PAYARIQ HAYOTI | Rasmiy kanal

ЎТГАНЛАР РУҲИ ШОД БЎЛМОҚДА...
Маълумки, инсон умри тугагач унинг дунёдаги сўнгги манзилгоҳи қабр ҳисобланади. Динимизда қабристонларни зиёрат қилиш, ободонлаштиришга тарғиб этилган.
Табиийки, ўтганларни хотирлаш, улар дафн этилган қабристонларни зиёрат қилиш, уларнинг ҳақларига яхши дуолар қилиш ва ушбу масканларни обод қилиш ҳам фарз ҳам қарз. Қабристон зиёрати кўнгилни юмшатади, виждонни уйғотади, қалбдаги ёмонликларни бартараф этади.
Дунёдан ўтган аждодларимиз, қариндош уруғларимиз дафн этилган қабристонларга бориб, уларнинг ҳақларига Қуръон тиловати ва дуолар қилишимизда, нафақат қабристон аҳллари баҳраманд бўлади балки бунда биз тириклар учун ҳам, жуда кўп руҳий манфаатлар бор.
Туманимиз мутасаддилари бошчилигида аждодларимиз қўним топган қабристонларнинг обод бўлишига алоҳида эътибор қаратилиб, кўплаб ишлар амалга оширилмоқда.
Туманимиздаги“Фидокор” маҳалласига қарашли "Оқтош ота" қабристонида 23-24-ноябрь кунлари ободонлаштириш ишлари олиб борилди.
Қабристон атрофига 150тупдан ортиқ повлония ва манзарали дарахтлар шунингдек қабристон ичкарисидаги йўлакчалар атрофига 80тупдан ортиқ арча кўчатлари ҳомий тадбиркорлар ҳисобидан олиб келиниб, экилди.Экилган арчани суғориш учун 300 метр масофадан артизан суви тортилиб келинди.Бу ишларни амалга оширишда аввало шу қабристонга қарашли бўлган фуқоралар меҳнати самарали бўлди.
Яна 150 туп повлония дарахти экиш учун ер шудгор қилиниб, ариқлари олиниб, тахтлаб қўйилди. Бу ишларни амалга оширишда Сафар ака Нормўминов, Сафар Исаев, Исломбек Болматов,Самариддин Раҳмонов, Абдумажид Болиев ва қабристон қоровули Ғаффор Болиевлар фаоллик кўрсатиб, ишларни тўғри ташкил этишдилар.
—Шу йили ёзда ҳам 300 метр бетон йўлакчалар қуйилиб, анжомлар турадиган махсус хона ҳам қурилиб битказилган эди. Ҳали ободонлаштиришда қиладиган ишларимиз бисёр, фақатгина бизнинг маҳалла аҳли, қабристонга тегишли инсонлар қўллаб-қувватлаб туришса, кўпгина ижобий ишларни амалга оширамиз. Бу ишларни амалга оширишда маблағ жиҳатдан амалий ёрдам қилган барча фуқароларимизга ўз миннадорчилигимизни билдирамиз, — дейди маҳалла оқсоқолларидан Сафар ака Нормўминов.
Суннат МУҲАММЕДОВ.
@PAYARIQHAYOTI_UZ

“КИЧИК ОТА”
Бир мақоламда акамлар отамнинг бюстини ясатиб, (ота-она уйимиз) меҳрли уйимизнинг кириш қисмининг баланд жойига ўрнатиб қўйган деб ёзган эдим. Ўша материалимни Шаҳрисабз шаҳрида яшаётган филолог синглимга жўнатсам, у қариндошлар каналига ташлабди.Уни ўқиб кўрган Бахтиёр укам ва унинг турмуш ўртоғи, отамнинг бюсти билан тушган “кичик ота” Аҳад Примовнинг суратини каналга ташлабди. Бюст айнан отамнинг қуйиб қўйган ўзи бўлмаса ҳам, ҳайкалтарош барибир отамга ўхшата олган. Ҳайкалтарош, ҳайкалтарошда.Отамнинг бюсти қуйиб қўйгандек “кичик ота”га ўхшашини қаранг, эй Худо ўхшашини қаранг, бекорга бунча отамнинг исми, фамилияси пешонасига ёзилмаган экан, деган хаёлга бордим.Ҳозир ҳамма жўнатма маълумот бир пасда телефонларимизда пайдо бўлади. Ўз аксини топади.Телефон тезкор маълумотларни етказишда энг қулай восита.
Дарҳақиқат,отамнинг исми ва фамилиясини олган, унга ота-онаси бобосининг исмини қўйган, укам Бахтиёрнинг кичик ўғли Сардорнинг ўғилчаси.Туғишган ака-укаларимнинг, невараларининг ҳаммасини яхши кўраман.Бироқ, отамнинг исми қўйилган Сардор укамнинг ўғлини кўрсам, доимо отам кўз олдимда намоён бўлади.Уни ич-ичимдан чинакамига яхши кўраман.”Кичик ота”деб ҳамма уни эркалатади.Илоҳим унинг ҳам авлодлари отам каби пиру бадавлат, болалари қобилу-фозил инсонлар бўлишини, отамнинг ёшидан ҳам ўтиб юришларини тилаб қоламан.
Жибак АҲАДОВА.
@PAYARIQHAYOTI_UZ

Александр Пушкин

             К...

Я помню чудное мгновенье:
Передо мной явилась ты,
Как мимолетное виденье,
Как гений чистой красоты.

В томленьях грусти безнадежной,
В тревогах шумной суеты,
Звучал мне долго голос нежный
И снились милые черты.

Шли годы. Бурь порыв мятежный
Рассеял прежние мечты,
И я забыл твой голос нежный,
Твои небесные черты.

В глуши, во мраке заточенья
Тянулись тихо дни мои
Без божества, без вдохновенья,
Без слез, без жизни, без любви.

Душе настало пробужденье:
И вот опять явилась ты,
Как мимолетное виденье,
Как гений чистой красоты.

И сердце бьется в упоенье,
И для него воскресли вновь
И божество, и вдохновенье,
И жизнь, и слезы, и любовь.

(Таржимаси)
.                    ...га
Эсимдадир ажиб дам ҳали:
Кўз олдимда бўлдинг намоён,
Пок гўзаллик даҳоси каби,
Бир лаҳзалик хаёл, тушсимон.

Ғам-аламдан дилим ёнганда
Тушларимда кўрдим чеҳрангни,
Ҳаётдаги бўм-бўш суронда
Келиб турди товшинг жаранги.

Йиллар ўтди. Исён бўрони
Хаёлларим совурди дилдан.
Ва унутдим дилбар садонгни,
Ўчди азиз чеҳранг ёдимдан.

Қувғинликнинг чангида нурсиз
Ғамга тўлиб кунларим ботди;
Худо, илҳом, кўз ёшисиз,
Ишқ, изтироб, ҳаётсиз оқди.

Мана, қалбга ошно бўлди най,
Кўз олдимда бўлдинг намоён,
Гўзалликнинг соф парисидай,
Бир лаҳзалик ажиб тушсимон.

Руҳим яна уйғонди бу дам,
Яна унда тирилди нажот;
Яна дилда худо ва илҳом,
Кўз ёши-ю муҳаббат, ҳаёт.

Зулфия таржимаси.

@PAYARIQHAYOTI_UZ

ҲАЁТИНГИЗГА КИРГАН ИНСОНЛАР ОБ-ҲАВОГА ЎХШАЙДИ…

Уларнинг аксарияти майин шаббода каби бирпасдан сўнг ўтиб кетади..
Баъзилари эса фаслларга ўхшайди, улар узоқ вақт қолгач, сўнгра ўрнини ўзидан кейингисига бўшатиб беради..
Нодиран инсонларгина иқлим каби ўзгармасдир, доимо ҳаётингизда - сиз кетсангиз улар ҳам ҳаётингизни тарк этишади…

Ноябрь ҳавоси ўзгарувчан: эхтиёт бўлинг!

Фейсбукдан.

@PAYARIQHAYOTI_UZ

❔ Меҳнат дафтарчам маълум сабабларга кўра йўқолган. Мен қандай пенсияга чиқсам бўлади?

Меҳнат дафтарчаси ёки электрон меҳнат дафтарчаси меҳнат стажини тасдиқловчи асосий ҳужжат ҳисобланади.

👉 2005 йил 1 январдан аввалги даврлар учун меҳнат стажи шахснинг меҳнат дафтарчасидаги мавжуд ёзувлар асосида, тасдиқловчи ҳужжатлар талаб этилмасдан белгиланади.

Меҳнат дафтарчаси мавжуд бўлмаганда, шунингдек, меҳнат дафтарчасида зарур ёзувлар бўлмаган ёки меҳнат фаолияти даврлари тўғрисида нотўғри ва ноаниқ ёзувлар мавжуд бўлган ҳолларда иш стажини тасдиқлаш учун:

⏺ - маълумотномалар;
⏺ - буйруқлардан кўчирмалар;
⏺ - шахсий ҳисобварақлар ва иш ҳақи бериш учун қайдномалар;
⏺ - меҳнат шартномалари;
⏺- архив маълумотномалари ва меҳнат фаолияти даврлари тўғрисидаги маълумотлар мавжуд бўлган бошқа ҳужжатлар қабул қилинади.

☑️ Шунингдек, меҳнат фаолияти даврлари тўғрисидаги маълумотлар суд тартибида гувоҳлар кўрсатмаларига асосан ҳам ҳисобга олиниши мумкин.

Туман Пенсия жамғармаси бўлим бошлиғи  А.Турсунов.

@PAYARIQHAYOTI_UZ

❔Пенсияга чиқишда иш стажи билан боғлиқ муаммолар  бўлмаслиги учун нима қилиш керак?

Бугунги кунда баъзи ҳолатларда пенсия ёшига етган фуқаролар пенсия тайинланиши учун мурожаат қилганларида иш стажи кам чиқиш ҳолатлари учраб турибди.

Бу нима билан боғлиқ?

🔄Маълумки, айни вақтда Пенсия жамғармаси пенсия тайинлашни
сўраб мурожаат қилган фуқароларнинг барча маълумотларини электрон равишда тегишли вазирлик ва идораларнинг ахборот тизимларидан электрон шаклда олмоқда.

Шахснинг иш стажи ва иш ҳақи тўғрисидаги маълумотлар тўлиқ
рақамлаштирилган бўлса, “иш стажи йўқолиб қолиш” ҳолати юз бермайди.

Аксинча, фуқаро ишлаган ташкилот, корхона ва муассасалар қонунчиликка мувофиқ ходимнинг пенсия тайинлаш учун зарур бўлган маълумотларини (меҳнат стажи, иш ҳақи ва бошқалар) “Ягона миллий меҳнат тизими” идоралараро дастурий-аппарат комплексига киритмаган тақдирда пенсия тайинлаш вақти келганда “иш стажи ва иш ҳақи тўғрисидаги маълумотлар” чиқмаслиги мумкин.

⌨️ Бундай ҳолатга тушмаслик учун расмий меҳнат фаолияти юритаётган барча фуқароларимиздан иш стажи ва иш ҳақи тўғрисидаги маълумотларга эътиборли бўлган ҳолда, иш берувчиларидан барча маълумотларини “Ягона миллий меҳнат тизими” идоралараро дастурий-аппарат комплексига киритиб рақамлаштириб қўйишларини маслаҳат берамиз.

👤Шунингдек, ишламаётган фуқаролар меҳнат дафтарчаларидаги маълумотлар рақамлаштирилмаган бўлса, яшаш ҳудудларидаги камбағалликни қисқартириш ва бандликка кўмаклашиш бўлимларига мурожаат қилган ҳолда, меҳнат фаолияти тўғрисидаги маълумотларни рақамлаштириб олишлари мумкин.

Айтганча, мазкур хизмат мутлақо бепул амалга оширилади.

Туман Пенсия жамғармаси бўлим бошлиғи   А.Турсунов.

@PAYARIQHAYOTI_UZ

МАКТАБДАГИ ТАДБИРЛАР
Ўқувчиларни фаолликка, дадилликка ундамоқда

68-мактабда Ўзбекистон ёзувчилар уюшмаси аъзолари Муҳиддин Абдусамат, Меҳрибон Абдураҳмонова, Ҳаёт Шодмонлар билан учрашув ўтказилди.

Таъкидлаш лозимки, тадбир ҳақиқий китобхонларнинг байрамига айланиб кетди десак, муболаға бўлмайди. Ўқувчилар ижодкорлар билан юзма-юз суҳбатлашиб, ўз фикр-мулоҳазаларини билдирдилар. Ўз ижод наъмуналарини бирга баҳам кўриб, келгусидаги вазифаларини белгилаб олдилар.
Тадбирда иштирок этган меҳмонлар мустақиллик йилларида чоп этилган китобларда бугунги кун нафаси уфуриб турганлиги, жамият, табиат, инсонларнинг эврилиши, феъл атвори, ўзига хослиги акс эттирилганлиги билан аҳамиятли эканлигини таъкидладилар.

— Қанча китоб кўп ўқисанг, шунча зеҳнинг ошиб бораверади — деди Ўзбекистон ёзувчилар уюшмаси аъзоси Меҳрибон Абдураҳмонова. — Китоблар келажагимиз эгалари бўлган баркамол авлодни Ватанга, халққа, қадриятларимизга муҳаббат руҳида тарбиялашда муҳим аҳамиятга эга.

Шундан сўнг ўқувчилар китоблардан парчалар ўқишди, шеърлар ва қўшиқлар ижро этишди.
- Бугунги учрашув нафақат ўқувчиларда балки ўқитувчиларда ҳам катта таассурот қолдирди,- дейди мактаб директор ўринбосари И. Сайдираҳмонов.- Очиғини айтадиган бўлсам, мактабимизда ҳар куни бўлмаса-да кунора тадбир. Бир кун китобхонлик бўйича танлов бўлса, бир кун спорт мусобақаси, очиқ дарс, маънавият соатлари. Бу ўқувчиларимизнинг яхши таълим олиши билан бирга, янгича фикрлашида ҳам алоҳида мотивация бераяпти деб ўйлайман.

Ҳусниддин ХОЛДОРОВ.

@PAYARIQHAYOTI_UZ