#Мақола
Бизни ташлаб кетма рамазон!
Сенда нозил бўлгандир Қуръон,
Сенда хатм қилинар Қуръон.
Сен ила биз топармиз "Райён",
Бизни ташлаб кетма Рамазон!
Мусулмонлар орзиқиб кутган муборак Рамазон ойининг илк кунидамиз.
Рамазон Аллоҳ таолонинг мўмин бандаларига улкан тортиғи ва мўл-кўл неъматларидан биридир. Аллоҳ таоло бандаларга муборак Рамазон ойи рўзасини жорий қилиб, уни диннинг буюк рукнларидан ва динни унинг устига қоим бўладиган асослардан бири қилиб белгилаган. Рамазон рўзаси Аллоҳ бандаларига марҳамат қилган улкан неъматларидан бири бўлгани учун ҳам, Рамазон ҳақида нозил қилинган оятлар ушбу қавл билан якунланади:"... Шояд шукр қилсангиз"(“Бақара” сураси, 185-оят).
Муборак Рамазон ойи мўминларнинг иймони зиёда бўлиши ҳамда фарз амалларни бажаришда сусткашлик ва хато-камчиликларга йўл қўювчилар тавба қилиши учун бандаларга берилган илоҳий совға ва раббоний ҳадядир.
Шундай экан, унга ҳақиқий шукрона ва ибодат қилишимиз учун бизга инъом қилиб берган ушбу неъматнинг улканлигини идрок қилиб, уларнинг баъзилари устида тўхталиб ўтсак. Рамазон ойининг қиёси ҳақида Ибн Жавзий раҳматуллоҳи алайҳ айтадилар: "Ўн икки ойнинг мисоли Яъқуб алайҳиссаломга ўхшайди. Худди унга болаларининг энг суюклиси Юсуф алайҳиссалом бўлганидек, Рамазон ойи ҳам Аллоҳ таолога ойларнинг энг суюклисидир".
Рамазон ойининг хосияти яна шундаки, ушбу муборак ойда Аллоҳ мусулмонларга катта Бадр ғазотида мушриклар устидан ғалаба нашъасини берди. Ваҳоланки, ушбу жангда мушрикларнинг адади мусулмонлардан уч баробар кўп эди.
Муборак Рамазон ойи Қуръон нозил бўлган ойдир. Ҳозир айнан Қуръон нозил бўлган ойда унинг фазли ва ўрни буюклигини билишимиз жуда мухимдир.
Қуръон Аллоҳ томонидан нозил бўлгани сабабли унга бўлган муҳаббат Аллоҳга бўлган муҳаббатни билдиради.
Чунончи, Ибн Масъуд розияллоҳу анҳу шундай дейдилар: “Ким Аллоҳ азза ва жаллани яхши кўришини билишни хоҳласа, ўзини Қуръонга кўндаланг қилсин. Агар Қуръонни яхши кўрса, бас, у Аллоҳ азза ва жаллани яхши кўради. Чунки Қуръон Аллоҳ азза ва жалланинг Каломидир”.
Рамазон ҳидоят ойи бўлиб, бу ҳақида Аллоҳ таоло шундай марҳамат қилади: “(У саноқли кунлар) Рамазон ойидирки, бу ойда одамлар учун ҳидоят ва фурқон (ҳақ билан ботилни ажратгувчи)нинг очиқ баёнотлари бўлиб Қуръон нозил қилинган” (“Бақара” сураси, 185-оят)...
Рамазон мағфират ойи бўлгани сабабли ушбу ойда қўпроқ саҳоват қилиш, ҳадялар бериш, меҳр-муруват кўрсатиш матлуб амаллардан ҳисобланади.
Дарҳақиқат, Расулуллоҳ соллаллоҳу алайҳи васаллам саҳобаларига ушбу улуғ ой ҳақида хушхабар бериб, уларни айнан шу ойда кўпроқ намоз ўқишга, кундузларни рўза билан, кечаларни эса нафл ибодатлари билан ўтказишга, кўпроқ зикр, тасбиҳ, ва Қуръон тиловати билан машғул бўлишга, фарз ва нафл садақалар қилишга ва шу каби солиҳ амалларга тарғиб қилардилар...
Аслини олганда, ҳар бир мўмин инсон Қуръони Каримни тиловат қилиб ҳам, тинглаб ҳам тўймайди. Салафи солиҳинлар Рамазон ойи намоз пайтида ҳам ва бошқа ҳолатларда Қуръон тиловат қилардилар. Зуҳрий раҳматуллоҳи алайҳ Рамазон кириб келса шундай дерди: “Албатта у Қуръон тиловати ва таом улашиш (ойи)дир”. Имом Молик раҳматуллоҳи алайҳ Рамазон кирса, ҳадис ўқиш ва илм аҳли билан суҳбат қуришдан қочар ва Қуръонни мусҳафдан (қараб ўқиш) тиловат қилишга киришарди. Суфён Саврий Рамазон кирса, барча ибодатни тарк этиб, Қуръон тиловатига киришарди. Улар ҳақида бу мазмундаги маълумотлар кўп. Аллоҳ таоло сиз ва бизга ҳам ўша зотларга гўзал суратда эргашишни ва уларнинг изларидан юришни насиб қилсин. У Зот табарока ва таолодан гўзал исмлари ва олий сифатлари ила қалбларимизга Қуръон муҳаббати, уни улуғлаш ва унга амал қилиш билан кўрк бағишлашни ва бизни Ўзининг хос бандалари бўлмиш Қуръон аҳлидан қилишини ҳар йилги муборак ойнинг рўзасини тутмоқлик учун қодир куч-қувват бермоғлигини сўраймиз!
Қизилтепа туман бош имом хатибининг хотин-қизлар масалалари бўйича ўринбосари Ойдин Равшанова
https://t.me//Bastomiy_uz
