Yuqoridagi she'rni o'zimcha sharhlagim keldi, muallif boshqa ma'noni iroda qilgan bo'lishi mumkin.
Avvalo, she'rda yurt, jamiyat, millat nomidan turib Islom diniga xitob qilinmoqda deb o'ylayman.
Men — jamiyat, yurt
Sen — Islom dini
Нега ҳамма яхшиликлар сенда бўлди?!
Нега ҳамма камчиликлар менда бўлди?!
Allohning so'nggi mukammal dini o'laroq hamma yaxshiliklar islomda ekanligiga shubha yo'q. Qariyb 95% musulmonlardan iborat yurt bo'lsak-da,
Нега ҳамма камчиликлар менда бўлди?! deya jamiyatdagi kamchiliklarni nazarda tutib ritorik savol (javob talab qilinmaydigan savol) qo'yilyapti.
Дегандингку сенга эргашмасак фасод бўлар,
Ишонмадим, фасод бўлмас, бироқ, бўлди!
Islomga amal qilmaslik yer yuzida fasod — buzg'unchilikga olib borishi diniy manbalarida ko'p o'rinlarda takidlangan. Lekin bunga biz jamiyat o'laroq ishonmadik, "sen" o'rtaga qo'ygan qonuniyatlarni amalga tatbiq qilmadik, mana endi fasod, yomonliklar ko'paydi deya keyingi qatorlarda bunga ba'zi misollar keltirilyapti.
Жамолингдан қочиб орттирилган фобиядан
Ҳалолингдан қўрқиб соттирилган ароқ бўлди?!
Islomning go'zalliklaridan qochib, har xil taqiqlar (ba'zi tashkilotlarda ayollarning ro'mollariga taqiqlar, ba'zan ko'chalarda "soqol olish" reyd tadbirlari) qo'yilaverganidan "islomofobiya" degan tushuncha paydo bo'ldi va ota-onasi o'zbek-musulmon bo'lgani holda o'zi islomni yomon ko'radigan avlod paydo bo'ldi.
Ba'zi tadbirkorlarga "Halol" belgilarini do'kon va restoranlaridan olib tashlash talab qilingan joylar bo'ldi, eshitdik. Lekin barcha fasod, buzg'unchiliklarning "onasi" bo'lgan spirtli ichimliklar savdosiga hech qanday taqiq qo'yilmadi.
Аёл-қизга талабимиз бўлса агар ҳақ-ҳуқуқлар,
Аёллардан алиментни олишимиз чатоқ бўлди!
Ayol-qizlarning haq-huquqlari deb bong uryapmiz-u, lekin ayollardan aliment olishgacha borishdi ko'pchilik... .
Islomda yetarlicha ayollar huquqlari haqida ta'limotlar borligiga qaramasdan feminizm, gender tengligi kabi oxiri fasod bo'lgan g'oyalar targ'ibotiga zo'r berilayotgani nazarda tutilyapti.
Кундан-кунга ортмоқда-ку кредит-у фоизимиз,
Сен айтгандек савдо қилганга-ку мароқ бўлди!
An'anaviy iqtisodiyot va bank tizimi foiz, riboga asoslangan va bunda doim mijoz zarar ko'radi, kredit beruvchi tomon hech qanday zararni zimmasiga olmaydi. Shu sababli, tobora tashqi qarzimiz oshib boryapti. Islom iqtisodiyoti va bank tizimida esa ikki tomon ham foyda va zargarga sherik bo'ladi va bu tizim asosida albatta
maroq bilan savdo qilasiz. Islom moliya tizimi hukmron yerlar gullab-yashnayotganligining guvohi bo'lyapmiz.
Haligacha islomiy banklarning yurtimizga kirib kelishiga ba'zi kuchlar qarshilik qilishayotganiga ishora.
Сенла эди одоб-аҳлоқ, гўзалгина қадриятлар
Кечган кунда бизга зулматлардан дарак бўлди.
Oxirida aynan qaysi ma'no iroda qilinganini tushunmadim, qolgani tushunarli.
Фозил миллат эришишни истаганда саодатга
Таклифимиз "истаганлар борсин ана дўзаҳ" бўлди.
Farobiyning "Fozil odamlar shahri" kitobidagidek ilm-fan, axloq va adolatga asoslangan ideal jamiyat qurib saodatli yashash edi maqsadimiz. Ammo, bir amaldor chiqib "odamlarga do'zahga tushishiga qo'yib beraylik" qabilidagi gapi bilan, bir-birimizni yaxshilikga chaqirishdan, yomonliklardan qaytarishdan to'sishga urindi.
Йўлингдан юришни-ку ўзимизга ор деб билиб,
Қурганимиз тизимимиз маймунларга мазаҳ бўлди.
Islomga asoslangan jamiyat qurishdan uyalib qurgan "dunyoviylikga asoslangan" jamiyatimiz "biz maymundan tarqalganmiz" deydigan e'tiqodlilarga kulgi bo'ldi, xolos.
Нега ҳамма яхшиликлар сенда бўлди?!
Нега ҳамма камчиликлар менда бўлди?!
Bu jumlalarga javob izladik, lekin hali ham bu savollar javobsiz. Nega biz yuqoridagilarni bilganimiz holda haliyam boshqa yo'ldan ketyapmiz?! Hamma yaxshiliklar Islomda ekanligini bilganimiz holda, nega haliyam boshqa yo'l orqali yashayapmiz jamiyat o'laroq?! Bu savol o'z egalariga. Ular esa javob berishmaydi... . Shuning uchun uchun ham ritorik savollarga nisbatan ishlatiladigan "?!" tinish belgilari qo'yilmoqda.
Boshda aytganimdek, muallif boshqa ma'noni qasd qilgan bo'lishi mumkin.
Shuhrat Ali
@Shuhrat_Ali_blogi
