Самарқандда ўз жонига қасд қилгани айтилган 69 ёшли аёл қариндошлари томонидан дафн этилди. Прокуратура қасддан одам ўлдириш моддаси бўйича жиноий иш очди
Самарқанд вилояти Пастдарғом туман прокуратурасига 7 февраль куни соат 20:50 ларда мурожаат келиб тушган.
Бош прокуратура матбуот хизматининг «Дарё»га хабар беришича, мурожаатда туманда яшаган 1951 йилда туғилган аёл А.У. ўз жонига қасд қилиб, вафот этганлиги, унинг яқин қариндошлари бу ҳақда ҳуқуқни муҳофаза қилувчи органларга хабар бермасдан, жасадини туманнинг Олти қаҳрамон маҳалласида жойлашган «Дўстлик» қабристонига кўмиб юборганлиги айтилган.
Ўтказилган бир қатор тезкор-суриштирув ҳаракатлари натижасида, марҳума А.У.нинг тан жароҳатларининг жойлашуви, келиб чиқиши ҳамда жасад ҳуқуқни муҳофаза қилувчи органларга хабар берилмасдан кўмиб юборилганлиги ҳолати шубҳали бўлиб, уни қотиллик жинояти қурбони бўлиши мумкинлиги, ҳақиқатни аниқлаш учун бир қатор тергов ҳаракатлари ўтказиш лозимлиги инобатга олиниб, 10 февраль куни туман прокуратураси томонидан Жиноят кодексининг 97-моддаси (қасддан одам ўлдириш) 1-қисми билан жиноят иши қўзғатилган.
Ҳозирда ушбу жиноятни фош этиш чоралари кўрилмоқда, дейилади хабарда.
@namanganliklar_live
