Suhrob Ziyo

#Bir_siqim_xotira

"MEN HAM OSHIQMANMI YOKI, SUHROBJI..."

Mansur aka haqida yozganda doim o‘zi qarshimda turgandek, yozganlarimni o‘qib "Xudo yarlaqasin sizni, qarindosh" deb turgandek bo‘laveradi. Shu sabab o‘tganlaridan keyin ular haqda nimadir qoralashga qo‘lim bormadi, bormadi...

"Izlam" turkumidagi kitoblarni varaqlab shu parchaga ko‘zim tushdi:

"Yoshlardan, o‘zimning do‘stlarimdan, havas qiladigan tomonlar topa olaman. Deylik, Mansur Jumayevning adabiy bilimiga havas qilaman. Diniy, mumtoz bilimlarim kemtikligini sezib turaman va ular but bo‘lganida ayrim she’rlarni yozmasligim mumkinligini, ayrim xatolarni qilmasligim mumkinligini o‘ylayman..."

Gulrang Ubayeva, "Gulqaychi"
(Suhrob Ziyo bilan suhbat).

O‘z so‘zini Hofizning, Fuzuliyning, Navoiyning so‘zi bilan o‘lchaydigan katta qalbni tengqurlar orasida boshqa hech kimda ko‘rmadim.

Endi "o‘chirilgan akkaunt"lardan suhbatlarni izlab topib, o‘zi bilan suhbatlashgandek ovunishdan boshqa choramiz yo‘q. Endi u lutf, u mutoyiba, u hikmat, u samimiyat faqat o‘sha "o‘chirilgan akkaunt"larda qoldi...

— Kechga Xurshid ila o'tsak makoningiz taraflarga...

—Makonim bo‘lipti Xiyobon orasi,
Menman Adiblarning asli-sarasi,
Men ham oshiqmanmi yoki, Suhrobji?

@suhrob_ziyo1

Ramiz RAVSHAN

***
Bu suvlarga kim tosh otdi?
Bu suvlarni kim uyg'otdi?
Suvlar uyg'ondi, tosh botdi,

yig'lama, toshim, yig'lama.

Og'ochlarim yashil-yashil,
Yaproqlari oshib-toshir,
Yaproqlarning orasinda
Tosh-la urdilar bir qushni...

yig'lama, og'ochim, yig'lama.

Tosh ostidan bir qush uchdi,
Ko'zidagi qanday yoshdir?
Qabrimning ustidagi tosh —
Bir qushga otganim toshdir

yig'lama, singlim, yig'lama...

Suhrob ZIYO o'zbekchalashtirdi.

@suhrob_ziyo1

Ramiz RAVSHAN

O‘g‘limning ko‘zlari

Qayerga yo‘l olsam, yo‘lim boshlanar
O‘g‘limning ko‘zlaridan.
Kun chiqar, oy tug‘ar, yulduzlar yonar,
Qor yog‘ar, yomg'irlar boshlanar
O‘g‘limning ko‘zlaridan.

Tutar, yer-u ko‘kni tutar ko‘zlari,
Yurgan yo‘llarimdan o‘tar ko‘zlari,
To‘ymaski, to‘ymas.
Kipriklari o‘sar yo‘l chetlarida,
Meni o‘z yo‘limdan chiqmoqqa qo‘ymas.

Yonida yuzim oqdir, yo‘lim ochiqdir, Alloh,
Meni har gunohdan o‘glim saqlaydi.
Bu yo‘llaring buncha balchiqdir, Alloh,
Yoki qayerdiradir o‘glim yig‘laydi?

Yig‘laydi –
Ko‘z yoshi tushar yo‘limga…
Ko‘zyoshlaring ichra kezarman, bolam.
Ko‘zlaringdan nur tushadi yo‘limga,
Yumma, ko‘zlaringni yumma,
Yo‘qsa, yo‘llarimdan ozarman, bolam.

Ne bor-u ne yo‘q edi ko‘zlaringgacha,
Dunyo qorong‘u edi ko‘zlaringgacha,
Tangri meni
Bu insonlik maydoniga otguncha
Kelib sening
Ko‘zlaringni yog‘dusiga botguncha
Umrimning o‘ttiz uch yilini kechdim.

Endi sendan yashirinmas
Dunyoda bir qadamim,
Berkitolmayman ularni,
Ko‘zlaringdan, jon bolam.
Faqat Alloh edi mening
Seva-seva qo‘rqqanim,
Endi sen ham borsan axir yer yuzida, jon bolam.

Qanday yaxshi,
Tangridan ham boshqa bizga boqqan bor
Yo‘limizni yoritadi bolalarning ko‘zlari.
O‘z yo‘lidan ozganlarning
Bolalari ko‘r bo‘lar,
Qorong‘uda adashadi
Otalarning o‘zlari.

…Bolalarni Tangri asrar!
Biz botsak ham gunohga, -
Zulmatlarda bolalarning
ko‘zlari chiroq-chiroq.
Tangri bizni ko‘rmas endi,
Boshqa umid yo‘q, biroq
Bu zulmatdan bizni faqat
Bolalar chiqarmasa…

Suhrob ZIYO o'zbekchalashtirdi.

@suhrob_ziyo1