Toshkent aeroportida Alisher Navoiy tavallud kuni keng nishonlandi9-fevral kuni buyuk shoir Mir Alisher Navoiy tavalludining 584 yilligi nishonlanmoqda. Shu kuni “Uzbekistan Airports” Alisher Navoiy nomidagi Davlat akademik opera va balet katta teatri bilan hamkorlikda poytaxt xalqaro aeroportining uchib ketish zalida tematik spektakl tashkil qildi.
Katta teatrning yetakchi solistlari Abdig‘ani Ro‘ziev va Shavkat Ziyomuhamedovlar bir necha soat davomida Alisher Navoiy va Abdurahmon Jomiy obrazini yaratishdi. Aeroport yo‘lovchilari va mehmonlari o‘rta asrlarning atoqli shoiri she’rlarini tinglash, tarixiy qahramonlar libosidagi teatr aktyorlari bilan esdalik suratlariga tushish imkoniga ega bo‘ldilar.
“Dunyoning ko‘plab aeroportlari terminallarida tarixiy liboslar kiygan animatorlar yurishadi. Bu ham milliy madaniyatni ommalashtirish, ham mamlakatning sayyohlik salohiyatini namoyish qilishdir. Biz bu amaliyotni Toshkent aeroportida qo‘llashga qaror qildik va uni Alisher Navoiy tavallud kuniga bag‘ishladik. Bizning g‘oyamiz Alisher Navoiy nomidagi Davlat akademik opera va balet katta teatri tomonidan qo‘llab-quvvatlangani bois, bugun katta teatrning yetakchi aktyorlari Navoiy va Jomiy rollarini ijro etishdi. Buning uchun teatr rahbari Ramiz Usmonovga alohida minnatdorchilik bildiramiz”, — deya izoh berdi "Uzbekistan Airports" matbuot xizmati.
Xorijlik yo‘lovchilar ko‘p bo‘lgan terminalda qahramonlar katta ishtiyoq bilan kutib olindi, esdalik uchun suratga tushishdi, turli tillardagi she’rlarni zavq bilan tinglashdi. Madaniy spektakl bugun Sharja, Tehron, Sharm al-Shayx, Moskva, Olmaota, Dushanbe, Bishkek, Istanbul va boshqa shaharlarga uchayotgan mingdan ortiq yo‘lovchilarni qamrab oldi.
#navoiy
Web-site |
Facebook |
Instagram |
Telegram |
X |
IOS/Android