Toshkent viloyati bojxona boshqarmasi rasmiy kanali✍️

#qonunchilikdagi_yangiliklar

Аввал хабар берганимиздек, Ўзбекистон ва Туркманистон ўртасида эркин савдо режими жорий этилиши натижасида, айрим турдаги маҳсулотлардан ташқари икки мамлакатда ишлаб чиқарилган товарларга нисбатан божхона божлари бекор қилиниб, ўзаро товарлар савдосидаги мавжуд чекловлар бартараф этилди ва савдо тартиботлари соддалаштирилди.

Масалан, Туркманистонга олиб кирилаётган маҳаллий цемент маҳсулотлари (божхона тўлови 100%), тўқимачилик матолари (50%), мебель (50%), шиша идишлар (50%), сув иситиш қозонлари (15%), пластик ва полипропилен маҳсулотлар (10%), колбаса ва гўшт маҳсулотлари (1 кг учун 2 доллар), пахта ёғи (1 кг учун 1 доллар) божхона тўловлари бекор қилинди.

Божсиз савдо режимининг қўлланиши келгусида икки мамлакат ўртасида инвестиция соҳасидаги ҳамкорликни кенгайтириш ва саноат кооперацияларини ривожлантириш орқали ўзаро савдо айланмаси ҳажмини оширишга замин яратади.

#qonunchilikdagi_yangiliklar

Ўзбекистон Республикаси Президентининг “Махсус иқтисодий ва саноат зоналари фаолиятининг самарадорлигини ошириш бўйича қўшимча чора-тадбирлар тўғрисида” 2025 йил 6 мартдаги ПФ-41 сон Фармони билан махсус иқтисодий зоналар эндиликда фақатгина экспортга йўналтирилган лойиҳаларга ихтисослашган, майдони ўралган махсус экспорт зонаси турида ҳам ташкил қилиниши мумкин.

Ана шундан зоналардан биринчиси – “Наманган” махсус экспорт зонаси ташкил этилади.

“Наманган” МЭЗ иштирокчилари томонидан четдан олиб кириладиган хомашё, материаллар ва бутловчи қисмлар эркин божхона зонаси божхона режимига жойлаштирилади. Бунда ушбу ҳудудга жойлаштирилган товарлар божхона тўловларини тўлаш ва иқтисодий сиёсат чораларини қўллаш мақсадида божхона ҳудудидан ташқарида жойлашган деб қаралади.

“Наманган” МЭЗ иштирокчиларига республика корхоналари томонидан етказиб берилган хомашё, материаллар ва бутловчи қисмлар, кўрсатилган хизматлар экспортга тенглаштирилади. Бунда “Наманган” МЭЗ иштирокчилари томонидан ички бозорга сотилган товарлар импортга тенглаштирилиб, тегишли божхона ва солиқ тўловлари ундирилади.

2025 йил 1 июндан махсус иқтисодий зоналар иштирокчилари томонидан маҳсулотларни ишлаб чиқариш ва экспортга реализация қилиш учун фойдаланадиган импорт хомашё, материал ва бутловчи қисмларни божхона тўловларини (божхона расмийлаштируви учун йиғимлар бундан мустасно) тўламаган ҳолда “товарларни божхона ҳудудида қайта ишлаш” божхона режимига жойлаштириш орқали уларни божхона расмийлаштирувидан ўтказиш амалиёти йўлга қўйилади.

#qonunchilikdagi_yangiliklar

2025 йил 25 февралдан эътиборан Ўзбекистон ва Туркманистон ўртасида эркин савдо режими жорий этилди

Бу билан, айрим турдаги маҳсулотлардан ташқари икки мамлакатда ишлаб чиқарилган товарларга нисбатан божхона божлари бекор қилиниб, савдо тартиботлари соддалаштирилди.

2024 йил 16 июл куни имзоланган “Ўзбекистон ва Туркманистон Ҳукуматлари ўртасида узоқ муддатли савдо-иқтисодий ҳамкорликнинг асосий йўналишлари тўғрисида Битимга эркин савдо режимидан истиснолар тўғрисида”ги баённома кучга кириши учун зарур тартиботларнинг икки тарафлама бажарилиши якунланган.

Ушбу баённома Ўзбекистон Республикаси Президентининг 2025 йил 27 январдаги ПҚ-29-сон қарори билан тасдиқланган.