, mahsulotlarda ishlab chiqarilgan sana, yaroqlilik muddati, miqdori va massasi kabi "UzTR.490-022:2017" texnik reglamenti talablariga rioya qilinmagan.

Mazkur qoidabuzarliklar yuzasidan savdo do‘konlari xodimlariga texnik reglament talablari bo‘yicha tushuntirish ishlari olib borildi hamda "Texnik jihatdan tartibga solish to‘g‘risida"gi Qonunning 43-moddasi talablari tushuntirildi.

Aniqlangan kamchiliklar bo‘yicha tegishli korxonalarga ogohlantirish xati berildi.

O‘zbekiston texnik jihatdan tartibga solish agentligi huzuridagi O‘zbekiston akkreditatsiya markazi IAF MLA ko‘p tomonlama akkreditatsiya natijalarini tan olish Bitimi doirasida hozirgi kunda dolzarb hisoblanmish ISO/IEC 27001 "Аxborot xavfsizligi, kiberxavfsizlik va mahfiylikni himoya qilish. Аxborot xavfsizligini boshqarish tizimlari. Talablar." hamda ISO 13485 "Tibbiy mahsulotlar. Sifatni boshqarish tizimlari. Tartibga solish boʼyicha talablar" xalqaro standartlari bo‘yicha sertifikatlashtirish faoliyatlarini tan olishga erishdi.

Markaz tomonidan ushbu sohalarda akkreditatsiyadan oʻtgan muvofiqlikni baholash organlari tomonidan rasmiylashtirilgan sertifikatlar IAF MLA Bitimiga qo‘l qo‘ygan mamlakatlar orasida tan olinishiga asos yaratildi.

Shu o‘rnida O‘zbekiston milliy akkreditatsiya tizimining xalqaro miqyosda tan olingan sohalari jami 10 taga yetdi.

O‘zbekiston texnik jihatdan tartibga solish agentligi huzuridagi Oʻzbekiston milliy akkreditatsiya markazi mutaxassislari bir qator xorijiy mamlakatlarda, jumladan, Yevropa davlatlarida baholash ishlarini olib bormoqdalar.

Xalqaro darajada tan olishga erishgan "O‘zbekiston akkreditatsiya markazi" DM mutaxassislari malakasi xorijda ham o‘z o‘rniga ega bo‘lib bormoqda.

Hozirda Markaz baholovchilari Elmira Tagieva, Ruxiddin Djabbarxanov hamda Komiljon Bekmirzaevlar Germaniya Federativ Respublikasi, Trier shahrida joylashgan "JT International Germany Gmbh" sinov laboratoriyasini akkreditatsiyadan o‘tkazish bo‘yicha baholash ishlarini olib bormoqda.

Baholash O‘zDst ISO/IEC 17025:2019 - "Sinov va kalibrlash laboratoriyalarining kompetentligiga qoʼyiladigan umumiy talablar" davlat standarti asosida o‘tkazilmoqda.

Shuningdek, audit jarayonida Markaz mutaxassislari laboratoriya xodimlarining malakasini baholash maqsadida bir qator ko‘rsatkichlar bo‘yicha olib borilgan nazorat sinovlarini kuzatdilar.

Shuningdek, Germaniyadagi laboratoriyaning akkreditatsiyasi gibrid shaklda oʻtmoqda. Markaz baholovchisi Mahmudjon Hayrullaev metrologiyaga aloqador qism bo‘yicha masofadan turib audit oʻtkazdi.