Нурли йўл | Расмий канал 🌙

#Ҳадис_510

ШАЪБОН ЯРМИГА ЕТГАНДА, РЎЗА ТУТМАНГЛАР

عَنْ أَبِي هُرَيْرَةَ رَضِي اللهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: لَا تَقَدَّمُوا رَمَضَانَ بِصَوْمِ يَوْمٍ وَلَا يَوْمَيْنِ، إِلَّا رَجُلٌ كَانَ يَصُومُ صَوْمًا فَلْيَصُمْهُ. رَوَاهُ الْخَمْسَةُ. وَلِأَصْحَابِ السُّنَنِ: إِذَا انْتَصَفَ شَعْبَانُ فَلَا تَصُومُوا

Абу Ҳурайра розияллоҳу анҳудан ривоят қилинади:

📗 «Набий (ﷺ): «Рамазон олдидан бир-икки кун олдин рўза тутманглар. Магар бир киши бирор рўза тутиб юрган бўлса, ўшани тутсин», дедилар».

✍️ Бешовлари ривоят қилганлар.

«Сунан» эгаларининг ривоятида: «Шаъбон ярмига етганда, рўза тутманглар», дейилган.


📜 Шарҳ: Аҳли китоб бўлмиш кофир қавмлар ўзларига фарз қилинган рўзанинг қайси кун бошланишига шубҳа қилиб, бир-икки кун олдин тутишар, оқибатда нафл ибодат билан фарз ибодатни аралаштириб юборишар эди.
Исломда эса иккиланишга, нафл ва фарз¬ларни аралаштириб юборишга рухсат йўқ. Мусулмонлар ҳар бир ибодатни жазм билан, азму қарор билан нафлни нафл ўрнида, фарзни фарз ўрнида адо этишлари лозим.

Шунинг учун ҳам Пайғамбаримиз (ﷺ) Рамазон киришидан олдин бир-икки кун қолганда рўза тутишдан қайтарганлар.
Аммо бир одам маълум кунларда, мисол учун, душанба ва пайшанба кунларда нафл рўза тутиб юришга одатланган бўлса-ю, ўша кун Рамазондан олдинги кунларга тўғри келиб қолса, тутса бўлаверади.
Шунингдек, баъзи бир кишилар назр рўза ният қилиб қўйган бўлсалар-у, ўша назр рўзани тутишлари Рамазондан бир-икки кун олдинги кунларга тўғри келиб қолса, улар ҳам тутсалар бўлаверади.

Юқорида зикр этилган сабабларга ҳамда Пайғамбаримиз (ﷺ)нинг «Шаъбон ярмига етганда, рўза тутманглар», деган ҳадисларига биноан, Шаъбон ойининг ўн олтинчи кунидан бошлаб, то Рамазони шариф киргунча нафл рўза тутиш макруҳ бўлади.

📌 Ушбу тафсилотларни яхши тушунмаслик оқибатида Одамлар ичида Шаъбон ойида рўза тутиб бўлмас экан, деган тушунча юзага келган. Аслида эса гап Шаъбон ойининг иккинчи ярмида эканлигини билиб олдик.

📌 Қазоларни тутиш жоиз. Шунингдек одатда душанба ва пайшанба рўза тутаётганлар ҳам тутишлари мумкин

Шаъбон ойининг аввалида рўза тутиш масаласини эса келгуси ҳадисларни ўрганиш жараёнида билиб оламиз, иншааллоҳ.

Манба: “Ҳадис ва Ҳаёт” китобидан


📚 KУНЛИК ҲАДИС

АЖРАШМАГАНИ УЧУН ОНАГА ОҚ БЎЛИБ ҚОЛМАЙДИМИ?
#оила

❓CАВОЛ: Қайнонам эримга "хотининг билан ажрашмасанг қарғаб ўтаман, сени ҳам хотинингни ҳам" деяптилар. Эрим билан ажрашмоқчи эмасмиз. Айтингчи қайнонамни қарғишлари ўтадими, онасини айтганини қилмагани учун эрим онасига оқ бўлиб қолмайдими?

💬 ЖАВОБ: Бисмиллаҳир Роҳманир Роҳим.
Ота-онани розилигини олиш фарз, лекин ота-она ноҳақ талоққа буюрса, итоат қилмаса, гуноҳкор бўлмайди. Лекин бу ота-она ҳеч ким, дегани эмас. Ўз ўрнида келинлар ҳам қайнота-қайноналарни рози қилишга ҳаракат қилиш керак. Эри билан ота-онасини уриштириб қўйиб, ўзи уларни томоша қилиб ўтириши катта бузғунчиликдир! Чунки ўша қайнота-қайноналар севимли эрини дунёга келтирган, камолатга эриштирган ва эру хотинни ширин-шакар ҳаётига сабабчи бўлган, керак бўлса уйлантириб, уй-жой қилиб берган зотлардир. Ваҳоланки, уйлантириш ва уй жой қилиб бериш, ота-онага қатъий белгилаб қўйилган фарз эмас.

Эр-хотин ўйлаб кўришсин, нима иш қилишганки, онаизор қарғайман, дейишга мажбур бўлган. Ўша камчиликни тўғирлашсин, узр сўрашсин, уларга ширинсўз бўлишсин. Зеро Аллоҳ таоло Қуръони каримда айтади: "Раббингиз, Унинг Ўзигагина ибодат қилишингизни ҳамда ота-онага яхшилик қилишни амр этди. (Эй, инсон!) Агар уларнинг бири ёки ҳар иккиси ҳузурингда кексалик ёшига етсалар, уларга «уф!..» дема ва уларни жеркима! Уларга (доимо) ёқимли сўз айт!"
Аллоҳ таоло барчамизга тавфиқ берсин!

Ўзбекистон мусулмонлари идораси
Фатво ҳайъати (Fatvo uz).

•┈┈┈┈•❈••✾••❈•┈┈┈┈•
🔸 Ибодат Масалалари 🔸

فَصَبْرٌ جَمِيلٌ

Энди чиройли сабр (дан бошқа чорам йўқ). (Юсуф сураси, 18-оят).

Дўстим, сабр қилинг.
Қуръонингизни олингда, маҳкам тутинг.
Намозларни канда қилманг.
Дардлардан савоб умид қилинг.
Бу кунлар Раббимизнинг тақдири.
Бу дунё ўткинчи имтиҳондан бошқа нарса эмас.
Сўнги манзилга элтувчи кўприқ, холос.
Ишонинг, кунлар келиб, иншааллоҳ жаннатда дарахт остида гурунг қилиб ўтирамиз.
Дунёнинг бўлмағур ишларини эслаб кулиб ўтирамиз.

📿 Дўст томонга | @nurli_yol

Бошқаларни яхшиликка чақиришдаги шартлар

Амру маъруф (яхшиликка буюриш)да беш нарсага амал қилиш шарт:

📌 Биринчиси: Илмли бўлиш. Чунки илмсиз одам яхшиликка буюришни аъло даражада, маромига етказиб бажара олмайди;

📌 Иккинчиси: Холис Аллоҳнинг розилигини ва Унинг сўзини қарор топдиришни мақсад қилсин;

📌 Учинчиси: Буюрилаётган кишига шафқатли, мулойим бўлиш,  уни юмшоқлик ва меҳр- шафқат билан яхшиликка буюриш;

📌 Тўртинчиси: Сабрли ва ҳалим бўлиш (шошқалоқлик ва дағаллик қилмаслик).

📌 Бешинчиси: Ўзи буюраётган нарсага амал қилиш. Шунда у  Аллоҳ таолонинг «Нима учун ўзингиз қилмайдиган нарсани гапирасиз?» (Соф сураси, 2-ояти) оятига тушиб қолмайди.

Шунингдек, оддий  (илмсиз) одам қози, муфтий ва эл орасида машҳур бўлган олимга насиҳат қилиши дуруст эмас. Чунки бу одобсизлик бўлиб, баъзан, илмсиз одам билмай қолган ҳолда ўзига зарар етказиб қўйиши мумкин,

«Фатавои Оламгирия» (Фатавои Ҳиндийя) китобидан

Мадраҳимов Абдурашид, ҲИМ талабаси


📿 Дўст томонга | @nurli_yol

Ҳаётимдаги йўқотган нарсаларимнинг барчасини уларни йўқотиб қўйишдан қўрққаним учун йўқотдим.

📿 Дўст томонга | @nurli_yol

لَا يُكَلِّفُ اللَّهُ نَفْسًا إِلَّا وُسْعَهَا

Аллоҳ ҳеч бир жонни тоқатидан ташқари нарсага мажбурламас. (Бақара сураси, 286-оят).

Парвардигор бир шохга у кўтара олмайдиган мевани илмайди.
Гарданингга юклаган ҳар иш сенга мосдир.
Сени курашлар майдонига ташладими, демак, сен у майдонга муносибсан.
Қўриқлашинг керак бўлган ҳар бир чегара сенинг чегарангдир, уни лозим тут.
Ғам, ташвишлар етдими, демак, сен уларни кўтаришга қодирсан.
Қийинчилик ва мусибатлар сени қувватли қилади.
Шу боис ўз ўрнингни ташлаб кетма.

📿 Дўст томонга | @nurli_yol