UzA Sport

Бугун, 1 ноябрда Суперлига 23-тури доирасида «Насаф» сафарда «Локомотив»ни мағлуб этиб, муддатдан аввал ўз тарихида илк бор Ўзбекистон чемпионлигини қўлга киритди.
Тошкент вилоятининг «Дўстлик» стадионида ўтган баҳсда Қарши клубининг чемпионлик имконияти катта экани сабабли Қашқадарёдан ташкилий тарзда 10га яқин автобусларда мухлислар олиб келинган эди.
Шиддатли ўтган баҳснинг 35-дақиқасида бош ҳакам Аҳрол Рисқуллаев кутилмаганда «Локомотив» ҳимоячиси Иван Рогачни майдондан четлатди ва қолган дақиқаларда «Насаф» майдонда бир киши кўп бўлиб ўйнади.
73-дақиқада Акмал Мозговой суперголи билан ҳисобни очиб, якунда «Насаф»га муҳим ғалаба ва чемпионликни келтирди – 1:0.
Шу тариқа, «Насаф» 23 ўйиндан кейин 52 очко жамғариб, чемпионат якунига 3 тур қолганда муддатдан аввал Ўзбекистон чемпионига айланди. Рўзиқул Бердиев шогирдлари ўз тарихида илк бор Суперлигада чемпионликни қўлга киритиб, Тошкент клубларининг 23 йиллик гегемонлигига чек қўйди.
Бунгача «Нефтчи» 2001 йилда Ўзбекистон чемпиони бўлган, шундан кейин ўтган 23 йил давомида чемпионлик фақат Тошкент клубларига насиб қилаётган эди. Хусусан, сўнгги 5 йил давомида «Пахтакор» чемпионликни ҳеч кимга бермай келаётганди. «Насаф» 2025 йилда Ўзбекистон чемпиони сифатида ОФК Элит Чемпионлар лигасида мамлакатимиз шарафини ҳимоя қиладиган бўлди.

@uzasport

Бугун Ўзбекистон Суперлигасининг 23-туридан ўрин олган “Локомотив” – “Насаф”, “Сўғдиёна“ – “Сурхон” клублари ўртасида ўйин бўлиб ўтади

Мазкур учрашувларнинг энг аҳамиятлиси, “Дўстлик” стадионида ўтадиган “Локомотив” – “Насаф” жамоалари баҳсидир. Сабаби, ҳозирда “Насаф” Суперлига ўйинларида 49 очко жамғариб, яққол пешқадамга айланган. Бугунги ўйинда “Насаф” дуранг ёки ғалаба қозонса, бу йилги Суперлига чемпионлигини муддатидан аввал қўлга киритади. Аслида, ушбу жамоа мағлуб бўлса ҳам мамлакат чемпиони бўла олади. Чунки, Қарши шаҳри жамоаси айни дамда энг яқин таъқибчиси ОКМК клубидан 10 очко илгарилаб кетган.
Дарвоқе, “Сўғдиёна“ – “Сурхон” учрашуви ҳам қизиқарли ўтиши шубҳасиз. Бу учрашувда мезбонлар мағлубиятга учраса, турнирдаги 3-поғонасини ушбу турни ғалаба билан якунлаган “Пахтакор”га бўшатиб беради. “Сўғдиёна” 22-тур якунига кўра 37 очкога эга бўлган. Пойтахт клуби эса айни вақтда 38 очко билан қолмоқда.

@uzasport

Шахмат: Афрўзада дуранг, Жавоҳир ва Нилуфар ғалабага эришди

Бразилияда давом этаётган 18 ёшгача бўлган шахматчилар ўртасидаги жаҳон чемпионатининг 3-тур баҳсида Афрўза Ҳамдамова оқ доналарда мексикалик Гваделупе Мантано Висенте билан дуранг ўйнади. Ушбу натижадан кейин Ҳамдамова 2,5 очко билан кучли бешликдан жой олишга эришди.
Ушбу турда терма жамоамиз аъзоларидан Жавоҳир Бозоров 14 ёшгача бўлган ўғил болалар мусобақасида оқ доналарда Жанубий Африка вакили Калеб Дейсел билан баҳс олиб борди ва ишончли тарзда ғалабага эришди.
14 ёшгача бўлган қизлар ўртасидаги баҳсда канадалик Анаис Хлоя Фисел билан беллашган Нилуфар Имомқўзиева қора доналарда ҳаракатланишига қарамасдан муваффақият қозонди.
Жаҳон чемпионатининг 4-турида Афрўза Ҳамдамова қора доналарда парагвайлик Майерггер Гонсалес билан, Жавоҳир Бозоров германиялик Даниэл Нуньес Грегур билан, Нилуфар Имомқўзиева арманистонлик Сона Кркьяшарян билан куч синашади.

@uzasport

Ўзбекистонда олимпия ҳаракати ANOC тадбирида эътироф этилди

Миллий Олимпия қўмиталари ассоциацияси (ANOC)нинг Португалиянинг Кашкайш шаҳрида ўтказилган навбатдаги Бош Ассамблея йиғилишида Ўзбекистон Миллий олимпия қўмитаси бош котиби Ойбек Қосимов етакчилигидаги мамлакатимиз спорт делегацияси ассамблея доирасида Халқаро олимпия қўмитаси мутасаддилари шунингдек, ХОҚ Президентилигига номзод бўлган Иордания шаҳзодаси Файсал Ал Ҳусайн, Халқаро велосипедчилар иттифоқи раҳбари Давид Лапартен, Халқаро гимнастика федерацияси президенти Моринари Ватанабе каби жаҳон спортида ўз овозига эга бўлган бир қатор мулозимлар билан суҳбат ўтказди.
Мулоқотлар давомида Марказий Осиё мамлакатларида олимпия ҳаракатини юксалтириш, Ўзбекистонда жисмоний тарбия ва спорт ривожини янги босқичга олиб чиқиш борасидаги ислоҳотлар, “Тошкент-2025” ёшлар Осиё ўйинларига кўрилаётган тайёргарлик масалаларида фикр алмашилди.
Мавзу юзасидан батафсил мақолани O’zA сайтида ўқишингиз мумкин.

@uzasport

Пара камончилар мамлакат чемпионлиги учун курашди

Республика Олимпия ва Паралимпия спорт турларига тайёрлаш марказида пара камондан отиш бўйича ёшлар ва катталар ўртасида ўтказилган Ўзбекистон чемпионати истеъдодли ёшларни кашф этишга хизмат қилди.
Тўрт кун мобайнидаги муросасиз баҳсларда 60 нафарга яқин матонатли ва иродали мерганлар ғолиблик учун кураш олиб борди.
Чемпионат сарҳисобига кўра, умумжамоа ҳисобида пойтахтлик пара комончилар 1-ўринни эгаллаган бўлса, 2 ва 3-ўринлардан Фарғона ва Самарқанд вилояти жамоалари жой олишди.
Мусобақалар сўнггида ғолиб ва совриндорларга Ўзбекистон Миллий паралимпия қўмитаси, Миллий гвардия ҳамда Республика Олимпия ва паралимпия спорт турларига тайёрлаш маркази мутасаддилари томонидан медал, диплом ҳамда эсдалик совғалари топширилди.

@uzasport

Бразилиянинг Флорианополис шаҳрида 18 ёшгача бўлган шахматчилар ўртасида ўтаётган жаҳон чемпионатининг иккинчи кунги баҳслари ортда қолди

Чемпионатнинг 2-турида 16 ёшгача бўлган қизлар мусобақасида Афрўза Ҳамдамова қора доналарда Словакия терма жамоаси аъзоси Новомеска Каринни 37-юриш ҳолатида таслим этди ва очколари сонини 2 тага етказиб олди.
14 ёшгача бўлган ўғил болалар мусобақасида шахматчимиз Жавоҳир Бозоров 2-турда қора доналарда латвиялик Рейнис Валдатисга имкониятни бой берди. 14 ёшгача бўлган қизлар мусобақасида Нилуфархон Имомқўзиева оқ доналарда мексикалик Теллес Фукусима билан муроса йўлини танлаши ортидан 1,5 очколи бўлди.
Чемпионатнинг 3-турида Афрўза Ҳамдамова оқ доналарда мексикалик Гваделупе Мантано Висенте, Жавоҳир Бозоров ҳам оқ доналарда Жанубий Африка вакили Калеб Дейсел, Нилуфар Имомқўзиева эса қора доналарда канадалик Анаис Хлоя Фисел билан ўйнайди.

@uzasport

Шахмат: Бразилияда Италияда эришилган натижа такрорланадими?

Бразилиянинг Флорианополис шаҳрида 18 ёшгача бўлган дунёнинг энг яхши шахматчилари иштирокида навбатдаги жаҳон чемпионати баҳслари бошланди.
Дунёнинг 62 та давлатидан 527 нафар маҳоратли ёш шахматчилар иштирокидаги 2024 йилги жаҳон чемпионати баҳслари 14, 16 ва 18 ёшгача бўлган ўғил ва қиз болалар ўртасида бўлиб ўтмоқда.
11 турдан иборат мусобақалар 10 ноябрга қадар давом этади.
Жаҳон биринчилиги баҳсларида Ўзбекистон терма жамоасининг 3 нафар ёш шахматчиси ғолиблик учун кураш олиб боради.
14 ёшгача бўлганлар ўртасидаги беллашувларда Нилуфархон Имомқўзиева ва Жавоҳир Бозоров ҳамда 16 ёшгача бўлган қизлар ўртасидаги мусобақаларда Афруза Ҳамдамова ватанимиз шарафини ҳимоя қилмоқда.
Эслатиб ўтамиз, ўтган йили Италияда ушбу ёш тоифаларида ўтказилган жаҳон чемпионатида ҳамюртимиз Афрўза Ҳамдамова 14 ёшгача бўлган қизлар ўртаси жаҳон чемпионлигига эришганди.

@uzasport

Аббосбек Файзуллаев Осиёнинг энг яхши ёш футболчиси деб топилди.

@uzasport

Олимпия ўйинлари ғолиби Диёра Келдиёрова: “Муносибларга овоз бердим”

Мамлакатимизнинг турли ҳудудларида, маҳаллаларида Ўзбекистон Республикаси Олий Мажлисининг Қонунчилик палатаси ҳамда маҳаллий Кенгашлар депутатлиги учун сайловлар давом этмоқда.
Сайлов жараёнларида аҳолининг барча қатлам вакиллари сингари спортчилар ҳам фаол иштирок этмоқда.
Ватан келажагига дахлдорлик ҳисси билан яшаётганлар орасида Олимпия ўйинлари, жаҳон чемпионатларининг ғолиблари, совриндорлари ҳам борлиги эътиборли.
Бугун пойтахтимизнинг Яккасарой тумани, «Дамариқ»МФЙда жойлашган 547-сайлов участкасида дзюдо бўйича Олимпия ўйинлари ғолиби Диёра Келдиёрова овоз бериш жараёнида қатнашди.

@uzasport

Шахмат: Европа кубогининг совриндорлари аниқланди

Cербиянинг Врнячка-Баня шаҳрида шахмат бўйича клублар ўртасида ўтказилган European Chess Club Cup мусобақаси якунланди.
Кеча кубок баҳсларининг сўнгги 7-турида Нодирбек Абдусатторов ва Жавоҳир Синдаров иштирок этган "SuperChess" жамоаси мусобақа пешқадами "Novy Bor Chess Club" билан куч синашди. Абдусатторов Винсент Кеймер, Синдаров вьетнамлик Ван Тай Нгуен билан дурангга эришган бўлса-да ҳисоб 2,5:3,5 кўринишида "Novy Bor Chess Club" фойдасига ҳал бўлди.
Нодирбек Ёқуббоевнинг "TAJFUN-ŠK Ljubljana" жамоаси 7-турда "Sentimento Ajka BSK" билан (3:3) муроса йўлини танлади. Ушбу турда Ёқуббоев сербиялик халқаро гроссмейстер Алексей Саранани мағлуб этди.
Ўйинлар сарҳисобига кўра, "Novy Bor Chess Club" жамоаси 13 очко билан Европа кубоги соҳиби бўлди.
"TAJFUN-ŠK Ljubljana" жамоаси 5-ўринни "SuperChess" 10 очко билан 7-поғонани эгаллади.

@uzasport

Россиялик спорт таълими олимлари Ўзбекистонда

Ўзбекистон давлат жисмоний тарбия ва спорт университетида Москва давлат спорт ва туризм университети ректори, профессор Наталя Масягина ҳамда Туризм ва меҳмондўстлик саноати институти директори Александр Ивансовдан иборат делегация аъзолари билан ҳамкорлик алоқаларини мустаҳкамлаш масаласида учрашув ташкил этилди.
Жисмоний тарбия ва спорт соҳасида икки томонлама ҳамкорликни йўлга қўйиш, қишки спорт турларини ривожлантириш, илмий лойиҳалар устида ишлаш бўйича ўзаро ҳамкорлик меморандуми имзоланди.
Ўзбекистон давлат жисмоний тарбия ва спорт университет ректори Рашид Маткаримов меҳмонларга мамлакатимизда спорт таълимини ривожлантириш, юртимизда ўтказилаётган халқаро спорт мусобақалари, келгуси йили пойтахтимизда ўтказиладиган Тошкент-2025 ёшлар Осиё ва Параосиё ўйинларига кўрилаётган тайёргарлик ҳақида сўзлаб берилди.
Учрашув жараёнида Наталя Масягинага Ўзбекистон давлат жисмоний тарбия ва спорт университети фахрий профессори унвони топширилди.

@uzasport

Футбол. Бугун Суперлиганинг 22-туридан ўрин олган иккита учрашув бўлиб ўтади.

Амалдаги чемпион "Пахтакор" Қаршида Навоийнинг "Қизилқум" жамоаси билан куч синашади. "Андижон" ўз майдонида Тошкентнинг "Олимпик" жамоасини қабул қилади.

@uzasport

Бугун, 26 октябрь куни Cербияда шахмат бўйича клублар ўртасида давом этаётган Европа кубогининг 7-турида ҳамюртларимиз Нодирбек Абдусатторов ва Жавоҳир Синдоров дона сураётган "SuperChess" клуби мусобақада етакчилик қилаётган "Novy Bor Chess Club" жамоаси билан куч синашса, Нодирбек Ёқуббоевнинг TAJFUN-ŠK Ljubljana" клуби "Sentimento Ajka BSK" жамоаси билан куч синашади.

Кеча ўтказилган 6-турда "SuperChess" клуби "Tuxera Aquaprofit Nagykanizsai Sakk Klub" жамосини 4,5:1,5 ҳисобида мағлуб этди. Ёқуббоев шарафини ҳимоя қилаётган "TAJFUN-ŠK Ljubljana" жамоаси 6-турда "Beer Sheva Chess Club" жамоасини 3,5:2,5 ҳисобида таслим қилди.
6-турдан кейин "Novy Bor Chess Club" клуби 11 очко жамғарган ҳолда пешқадамлик қилаётган вазиятда "SuperChess" жамоаси 10 очко билан қўшимча кўрсаткичларга кўра 2-ўринда бормоқда. Шунингдек, "Turkish Airlines", "Alkaloid", "TAJFUN-ŠK Ljubljana", "Bayegan Pendik Chess Sports Club" ва "C’Chartres Echecs" жамоалари ҳам ҳозирча 10 очкога эга бўлиб турибди.

@uzasport

Хитой Тайпейида давом этаётган U-17 Осиё кубогининг гуруҳ босқичида иштирок этаётган Ўзбекистон ўсмирлар терма жамоаси муносиб ўйин намойиш этмоқда.

Қитъа кубогининг “Е” гуруҳидан жой олган умидли футболчилар жамоамиз кеча гуруҳ босқичининг 2-турида Хитой Тайпейи терма жамоаси билан куч синашди.
Шиддатли кечган баҳсда Ўзбекистон терма жамоаси Хитой Тайпейини 1:0 ҳисобида мағлуб этди. Учрашувнинг 61-дақиқасида Абубакир Шукуруллаев томонидан киритилган гол ўсмирлар терма жамоамизга ғалаба келтирди.
U-17 Осиё кубоги гуруҳ босқичининг 1-турида Фаластинни 3:0 ҳисобида мағлуб этган терма жамоамиз 3-турда Ироқ терма жамоаси билан рўбарў келади.
2-турнинг Ироқ-Фаластин тўнашувида ироқликлар 4:0 ҳисобида муваффақиятга эришди.
Эртага, 27 октябрь куни гуруҳ босқичининг сўнгги 3-турида 6 тадан очкога эга Ўзбекистон ва Ироқ Осиё кубоги йўлланмаси учун кураш олиб боради. Ушбу “дуэль”да омадга эришган жамоа гуруҳ Осиё кубогининг кейинги босқичига йўл олади.

@uzasport

Ҳамюртимиз дунёнинг "Энг яхши ёш футболчиси" бўлишга даъвогар

Футбол тарихи ва статистикаси халқаро федерацияси (IFFHS) 20 ёшгача бўлган дунёнинг "Энг яхши ёш футболчиси" номига муносиб бўлишга даъвогарлар рўйхатини эълон қилди.
25 нафар футболчи номи келтириб ўтилган ушбу рўйхатдан Ўзбекистон миллий терма жамоаси ва Франциянинг "Ланс" футбол клуби ҳимоячиси Абдуқодир Ҳусанов ҳам жой олди.

@uzasport

Шахмат: ҳамюртимиз Гулруҳбегим Тоҳиржонова АҚШ вице-чемпиони бўлди

Америка Қўшма Штатларининг Сент-Луис шаҳрида умумий мукофот жамғармаси 152 000 долларни ташкил қилган шахмат бўйича эркаклар ва аёллар ўртасида якунига етган мамлакат чемпионатида ҳамюртимиз Гулруҳбегим Тоҳиржонова (2374) 11 имкониятдан 7,5 очко жамғариб, кумуш медални қўлга киритиш баробарида 30 минг АҚШ долларига эга чиқди.
Шиддатли кечган баҳсда америкалик Карисса Йип (2418) 8,5 очко билан АҚШнинг 2024 йилги чемпиони, Алисе Ли (2395) 7 очко билан бронза медалига сазовор бўлди.
Айтиш лозим, океан орти мамлакатида муносиб натижага эришган Гулруҳбегим Тоҳиржонова АҚШ вице-чемпиони бўлиш баробарида аёллар ўртасидаги жаҳон кубогида қатнашиш ҳуқуқини вам қўлга киритди.
Эркаклар ўртасидаги мусобақада ФИДЕ рейтингида 4-ўринда бораётган Фабиано Каруана АҚШ чемпионлигига эришди.

@uzasport

Футбол: Ўзбекистон FIFA рейтингида икки поғона юқорилади

Халқаро футбол ассоциациялари федерацияси(FIFA) миллий терма жамоаларнинг янгиланган рейтингини эълон қилди.

Унга кўра, жадвалда кучли бешлик ўзгармаган ҳолда Аргентина етакчи, Франция ва Испания терма жамоалари кейинги поғоналарда қайд этилган.

Эътиборлиси, янгиланган рейтингда Ўзбекистон миллий терма жамоаси икки поғона юқорилаб, 58-ўринни эгаллади. Осиё қитъасининг еттинчи жамоаси сифатида кўрсатилган миллий терма жамоамиз ушбу натижа билан Саудия Арабистонини ортда қолдиришга муваффақ бўлди.  

Осиё мамлакатлари орасида етакчиликка эришган Япония  FIFA рўйхатида 15-ўриндан жой олган бўлса, ЖЧ-2026 саралаш босқичида терма жамоамизнинг асосий рақибларидан бири бўлган Эрон рўйхатда 19-ўринни эгаллади.

@uzasport

Ўзбекистонда қанча спорт тури давлат реестрида қайд этилган?

Бугунги кунда мамлакатимизда оммавий спортни ривожлантириш, ёшларни соғлом турмуш тарзи билан қамраб олиш, маҳоратли спортчиларни тайёрлаш йўналишида 98 та федерация ва ассоциациялар ва спорт турининг тармоқларини эътироф этиш реестрида 156 та спорт турлари қайд этилган.
Куни кеча Ўзбекистон Республикаси Спорт вазирлигининг кенгайтирилган ҳайъат йиғилишида спорт турлари реестрига киритиш бўйича келиб тушган мурожаатларга бағишланган йиғилиш бўлиб ўтди. Унда 13 та мурожаат кўриб чиқилди.
Ҳайъат йиғилишида Ўзбекистон Фижитал спорт федерациясининг ушбу спорт турини спорт турлари реестрига киритиш бўйича мурожаати кўриб чиқилди ҳамда жамоатчилик кенгаши фижитал спорт турининг реестрга киритилганини расман тасдиқлади.

@uzasport

Абдусатторов ва Синдоров жамоаси Европа кубогида пешқадам

Сербиянинг Врнячка-Баня шаҳрида шахмат бўйича клублар ўртасида ўтказилаётган қитъа кубоги мусобақаларида ҳамюртларимиз Нодирбек Абдусатторов ва Жавоҳир Синдоров “SuperChess” жамоаси таркибида ғолиблик учун кураш олиб бормоқда.
Европадаги 102 та шахмат клублари иштирок этаётган мусобақанинг эркаклар баҳсида 84 та, аёллар ўртасидаги мусобақаларда 18 та жамоа аъзолари дона сурмоқда.
Ортда қолган 3 та тур баҳслари сарҳисобига кўра, Абдусатторов ва Синдоров жой олган “SuperChess” жамоаси учта ўйинда ҳам ғалаба қозониб, қўшимча кўрсаткичлар эвазига турнир жадвалини бошқариб бормоқда. Шунингдек, турнирда қатнашаётган яна 7 та жамоа ҳам ортда қолган 3 та турда муваффақиятга эришган.
Бугун, 23 октябрь куни 39-маротаба ташкил этилаётган Европа кубогининг навбатдаги 4-турида “SuperChess” жамоаси турнир жадвалида 2-ўриндан жой олган “Турк авиалинияси” жамоаси билан куч синашади.
Мусобақа 27 октябрга қадар давом этади.

@uzasport