Тошкент вилояти судлари | Расмий канал

Telegram каналларидан бирида эълон қилинган билдириш юзасидан

Аввало шуни таъкидлаб ўтиш лозимки, мурожаатда билдирилган иддаони нечоғли тўғри ёки нотўғри дейиш фикридан йироқмиз.

Хусусан, Тошкент вилоят судида суд мажлисларининг вақтида бошланмаслик ҳолатлари бор гап. Айни ҳолат вилоятдаги туман (шаҳар) судларида учраб туришини ҳам инкор этиб бўлмайди. Бунинг сабаблари, муаллиф таъкид этганидек, фақатгина судларнинг бир бинода жойлашганлиги, суд заллари етишмаслиги ёки иш ҳажмининг кам-кўплиги каби омилларга боғлиқ эмас. Тўғри, айни юқорида тилган олинган омилларнинг таъсири алоҳида, бироқ тарафлардан бирининг белгиланган вақтда судда ҳозир бўлмаслиги ёки бир суд мажлисининг (объектив сабабларига кўра) мўлжалдагидан узоқроқ давом этиши ва унинг кейингисига таъсири каби бошқа сабабларни ҳам эътиборга олиш лозим.

Тизимда ишларни тўғри ташкил қилишга қанчалар ҳаракат қилинмасин, суд мажлиси қанча вақт давом этишини, олдиндан ҳисоб-китоб қилиш иложсиз экани амалиётдан маълум. Чунки бу суд, унда кимларнингдир тақдири ҳал бўлади. Шундай экан, суд мажлисининг белгиланган вақтда бошланмаслигидан судья ёки судлов ҳайъати асло манфаатдор эмас.

Чунки, қонунда муддат бузилиши судьяга нисбатан интизомий чора қўллаш эҳтимолини келтириб чиқаради. Яъники, ишларни вақтида ўтказиб, белгиланган муддатда якунига етказиш, биринчи навбатда судьянинг ўзи учун муҳим.

Яна бир гап. Мурожаатда тилга олинган эътирозларга йўл қўймаслик мақсадида бу каби ҳолатлар вилоят суди раҳбарияти томонидан ҳам доимий назоратга олинган бўлиб, судья ва суд ходимлари билан ўтказилаётган йиғилишларда суд мажлисларини белгиланган вақтда бошлаш, тарафларни суд мажлиси ва жойи ҳақида ўз вақтида хабардор қилиш бўйича доимий равишда тушунтириш ишлари олиб борилмоқда.

Сайт I Telegram

"Eltuz" ижтимоий тармоғида эълон қилинган мурожаат юзасидан

Мурожаатда фуқаролик ишлари бўйича Ўртачирчиқ туманлараро судининг судьяси А.Юлдашов томонидан ариза қабул қилишда ортиқча ҳужжатлар талаб қилинганлиги ва фуқаролик иши бугунги кунга қадар кўрилмаётганлиги баён қилинган.

Аввало шуни таъкидлаш лозимки, ушбу мурожаатда мурожаатчининг исми, отасининг исми ҳамда яшаш жойи тўғрисидаги маълумотлар кўрсатилмаган.

“Жисмоний ва юридик шахсларнинг мурожаатлари тўғрисида”ги қонун 3-моддасининг олтинчи қисмида “Жисмоний шахснинг фамилияси (исми, отасининг исми), унинг яшаш жойи тўғрисидаги маълумотлар ёки юридик шахснинг тўлиқ номи, унинг жойлашган ери (почта манзили) тўғрисидаги маълумотлар кўрсатилмаган ёхуд улар ҳақида ёлғон маълумотлар кўрсатилган мурожаат, шунингдек, уни идентификация қилиш имкониятини бермайдиган электрон мурожаат ёхуд имзо билан тасдиқланмаган ёзма мурожаат аноним” ҳисобланиши аниқ белгилаб қўйилган.

Шунингдек, мазкур қонуннинг 29-моддасида аноним мурожаатлар кўриб чиқилмаслиги кўрсатилган.

Шундай бўлса-да номаълум мурожаат муаллифининг иддаоларидан келиб чиқиб, айрим маълумотларни келтириб ўтишни жоиз деб билдик.

Фуқаролик ишлари бўйича Ўртачирчиқ туманлараро судининг иш юритувига 2025 йил 24 январь куни жами 42 та даъво тартибидаги, 214 таси суд буйруғи тартибидаги ишлар келиб тушган.

Жумладан, судья А.Юлдашовнинг иш юритувига шу куни келиб тушган 9 та фуқаролик ишининг 4 таси кредит муносабати, 3 та қарз ундириш билан боғлиқ ва 2 таси оилавий низолар билан боғлиқ ишларни ташкил қилган.

Бундан ташқари, мазкур судда судьяларнинг қабул кунлари ҳам белгиланган бўлиб, судья А.Юлдашов ҳафтанинг сешанба куни соат 10-00 дан 18-00 га қадар, фуқароларни қабул қилиши белгиланган.

Ўз навбатида Тошкент вилоят суди очиқлик ва шаффофлик тарафдори эканлигини алоҳида қайд этган ҳолда, ижтимоий тармоқ фаолларидан аноним мурожаатлар, тўлиқ ўрганилмаган ҳамда ҳақиқатга тўғри келмайдиган маълумотларни эълон қилмасликларини сўраб қолади.

Сайт I Telegram

Фейсбук ижтимоий тармоғида эълон қилинган билдириш юзасидан

Жиноят ишлари бўйича Бекобод туман судининг иш юритувига Ўзбекистон Республикаси ЖКнинг 165-моддаси 1-қисми, 121-моддаси 4-қисми “в” банди, 165-моддаси 2-қисми “а” банди ва 121-моддаси 4-қисми “в” банди билан айбланган Хумойиддин Мирзаевга оид жиноят иши 2024 йил 10 декабрь куни келиб тушган.
Судланувчига оид жиноят ишини биринчи босқич судида кўришда унинг ҳақ-ҳуқуқларини “PARITET STATUS” адвокатлик фирмаси адвокати С.Вахидов ҳимоя қилган.

Суд тергови жараёнида адвокат С.Вахидов илтимоснома билан мурожаат қилиб, терговчи Б.Джумабоев сўроқ қилинувчи Х.Мирзаевни “ҳимоячи иштирокисиз”, ҳақорат қилиб, жеркиш ҳолатларига тегишли экспертиза тайинлаш орқали аниқлик киритишни сўраган.

Жиноят ишлари бўйича Бекобод туман судининг 2025 йил 30 январдаги ажримига кўра, суд тергови жараёнида терговчи Б.Джумабоевнинг Ўзбекистон Республикаси ЖПК нормаларини бузганлиги ёки жиноят содир этганлиги ҳолати аниқланган тақдирда, суд якуний қарор чиқариш учун алоҳида хонага кирганида терговчи Б.Джумабоевнинг ҳаракатларига ҳуқуқий баҳо беришлигини инобатга олиб, адвокат томонидан берилган илтимоснома рад қилинган.

Жиноят ишлари бўйича Бекобод туман судининг 2025 йил 14 февралдаги ҳукмига кўра, Х.Мирзаев Жиноят кодексининг 121-моддаси 4-қисми “в” банди ва 165-моддаси 1-қисми билан айбдор деб топилиб, ЖКнинг 59-моддаси тартибида 6 йил муддатга озодликдан маҳрум қилиш жазоси тайинланган.
Шунингдек, жиноят ишлари бўйича Бекобод туман суди томонидан 2025 йил 14 февралда хусусий ажрим чиқарилган бўлиб, унда Бекобод туман ИИБ ЖҚБ тезкор ходими М.Турсунмуродов ва туман ИИБ ҳузуридаги тергов бўлими терговчиси Б.Джумабоев томонидан олиб борилган процессуал ҳаракатлар бўйича йўл қўйилган камчиликларни муҳокама қилиш ва келгусида бу каби хато ва камчиликларга йўл қўймаслик юзасидан тегишли чоралар кўриш учун Бекобод туман ИИБ бошлиғининг эътиборига етказиш ҳамда Бекобод туман прокурорига маълумот учун юбориш белгиланган.

2025 йил 24 февраль куни адвокат С.Акмалов томонидан судланувчи Х.Мирзаевнинг ҳақ-ҳуқуқларини ҳимоя қилаётганлиги ҳақидаги ордер ва апелляция тартибида шикоят берилган бўлиб, ҳозирда жиноят иши Тошкент вилоят судининг жиноят ишлари бўйича судлов ҳайъати апелляция инстанциясида кўриш учун расмийлаштирилаётганлиги маълум қилинади.


Сайт I Telegram