QAYROQI GAPLAR

Dunyoning ishlari qiziq: kimningdir omadi chopsa, boshqa birining allergiyasi qo‘ziydi.

***
Hayot kurashlarida ko‘proq ko‘ngillilar jarohat oladi.

***
Zamonga munosib qadam tashlash uchun baquvvat oyoqlarning o‘zi kamlik qiladi – bosh ham kerak.

***
Gohida birgina boshliqni xotirjam qilish uchun butun jamoa bezovta bo‘lishiga to‘g‘ri keladi.

***
Bemor shifokor yozgan dorilar ro‘yxatini ko‘rib,  sergak tortdi, dorilarning narxini eshitib... dardini unutdi.

***
Shifobaxsh giyohlar, albatta, foyda qiladi: bemorga bo‘lmasa... boshqa kimgadir...

***
Lotereya o‘yinlaridan boyib ketish mumkin: o‘ynaganlar bo‘lmasa ham o‘ynatganlar.

Habib SIDDIQ.

Kim nimani tushundi?