O'ZBEKISTONDA SOG'LIQNI SAQLASH - ЗДРАВООХРАНЕНИЕ УЗБЕКИСТАНА газетасининг расмий канали

Бухорода тиббиёт ходимлари ўртасида футбол турнири бошланди

Ўзбекистон Республикаси Президентининг 2020 йил 30 октябрдаги "Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида"ги қарорида белгиланган вазифалар ижросини таъминлаш, оммавий спортни ривожлантириш мақсадида Бухоро вилоятида спорт мусобақалари мунтазам ташкил этилмоқда.

Шу муносабат билан Бухоро вилояти Соғлиқни сақлаш бошқармаси томонидан тизимда фаолият юритаётган тиббиёт ходимлари ўртасида футбол бўйича "Бухоро соғлиқни сақлаш бошқармаси кубоги" турнири бошланди. Ушбу мусобақада вилоятдаги даволаш-профилактика муассасалари, туман ва шаҳар тиббиёт бирлашмаларида фаолият олиб бораётган врачлар иштирок этмоқда.

Мусобақа доирасида иштирокчилар ўз жамоалари билан ғалаба учун кураш олиб боришмоқда.

Ушбу турнир тиббиёт ходимлари ўртасида соғлом турмуш тарзини тарғиб қилиш, спортга бўлган қизиқишни ошириш ва жамоавий бирдамликни кучайтиришга хизмат қилади.

Мусобақа ғолиблари Наврўз байрами арафасида тантанали равишда тақдирланади.

➡️ Бухоро тиббиёти

Бухоро шаҳрида кенг кўламли тиббий кўрик ўтказилди

Бугун Бухоро шаҳридаги О.Хўжаев маҳалласида аҳоли саломатлигини мустаҳкамлаш ва касалликларни эрта аниқлаш мақсадида кенг кўламли сайёр тиббий кўрик ташкил этилди.

Тиббий кўрикда Бухоро вилоят соғлиқни сақлаш бошқармаси тасарруфидаги муассасалар ҳамда шаҳар тиббиёт бирлашмасида фаолият юритувчи 15 нафар малакали мутахассис иштирок этди. Фуқаролар мобил офтальмологик поликлиника, мобил проскан аппарати ва мобил донорлик бригадаси имкониятларидан фойдаланиш имкониятига эга бўлди.

Шунингдек, ижтимоий ётоқхонада ўтказилган тиббий кўрик давомида мутахассислар хонадонма-хонадон юриб, аҳолининг яшаш шароити ва тиббий-ижтимоий ҳолати яхшиланишига алоҳида эътибор қаратдилар.

Тадбир доирасида 980 нафар аҳолининг 327 нафари тиббий текширувдан ўтказилди. Уларнинг 232 нафари 18 ёшдан катта шахслар, 7 нафари 1 ёшгача бўлган чақалоқлар, 88 нафари эса 18 ёшгача бўлган болаларни ташкил этди. Шунингдек, 191 нафар туғруқ ёшидаги аёллар ҳам тиббий текширувдан ўтказилди.

Текширув натижаларига кўра, 325 нафар беморда жами 391 та турли хил касалликлар аниқланди. Мазкур ҳолатлар бўйича беморлар назоратга олиниб, уларнинг саломатлигини тиклаш учун зарур чоралар кўрила бошланди.

Шунингдек, тиббий кўрик давомида 20 нафар беморга ташкилотчилар томонидан бепул дори-дармонлар топширилди. 4 нафар бемор эса имтиёзли жарроҳлик амалиётига йўналтирилди.

Мазкур тиббий кўрик аҳолининг саломатлигини яхшилаш ва касалликларни эрта аниқлаш мақсадида ташкил этилган бўлиб, бундай тадбирлар келгусида ҳам давом эттирилиши режалаштирилган.

Эслатиб ўтамиз, тиббий кўрик эртага ҳам шу манзилда давом этади.


➡️ Бухоро тиббиёти

Бухоро туман тиббиёт бирлашмаси нуронийлар учун соғлом турмуш тарзи тадбири ўтказди

Бухоро туман тиббиёт бирлашмаси тиббий ходимлари томонидан Работак маҳалла фуқаролар йиғинида нуронийлар учун соғлом турмуш тарзига бағишланган тадбир ташкил этилди. Тадбир доирасида кекса ёшда тўғри овқатланиш, гиёҳларнинг организмга фойдаси, жисмоний фаоллик ва "5000 минг қадам сари олға" марафони ҳамда мини-футбол мусобақаси ўтказилди.

Тадбирда тиббий мутахассислар аҳолига туз ва шакарни меъёрида истеъмол қилиш ҳамда кундалик овқатланиш рационини тўғри ташкил этиш бўйича тавсиялар бердилар. Шунингдек, табиий гиёҳларни қайси вақтда ва қандай ичиш кераклиги, уларнинг организмга фойдали таъсири ҳақида ҳам тушунчалар берилди.

Нуронийлар учун жисмоний фаолликнинг аҳамияти ва унинг саломатликка ижобий таъсири ҳақида кенг маълумотлар тақдим этилди. Иштирокчилар ўзларини қизиқтирган саволларга мутахассислар томонидан тўлиқ жавоб олдилар.

Тадбир давомида "5000 минг қадам сари олға" марафони ва мини-футбол мусобақаси ҳам ташкил этилди. Бу спорт тадбирлари нуронийлар ўртасида катта қизиқиш уйғотиб, уларни фаол ҳаракатланишга илҳомлантирди.

Бундай тадбирлар нуронийларнинг жисмоний ва маънавий саломатлигини мустаҳкамлашга, соғлом турмуш тарзига риоя қилишларига кўмаклашади. Бухоро туман тиббиёт бирлашмаси ушбу йўналишдаги ишларни давом эттиришни режалаштирмоқда.

➡️ Бухоро тиббиёти