Sarvarbek Team | UzLife English

🇨🇳 Xitoyliklar biz uchun xavfmi?

Toshkentda har kuni hech bo‘lmaganda bir marta bo‘lsa ham xitoyliklarni uchratmaslik imkonsiz. Xo‘sh, ular biz uchun haqiqiy xavfmi?

Ha, agar raqobatdan qo‘rqsangiz, ular haqiqiy xavf.

🚛 Xitoyliklar bozorda raqobatni kuchaytiradi
Biznes egalari yillar davomida yuqori marjada ishlashga o‘rganib qolishgan. Xitoyliklar esa raqobatga kirib kelishi bilan narxlarni pasaytiradi, marjalar tushadi, monopoliyalar yemiriladi. Ayniqsa, Xitoydan mahsulot olib kelib, 2-3 barobar qimmatiga sotadiganlar endi buni qila olmaydi.

💡 Natijada oddiy xalq yutadi, narxlar arzonlashadi, inflatsiya pasayadi.

🙅Xitoyliklarning o‘zbek qizlariga uylanayotganichi?
Bu mavzu ataylab shov-shuvga aylantirilmoqda, lekin muammo xitoyliklarda emas, balki o‘z qizlarini ularga turmushga berayotgan o‘zimiznikilarda. Kimnidirni majburlashayotgani yo‘q. Demak, bu individual qaror va unga manipulyatsiya vositasi sifatida qarash noto‘g‘ri.

📌 Endi o‘zbek yoshlari xitoy yoshlari bilan ham raqobat qilishi kerak
Avvallari ozroq bilim va harakat bilan ham muvaffaqiyat qozonish mumkin edi. Endi esa raqobat kuchaygan, nafaqat ichki bozor, balki xalqaro miqyosda ham o‘z o‘rnini topish kerak.

🚇 Metroda xitoyliklarning kitob o‘qib ketishi, kutubxonalarda ularning ko‘payib borishi tasodif emas.
Ular rivojlanishdan to‘xtamaydigan xalq. Agar o‘z ustimizda ishlamasak, bu raqobatda yutqazamiz.

💡Xitoyliklar muammo emas, balki bizni o‘z ustimizda ishlashga majburlovchi sabab. Kimki raqobatdan qo‘rqsa, ular uchun xitoyliklar haqiqiy xavf.

🔹 @SarvarbekTeam | Raqobatdan qo‘rqish emas, tayyorlanish kerak.

🇺🇸 Competition – 🇺🇿 Raqobat
🇺🇸 Monopoly – 🇺🇿 Monopoliya
🇺🇸 Inflation – 🇺🇿 Inflatsiya

🔹 Bizda Ateizm, g'arbda esa Islom kuchayib bormoqda

Qiziq hodisa: G‘arbga intilib endi rivojlanayotgan davlatlarda Ateizm kuchaymoqda, lekin ayni paytda rivojlangan G‘arbning o‘zida esa Islom tez rivojlanmoqda.

Bu tasodif emas. Endi rivojlanayotgan davlatlar G‘arbni faqat tashqi ko‘rinishi bilan, ya’ni texnologiya, madaniyat va hayot tarzini qabul qilib, G‘arbning ma’naviy bo‘shlig‘ini tushunmayapti. Ular moddiy taraqqiyotni dinni inkor qilish bilan bog‘laydi.

Rivojlangan G‘arb esa boshqa yo‘lda. Ular ilm-fan va moddiy taraqqiyot cho‘qqisiga chiqqanidan keyin, hayotlarida bo‘shliq paydo bo‘ldi. Aynan mana shu bo‘shliq Islomga yo‘l ochdi. Bugun Islom Yevropada eng tez rivojlanayotgan din, Britaniyada Muhammad ismi chaqaloqlarga eng koʻp qoʻyilgan ism boʻlgani ham bunga yaqqol misol, AQShda esa eng ko‘p qabul qilinayotgan e’tiqod.

💡 Shu joyda bir narsa esimga tushadi: Ilm-fanni oʻrganish sizni Ateist qilishi mumkin, lekin ilm fanni chuqur oʻrganish sizni musulmon qiladi.

🔹 @SarvarbekTeam | Din rivojlanishga toʻsiq emas!

🇺🇸 Atheism – 🇺🇿 Ateizm
🇺🇸 Spirituality – 🇺🇿 Ma’naviyat
🇺🇸 Contradiction – 🇺🇿 Ziddiyat

Chuqur maʼnoli...

Bir necha kun oldin ustozimiz aytgandilar:
Shaytonning inson ustidagi eng katta xiylalaridan biri bu "ertaga". Ertaga deb koʻp ishlarimizni kechga qoldiramiz. Lekin hech qachon erta kelmaydi, kelganda ham "bugun" boʻlib keladi.

❗️Ortiqcha tahlilga hojat yoʻq!

- @SarvarbekTeam -

Qayerga qarasang hamma online webinar tashkil qilmoqda. Oʻzbekistonda bu soʻzning maʼnosi "Kursning reklamasi".

🇺🇸Advertisment - 🇺🇿Reklama

- @SarvarbekTeam -

🔹 Marketing – eng katta illuziya

Marketingni tushunmaydigan insonlar atrofida hosil bo‘lgan illuziyaning qurboniga aylanadi. Aslida ularga kerak bo‘lmagan narsalar "eng zarur narsa" bo‘lib ko‘rinadi, bor narsalari esa "eskirib qolgan"dek tuyuladi. Marketologlar odamlarni qanday manipulyatsiya qilishni juda ham yaxshi bilishadi, lekin bu san’at yangi emas.

Qiziq gap yuradiku, eng birinchi marketolog – shayton edi. U taqiqlangan mevani Odam Ato va Momo Havoga shunday "reklama" qildiki, ular o‘zlari bilmagan holda o‘z ehtiyojlaridan ko‘ra, shayton yaratgan illuziyaga ishonib qoldi.

Bugun ham aynan shu narsa davom etmoqda. Reklamalar, imidj, brendlar – bularning barchasi real ehtiyojni illuziya bilan almashtirib qoʻygandek goʻyo.

Bu xiylalar qurboni boʻlmaslikning yagona yoʻli, aslida hammasi qanday ishlashini tushunish. Hozir uchun umumiy qilib bir gap aytishim mumkin, biz hech qachon shunchaki tasodifan qaror chiqarmaymiz. Hammasi bizga koʻrsatilgan ta'sirlar natijasi. Buni keyinroq alohida postda tushuntirib oʻtaman!

🔹 @SarvarbekTeam | Illuziyalarga aldanmaymiz

🇺🇸 Illusion– 🇺🇿 Illuziya
🇺🇸 Manipulation – 🇺🇿 Manipulyatsiya
🇺🇸 Forbidden fruit – 🇺🇿 Taqiqlangan meva

🟢Tarbiya masalasi...

Maktabda bu gapni eshitgan boʻlsangiz kerak "Maktab bilim beradi tarbiya emas. Tarbiyani oila beradi." Bilim berishni ham qoyillatib qoʻya olmayotgan maktab tizimimizdan bunday gaplarni eshitish insonga yoqmaydi ochigʻi.

Agar bolaning ota-onasi tarbiyasiz boʻlsa, uning farzandi ham tarbiyasiz boʻlib oʻsishga majburmi? Mana shu muammoni aslida maktab hal qilishi kerak edi. Maktab tarbiya berishga majbur va buni haqiqiy mutaxassislar qilishi kerak. Tarbiya berishim kerak ekan deb bolani urib tarbiya qiladiganlar emas. Bolaga qoʻl koʻtarayotgan oʻqituvchi bu bola kelajakda bu bolalik travmalaridan oʻzi anglamagan holda qanchalar qiynalishini bilganida edi.Bizda bola psixologiyasiga shunchaki "tupurib qoʻyishgan". Pedagoglar xattoki umumiy psixologiyani ham bilishmaydi. Psixologiya alohida mavzu tarbiyaga qaytsak. Masalan, Yaponiyada maktab bolalarga haqiqiy tarbiya beradi. Va shuning uchun ham Yapon jamiyatining oʻziga xos umumiy tarbiyasi bor. Bizga ham shu narsalar kerak. Yaponiyaliklarning tarbiyasi bu ularning brendiga aylangan. Bizda, aholining katta qismi Islom diniga eʼtiqod qiluvchi jamiyatda tarbiya muammo boʻlishi uyatli holat aslida. Bu borada ular bizdan koʻra koʻproq Islomga amal qilayotgandek.

- @SarvarbekTeam -

🔳Zamonaviy taʼlim tizimi: Bilim beradimi yoki robotlar yaratadimi?

Zamonaviy taʼlim tizimi haqida gap ketganda, ko‘pchilikning fikri "bu tizim bolalarni mustaqil fikrlashga o‘rgatadimi yoki ularni faqat buyruqlarni bajaradigan robotlarga aylantiradimi?" degan savolga to‘g‘ri keladi. Keling, bu masalani chuqurroq ko‘rib chiqaylik.

▫️Standartlashtirilgan testlar:

Bugungi kunda taʼlim ko‘pincha standartlashtirilgan testlar (masalan, TOEFL, IELTS, DTM yoki milliy imtihonlar) atrofida qurilgan. Bu testlar talabalarning bilimini o‘lchashning eng yaxshi usuli deb hisoblanadi. Lekin, ular aslida talabalarni kreativ fikrlashdan uzoqlashtiradi va ularni faqat maʼlum bir javobni topishga majbur qiladi.

▫️Yaratuvchanlikni yo‘qotish:

Zamonaviy taʼlim tizimi ko‘pincha talabalarni "to‘g‘ri" javobni topishga undaydi. Bu esa ularning yaratuvchanlik va tanqidiy fikrlash qobiliyatini cheklaydi. Talabalar o‘rgangan narsalarini hayotda qanday qo‘llashni bilmasdan, faqat imtihonlarni topshirishga qaratiladi.

▫️Raqobat va stress:

Zamonaviy taʼlim tizimi talabalarni doimiy ravishda bir-birlari bilan raqobatlashishga undaydi. Bu esa ularga nafaqat bilim, balki katta miqdorda stress va ruhiy bosim ham olib keladi. Natijada, talabalar bilim olishdan ko‘ra, faqat ball to‘plashni istashadi.

🔻Taʼlim tizimi aslida nima uchun mavjud? Bolalarni hayotga tayyorlash uchunmi yoki ularni tizimga moslashtirish uchunmi? Agar biz talabalarni faqat testlar va ballar orqali baholashni davom ettirsak, ularni haqiqiy hayotga tayyorlash imkoniyatini yo‘qotamiz.

🟢Lekin bu tizimni o‘zgartirish mumkinmi? Albatta.

✔ Hayotiy ko‘nikmalarni o‘rgatish:

Taʼlim tizimi nafaqat nazariy bilimlar, balki hayotda kerak bo‘ladigan ko‘nikmalarni (masalan, muloqot, jamoa ishi, vaqtni boshqarish) ham o‘rgatishi kerak.

✔ Individual yondashuv:

Har bir talabaning qobiliyati va qiziqishlarini hisobga olgan holda, ularga moslashtirilgan taʼlim dasturlarini ishlab chiqish.

🛑 Agar biz talabalarni faqat testlar va ballar orqali baholashni davom ettirsak, ularni haqiqiy hayotga tayyorlash imkoniyatini yo‘qotamiz. Taʼlimning asosiy maqsadi — bu mustaqil fikrlovchi, yaratuvchan va mas’uliyatli insonlar yetishtirishdir.

🔹@SarvarbekTeam | Fikr yuritamiz!

Instagramda oʻzbeklarning aktivligi yuqori ekanligi, ManCity postlarini "portlatib" yuborishi oʻzbeklarning ijtimoiy tarmoqlarda juda ham kuchli ekanligini emas, aksincha naqadar ijtimoiy tarmoqlarga qaram boʻlib qolganini koʻrsatadi.

- @SarvarbekTeam -

🔳Xalqlarning Stokgolm sindromiga chalinishi

Stokgolm sindromi haqida sizga aytib bergan edim. Va anchadan beri oʻylab kelayotgan narsam haqida yozishga qaror qildim. Bu sindromning Xalqlarda namoyon boʻlishi. Xalqlar bu sindromga chalinishi haqida internetda deyarli maʼlumot mavjud emas. ChatGpt bilan esa aniq fikrlar tuzib chiqdik. Xo'sh, u qanday koʻrinishda namoyon boʻladi:

▫️Zo‘ravonlik yoki repressiya: Xalq hukumat tomonidan qattiq nazorat qilinadi, lekin bu nazorat ularning xavfsizligi va tinchligi uchun zarur ekanligiga ishontiriladi.

▫️Tizimni oqlash: Xalq o‘zining erkinliklari cheklanayotganini ko‘rsa ham, "hech bo‘lmaganda, bu tizim bizga xavfsizlik yoki barqarorlik beradi" deb o‘ylaydi.

▫️Qo‘rquv va manipulyatsiya: Propaganda yoki qo‘rquv orqali xalqni o‘z hayotidan tashqaridagi xavf-xatarlarga ishontirishadi va ularni nazorat qilayotgan tizimni qabul qilishga majbur qilishadi.


🔻Xalqlarning Stokgolm sindromiga chalinishi shunchaki individual xatolik emas – bu yillar davomida shakllangan ommaviy psixologik jarayon. Inson o‘zining erkin emasligini sezmasa, u erkinlik uchun kurashmaydi. Shu sababdan ham ko‘plab jamiyatlar o‘zlarini cheklayotgan tizimni oqlashga, unga moslashishga va hatto himoya qilishga moyil bo‘lib qoladi.

🟢Lekin bu tuzoqdan chiqish mumkinmi? Albatta.

✔ Tanqidiy fikrlashni rivojlantirish – Har qanday axborotni shunchaki qabul qilish o‘rniga, uni tahlil qilish, alternativ nuqtai nazarlarni o‘rganish kerak.
✔ O‘z tarixini anglash – Xalqlar o‘z boshidan o‘tkazgan tajribalarni ob’ektiv baholashi va xatolarni takrorlamasligi lozim.
✔ Erkinlik va barqarorlik o‘rtasidagi muvozanatni tushunish – Xavfsizlik uchun erkinlikdan butunlay voz kechish oxir-oqibat yanada ko‘proq zulmga olib keladi.


🛑 Agar xalq o‘zining qaram ekanligini sezmasa, u hech qachon ozod bo‘lolmaydi.

🔹@SarvarbekTeam | Fikr yuritamiz!

📌Eng yomon qaramlik...

Eng yomon qaramlik bu fikr qaramligi! Balki radikalizm ham shundan kelib chiqar. Miyada hech qanday filtrlarsiz, propagandalar taʼsirida boshqalar tomonidan boshqariladigan fikrlar bilan yashash... Jorj Oruel "1984" asarini albatta oʻqib koʻringlar. Bu asar haqida ham keyingi postlarda alohida toʻxtalib oʻtaman.

© @SarvarbekTeam | Fikr yuritamiz!

🫧Ekspert illuziyasi

Biz o'zimiz bilgan narsalarni boshqalar ham biladi deb oʻylaymiz yoki shunday tuyuladi. Masalan, oʻzim ingliz tilini bilganim uchun xuddi hamma biladigandek tuyuladi. Shunga kurs masalasida ham ancha toʻxtab qolgan edim. Kecha Teacher Azamning Englify oʻquv markaziga bir masala boʻyicha bordim. Va u yerdagi talabni koʻrib hayron qoldim. Talab juda ham ko'p. Kurs taklifi ham albatta yomon emas. Lekin bilaman undan koʻra yaxshiroq taklif yarata olaman. Chunki tashqaridan qaragan insonga kamchiliklar albatta koʻrinadi. Xullas, aytmoqchi boʻlganim bunday illuziyalar notoʻgʻri xulosa chiqarishga sabab boʻlishi mumkin.

🔹 @SarvarbekTeam

Stokgolm sindromi – inson psixologiyasidagi paradoks

Stokgolm sindromi – insonlar munosabatlarida yuzaga kelishi mumkin bo‘lgan juda qiziq va murakkab psixologik holat.

❓ Bu sindrom nima?

Tasavvur qiling, bir inson boshqasiga zulm qiladi, ammo vaqt o‘tib jabrlanuvchi o‘ziga zarar yetkazayotgan insonni oqlashni boshlaydi. U hatto zulm qiluvchini yaxshi ko‘rib qolishi ham mumkin. Ko'proq garovga olish holatlarida, oiladagi zoʻravonliklarda yuzaga keladi.

Bu sindromga oid yana bir qiziq holatni aniqladim. Bu holat haqida nafaqat o'zbek tilida balki boshqa tillarda ham fikr yuritilmagan ekan. Bu haqida keyinroq aytib beraman.

🛜 @SarvarbekTeam | Fikrlarni cheklab boʻlmaydi!

Ne istaymiz...

Gohida bilmaysan ne istashingni
Baʼzida oddiylik, baʼzan mol-dunyo
Bilmayin qolasan ne qilishingni
Oddiylik yaxshimi yoki mol-dunyo

Halovatni izla sen oddiylikdan
Axir insoniyatga halovat kerak
Imkoniyatni esa molu-dunyodan
Gar ikkisi boʻlsa mukammal demak.

Oluvchi qoʻllardan, beruvchi yaxshi
Kuchsiz mo'minidan ham afzal kuchlisi
Axir bu boylik ham hayotning naqshi
Lekin boʻlib qolma pulning muhlisi

To'g'ri mukammal she'r yoza olmayman
Chunki aslida men shoir emasman
Lekin gaplar kelsa, jim turolmayman
Chunki bu hayotga befarq hammasman.

© "Yon daftar" J.S.

🇺🇸Ingliz tili oʼrganayotganlar uchun shunchaki foydali boʼlsin deb @IELTSPreparationBot tayyorlaganman esingizda boʼlsa. Bunga yana yangi maʼlumotlar qoʼshish niyat bor.