Xabar berib borayotganimizdek, “Oʻzkimyosanoat” AJ fermerlar va soha vakillari ishtirokida hududlarda “Mineral oʻgʻit - moʻl hosil garovi” mavzusida turkum amaliy seminarlar oʻtkazib kelmoqda.

Ularning navbatdagisi Andijon viloyatida tashkil etildi.

Oʻzbekiston Respublikasi Hisob palatasi bilan hamkorlikda oʻtkazilgan tadbirda viloyat va tuman hokimlarining qishloq xoʻjaligi masalalari boʻyicha oʻrinbosarlari, qishloq xoʻjaligi boshqarmalari rahbarlari, fermerlar, tadbirkorlik subyektlari, tijorat banklari hamda “Oʻzkimyosanoat” AJ tarmoq korxonalari mutasaddilari ishtirok etdi.

“Oʻzkimyosanoat” AJ rahbariyati hamda soha masʼullari tarmoq korxonalari tomonidan ishlab chiqarilayotgan mineral oʻgʻitlarning sifati va xususiyatlari, mineral oʻgʻitlarni birjada chegirma narxlarda sotish mexanizmi, hududlarda faoliyat olib borayotgan korxonalarning ijara (vakolatli) omborlari xususida batafsil maʼlumotlar berdilar.

Taʼkidlash joiz, “Oʻzkimyosanoat” AJda mineral oʻgʻitlar savdosi boʻyicha fermer xoʻjaliklari va dehqonlar uchun bir qator qulayliklar yaratilmoqda. Xususan, birja savdolariga mineral oʻgʻitlarning boshlangʻich narxlaridan oʻrtacha 10%gacha pasaytirib xarid qilish-auksion tartibida savdoga qoʻyish mexanizmi joriy etildi.

Tadbir davomida birjada alohida “forvard” kontraktlarda oldindan 30 foiz toʻlov, qolgan 70 foiz qismiga faktoring xizmatidan foydalangan holda xarid qilish mexanizmlari yuzasidan taqdimotlar oʻtkazildi.

Amaliy muloqot formatida tashkil etilgan tadbirda ishtirokchilarni qiziqtirgan savollariga atroflicha javoblar berildi.

😄 “Oʻzkimyosanoat” AJ Matbuot xizmati
——————————————————————————————
🌐 Veb-sayt ✉️ Telegram 📱 Facebook 📱 Instagram 🌐 Youtube