TALABALARIMIZGA TILAKLAR…!
Assalomu alaykum, aziz talabalar!
Yana bir bor barchangizga yangi 2025-yil muborak boʻlsin! Yangi yil Siz aziz talabalar uchun yangi imkoniyatlar, yangi maqsadlar va yangi marralar yili bo’lsin!
Ertaga boshlanadigan o’qishlarga katta kuch va ishtiyoq bilan kirishib, yil davomida yuksak marralarga erishasiz degan umiddamiz!
Qadrli talabalar!
Biz 2025 yilda Institutimiz oldiga katta maqsadlar qo’yganmiz. Eng muhimi, kelayotgan yilda Siz aziz talabalarni Yaponiya, Janubiy Koreya, Xitoy, Italiya, Islandiya va Vengriya kabi rivojlangan davlatlarga doktorantura, magistratura va malaka oshirish kurslariga yuborishni maqsad qilganmiz. Bu maqsadga erishish uchun Siz aziz talabalarning qat’iyat bilan intilishingiz o’ta muhim ahamiyatga ega.
Oʻtgan yilda erishgan yutuqlarimiz Sizni ushbu oliy maqsad sari ildam qadam tashlashga undashi kerak. Siz koʻrib kuzatib turganingizdek, o’tgan yilda bir nechta talabalarimiz o’z harakatlari va bilimi bilan munosib natijalarga erishdi. 2024 yilda 16 nafar talabamiz xorijiy til sertifikatlarini qoʻlga kiritib, institutimizga magistraturaga oʻqishga kirgan boʻlsa, 5 nafar talabamiz Vengriya va Italiya davlatlarida magistratura bosqichida oʻqishlarini davom ettirmoqda. Siz aziz talabalarimiz ham shular qatorida boʻlishingiz uchun hali imkoniyatlar oʻz qoʻlingizda. Bu yutuqlar barchamiz uchun iftixor va o'rnak bo'lishi kerak!
Bu yutuqlarning barchasi ushbu talabalarning bilim olishga boʻlgan ishtiyoqi, mehnatsevarligi va oʻz ustida tinimsiz ishlashining natijasidir. Shuning uchun ham, yangi yilda oʻz oldingizga yanada ulkan maqsadlar qoʻyishingiz va ularga erishish yoʻlida astoydil harakat qilishingizni soʻrayman.
Aziz talabalar!
Oldimizda turgan vazifalar murakkab, lekin birgalikdagi saʼy-harakatlarimiz bilan biz barcha maqsadlarimizga erishisha olamiz deb o’ylayman. Biz institutimizdagi har bir talabamizning yaxshi bilim olish orqali kelajakda hayotini tubdan yaxshilashini va jamiyatimizga munosib hamda kerakli inson boʻlib yetishishini xohlaymiz. Buning uchun barcha imkoniyatlarni ishga solishga va Sizga har tomonlama yordam berishga tayyormiz.
Hurmatli talabalar!
Bugungi globallashuv davrida mutaxassislik fanlari bilan bir qatorda xorijiy tillarni mukammal bilish har bir yosh mutaxassis uchun zaruriy shartga aylanib bormoqda. Xorijiy tillar, ayniqsa ingliz tili nafaqat xalqaro muloqot vositasi, balki ilm-fan, texnologiya va biznes sohalarida ham muhim ahamiyatga ega. Sizlar ingliz tilini oʻrganish orqali xorijiy adabiyotlardan bahramand boʻlishingiz, xalqaro konferensiyalarda ishtirok etishingiz, xorijda oʻqish va ishlash imkoniyatiga ega boʻlishingiz mumkin.
Shu bois, har biringizni ingliz, koreys, yapon, xitoy tillarini oʻrganishga alohida eʼtibor berishingizni soʻrayman. Institutimizda bu borada sizlarga zarur sharoitlar yaratilgan. Qolaversa, Sizlar oʻz ixtiyoringizda koʻplab zamonaviy oʻquv qoʻllanmalari, til oʻrganish markazlari va malakali oʻqituvchilarga egasiz. Ulardan unumli foydalanib, oʻz bilim va koʻnikmalaringizni yanada oshiring.
Aziz talabalar!
Sizlar Oʻzbekistonning kelajagisiz. Sizlarga katta umidlar bogʻlaymiz. Oʻzingizning bilimingiz, intilishingiz va gʻayratingiz bilan yurtimizning agrar soha ravnaqiga munosib hissa qoʻshishingizga ishonamiz.
Bir narsani unutmasligingiz va bunga to’g’ri baho berishingizni istardim. Siz egallayotgan kasbning qimmati va unga bo’lgan talab yildan yilga ortib boradi. Buning uchun albatta yaxshi va bilimli mutaxassis bo’lish kerak. Sizlarni ushbu ezgu va sharafli kasbni egallashda bor kuch-g’ayratingizni ishga solishga chaqiraman. Sizning mehnatingiz jamiyatimiz, qolaversa institutimizning ravnaqi uchun juda muhimdir!
Yangi 2025-yil barchangizga omad, muvaffaqiyat va yangi zafarlar olib kelsin!
Hurmat bilan,
Institut direktori T.Rajabov
