May ohanglari
25-may
So‘ngan umid,
Istalmagan orzu yuki
Ezib borar yelkalarimni.
Ko‘zlarimni yumib eslayman
Kechki ikki, chiroq yorug‘i
Va o‘qilyotgan kitob shivirin.
Uyg‘onib ketardi bobom uyqudan,
ko‘zlarimda aybdorlik va
Uyqu istagini yashirganimcha
Tabassum qilardim shafaqrang.
Adadsiz mehrni taniganman men,
O‘shanda bobomning nigohlarida.
Ishonchni, umidni, muhabbatni ham
Duoga ochilgan kaftlar ichida
Ko‘rganim yodimda.
Bugun olis, katta shaharda,
Hashamatli yemakxonada
Yog‘ayotgan yomg‘irga qarab
Istalmaslik azobi ichra
tabassum qilaman shafaqrang.
Lek,
Bobomni qaytarmas endi bu hayot...
26-may
Meni shahar ezmagan,
Va na odamlar,
Na adoqsiz g‘am
Va xattoki ishq.
Ko‘zimga kulguni bermagan asli,
Na diydor,
Na dunyo
Va na xatto sen.
Ularning barisi menda bor edi,
Xuddi kulol loyni qoryotgan mahal
Qo‘ng‘irsoch qizchasi yugurib kelib
Jajji barmoqlarin shevasi bilan
Yaxshi ko‘rishini aytgani kabi
Gʻam va baxt ichida yaralganman men...
31-may
Bahor ketar ekan o‘ziday
Xush ifor qoldirib ketar dunyoga
Ilk ko‘klam ochilgan o‘rik guliday
Napormon mayinlik his etar ko‘ngil.
Maysalarga yuz bosgan chog‘da
Qitiqlagan farah yoprilar
Yuzlarga, kunlarga, dunyoga...
Bahordek yashagim keladi azal --
Ketsam...
Go‘zal bir mayinlik qolsa ortimda,
Entikib eslansa baxtning bo‘ylari.
Axir bahor har damgidan-da
ketayotgan lahzada go‘zal...
@FeruzaXayrullayeva