Assalomu alaykum!
Bugun men uchun juda muhim kun – hayotimga rang bergan, orzularimni qo‘llab-quvvatlagan inson, Otajonimning tavallud ayyomi.
Ko‘pchilik menga, “Qanday qilib hamma narsaga qiziqib, har bir narsani bilishga intilasan?” deb savol beradi. Mening bu savolga javobim oddiy: bu – OTAM.
Bolaligimdan meni shaxmat degan buyuk dunyoga olib kirgan, qancha savol bersam ham charchamay, har biriga javob bergan tirik entsiklopediyam – bu OTAM.
Futbol tomosha qilib o‘tirganlarida, yonlarida 2 yoki 3 soat o‘tirganimga qaramay, “Sen qiz bolasan, futbolni nima qilasan?” demasdan, barcha qoidalarini o‘rgatgan insonim – bu ham OTAM.
Men o‘qiyotgan har bir kitobni o‘zlari ham o‘qib, keyin men bilan tahlil qilgan, bilimlarimni boyitishga yordam bergan eng yaqin kitobxonim.
Oddiy telefon kamerasida olingan rasmimni ham maqtashni unutmay, “Albatta, bir kuni kamera olasan!” deb motivatsiya bergan eng katta motivatorim.
Hayotimda qandaydir natijalarga erishgan bo‘lsam, bu natijalarimning ortida OTAMning ishonchi, qo‘llab-quvvatlovi bor. Boshqalar ishonmagan paytda ham ular menga ishongan.
Otajon!
Ha, men o‘sha injiq qizingizman, har bir gapingizga yig‘lab javob beradigan yig‘loqi qizingiz.
Ha, men o‘sha 18 yoshida Sizga mashina olib berishni orzu qilgan-u, lekin olib berolmagan qizingizman.
Ha, men o‘sha siz “Endi Makka-yu Madinaga borsak qiynalmaymiz, qizimiz ingliz tilida o‘qiydi!” deb xursand bo‘lgan, lekin grantga kira olmay, kontraktda o‘qishga kirgan qizingizman.
Ha, men o‘sha sizga hech qachon yaxshi ko‘rishini ayta olmagan va hattoki bu so‘zlarni to‘g‘ridan-to‘g‘ri sizga emas, kanaliga yozayotgan qizingizman.
Ammo, Ota, men sizni juda ham yaxshi ko‘raman. Tug‘ilgan kuningiz bilan ❤️
