O'zLiDeP Бухоро вилоят Кенгаши

Сайловчиларнинг мурожаати O’zLiDeP депутати эътиборида

O'zLiDePдан Бухоро шаҳар Кенгашига сайланган депутатларнинг сайловчилар билан учрашувлари давом этмоқда. Жумладан, 8-М.Таробий сайлов округидан сайланган депутат Нодир Ҳамдамов ўз ўрганишлари давомида шаҳардаги Б.Нақшбанд МФЙда бўлиб, “еттилик” тизими ходимлари фаолияти билан яқиндан танишди.

Депутат Н.Хамдамов 11030 нафар аҳоли истиқомат қилиб келаётган ушбу махалла худудига қарашли ижтимоий соҳа объектлари билан танишиш мақсадида 43-умумтаълим мактаби ҳамда 11-сон оилавий поликлиникада бўлди.

Сайловчилар билан ўтказилган юзма-юз мулоқотлари чоғида улар ўз маҳаллалари ҳудудида қўшимча равишда яна 2та чиқинди тўплаш шаҳобчалари қуриш зарурлигини, аҳолиси зич жойлашган А.Темур кўчасида эса болалар боғчасига эҳтиёж сезилаётганлигини маълум қилдилар.

Депутат ўз ўрганишлари давомида шунингдек, ҳудуддаги 43-сонли умумтаълим мактаби гарчи 630 ўринга мўлжалланган бўлсада, бу ерда ҳозирги пайтда 1430 нафар ўқувчи 2 сменада таълим-тарбия олаётганини аниқлади. Ҳолбуки, ушбу билим даргоҳига қарашли бўш турган ер участкасида қўшимча бино қуриш имконияти мавжуд.

Аниқланган барча муаммолар бўйича тегишли мутасадди ташкилот раҳбарларига депутатлик сўровлари юборилиб, ижроси назоратга олинадиган бўлди.

Депутат Жонибек Матниёзов ўз сайловчилари ҳузурида

ЎзЛиДеП Бухоро шаҳар Кенгаши депутатлигига 27-Имом ал-Бухорий сайлов округидан сайланган Жонибек Матниёзов ҳудуддаги С.Рахимов МФЙ аҳолиси билан ўтказилган учрашувлари доирасида нафақат ушбу маҳалла, балки унга туташ Ғ.Ғулом, Янгиобод, Наршахий, Кўкалдош МФЙларида амалга оширилаётган ободончилик ишлари билан қизиқиб, аҳолининг турмуш даражасини яхшилаш, айрим мавжуд муаммоларни бартараф этиш бўйича ўз фикр-мулоҳазаларини билдирди.

Жумладан, 6050 нафар аҳоли истиқомат қилиб келаётган С.Рахимов МФЙдаги “Аёллар” дафтари рўйхатида 157 нафар хотин-қизлар қайд этилган бўлиб, аҳоли вакилларидан 103 нафари бугунги кунда хорижий давлатларда ишлаб келмоқда.

Ўрганишлар чоғида халқ вакили Ж.Матниёзов Хўжа Ориф Моҳитобон кўчаси билан Озод кўчаси кесишмасида бўлганида бу ерда ёмғир сувлари тўпланиб қолганига гувоҳ бўлди.

Навбатдаги иситиш мавсумига кўпчилик жойларда бўлганидек, МФЙ ҳудудидаги 17-сон МТТда ҳам пухта ҳозирлик кўрилган. Бироқ, ушбу тарбия маскани ҳовлисидаги экин майдони бугунги кунда давом этаётган “Яшил макон” умуммиллий дастури ижросини таъминлаш имконини бермаётгани ўрганишлар давомида аниқланди.

Вилоят қон қуйиш маркази кейинги пайтда бир қатор замонавий тиббий асбоб-ускуналар билан таъминланди. Грант асосида хориждан олиб келинган ПЦР аппарати улардан биридир. Депутат Ж.Матниёзов бу ерда бўлганида шу пайтгача ушбу зарур аппаратдан фойдаланилмаётганлигини кўрди. Ушбу муаммонинг ечими эса молиявий масала билан боғлиқ эканлиги аниқланди.

Ж.Матниёзов томонидан ўрганишлар давомида аниқланган барча камчиликларни бартараф этиш юзасидан мутасадди ташкилотларнинг раҳбарларига депутатлик сўровлари юборилиб, уларнинг ижроси назоратга олинадиган бўлди.