Бухоро вилояти судлари | Расмий канал

Ҳар йили баҳорнинг илк кунлари юртимиз бўйлаб гулдек нозик ҳилқат вакилалари бўлмиш аёлларнинг байрами – 8 март нишонланади. Бу сана – меҳрибон онамиз, севимли опа-сингилларимиз, садоқатли аёлимиз, азиз устозларимиз ва ҳамкасбларимизни яна бир бор қадрлаш, уларга чексиз миннатдорчилик билдириш учун айни фурсатдир. Аёллар – нафақат оила таянчи, балки жамият тараққиёти ва келажагини белгилаб берувчи буюк кучдир. Шу боис бу кун ҳар бир юракка илиқлик улашадиган, муҳаббат ва ҳурмат баралла тараннум этиладиган айёмдир.

Мазкур айём аёлларнинг жамият ҳаётидаги бебаҳо ўрни ва улкан ҳиссасини яна бир бор эътироф этиш, уларга чуқур ҳурмат ва миннатдорлик изҳор этиш учун муҳим санадир. Хотин-қизлар нафақат оила мустаҳкамлиги, балки ижтимоий-иқтисодий тараққиёт, маънавий юксалиш ва келажак авлод тарбиясида ҳам беқиёс ўринга эгадир.
Бугунги кунда мамлакатимиз суд-ҳуқуқ тизимида хотин-қизлар фаолияти алоҳида эътирофга лойиқдир. Адолат, қонун устуворлиги ва инсон ҳуқуқларини таъминлашдек мураккаб ва масъулиятли вазифаларни сидқидилдан бажараётган аёл судья ва ходималар нафақат касбий маҳорати, балки юксак инсоний фазилатлари билан ҳам юртдошларимиз ҳурматини қозонмоқдалар. Улар ҳуқуқий маданиятни юксалтириш, жамиятда адолатга бўлган ишончни мустаҳкамлаш йўлида ибрат бўлиб келаётган фидойи ва ташаббускор инсонлардир.

Суд тизимида фаолият юритаётган аёллар нафақат ўз касбига садоқати, балки теран фикрлаши, ҳаётий тажрибаси ва инсонийлик фазилатлари билан ҳам юксак ҳурматга сазовордир. Шу боис, уларнинг сермазмун фаолиятини эътироф этиш, меҳнатларига муносиб баҳо бериш жамиятимиз учун ҳам ўта муҳим аҳамият касб этади.

Ушбу сана муносабати билан аёл судья ва ходималарни тақдирлаш, уларнинг фидокорона меҳнатларини муносиб эътироф этиш мақсадида Бухоро вилоят маъмурий судида тантанали тақдирлаш маросими бўлиб ўтди.

Маросимни Бухоро вилоят маъмурий суди раиси А.Ахмедов очиб, адолат ва инсоф, олий маънавият ва юксак масъулият тамойилларини ҳаёт тарзига айлантираётган, қонунчилик мезонларини сўзсиз таъминлаш билан бирга, ҳар бир фуқаронинг қонуний ҳуқуқ ва манфаатларини ҳимоя қилишда ўзига хос жасорат кўрсатиб, жамиятда тенглик ва адолат тамойилларини мустаҳкамлашга хизмат қилаётган аёл судья ва ходималарни самимий қутлаб, уларнинг келгусидаги фаолиятида улкан зафарлар тилади.

Шундан сўнг, вилоят маъмурий суди раиси А.Ахмедов суд тизимида кўп йиллардан буён меҳнат қилиб келаётган Бухоро вилоят маъмурий судининг судьяси Г.Муллабаева Ўзбекистон Республикаси Бош вазири ўринбосари, хотин-қизлар қўмитаси раиси З.Маҳкамова томонидан “Мўътабар аёл” кўкрак нишони билан тақдирланганини эътироф этиб, судья Г.Муллабаевани ушбу юксак мукофот билан яна бир бор муборакбод этди.

Шунингдек, тадбирда вилоят маъмурий судининг архив мудираси Ю.Абдугаффорова, судья катта ёрдамчилари Ф.Умарова ва М.Тошева ҳамда тозаликка масъул бўлган ходималар М.Шарипова, М.Файзиева, Х.Раупова ва Ш.Абдиевалар вилоят маъмурий суди жамоасининг қимматбаҳо совғалари билан тақдиланди.
Тадбирда тадбир иштирокчилари, хусусан судьялар томонидан мунис ва мўътабар аёлларимизни байрам билан табриклаб, самимий тилаклар билдирилди.

БУХОРО ВИЛОЯТ МАЪМУРИЙ СУДИ

Сайт I Telegram I Facebook

Бугун Олий суд ҳамда вилоятлар судларида 8 март – Халқаро хотин-қизлар куни муносабати билан байрам тадбири бўлиб ўтди.

Маълумки, ҳар бир жамият ва халқнинг маданияти нечоғлик юксак эканлиги, маънавий баркамоллиги энг аввало, аёлларга бўлган муносабат, уларга кўрсатилаётган ҳурмат-эътибор билан белгиланади. Чунки аёл деганда, аввало ҳар биримизнинг кўз ўнгимизда меҳрибон оналаримиз, мунис опа-сингилларимиз ва латофатли қизларимизнинг нурли чеҳраси намоён бўлади.

Шунинг баробарида аёллар оиламиз бекаси, миллатимиз давомчиси ҳисобланган фарзандларимизни оқ ювиб, оқ тарайдиган, уларга муносиб тарбия берадиган меҳрибон ва оқила зотлардир.

8-март - Халқаро хотин-қизлар куни байрами муносабати билан Ўзбекистон Республикаси Олий суддида тантанали тадбир ўтказилди. Кўтаринки кайфиятда нишонланган байрам тадбирида барча вилоят судлари видеоконференцалоқа орқали иштирок этди.

Олий суд раиси Б.Исламов нутқ сўзлаб соҳада фолият олиб бораётган барча хотин-қизларни байрам билан қизғин табриклади. Аёл судьялар, суд ходимлари, шунингдек техник ходимларнинг меҳнатини алоҳида эътироф этиб, садоқатли хизматлари учун миннатдорчилик билдирди.

Одил судловни амалга оширишдаги фидокорона хизматлари инобатга олиниб, Жомбой туманлараро иқтисодий суди раиси Навбаҳор Турсунова давлатимизнинг “Содиқ хизматлари учун” медалига муносиб кўрилганини алоҳида таъкидлаб, медал соҳибасини Олий суд раҳбарияти ва жамоаси номидан табриклади. Бу давлат мукофоти суд тизимидаги барча ҳамкасблар учун фахр эканлигини таъкидлади.

Шунингдек, тадбирда бир гуруҳ хотин-қизлар Олий суднинг “Фахрий ёрлиқлари” ва эсталик совғалари билан тақдирландилар.

Мазкур байрам тадбири Бухоро вилоят судида давом эттирилди. Вилоят суди раиси У.Рўзиев тизимда меҳнат қилаётган барча хотин-қизларни баҳор, янгиланиш, уйғониш, гўзаллик ва нафосат байрами билан қизғин табриклади. Уларнинг одил судлов фаолиятини амалга ошириш ва жамиятда қонун устуворлигини таъминлаш, фуқароларнинг суд идораларига бўлган ишончини мустаҳкамлаш йўлидаги беқиёс хизматларини таъкидлаб, келгусидаги фаолиятига эзгу тилакларини изҳор қилди.

Шунингдек, вилоят судининг раиснинг ўринбосарлари, судьялар ҳам мунис ва мўътабар аёлларни байрам билан табриклаб, самимий тилаклар билдирдилар. Байрам тадбирида барча туман (шаҳар) судлари видеоконференцалоқа орқали иштирок этишди.

Тадбир давомида хотин-қизларга гуллар ва эсталик совғалар тантанали равишда топширилди.

Сайт I Telegram I Facebook