Ревизор 🧮

Қизиқ ҳолат: айни пайтда корхона ва ташкилотлар ҳақида маълумот олиш учун қулай бўлган orginfo.uz, iHamkor.uz, myOrg.uz ва бошқа каби сайтлар ишламаяпти ёки фаолияти (вақтинча) тўхтатилган.

Бир вақтнинг ўзида барчасини ишламай қолиши шубҳали, албатта. Тасодифлар тасодифан бўлмайди.

@revizor_uzb

«Жалақудуқ туман йўллардан фойдаланиш» давлат муассасаси томонидан барча объектларда махсус транспорт хизмати кўрсатиш бўйича бошланғич қиймати 101,0 млн сўмлик танлов ўтказилди.

Танлов натижаларига кўра, энг паст нарх — 100,5 млн сўм таклиф қилган «Will Print» МЧЖ танлов ғолиби, иккинчи иштирокчи «DAVR TAMIRLASH» МЧЖ эса заҳира ғолиби деб топилди.

Мазкур танловда ўзаро аффилланган шахсларга тегишли тадбиркорлик субъектлари иштирок этган бўлиши мумкин.

Хусусан, Ғозиев Файзулло Эркинжонович бир вақтнинг ўзида «Will Print» ва «DAVR TAMIRLASH» МЧЖларнинг раҳбари ҳамда ягона таъсисчиси ҳисобланади.

@revizor_uzb

АКТ маркази қандай қилиб «Ягона етказиб берувчилар реестири»га киритилган — вазирлик ва қўмитада аниқ жавоб йўқ

«Ахборот-коммуникация технологияларини ривожлантириш маркази» МЧЖ (кейинг ўринларда «АКТ маркази» деб юритилади) «Ягона етказиб берувчилар реестири»га қандай асосда киритилгани борасида тегишли вазирлик ва идоралардан ҳанузгача расмий муносабат билдирилмади.

@revizor_uzb жамоаси бу ҳолатга ойдинлик киритиш мақсадида тегишли идораларга савол йўллади. Рақобатни ривожлантириш ва истеъмолчилар ҳуқуқларини ҳимоя қилиш қўмитаси масъул ходими «бу каби давлат харидларини ўрганиш қўмита ваколатларига кирмаслиги»ни маълум қилди (оғзаки).

Қўмита ходими Президентнинг тегишли қарорида 2024 йил 1 октябрдан бошлаб «Ягона етказиб берувчилар реестири»га бозорда муқобиллари йўқ ва техник жиҳатдан мураккаб товарларни етказиб берувчилар фақат Рақобат қўмитасининг хулосаси асосида киритилиши белгиланганидан бехабар бўлиши мумкин.

Иқтисодиёт ва молия вазирлиги ходими эса «АКТ маркази» ДУК Вазирлар Маҳкамасининг 2012 йил 1 февралдаги 24-сон қарорига асосан «Ягона етказиб берувчилар реестири»га киритилганини ҳақида маълумот тақдим этди.

Бироқ, вазирлик «АКТ маркази» МЧЖ — ҳозирги кунда давлат бошқаруви органлари ёки ҳокимликлар ҳузуридаги давлат унитар корхонаси ҳисобланмаслигини, жисмоний шахсга тегишли тадбиркорлик субъекти эканлигини эътиборга олмагани кўринади.

Юқоридагилардан келиб чиқиб, вазирлик ва қўмита томонидан мазкур масалага етарли даражада эътибор қаратилмаган, деб хулоса қилиш мумкин. Бундай бепарволик, ўз навбатида, «IT бозори»да соғлом рақобат муҳитига салбий таъсир кўрсатмай қолмайди.

Ўрганиш давомида «АКТ маркази» МЧЖнинг СТИРи аввал Сирдарё вилояти ҳокимлиги ҳузуридаги «АКТ маркази» давлат унитар корхонасига тегишли бўлгани аниқланди. Аммо очиқ манбалардан ҳокимлик ҳузуридаги ДУКнинг давлат улуши кимга, қанчага ва қандай шартларда сотилгани ҳақида маълумотларни топиш имкони бўлмади.

Шу билан бирга, ушбу кейс бир қатор саволларни келтириб чиқармоқда: «Ягона етказиб берувчилар реестири»га киритилган бошқа субъектлар қандай мезонлар асосида танланган? Яна қанча мана шу каби ҳолатлар учраши мумкин? Реестрга киритиш жараёни нега назорат қилинмаяпти? Ахир бундай ҳолатлар соғлом рақобат муҳитига таъсир қилиши мумкин-ку! Буни беварволикка йўйиш керакми ёки манфаатдорликка?

«NAVOIYURAN» давлат корхонаси табиий уранни транспортировка қилиш учун бошланғич қиймати 9 млн АҚШ долларлик тендер ўтказди.

Ушбу хизматлар Санкт-Петербург (Россия) портидан АҚШдаги «Конвердин Энтерпрайз» ва Канададаги «Камэко Корпорэйшн» қайта ишлаш корхоналарига уранни етказиб беришни ўз ичига олган.

Танловда фақат битта талабгор — Commonwealth Independent States Navigation (2019) Inc. (CISNAV) иштирок этган. Компания 9 млн АҚШ доллари таклиф қилган ва танлов ғолиби деб топилган.

Commonwealth Independent States Navigation (2019) Inc. — Канаданинг Монреаль шаҳрида жойлашган бўлиб, юк ташиш ва экспедиторлик хизматларини кўрсатишга ихтисослашган.

Давлат харидлари тўғрисидаги қонунчиликка мувофиқ, агар тендерга камида иккита таклиф келиб тушса, улар харид комиссияси томонидан кўриб чиқилади. Бироқ, агар тендерда фақат битта иштирокчи қатнашган бўлса ёки умуман иштирокчи бўлмаган тақдирда, тендер ўтказилмаган деб ҳисобланади.

@revizor_uzb

Амалдор ака тақдим этган эксклюзив имкониятлар тадбиркор укани тендерлардаги ғалабасини таъминлаган(ми?)

2022–2024 йиллар давомида «Агробанк» АТБ томонидан «Гибрид почта» платформасига уланиш ва ундан фойдаланиш бўйича ўтказилган тендерларда «Space Online Genesis» МЧЖ ғолиб деб топилиб, умумий қиймати 5,8 миллиард сўмлик буюртмаларни қўлга киритган.

Ушбу танловларнинг деярли барчасида иккинчи иштирокчи сифатида қатнашган «DEVOPS» МЧЖ жорий йил октябрь ойида 1 миллиард 692 миллион сўм бошланғич нархли тендерда 169,2 миллион сўм таклиф билан ғолиб бўлган. Бироқ қисқа вақт ўтгач, мазкур шартнома бекор қилинган.

«Агробанк» АТБ ва «Space Online Genesis» МЧЖ ўртасида шартномалар имзоланиши жараёнида «Space Online Genesis» МЧЖнинг «Ўзбекистон почтаси» АЖ билан эксклюзив шартномага эга эканлигига алоҳида эътибор олинган. Юқори эҳтимол билан, айнан шу эксклюзив шартнома танловларда ғолиб бўлиш учун асос бўлган.

Ҳозирда «Space Online Genesis» МЧЖнинг раҳбари ва таъсисчиларидан бири — Файзуллаев Шухрат Насибуллаевич, тахминларга кўра, «Ўзбекистон почтаси» АЖни 2019 йилдан бери бошқариб келаётган Файзуллаев Алишер Насибуллаевичнинг яқин қариндоши (масалан, ака-ука) бўлиши мумкин.

Агар улар ҳақиқатан қариндош бўлса, давлат-ака ўзининг тадбиркор-укаси билан тузган эксклюзив шартноманинг мазмун-моҳиятини очиқлаган ҳолда жамоатчиликка тақдим этиши лозим. Почта монополисти (эҳтимолий ака)нинг бундай эксклюзив шартномаси оқибатида «Гибрид почта» тизими бозорида монополист (ука) пайдо бўлмаганми, деган саволлар туғилмоқда.

Уларнинг ўрталарида қариндошлик алоқалари бўлмаган тақдирда ҳам «Ўзбекистон почтаси» АЖ ушбу эксклюзив шартнома тафсилотларини ва бундай имтиёзларни бошқа тадбиркорлик субъектларига ҳам тақдим этган-этмаганини очиқлаши зарур.

Бундан ташқари, «Space Online Genesis» МЧЖнинг яна бир таъсисчиси Зияев Фаррух Ғолибшерович (25 фоиз улуш эгаси) — Ахборотлаштириш ва телекоммуникациялар соҳасида назорат бўйича давлат инспекцияси («Ўзкомназорат»)нинг cобиқ бошлиғи, нотўғри ва келишилмаган хатти-ҳаракатлари сабаб лавозимдан четлатилган Ғолибшер Зияевнинг ўғли бўлиши мумкин.

@revizor_uzb

Мазкур лот (24110012407327) техник шартларни жойлаштиришда йўл қўйилган «техник хато» туфайли буюртмачи томонидан бекор қилинибди.

@revizor_uzb

«Тошкент ёшларни севади, ёшлар агентлиги эса пиарга пул совуришни(ми?)»

Тошкент шаҳар Ёшлар ишлари бошқармасининг 2024 йил 11 декабрдаги яна бир қизиқ хариди этиборини тортди. Ушбу харид доирасида бошқарма ва «Media Affairs» МЧЖ ўртасида умумий қиймати 534,7 миллион сўмлик тўғридан-тўғри шартнома тузилган.

Шартнома мазмунига кўра, «Media Affairs» МЧЖ томонидан «Тошкент ёшларни севади» шиори остида ўтказилган тадбирларни «Platina.uz» сайти ва унинг ижтимоий тармоқ саҳифаларида ёритиш ва PR ( пиар) материалларни жойлаштириш кўзда тутилган.

@revizor_uzb тадбирга оид материалларнинг самарадорлигини таҳлил қилиш учун «Platina.uz» сайтининг YouTube каналидаги видеоматериалларни танланма усулда ўрганди.

Қизиғи шундаки, тадбирга оид бир нечта видеоларнинг кўришлар сони 1000 тага ҳам етмаган. Яъни, тадбир пиари учун сарфланган маблағ миқдори натижага нисбатан жуда юқори кўринади.

Битта сайтдаги ёритиш ишлари учун ярим миллиард сўмлик шартнома тузилган экан, агар бошқа сайтлар ва ОАВларда ёритилган материаллар ҳажмини чамалаб кўрсак, тадбирнинг умумий пиар харажатлари қанчалик катта бўлгани ҳақида фақат тахмин қилиш мумкин.

Ёшлар тадбирларига бўлган эътибор ижобий ҳолат ҳисобланади, бироқ пиар фаолиятлар учун сарфланаётган давлат маблағларининг натижадорлиги жиддий баҳоланиши зарур.

@revizor_uzb

Фикр билдириш имкониятисиз ўтаётган жамоатчилик муҳокамалари ҳақида

Президентнинг 2024 йил 10 июлдаги ПҚ-249-сонли қарорига мувофиқ давлат буюртмачилари томонидан тўғридан-тўғри шартномалар улар тузилишидан олдин камида бир иш куни давомида жамоатчилик муҳокамасидан ўтказилиши шарт.

Мазкур тартиб 2024 йил 1 октябрдан бошлаб кучга кирган бўлса-да, ваколатли орган — Иқтисодиёт ва молия вазирлиги ҳамда тизим оператори томонидан давлат харидлари электрон тизимида жамоатчилик муҳокамасини ўтказиш учун имкониятлар яратилмаган. Электрон тизимда «муҳокама жараёнида» бўлими мавжуд, аммо у ерда фикр билдириш имконияти йўқ.

Айни пайтда, давлат буюртмачилари тўғридан-тўғри шартномалар тузишда «эътироз келиб тушмаган» деган мазмундаги баённомаларни жойлаштириб келмоқда. Бу «шаблон» баённомаларнинг барчасида «бир иш куни ичида жамоатчилик томонидан тўғридан-тўғри шартнома тузиш бўйича эътирозлар тушмади» деган стандарт ифодалардан фойдаланилаётгани кузатилмоқда.

Жамоатчилик муҳокамасининг тўлиқ амалга оширилмаслиги ортидан давлат харидлари бўйича қарорлар шаффоф бўлмай қолиши мумкин. Бу эса давлат маблағларидан оқилона фойдаланилишини таъминлашга тўсқинлик қилади ва коррупция хавфини оширади.

@revizor_uzb

Мактабгача ва мактаб таълими вазирлиги «REVISION» МЧЖ билан тўғридан-тўғри шартнома тузиш асосида иккита видеоролик тайёрлаш учун жами 360 миллион сўм маблағ сарфлади.

Видеороликларнинг давомийлиги 6:30 ва 6:16 минутни ташкил этади.

@revizor_uzb

Давлат ташкилотлари ва мансабдор шахслар фаолиятида шаффофлик, масъулиятлилик ва жамоатчилик назоратини таъминлаш — замонавий жамият учун энг долзарб вазифалардан биридир.

@revizor_uzb канали ана шу вазифани амалга оширишни ният қилиб яратилган. Унинг асосий мақсади — давлат ташкилотлари фаолиятидаги ҳар қандай ноаниқлик ёки шаффофлик етишмаслигини жамоатчиликка очиб берган ҳолда ишончли маълумотни етказиш.

Каналда эълон қилинаётган ҳар бир постнинг ортида катта меҳнат, таҳлил ва масъулият ётади. Ҳар бир материал тайёрлашга камида икки-уч соат вақт кетади, тендер ва танловлар билан боғлиқ айрим постлар эса уч-тўрт кунлик текширув ва таҳлилларни талаб қилади. Бундай жиддий ёндашув орқали канал давлат харидларини холисона ёритишни мақсад қилган.

Канал ҳеч қандай ташкилот ёки компаниялар билан ҳамкорлик қилмайди. Реклама ёки пиар материаллар жойлаштирилмайди ва бу орқали канал ўзининг мустақиллигини сақлаб келмоқда.

Муаллиф канал фаолиятидан ҳеч қандай даромад олмайди ва мақолалар учун «соққа» эвазига «заказ»лар қабул қилмайди. Қолаверса, ҳар қандай ноқонуний ёки этикага зид таклифларни ва илтимосларни рад этиш мақсадида муаллиф ўз анонимлигини сақлашни устун қўяди.

Канал ўз фаолияти учун ҳеч қандай моддий ёрдам талаб қилмайди. Муаллиф учун асосий мукофот — обуначиларнинг ишончи ва қўллаб-қувватлови.

Муаллиф обуначилардан фақат лайклар, постларни улашиш ва канални бошқаларга тавсия қилиш орқали қўллаб-қувватлашни кутиши мумкин, холос. Бу нафақат канал ривожи, балки фуқароларнинг давлат ишларидаги иштироки ва масъулиятли фаоллиги учун муҳимдир.

Канал фаолиятига киритилган меҳнатга қарамасдан, баъзи сайт ва блоглар материаллардан фойдаланиб, муаллифни манба сифатида кўрсатмайди. Афсуски, бу ҳолат ҳатто расмий ОАВ сайтларида ҳам кузатилади. Ҳар бир ахборотдан фойдаланганда манба кўрсатиш, нафақат профессионал одоб қоидаларидан, балки умуминсоний қадриятлардан ҳам ҳисобланади.

Бугун кимнингдир меҳнатини тан олмаслик, эртага ўз ишимиз қадрланмаслигига олиб келиши мумкин.

@revizor_uzb

Ўзаро боғлиқ компаниялар «ўйини»

«AMMOFOS-MAXAM» АЖ томонидан газ тақсимлаш пунктларида жойлашган газ ҳисоблаш узелларини кўчириш ва қурилиш-монтаж ишларини бажариш хизмати бўйича танлов ўтказилган. Лойиҳа учун бошланғич нарх 261 004 319 сўм этиб белгиланган.

Бир сўм фарқ билан ғалаба:

Танловда икки иштирокчи — «GAZMONTAJQURILISH» МЧЖ ва «IZOPOL» МЧЖ ўз таклифларини тақдим этган. Иккаласи ҳам бошланғич нархдан бор-йўғи бир сўм кам (261 004 318 сўм) нарх таклиф қиган.

Натижада «GAZMONTAJQURILISH» МЧЖ танлов ғолиби, «IZOPOL» МЧЖ эса заҳира ғолиби деб топилган.

Мазкур танловда ўзаро аффилланган шахсларга тегишли тадбиркорлик субъектлари иштирок этган.

Хусусан, «GAZMONTAJQURILISH» МЧЖнинг раҳбари ва таъсисчиларидан бири — AVTOMANOV ALEKSEY YUREVICH (24%) бир вақтнинг ўзида «IZOPOL» МЧЖнинг ҳам 33,30 фоиз улушига эгалик қилади.

Шунингдек, «IZOPOL» МЧЖнинг қолган таъсисчилари — CHUVAYEV ANATOLIY VIKTOROVICH (33,30%) ва XRYUKIN ANDREY ALEKSEYEVICH (33,40%) — «GAZMONTAJQURILISH» МЧЖнинг ҳам таъсисчилари ҳисобланади.

@revizor_uzb

Шаҳрихон тумани тиббиёт бирлашмасига қарашли бўлимларга «кислород станцияси» сотиб олиш ва ўрнатиш мақсадида бошланғич нархи 649 млн 925 минг сўмлик танлов ўтказилган.

Мазкур танловда икки талабгор иштирок этиб, 639 млн 936 минг сўм нарх таклифи билан «TEHNO TEZKOR» МЧЖ танлов ғолиби, «ELITE TECHNOSALE»МЧЖ эса заҳира ғолиби деб топилган.

Танловда қатнашган ушбу икки тадбиркорлик субъектининг раҳбар-таъсисчилари, рўйхатдан ўтган ҳудудлари ва жойлашган манзиллари бошқа-бошқа бўлса-да, уларни бир хил телефони рақами боғлаб туради. Яъни, икки компанияга тегишли расмий маълумотларда алоқа учун 930380004 телефон рақами кўрсатилган.

Шунингдек, «TEHNO TEZKOR» ва «ELITE TECHNOSALE» компаниялари шу йилнинг ноябрь ойида давлат рўйхатидан ўтказилган бўлиб, уларнинг ташкил топганига унчалик кўп вақт ўтмаган. Бу ҳолат, ўз навбатида, компанияларнинг тендерларда иштирок этиш учун етарли тажрибага эгалигини савол остига қўяди.

@revizor_uzb