BO'LAJAK TALABA UKAM UCHUN!
Men bugun ro'zg'orga bir-ikki narsa oldim. Taxminan 200.000 atrofida bo'ldi, bular faqatgina eng zaruriy mahsulotlar edi va hech qanday ermak uchun olinadigan narsalar emas edi. Uyga kelsam wi-fi oylik to'lovi yetib kelgan ekan, unga ham 100.000 so'm toʻladim. Har hafta bolamga oladigan 100.000 soʻmlik ozuqa ham navbatda turgan ekan. Umumiy hisobda bemalol 500.000 so'mga yaqin harajat. Aytgancha, bugun ishxonada uydan olib borgan tushligimni yedim (va bu menga juda qulay va yoqadi). Men va men kabi ro'zg'orga mas'ul kishilar uchun bunaqa xarajatlar odatiy holat bo'lgan. Men nega bunday o'ta shaxsiy narsalarni senga aytyapman. Seni yaxshi ma'noda qo'rqitish va ruhan tayyorlash uchun. Men katta hayot mashaqqatlardan iborat demoqchi emasman, bular shunchaki shirin lekin qimmat tashvishlar. Bu shirin lekin qimmat tashvishlardan o'ta olayotganim uchun ming bor shukr qilaman. Endi, kel, maqsadga o'tsam. Agar o'qishga kirgan bo'lsang:
-buni takasaltang do'stlaring kabi 4 yil nishonlab, disko barlarning hammasini ziyorat qilib, fakultetingdagi hamma qizlarni sevib chiqib laqma degan nomni orttirishing shartmas;
- yo'nalishinga aloqador kitoblardan o'qi, videolarni ko'r, kurslarga qatnash. Imkon qadar ko'proq diqqatingni shunga qarat, garchi birdan qoʻling pulga kirmasada;
- vaqting va imkoniyating bo'lsa birinchi kursdan oz-ozdan ishlab pul topishga ham harakat qil. Chunki moliyaviy mustaqil bo'lsang seni ERKAK deb chaqirsa bo'ladi;
-Universitetingdagi nohaqliklarga haqida noliyverib o'zingdan jabrdiydani yasab olma. Universitetdagi muammolarni sendan oldingilar tuzatolmagan, Sen ham tuzatolmaysan. Faqatgina haqiqatga yuzlan, vaziyatga moslash va tinimsiz, tinimsiz, tinimsiz o'qi va ishla;
- Qizga qahad kelganday bitta ezmani topib olib kechqurunlari bilan telefon-u telegramda yozishib ishing va vaqtingdagi barakani o'ldirma. Ertaga hayf ketgan vaqting uchun o'sha suyukli mashuqang badal to'lamaydi.
Xullas, ukam! Sen o'qishga kirganingda xursand bo'lib tabriklagan jamiyat ertaga oilali bo'lib oddiy ro'zg'orni eplolmaganingda seni NOSHUD deb ataydi. Olloh asrasin. Tinimsiz o'qi, sohangni chuqur o'rgan. 4 yilda 1460 kun bor. Sen 1460 kun o'qib diplom olgandan keyin ish meni topadi deb oʻylasang hali bola ekansan. Ertaga ota-onang qariganda va birovning qizi senga ayol bo'lib kelganda ularni qiynamaslik uchun bugundan sharoitingni koʻr. Yoki 4 yil talabalikni bayram qil, yoki 4 yil o'zing uchun mukammal hayot tarzini shakllantir.