#Мақола
#27_июнь
#Матбуот_ва_ОАВ_ходимлари_куни
УСТОЗЛАРГА ТАШАККУР!Инсоннинг ўсиб-улғайиши, камол топишида устоз-мураббийларнинг ўрни беқиёс. Яшаш учун сув ва ҳаво қанчалик керак бўлса, кишининг жамиятга нафи тегадиган бир шахс бўлиб етишишида УСТОЗ деб аталмиш улуғ зотнинг аҳамияти ҳам худди шу кабидир. Ҳозирда йигирма бир ёшдаман. Мактабни олтин медаль билан тамомлаб, биринчи йилиёқ талабалик бахтига мушарраф бўлдим. Бунгача бўлган давр мобайнида ҳам озми-кўпми бир қанча ютуқларни қўлга киритдим. Туманда, вилоятда ўтказилган бир қатор танловларда фаол иштирок этиб, муваффақиятларга эришдим. Мактабда ўқиб юрган кезларимда
«Ҳаётга чақириқ» номли шеърий тўпламим нашр этилди. Кўплаб босма ҳамда интернет нашрларида мақолаларим эълон қилинди.
Боқий Мирзо, Оташ Холмирзаев, Носиржон Деҳқонов, Исроилжон Юсупов, Дилбар Ҳайдарова, Шаҳноза Баёзова ҳамда бошқа
ижодкор-устозларим сабаб журналистикага қизиқишим ортди ва уларнинг беминнат кўмаги ила бу соҳа томон одимладим. Журналист касбини танлашимга Носиржон Деҳқонов сабаб бўлган десам, хато бўлмайди. Устозни бундан 3-4 йил аввал таниганман. Илк ёзган мақола, ҳикояларим газета юзини кўришида бу инсоннинг ҳиссаси кўп. Айниқса,
«Журналист бир жойда қандайдир муаммо кўрдими, бефарқ ўтиб кетишга хаққи йўқ. Масалан, кўчада ичимлик суви қувури бузилиб, ҳамма жойни тартибсиз ҳолга келтирган. Журналист бу ҳолатга кўз юмиб эмас, касби тақозоси билан ҳам мазкур масала ечимига эътибор қаратиши, сабабларини ўрганиши ҳамда мутасаддиларга хабар бериб, ҳолатни ижобий томонга ўзгартириши шарт. Бу иш унга қандайдир моддий манфаат келтирмаслиги мумкин, аммо халққа катта ёрдам. Ўз навбатида зиммасидаги вазифасини адо этган ҳисобланади. Агар жимгина ўтиб кетадиган бўлса, гарчанд бу соҳада салмоқли муваффақиятларга
эришган бўлсин, бари бесамар. Журналист халқ манфаатини ўз манфаатидан устун қўювчи жамиятнинг алоҳида бир қатламидир» – деган сўзлари ҳалигача қулоғим остида ҳозир айтилгандек жаранглайди.
— «Одамлар орасида «Танганинг икки томони бор» деган нақл бор. Аммо журналист танганинг учинчи томонини ҳам кўра билиши лозим. Масалага ойдинлик киритишда холис, шаффоф ва албатта, ҳаққоний йўндашиши шарт. Бу — унинг бурчи» - деган эди шоир, ёзувчи, ўткир қалам соҳиби Боқий Мирзо илк учрашувда. Устознинг ҳикматга бой тавсияси хотирамга муҳрланган.
Тақдир мени ўз касбига садоқатли, барчага яхшилик истайдиган, жонкуяр, оқкўнгил инсонлар билан топиш-
тирганидан бахтлиман. 27 июнь — Матбуот ва оммавий ахборот воситалари ходимлари куни муносабати билан шундай ютуқларга эришишимга, жамиятнинг бир аъзоси сифатида етишишимда меҳнати сингган устозларимга чексиз миннатдорлик билдираман.
Ойбек ЮСУПОВ,
Қорақалпоқ давлат университети журналистика факультети талабаси
«Наманган ҳақиқати» газетасининг 50(19773)-сони (2021 йил 26 июнь)
